Lininig Bilang Sarong Banwaan Para sa Marahay na mga Gibo

“Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.”​—2 CORINTO 7:1.

1. Ano an hinahagad ni Jehova sa mga nagsasamba sa saiya?

 “SIISAY an matukad sa bukid ni Jehova, asin siisay an masakat sa saiyang banal na lugar?” Ibinangon ni Hadeng David kan suanoy na Israel an nakapupukaw nin isip na hapot na iyan mapadapit sa pagsamba na inaako ni Jehova. Dangan itinao nia an simbag: “An siisay man na inosente sa saiyang kamot asin malinig sa puso, na dai dinara an Sakuyang kalag sa daing kamanungdanan, ni nanumpa man nin mapandaya.” (Salmo 24:​3, 4) Tanganing akoon ni Jehova, an pinakapersonipikasyon nin kabanalan, an saro dapat na malinig asin banal. Bago kaiyan, pinagirumdom ni Jehova an kongregasyon nin Israel: “Dapat na santipikaron nindo an saindong sadiri asin dapat na magpakabanal kamo, huli ta ako banal.”​—Levitico 11:​44, 45; 19:2.

2. Paano idinoon ni Pablo asin Santiago an importansia kan kalinigan sa tunay na pagsamba?

² Pakalihis nin dakol na siglo, si apostol Pablo nagsurat sa mga kapwa Kristiano sa hababaon an moral na siudad nin Corinto: “Mantang igwa kita kan mga panugang ini, mga namomotan, magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” (2 Corinto 7:1) Idinodoon giraray kaini na tanganing magkaigwa nin relasyon sa Dios asin mag-ako kan ipinanuga niang mga bendisyon, an saro dapat na malinig asin mayo nin karamogan asin karatan sa pisikal asin espirituwal. Kaagid kaiyan, kan magsurat manongod sa pagsamba na inaako nin Dios, si disipulo Santiago nagsabi: “An klase nin pagsamba na malinig asin daing digta sa pagheling kan satong Dios asin Ama iyo ini: an pag-ataman sa mga ilo asin babaeng balo  sa saindang kasakitan, asin an pagpadanay sa sadiri na daing digta kan kinaban.”​—Santiago 1:27.

3. Tanganing akoon nin Dios an satong pagsamba, sa ano kita dapat na seryoso?

³ Huling an pagigin malinig, banal, asin daing ramog importanteng marhay sa tunay na pagsamba, an siisay man na nagmamawot na magkamit kan pag-oyon nin Dios maninigo na seryoso sa pag-abot sa kahagadan na ini. Minsan siring, dahelan sa magkalaenlaen na marhay an mga pamantayan asin ideya kan mga tawo ngonyan mapadapit sa kalinigan, dapat niatong masabotan asin sunodon an ibinibilang ni Jehova na malinig asin inaako. Kaipuhan niatong aramon kun ano an hinahagad nin Dios sa mga nagsasamba sa saiya sa bagay na ini asin kun ano an saiyang ginibo tanganing tabangan sinda na magin asin magdanay na malinig patin inaako nia.​—Salmo 119:9; Daniel 12:10.

Malinig Para sa Tunay na Pagsamba

4. Ipaliwanag an ideya nin kalinigan oyon sa Biblia.

⁴ Para sa kadaklan na tawo, an pagigin malinig nangangahulogan sana nin pagigin mayo nin ramog o ati. Minsan siring, sa Biblia an ideya nin pagigin malinig ipinaririsa nin dakol na termino sa Hebreo asin Griego na ilinaladawan an kalinigan bako sanang sa pisikal na sentido kundi mas parate sa moral asin espirituwal na sentido. Sa siring, an sarong ensiklopedya sa Biblia nagsasabi: “An ‘malinig’ asin ‘maati’ mga termino na bihirang konektado sa mga bagay na may labot sana sa pangangataman sa salud, kundi sa pangenot mga ideya na may labot sa relihion. Bilang siring, an prinsipyo nin ‘kalinigan’ nakakaapektar sa haros gabos na aspekto nin buhay.”

