Nasasabotan daw Nindo an Pagkamoot nin Dios?

ILINADAWAN kan tawong si Job kaidto an kamugtakan kan bakong sangkap na tawo sa mga tataramon na ini: “An tawo, na namundag sa babae, halipot an buhay asin pano nin kasakitan. Siring sa sarong burak sia nagluwas asin pinutol, asin sia minadulag na siring sa anino asin dai nagdadanay.” (Job 14:​1, 2) An buhay, arog kan naeeksperyensiahan kaidto ni Job, pano nin labi-labing kamondoan asin kapungawan. Namatean na daw nindo an siring kaiyan?

Minsan siring, sa ibong kan gabos na kadepisilan asin problema na tibaad inaatubang niato, igwa nin masarig an basehan na paglaom, saro na nakabasar sa pakikidamay asin pagkamoot nin Dios. Enot sa gabos, itinao kan satong maheherakon na langitnon na Ama an atang na pantubos tanganing balukaton an katawohan sa makasalan na kamugtakan. Oyon sa Juan 3:​16, 17, si Jesu-Cristo nagsabi: “An Dios namoot na gayo sa kinaban [nin katawohan] na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan. Huli ta an Dios nagsugo kan saiyang Aki [si Jesus] sa kinaban, bakong tanganing sia maghokom sa kinaban, kundi tanganing ikaligtas an kinaban paagi sa saiya.”

Estudyare man an maboot na aktitud nin Dios sa sato na bakong sangkap na mga tawo. Si apostol Pablo nagsabi: “Ginibo nia hale sa sarong tawo an gabos na nasyon kan mga tawo, tanganing mag-erok sa ibabaw kan bilog na daga, asin saiyang dineterminaran an itinalaan na mga panahon asin an mga kasagkodan kan erokan nin mga tawo, tanganing hanapon ninda an Dios, ta tibaad pa kapkapon sia ninda asin talagang makua sia ninda, minsan ngani, sa katunayan, sia bakong harayo sa lambang saro sa sato.” (Gibo 17:​26, 27) Isip-isipa iyan! Maski kita bakong sangkap na mga tawo, puede pa man giraray kitang magkaigwa nin personal na relasyon sa satong mamomoton na Kaglalang, si Jehova Dios.

Kun siring, may kompiansa niatong maaatubang an ngapit, sa pakaaram na an Dios nagmamakolog sa sato asin may pagkamoot na guminibo nin probisyon para sa satong nagdadanay na pakinabang. (1 Pedro 5:7; 2 Pedro 3:13) Kun siring, daing duwa-duwa na nasa sato an gabos na dahelan na makanood nin dugang pa manongod sa satong mamomoton na Dios paagi sa pag-adal kan saiyang Tataramon, an Biblia.