Hula ni Isaias—Liwanag Para sa Bilog na Katawohan I

Kasumpay kan Kapitulo Beinte-Singko: An Hade Asin an Saiyang mga Prinsipe

“An Daing Isip”

12. Sairisay an ‘mga daing isip’ ngonyan, asin sa anong paagi sinda bakong matinao?

¹² Sunod, ipinaheling kan hula ni Isaias an sarong pagkakalaen: “An daing isip dai na aapodon na matinao; asin kun manongod sa tawong daing prinsipyo, dai na sia sasabihon na kagalanggalang; huli ta an daing isip mismo magtataram sana nin pagkadaing isip.” (Isaias 32:​5, 6a) Siisay “an daing isip”? Garo baga sa pagdodoon, duwang beses na itinao ni Hadeng David an simbag: “An daing isip nagsabi sa saiyang puso: ‘Mayong Jehova.’ Sinda guminawe sa kapahapahamak na paagi, sinda guminawe nin makauuyam nin makuri sa saindang mga gibo. Mayo nin siisay man na naggigibo nin marahay.” (Salmo 14:1; 53:1) Siempre, an matagas na mga ateista nagsasabi na mayong Jehova. Garo man sana iyan man an sinasabi kan “mga intelektuwal” asin iba pa na minagawe na garo baga mayo nin Dios, na naniniwala na dai sinda maninimbag sa kiisay man. Mayo sa mga siring an katotoohan. An pagigin matinao mayo sa saindang puso. Mayo sinda nin ebanghelyo nin pagkamoot. Bakong arog kan tunay na mga Kristiano, sinda maluway sa pagtao sa mga nangangaipo na nasa kasakitan o biyong dai iyan ginigibo.

13, 14. (a) Paano naggigibo nin nakararaot an mga apostata sa presenteng aldaw? (b) Sa ano hinihingoang pogolan kan mga apostata an mga nagugutom asin napapaha, alagad ano an magigin ultimong resulta?

¹³ An dakol sa siring na mga daing isip naongis sa mga paradepensa kan katotoohan nin Dios. “An saiya mismong puso maggigibo kan nakararaot, tanganing gumibo nin apostasiya asin magtaram tumang ki Jehova nin palta-rason.” (Isaias 32:6b) Totoo nanggad ini sa mga apostata sa presenteng aldaw! Sa dakol na nasyon sa Europa asin Asia, an mga apostata nakialyansa sa ibang kalaban kan katotoohan, na nagtataram nin direktang mga kaputikan sa mga autoridad, sa katuyohan na iprohibir o ibawal an Mga Saksi ni Jehova. Nagpapaheling sinda kan espiritu kan “maraot na oripon,” na manongod sa sainda naghula si Jesus: “Kun an maraot na oripon na iyan magsabi sa saiyang puso, ‘Nag-aatraso an sakuyang kagurangnan,’ asin magpoon nang bugbogon an saiyang mga kapwa oripon asin magkakan patin mag-inom kaiba kan mga paraburat, an kagurangnan kan oripon na iyan madatong sa aldaw na dai nia linalaoman asin sa oras na dai nia aram, asin hahampakon sia nin makuri asin ibibilang sia sa mga parasaginsagin. Dian sia mananangis asin magraragot an saiyang mga ngipon.”​—Mateo 24:48-51.

¹⁴ Mientras tanto, pinangyayari kan mga apostata na “halean nin laog an kalag kan nagugutom, asin pinapangyayari nia pati an napapaha na dai makainom.” (Isaias 32:6c) Pinopogolan kan mga kaiwal kan katotoohan na umako nin espirituwal na kakanon an mga tawong gutom sa katotoohan, asin hinihingoa nindang olangon an mga napapaha na uminom kan nakarerepreskong tubig kan mensahe kan Kahadean. Alagad an magigin ultimong resulta iyo an sinabi ni Jehova sa saiyang banwaan paagi sa saro pa niang propeta: “Sierto na sinda makikilaban tumang sa saimo, alagad ta dai sinda manggagana sa saimo, huling ‘ako nasa saimo,’ an sabi ni Jehova, ‘tanganing iligtas ka.’”​—Jeremias 1:19; Isaias 54:17.