5. Sagkod saen dinirehiran kan Ley ni Moises an kalinigan sa buhay nin mga Israelita?

⁵ Sa katunayan, kaiba sa Ley ni Moises an mga susundon asin reglamento dapit sa haros lambang aspekto kan buhay kan mga Israelita, na espesipikong sinasabi kun ano an malinig saka inaako asin kun ano an bako. Halimbawa, sa Levitico kapitulo 11 sagkod 15, maheheling niato an detalyadong mga instruksion na may koneksion sa kalinigan asin pagkamaati. May nagkapirang hayop na maati, asin an mga Israelita dai dapat na kumakan kaiyan. An pangangaki nagpapagin maati sa sarong babae sa laog nin sarong espesipikong lawig nin panahon. An nagkapirang helang sa kublit, partikularmente an daot, asin an pagluwas nin kago sa mga lalaki asin pagregla nin mga babae magpapagin maati man sa saro. Isinabi man nin malinaw kan Ley kun ano an maninigo na gibohon sa mga situwasyon na may kalabot na pagkamaati. Halimbawa, sa Bilang 5:​2, mababasa niato: “Pagbotan mo an mga aki ni Israel na paluwason ninda sa kampo an gabos na daoton asin an gabos na inaawasan patin an gabos na maati dahel sa sarong kalag na nagadan.”

6. Sa anong katuyohan itinao an mga ley dapit sa kalinigan?

⁶ Daing duda, an mga ini asin an iba pang mga ley hale ki Jehova nagpabanaag nin medikal asin pisyolohikong mga ideya na adelantadong marhay kan panahon ninda, asin nakinabang an banwaan kun sinusunod ninda iyan. Pero, an mga ley na ini dai itinao bilang saro sanang susundon dapit sa kodigo sa salud o solamente tanganing magserbing giya sa pagbolong. Kabtang iyan kan tunay na pagsamba. An bagay na may labot iyan sa pan-aroaldaw na buhay nin mga tawo​—pagkakan, pangangaki, relasyon mag-agom, asin iba pa​—nagdodoon sana kan punto na bilang saindang Dios, si Jehova an may deretso na magdesisyon para sa sainda kun ano an tama asin kun ano an bakong tama sa gabos na aspekto kan saindang buhay, na eksklusibong idinusay ki Jehova.​—Deuteronomio 7:6; Salmo 135:4.

7. Paagi sa pag-otob sa Ley, anong bendisyon an aakoon kan nasyon nin Israel?

⁷ An tipan nin Ley nagprotehir man sa mga Israelita sa nakaaating mga gibo kan mga nasyon sa palibot ninda. Paagi sa fiel na pag-otob sa Ley, kabale an gabos na kahagadan para sa pagdadanay na malinig sa pagheling ni Jehova, an mga Israelita magigin angay na maglingkod sa saindang Dios asin mag-ako kan saiyang bendisyon. Mapadapit digdi, si Jehova nagsabi sa nasyon: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri hale sa gabos na ibang banwaan, huli ta sadiri ko an bilog na daga. Asin kamo mismo magigin kahadean nin mga saserdote asin banal na nasyon para sa sako.”​—Exodo 19:​5, 6; Deuteronomio 26:19.

