“Ika Ekselenteng Babae”

An mga tataramon na ini nin pag-omaw sinabi sa sarong hoben na Moabita. Sia an balo na an ngaran Rut, an manugang na babae nin sarong babaeng Israelita, si Noemi. Nag-istar sa Israel kaidtong mga 3000 na taon na an nakaagi, kan namamahala an mga hukom, si Rut nagkaigwa nin ngaran huli sa pagigin ekselente. (Rut 3:11) Paano daw nia nakamtan an reputasyon na ini? Siisay an puedeng makinabang sa halimbawa nia?

Dai nagkakakan “kan tinapay nin kahugakan,” si Rut nagtrabaho nin halawig na mga oras asin may kahigosan bilang paraarahit sa oma, na huli sa siring na kahigosan kaya sia kinomendaran. Dawa kan alokon na pagianon an saiyang trabaho, sia padagos na nagpagal, na ginigibo iyan nin labi pa sa linalaoman sa saiya. Lataw na marhay na sia angay sa paglaladawan kan Biblia manongod sa sarong kaomaw-omaw, may kakayahan, mahigos na agom na babae.​​—Talinhaga 31:10-​31; Rut 2:​7, 15-​17.

An espirituwal na mga kualidad ni Rut​​—an saiyang mapakumbaba, mapagsakripisyong espiritu asin an saiyang maimbod na pagkamoot​​—an mayor na nakakontribwir sa halangkaw na pagheling sa saiya kan publiko. Binayaan an saiyang mga magurang asin an tinuboan niang nasyon, na may kadikit na paglaom na makakua kan seguridad na puedeng itao nin pag-agom, sia nagdanay na kaibanan ni Noemi. Kadungan kaiyan, ipinahayag ni Rut an pagmawot na maglingkod ki Jehova, an Dios kan saiyang panugangan na babae. Sa pagdoon kan saiyang halaga, an pagkasaysay sa Kasuratan nagsasabi na sia “mas marahay [para ki Noemi] kisa pitong aking lalaki.”​​—Rut 1:​16, 17; 2:​11, 12; 4:15.

Minsan ngani kaomaw-omaw an rekord nin pagigin ekselente ni Rut sa tahaw kan saiyang mga kaibaibang tawo, an orog na mahalaga iyo an positibong balwasyon nin Dios kan saiyang mga kualidad asin an pagbalos nia ki Rut kan pribilehio na magin apoon na babae ni Jesu-Cristo. (Mateo 1:5; 1 Pedro 3:4) Kanigoan karahay na halimbawa si Rut bako sanang para sa mga Kristiana kundi para sa gabos na naghihingakong nagsasamba ki Jehova!