15. Ngonyan, sairisay partikularmente an “daing prinsipyo,” anong “putik na mga tataramon” an pinalakop ninda, asin ano an resulta?

¹⁵ Poon kan mga taon sa tanga kan ika-20 siglo, an inmoralidad hayag na naglakop nin marikas sa kadagaan kan Kakristianohan. Taano? Isinabi bago pa kan hula an sarong rason: “Kun manongod sa tawong daing prinsipyo, an saiyang mga kasangkapan maraot; sia mismo nagtao nin hatol sa mga gibo nin kalaswaan, tanganing ipahamak an mga nasasakitan paagi sa putik na mga tataramon, dawa pa kun an sarong dukha nagtataram kan tama.” (Isaias 32:7) Bilang kaotoban kan mga tataramon na ini, an dakol sa mga klero partikularmente nagkaigwa nin konsintidor na aktitud mapadapit sa pagdodorog bago an kasal, pagsasaro nin bakong kasal, homoseksuwalidad​—tunay nanggad, “pakikisaro asin gabos na klase nin karigsokan.” (Efeso 5:3) Sa siring, ‘ipinapahamak’ ninda an saindang mga aripompon paagi sa saindang putik na mga tataramon.

16. Ano an nakakapaogma sa tunay na mga Kristiano?

¹⁶ Sa kabaliktaran, kanigoan kanakarerepresko an kaotoban kan sunod na mga tataramon kan propeta! “Kun manongod sa matinao, para sa mga bagay na matinao na sia nagtao nin hatol; asin para sa mga bagay na matinao na sia matindog.” (Isaias 32:8) Inenkaminar ni Jesus mismo an pagigin matinao kan sabihon nia: “Magin matinao, asin an mga tawo magtatao  sa saindo. Iuula ninda sa saindong paa an marahay na takad, dusok, ginugo asin naglilipwas. Huli ta sa takadan na itinatakad nindo, iyan man sana an itatakad sa saindo.” (Lucas 6:38) Si apostol Pablo man nagtokdo sa mga bendisyon na napapasa mga matinao kan sabihon nia: “Dapat na isaisip nindo an mga tataramon kan Kagurangnan na si Jesus, kan sia mismo magsabi, ‘Igwang orog na kaogmahan sa pagtao kisa pag-ako.’” (Gibo 20:35) An tunay na mga Kristiano nagigin maogma, bakong huli sa pagkamit nin materyal na kayamanan o sosyal na pagkaprominente, kundi huli sa pagigin matinao​—kapareho kan saindang Dios, si Jehova, na matinao. (Mateo 5:​44, 45) An pinakadakulang kaogmahan ninda yaon sa paggibo kan kabotan nin Dios, sa matinaong paggamit kan saindang sadiri tanganing ipaaram sa iba an “mamuraway na maogmang bareta kan maogmang Dios.”​—1 Timoteo 1:11.

17. Sairisay sa ngonyan an siring sa “mga aking babae na kampante” na nasambitan ni Isaias?

¹⁷ An hula ni Isaias nagpapadagos: “Mga babaeng hayahay, pangagbuhat kamo, paghinanyog sa sakong tingog! Mga aking babae na kampante, dangoga nindo an sakong sinasabi! Sa laog nin sarong taon asin nagkapirang aldaw kamong mga kampante riribokon, huli ta an pagguno nin ubas matatapos na alagad mayo nin madatong na pagtitipon nin bunga. Pangagtakig kamo, mga babaeng hayahay! Pangagribok kamo, mga kampante!” (Isaias 32:9-11a) An aktitud kan mga babaeng ini tibaad magpagirumdom sa sato kan mga naghihingako ngonyan na naglilingkod sa Dios alagad bako man na maigot sa paglilingkod sa saiya. An mga siring manonompongan sa mga relihion kan “Dakulang Babilonya, an ina kan mga patotot.” (Kapahayagan 17:5) Halimbawa, an mga miembro kan mga relihion kan Kakristianohan kaparehong marhay kan paglaladawan ni Isaias sa “mga babaeng” ini. Sinda “hayahay,” daing pag-intindi mapadapit sa paghokom asin pagkariribok na madali nang makatahob sa sainda.