8. Taano ta maninigong tawan nin atension kan mga Kristiano ngonyan an sinasabi sa Ley manongod sa kalinigan?

⁸ Huling iiniba ni Jehova sa Ley an mga detalyeng iyan tanganing tokdoan an mga Israelita kun paano magigin malinig, banal, asin inaako nia,  bako daw na angay para sa mga Kristiano ngonyan na pag-isipan nin maingat kun paano sinda nakakasunod sa bagay na ini? Minsan ngani an mga Kristiano bako nang sakop kan Ley, dapat nindang tandaan na, siring sa ipinaliwanag ni Pablo, an gabos na bagay na idtoon sa Ley “anino kan mga bagay na madatong, alagad an katunayan dian ki Cristo.” (Colosas 2:17; Hebreo 10:1) Kun an pagheling ni Jehova Dios, na nagsasabing “dai ako nagliwat,” sa pagigin malinig asin daing ramog importanteng marhay sa tunay na pagsamba kan panahon na idto, dapat na seryosohon niato ngonyan an pagigin malinig sa pisikal, moral, asin espirituwal kun boot niatong kamtan an saiyang pag-oyon asin bendisyon.​—Malaquias 3:6; Roma 15:4; 1 Corinto 10:​11, 31.

An Kalinigan sa Pisikal Nagrerekomendar sa Sato

9, 10. (a) Taano ta importante sa sarong Kristiano an kalinigan sa pisikal? (b) Ano an parateng ikinokomento manongod sa mga kombension kan Mga Saksi ni Jehova?

⁹ An kalinigan daw sa pisikal importanteng kabtang pa man giraray kan tunay na pagsamba? Minsan ngani bako sanang an kalinigan sa pisikal an minagibo sa saro na magin tunay na parasamba sa Dios, angay nanggad na an sarong tunay na parasamba magin malinig sa pisikal sagkod sa itinotogot kan saiyang mga kamugtakan. Nangorogna ngonyan, na an dakol na tawo daing gayo nag-iintindi sa pagpapadanay na malinig kan saindang sadiri, kan saindang gubing, o kan saindang palibot, an mga naggigibo kaiyan parateng naririsa kan mga tawo sa palibot ninda. Puede ining magbunga nin positibong mga resulta, siring kan sabi ni Pablo sa mga Kristiano sa Corinto: “Dai kami sa ano man na paagi nagtatao nin ano man na dahelan nin pagkasingkog, tanganing an samong ministeryo dai makuanan nin sala; kundi sa lambang paagi irinerekomendar niamo an samong sadiri bilang mga ministro nin Dios.”​—2 Corinto 6:​3, 4.

¹⁰ Paorootro, an Mga Saksi ni Jehova kinokomendaran kan mga opisyal sa publiko huli sa saindang malinig, areglado, asin magalang na gawe-gawe asin ugale, na naheheling partikularmente sa saindang darakulang kombension. Halimbawa, manongod sa sarong kombension na ginibo sa probinsia nin Savona, Italia, an peryodikong La Stampa nagkomento: “An tolos-tolos na maririsang marhay kun an saro nag-aagi sa mga pasilidad iyo an kalinigan asin pagkaareglado kan mga tawong naggagamit kaiyan.” Pakatapos nin sarong kombension kan mga Saksi sa sarong istadyum sa São Paulo, Brazil, an sarong opisyal sa istadyum nagsabi sa saiyang superbisor sa mga paralinig: “Poon ngonyan gusto niamo na linigon nindo an istadyum nin siring sa pagkalinig kan mga Saksi ni Jehova.” An saro pang opisyal sa istadyum man sanang iyan nagsabi: “Kun gusto kan mga Saksi ni Jehova na arkilahon an istadyum, sa petsa sana kami interesado. Mayo na kaming ibang problema.”

11, 12. (a) Anong prinsipyo sa Biblia an maninigo niatong tandaan kun dapit sa personal na kalinigan? (b) Ano an mga puedeng ihapot manongod sa satong personal na ugale asin pamumuhay?

