Mga Hapot Hale sa mga Parabasa

Kaipuhan daw na biyong iladop sa tubig an sarong tawo na gustong magpabautismo alagad may grabeng diperensia o maluyang marhay an salud, kaya magigin depisil an pagladop?

An terminong “pagbautismo” hale sa Griegong berbo na baʹpto, na nangangahulogan “ibuntog.” (Juan 13:26) Sa Biblia, an “bautismohan” kapareho kan “iladop.” May labot sa ginibong pagbautismo ni Felipe sa kapon na Etiope, an The Emphasised Bible, ni Rotherham, nagsasabi: “Pareho sindang naglugsad sa tubig, si Felipe sagkod an kapon,​​—asin ilinadop nia sia.” (Gibo 8:38) Sa siring, an tawong binabautismohan talagang ibinubuntog sa tubig.​—Mateo 3:16; Marcos 1:10.

Sinabihan ni Jesus an saiyang mga disipulo: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda.” (Mateo 28:​19, 20) Huli kaiyan, iinaareglo kan Mga Saksi ni Jehova an mga pagbautismo sa mga pool, danaw, salog, o iba pang lugar na igwa nin igong tubig para sa biyong pagladop. Mantang an bautismo paagi sa biyong pagladop sarong kahagadan na sono sa Kasuratan, an mga tawo mayong autoridad na ipuera sa bautismo an siisay man. Sa siring, an saro maninigong bautismohan dawa kun kaipuhan na gibohon an pambihirang mga paagi huli sa saiyang kamugtakan. Halimbawa, an mga pagbautismo sa darakulang banyadera nakatabang sa mga halangkaw na an edad o sa mga espesyalmenteng maluya an salud. An tubig sa banyadera puedeng pahimbongon, an kandidato sa bautismo puedeng kalmado asin luway-luway na ibugtak sa tubig asin, oras na makaadaptar na sa temperatura kaiyan, puede nang gibohon an aktuwal na pagbautismo.

Dawa an mga tawo na may grabeng diperensia binautismohan. Halimbawa, ilinadop an mga indibiduwal na naoperaran sa trachea asin, bilang resulta, igwa nin permanenteng labot sa halonan, o an mga nangangaipong gumamit nin mechanical respirator. Siempre, para sa gabos na arog kaiyan na pagbautismo kaipuhan an maingat na preparasyon. Magigin madonong na may presenteng sinanay na nars o doktor kun igwa. Minsan siring, kun ginigibo an espesyal na pag-asikaso o pag-iingat, sa haros gabos na kamugtakan, puedeng isagibo an mga pagbautismo. Kun siring, maninigong gibohon an gabos na rasonableng paghihingoa na bautismohan sa tubig an saro kun ini an sinserong pagmawot kan indibiduwal asin kun gusto niang akoon an imbueltong mga peligro.