18. Siisay an sinabihan na “maghagkos nin telang sako sa mga habayan,” asin taano?

¹⁸ Dangan, an pangapodan ipinaabot sa falsong relihion: “Pangaghuba kamo asin magin kamong huba, asin maghagkos nin telang sako sa mga habayan. Tubtuba an saindong daghan sa pag-agrangay huli sa magagayon na kaomahan, huli sa mabungang ubasan. Sa daga kan sakuyang banwaan mga tonok sana, mga binit an matunga, huli ta iyan nasa gabos na harong nin labi-labing kagayagayahan, iyo, sa ogmahon na marhay na banwaan.” (Isaias 32:11b-13) An pananaram na “Pangaghuba kamo asin magin kamong huba” dai man nangangahulogan na paghale kan gabos na gubing. An suanoy na kostumbre iyo an pagsulot nin pan-ibabaw na gubing sa ibabaw nin pan-irarom na gubing. An pan-ibabaw na gubing sa parate ginagamit na midbidan. (2 Hade 10:​22, 23; Kapahayagan 7:​13, 14) Sa siring pinagbobotan kan hula an mga miembro kan falsong mga relihion na hubaon an saindang pan-ibabaw na gubing​—an saindang sagin-sagin na midbidan bilang mga lingkod nin Dios​—asin imbes magsulog nin mga gubing na telang sako, mga simbolo nin pagkaludok huli sa madali nang paghokom sa sainda. (Kapahayagan 17:16) Daing manonompongan na diosnon na pagkamabunga sa tahaw kan relihiosong mga organisasyon kan Kakristianohan, na naghihingako na “ogmahon na marhay na banwaan” nin Dios, o sa tahaw kan gabos na iba pang miembro kan pambilog na kinaban na imperyo nin falsong relihion. An saindang lugar kan aktibidad tinutuboan nin “mga tonok sana, mga binit” nin kapabayaan asin pag-abandonar.

19. Anong kamugtakan kan apostatang “Jerusalem” an ibinuyagyag ni Isaias?

¹⁹ An ladawan na ini nin kaduloman nakakaabot sa gabos na kabtang kan apostatang “Jerusalem”: “An torreng erokan mismo binarayaan, an mismong ribok kan siudad inabandonar; an Ofel asin an torrengbantayan mismo nagin mga kadlagan, na sa panahon na daing talaan iyo an labi-labing kagayagayahan nin mga sebra, an sabsaban nin mga pugro.” (Isaias 32:14) Iyo, kaiba pati an Ofel. An Ofel sarong halangkaw na kabtang nin Jerusalem na nagseserbing makosog na pandepensa. An pagsabing an Ofel nagin kadlagan tanda nin biyong pagkagaba para sa siudad. Ipinaheheling kan mga tataramon ni Isaias na an apostatang “Jerusalem”​—an Kakristianohan​—bakong mapagmangno sa paggibo kan kabotan nin Dios. Iyan daing laog sa espirituwal, biyong mayo nin katotoohan asin hustisya​—arog-hayop sa pinakagrabe.

Sarong Mamuraway na Kabaliktaran!

20. Ano an epekto kan espiritu nin Dios na ibinububo sa saiyang banwaan?

²⁰ Sunod, iinatubang ni Isaias an sarong nakaoogmang paglaom para sa mga naggigibo kan kabotan ni Jehova. An ano man na kagabaan kan banwaan mismo nin Dios magdadanay sana “sagkod na sa satuya an espiritu ibubo hale sa itaas, asin an kapatagan magin nang tatamnan, asin an tatamnan mismo ibilang na tunay na kadlagan.” (Isaias 32:15) Nakaoogma, poon kan 1919, ibinubo nin abunda an espiritu ni Jehova sa saiyang banwaan, na garo man sana ibinabalik sa dati an sarong namumungang tatamnan nin linahidan na mga Saksi, na susundan nin sarong naghihiwas na kadlagan nin ibang karnero. Prosperidad asin pag-oswag an lataw na marhay sa saiyang organisasyon digdi sa daga ngonyan. Sa ibinalik na espirituwal na paraiso, an “kamurawayan ni Jehova, [an] kagayonan kan satong Dios,” ipababanaag kan saiyang banwaan  mantang ibinabalangibog ninda sa bilog na kinaban an saiyang madatong na Kahadean.​—Isaias 35:​1, 2.