¹¹ Kun an kalinigan asin pagkaareglado sa satong lugar nin pagsamba puedeng magbunga nin kaomawan sa Dios na satong sinasamba, tunay nanggad na siring man kaiyan kaimportante an pagpaheling kan mga kualidad na ini sa satong personal na buhay. Minsan siring, sa satong pribadong harong, tibaad magsaboot kita na igwa kita nin deretso na gibohon an ano man na gusto niato. Asin kun mapadapit sa paggubing asin pag-alinyar, siertong igwa kita nin katalingkasan na pilion kun ano an sa heling niato komportable asin magayon! Pero, sa kadaklan, ini gabos may limitasyon sana. Girumdoma na kan ipinaliliwanag an dapit sa pagpili nin saro sa saiyang kakakanon, pinapagmaan ni Pablo an saiyang mga kapwa Kristiano: “Pirme nindong bantayan na an autoridad nindong ini maski paano dai magin singkogan sa mga maluya.” Dangan sinabi nia an mahalagang prinsipyo: “An gabos makatanosan; alagad bakong gabos nakakarahay. An gabos makatanosan; alagad bakong gabos nakakaparigon.” (1 Corinto 8:9; 10:23) Paano minaaplikar sa sato an hatol ni Pablo kun manongod sa kalinigan?

¹² Rasonable sanang asahan kan mga tawo na an sarong ministro nin Dios malinig asin areglado sa saiyang pamumuhay. Kun siring, maninigo niatong seguradohon na an itsura kan satong harong asin an palibot kaiyan dai makapaluya sa paghingako niato, arin na baga, na kita mga ministro kan Tataramon nin Dios. Anong klaseng patotoo an itinatao kan satong harong manongod sa sato asin sa satong mga tinutubod? Nagpapaheling daw iyan na kita tunay na nagmamawot na mabuhay sa sarong  malinig asin aregladong bagong kinaban nin katanosan, na makosogon niatong irinerekomendar sa iba? (2 Pedro 3:13) Kaagid kaiyan, an satong personal na itsura​—baga man sa panahon nin paglibang o sa ministeryo​—puedeng magsalang makadagdag o makabawas sa gayon kan mensaheng ihinuhulit niato. Halimbawa, mangnoha an komentong ini nin sarong reporter sa peryodiko sa Mejico: “Totoo nanggad, an mga hoben dakulang kabtang kan mga miembro kan Mga Saksi ni Jehova, asin risang-risa an saindang bulog, kalinigan, asin angay na gubing.” Abaang kagayagayahan na makaibanan sa tahaw niato an siring na mga hoben!

13. Ano an puede tang gibohon tanganing masegurado na an gabos na aspekto kan satong pan-aroaldaw na buhay malinig asin areglado?

¹³ Siempre, an pagsegurado na an satong sadiri, an satong mga rogaring, asin an satong harong pirmeng malinig asin areglado mas madaling sabihon kisa gibohon. An kinakaipuhan, bakong kadakol na komplikado asin mamahalon na mga kasangkapan o gamit, kundi marahay na pagplano asin daing liwat-liwat na paghihingoa. Dapat na magtalaan nin panahon sa paglinig kan satong lawas, kan satong mga bado, kan satong harong, kan satong sasakyan, asin iba pa. An pagigin sibot sa ministeryo, pag-atender sa mga pagtiripon, asin personal na pag-adal​—apuera sa pag-asikaso sa iba pang mga obligasyon sa pan-aroaldaw na buhay​—dai nagpapalibre sa sato sa pangangaipong magdanay na malinig asin inaako sa pagheling nin Dios asin nin mga tawo. An pamilyar na prinsipyo na “para sa gabos na bagay igwa nin itinalaan na panahon” aplikado man na gayo sa kabtang na ini kan satong buhay.​—Eclesiastes 3:1.

Sarong Puso na Daing Ramog

14. Taano ta masasabi na an kalinigan sa moral asin espirituwal orog pa nganing importante kisa kalinigan sa pisikal?

¹⁴ Kun paanong importante na tawan nin atension an kalinigan sa pisikal, orog pa nganing importante na atenderan an kalinigan sa moral asin espirituwal. Ini an magigin konklusyon niato paagi sa paggirumdom na an nasyon nin Israel isinikwal ni Jehova, bakong huli ta sinda maati sa pisikal, kundi huli ta sinda nagin maraot sa moral asin espirituwal. Paagi ki propeta Isaias, sinabi sa sainda ni Jehova na dahelan sa saindang pagigin sarong “nasyon na makasalan, banwaan na nagagabatan sa sala,” an saindang mga atang, an saindang pagselebrar kan bagong bulan asin sabbath, iyo, maski ngani an saindang mga pamibi nagin pagabat sa saiya. Ano an maninigo nindang gibohon tanganing kamtan liwat an pabor nin Dios?  Si Jehova nagsabi: “Pangaghugas kamo; pangaglinig kamo; halea nindo an karatan kan saindong mga gibo sa atubangan kan sakuyang mga mata; umontok na kamo sa paggibo nin maraot.”​—Isaias 1:​4, 11-16.

