“Uminirarom Sinda”

“Tinahoban sinda kan nag-uulakbong mga tubig; uminirarom sinda sa mga kairaroman siring sa gapo.”

PAAGI sa mga tataramon na iyan, sinelebrar ni Moises asin kan mga Israelita sa awit an saindang pagkaligtas sa Dagat na Pula asin an pagkapara kan naglalapag na mga kaiwal nindang Egipcio​​—si Faraon asin an saiyang mga puersa militar.​—Exodo 15:​4, 5.

Para sa siisay man na nakakaheling mismo kan siring na pambihirang pangyayari, an leksion dai mamamaluan. Mayo nin siisay man na makapanggaganang angaton o labanan an autoridad ni Jehova asin mabuhay. Minsan siring, pakalihis nin pirang bulan sana, hayag na inangat kan prominenteng mga Israelita​—si Core, Datan, Abiram, asin 250 parasuportar​​—an autoridad na itinao nin Dios ki Moises asin Aaron.​—Bilang 16:1-3.

Sa instruksion ni Jehova, pinatanidan ni Moises an mga Israelita na rumayo sa mga tolda kan mga rebelde. Si Datan asin Abiram, kataed an mga miembro kan saindang pamilya, palaban na nanindogan. Dangan isinabi ni Moises na sa sadiri Niang paagi, lilinawon ni Jehova sa banwaan na an mga tawong ini “dai nagpaheling nin paggalang ki Jehova.” Sa puntong iyan, binuka ni Jehova an daga na tinotongtongan ninda. “Kaya uminirarom sindang buhay sa Sheol, asin an gabos na sadiri ninda, asin tinambonan sinda kan daga.” Kumusta si Core asin an iba pang mga rebelde? “Luminuwas an kalayo hale ki Jehova asin tinumtom an duwang gatos may limang polong lalaki na nagdodolot kan insenso.”​—Bilang 16:23-35; 26:10.

Si Faraon asin an saiyang mga hukbo, saka an mga rebelde sa kaawagan, nalaglag gabos huli ta dai ninda rinekonoser an autoridad ni Jehova asin an saiyang interes sa mga aktibidad kan saiyang banwaan. Importante, kun siring, na an gabos na makaheheling kan pagprotehir ni Jehova sa delikadong mga aldaw na ini mag-adal manongod asin kumuyog ki Jehova bilang an “Kaharohalangkawe” asin “Makakamhan sa Gabos na Saro.” Sa paggibo kaiyan, puede nindang isapuso an nakapakokosog liwat sa boot na mga tataramon ni Jehova: “Magkakapurukan sa mismong kataed mo an sangribo asin sampulong ribo sa too mo; sa saimo dai iyan marani. Sa saimo sanang mata na ika maheling asin magmamasid sa pagbalos sa mga maraot. Huli ta ika nagsabi: ‘Si Jehova an sakong pailihan,’ ginibo mo an Kaharohalangkawe mismo na mani saimong erokan.”​—Salmo 91:​1, 7-9.