21. Saen manonompongan ngonyan an katanosan, katrangkilohan, asin katiwasayan?

²¹ Hinanyoga ngonyan an mamuraway na panuga ni Jehova: “Sa kaawagan siertong mag-eerok an hustisya, asin sa tatamnan mag-iistar mismo an katanosan. Asin an gibohon kan tunay na katanosan kaipuhan na magin katoninongan; asin an paglilingkod kan tunay na katanosan, katrangkilohan asin katiwasayan sagkod sa panahon na daing talaan.” (Isaias 32:​16, 17) Marahayon nanggad na ilinaladawan kaini an espirituwal na kamugtakan kan banwaan ni Jehova ngonyan! Bakong arog kan mayoriya nin katawohan, na nagkakabaranga huli sa pagkaongis, kadahasan, asin kaherakherak na espirituwal na kadukhaan, an tunay na mga Kristiano nagkakasararo sa bilog na globo, minsan ngani sinda “hale sa gabos na nasyon asin tribo asin banwaan patin tataramon.” Sinda namumuhay, naggigibo, asin naglilingkod kaoyon sa katanosan nin Dios, na ginigibo iyan na may kompiansa na makakamtan ninda, sa katapustapusi, an tunay na katoninongan asin katiwasayan sagkod sa panahon na daing talaan.​—Kapahayagan 7:​9, 17.

22. Ano an pagkakalaen kan kamugtakan kan banwaan nin Dios asin kan mga nasa falsong relihion?

²² Sa espirituwal na paraiso, an Isaias 32:18 naootob na. Iyan nagsasabi: “An sakuyang banwaan kaipuhan na mag-erok sa matoninong na erokan asin sa mga harong na may lubos na kompiansa patin sa trangkilong mga pahingaloan.” Alagad para sa palsipikadong mga Kristiano, “maoran nanggad nin graniso kun an kadlagan magkapurukan asin an siudad ibagsak.” (Isaias 32:19) Iyo, siring sa sarong maunos na bagyo nin graniso, an paghokom ni Jehova andam nang tumama sa palsipikadong siudad nin falsong relihion, na ibinababa an “kadlagan” nin mga parasuportar kaiyan, na rinaradas ini nin sararoan!

23. Anong lakop sa globong gibohon an madali nang matapos, asin sa ano mapapabilang an mga nakikikabtang dian?

²³ An kabtang na ini kan hula nagtatapos: “Maogma kamo na nagsasabwag nin banhi sa kataed nin gabos na tubig, na pinahihiro an mga bitis kan baka asin kan asno.” (Isaias 32:20) An baka asin asno mga hayop na pantrabaho na ginagamit kan suanoy na banwaan nin Dios sa pag-arado sa oma asin sa pagsabwag nin banhi. Ngonyan, an banwaan ni Jehova naggagamit nin mga kasangkapan sa pag-imprenta, elektronikong mga kasangkapan, modernong mga edipisyo asin transportasyon asin, orog sa gabos, sarong nagkakasararo, teokratikong organisasyon tanganing mag-imprenta asin magdistribwir nin binilyon na publikasyon sa Biblia. Ginagamit kan gikan sa boot na mga trabahador an mga instrumentong ini tanganing magsabwag nin mga banhi kan katotoohan kan Kahadean sa bilog na daga, sa literal na paagi “sa kataed nin gabos na tubig.” Minilyon na matatakton sa Dios na lalaki asin babae an naani na, asin kadakoldakol pa an minaiba sa sainda. (Kapahayagan 14:​15, 16) Tunay nanggad na sinda gabos ibibilang na “maogma”!

[Mga Hapot Para sa Pag-adal]