15, 16. Ano an sinabi ni Jesus na nakapararamog sa tawo, asin paano kita makikinabang sa sinabi ni Jesus?

¹⁵ Tanganing masabotan nin orog an importansia kan kalinigan sa moral asin espirituwal, horophoropa an sinabi ni Jesus kan iinsistir kan mga Fariseo asin eskriba na an saiyang mga disipulo maati huli ta dai sinda naghugas nin kamot bago magkakan. Itinanos iyan ni Jesus paagi sa pagsabi: “Bakong an minalaog sa saiyang ngoso an nakapararamog sa tawo; kundi an minaluwas sa saiyang ngoso an nakapararamog sa tawo.” Dangan ipinaliwanag ni Jesus: “An mga bagay na minaluwas sa ngoso gikan sa puso, asin an mga iyan an nakapararamog sa tawo. Halimbawa, gikan sa puso minaluwas an maraot na mga pangangatanosan, mga paggadan, mga pagsambay, mga pakikisaro, mga paghabon, putik na mga patotoo, mga paglanghad. Ini an mga bagay na nakapararamog sa tawo; alagad an pagkakan na dai naghugas nin kamot dai nakapararamog sa tawo.”​—Mateo 15:​11, 18-20.

¹⁶ Ano an manonodan niato sa mga tataramon ni Jesus? Idinodoon ni Jesus na an maraot, inmoral, asin maating mga tendensia sa puso sinusundan nin maraot, inmoral, asin maating mga gibo. Siring sa pagkasabi kaiyan ni disipulo Santiago, “an lambang saro nababalo paagi sa pagkabutong asin pagkaakit sa saiya kan saiyang sadiring kamawotan.” (Santiago 1:​14, 15) Sa siring, kun habo niatong maholog sa magabat na mga kasalan na sinabi ni Jesus, dapat niatong haleon sa satong puso an ano man na tendensia sa siring na mga bagay. Nangangahulogan iyan na dapat kitang mag-ingat sa kun ano an satong binabasa, dinadalan, asin pinagdadangog. Ngonyan, para sana sa daing olang na pagtaram asin artistikong katalingkasan, an industriya nin aling-alingan asin mga anunsio daing katapusan sa pagpaluwas nin kadakol na tanog asin ladawan na nagpapanigo sa mga paghimuyawot kan makasalan na laman. Maninigo kitang magin desidido na dai pagtogotan na makagamot sa satong puso an ano man na siring na mga ideya. An pangenot na nagdedeterminar na bagay iyo na tanganing masonoan asin akoon nin Dios, dapat na dayaday kitang magin mapagbantay tanganing mapagdanay an malinig asin daing ramog na puso.​—Talinhaga 4:23.

Lininig Para sa Marahay na mga Gibo

17. Taano ta dinara ni Jehova an saiyang banwaan sa sarong malinig na kamugtakan?

¹⁷ Tunay nanggad na sarong bendisyon asin proteksion na, sa tabang ni Jehova, puede kitang magkaigwa nin malinig na kamugtakan sa atubangan nia. (2 Corinto 6:14-18) Pero, nasasabotan man niato na dinara ni Jehova an saiyang banwaan sa sarong malinig na kamugtakan para sa sarong espesipikong katuyohan. Sinabi ni Pablo ki Tito na “itinao [ni Cristo Jesus] an saiyang sadiri para sa sato tanganing ikaligtas nia kita sa gabos na klase nin katampalasanan asin makalinig para sa saiya man sana nin sarong banwaan na magigin saiyang sadiri, maigot sa marahay na mga gibo.” (Tito 2:14) Bilang sarong lininig na banwaan, sa anong mga gibo kita maninigo na magin maigot?

18. Paano niato ikapaheheling na kita maigot sa marahay na mga gibo?

 ¹⁸ Enot sa gabos, maninigo kitang magmaigot sa pagpahayag sa publiko kan maogmang bareta kan Kahadean nin Dios. (Mateo 24:14) Sa paggibo kaiyan, iinoopresir niato sa mga tawo sa gabos na lugar an paglaom na mabuhay sagkod lamang sa sarong daga na mawawaran na nin ano man na klase nin polusyon. (2 Pedro 3:13) Kabale man sa satong marahay na mga gibo an pagpaheling kan mga bunga kan espiritu nin Dios sa satong pangaroaldaw na buhay, na sa siring pinamumuraway an satong langitnon na Ama. (Galacia 5:​22, 23; 1 Pedro 2:12) Asin dai niato linilingawan an mga mayo sa katotoohan na tibaad nadanyaran na marhay nin natural na mga kalamidad o mga trahedya nin tawo. Ginigirumdom niato an sadol ni Pablo: “Tunay nanggad, kun siring, mantang igwa kita nin marahayrahay na panahon para kaiyan, gumibo kita kan marahay sa gabos, alagad orog na sa mga may relasyon sa sato sa pagtubod.” (Galacia 6:10) An gabos na paglilingkod na siring kaiyan, na ginigibo gikan sa malinig na puso asin may dalisay na motibo, nakapaoogmang marhay sa Dios.​—1 Timoteo 1:5.

19. Anong mga bendisyon an naghahalat sa sato kun padagos niatong papagdadanayon an sarong halangkaw na pamantayan nin kalinigan​—sa pisikal, moral, asin espirituwal?

¹⁹ Bilang mga lingkod kan Kaharohalangkawe, isinasapuso niato an mga tataramon ni Pablo: “Ako nakikimaherak sa saindo huli sa mga pagkamadinamayon nin Dios, mga tugang, na idolot nindo an saindong hawak na siring sa buhay na atang, banal, inaako nin Dios, sarong sagradong paglilingkod na igwa kan saindong kakayahan na mangatanosan.” (Roma 12:1) Logod na padagos niatong pahalagahan an pribilehio nin pagigin lininig ni Jehova asin gibohon an satong pinakamakakaya na papagdanayon an sarong halangkaw na pamantayan nin kalinigan sa pisikal, moral, asin espirituwal. An paggibo kaiyan magtatao sa sato bako sanang nin paggalang sa sadiri asin pagkakontento ngonyan kundi siring man kan paglaom na maheling na lumihis na “an enot na mga bagay”​—an presenteng maraot asin maramog na sistema​—kun ‘gibohon na nin Dios na bago an gabos na bagay.’​—Kapahayagan 21:​4, 5.

Nagigirumdoman daw Nindo?

• Taano ta tinawan nin dakol na ley manongod sa kalinigan an mga Israelita?

• Paano nakadadagdag sa gayon kan mensaheng ihinuhulit niato an kalinigan sa pisikal?

• Taano ta orog pa nganing importante kisa kalinigan sa pisikal an kalinigan sa moral asin espirituwal?

• Paano niato ikapaheheling na kita sarong banwaan na “maigot sa marahay na mga gibo”?

[Mga Hapot Para sa Pag-adal]

[Mga ritrato sa pahina 21]

An kalinigan sa pisikal nakadadagdag sa gayon kan mensaheng ihinuhulit niato

[Ritrato sa pahina 22]

Nagpatanid si Jesus na an maraot na mga kaisipan minaresulta sa maraot na mga gibo

[Mga ritrato sa pahina 23]

Bilang lininig na banwaan, an Mga Saksi ni Jehova maigot sa marahay na mga gibo