Madali Nang Matapos an mga Problema nin Katawohan!

AN GIBONG humanitaryo limitado sana an halaga kun bako iyan na kabtang nin sarong mas mahiwas na estratehiya asin mayo nin politikal na suporta na an obheto resolberan an pinakadahelan nin iriwal. Paorootrong ipinaheling nin eksperyensia na an gibong humanitaryo sana dai makakaresolber sa mga problema na sa pundamental huli sa politika.”​​—The State of the World’s Refugees 2000.

Sa ibong nin dakulang gibong humanitaryo, an mga problema nin katawohan dai napopondo sa pagdakol. Ano an posibilidad para sa nagdadanay na politikal na solusyon? An totoo, saditon an posibilidad. Alagad saen pa kita puedeng umasa? Sa sarong makahulogan na teksto sa kapinonan kan saiyang surat sa mga Kristiano sa Efeso, ipinaliliwanag ni apostol Pablo kun paano tataposon nin Dios an gabos na problema nin katawohan. Isinabi ngani nia kun anong ahensia an gagamiton nin Dios sa paggibo kaini​​—sarong ahensia na tatawan nin atension an pinakadahelan kan gabos na problema na nandadamat sa sato ngonyan. Taano ta dai estudyaran an sasabihon ni Pablo? Makukua an teksto sa Efeso 1:3-10.

“Tiponon Giraray an Gabos Dian ki Cristo”

An katuyohan nin Dios, an sabi kan apostol, iyo an para sa inaapod niang “sarong administrasyon [o pagmanehar sa mga bagay-bagay] sa katapusan kan itinalaan na mga panahon.” Ano an kahulogan kaini? Nangangahulogan iyan na an Dios nagtalaan nin panahon na sia mahiro sa sarong paagi tanganing “tiponon giraray an gabos dian ki Cristo, an mga bagay sa kalangitan asin an mga bagay sa daga.” (Efeso 1:10) Iyo, pinonan nin Dios an sarong areglo na an gabos na bagay sa langit asin sa daga ibalik sa pagkaoroyon sa irarom kan saiyang direktang pagkontrol. Interesante nanggad, mapadapit sa termino na trinadusir digdi na “tiponon giraray,” an nag-espesyalisar sa Biblia na si J. H. Thayer nagsabi: “Tiponon giraray para sa saiya . . . an gabos na bagay asin persona (na sagkod ngonyan dai nagkakasararo huli sa kasalan) sa pinagsarong kamugtakan nin pakikiiba ki Cristo.”

Itinotokdo kaiyan an pangangaipo na gibohon ini nin Dios huli sa paglataw kan dai pagkasararo kan enot. Sa kapinonan kan kasaysayan nin tawo, an enot niatong mga magurang, si Adan asin  Eva, nagsunod ki Satanas na Diablo sa pagrebelde sa Dios. Gusto nindang magin independiente paagi sa pagkaigwa ninda nin deretsong magdesisyon para sa saindang sadiri kun ano an tama asin kun ano an sala. (Genesis 3:1-5) Kaoyon kan hustisya nin Dios, hinale sinda sa pamilya nin Dios asin nawara ninda an saindang pakikiiba sa saiya. Ihinolog ninda an katawohan sa pagkabakong sangkap kaiba an gabos na grabeng resulta na naeeksperyensiahan niato ngonyan.​—Roma 5:12.

Temporaryong Pagtogot sa Karatan

‘Taano ta itinogot nin Dios na gibohon ninda iyan?’ tibaad ihapot nin nagkapira. ‘Taano ta dai na sana nia ginamit an saiyang supremong kapangyarihan asin ipinaotob an saiyang kabotan, sa siring naebitaran an gabos na kakologan asin pagdusa na naeeksperyensiahan niato ngonyan?’ Tibaad natural na magsaboot nin arog kaiyan. Alagad ano daw talaga an patutunayan kan paggamit kan arog kaiyan kadakulang kapangyarihan? Hinahangaan o inooyonan daw nindo an siisay man na sa enot pa sanang senyal nin pagkontra talagang pinopoho na an gabos na pagtumang huli ta sia igwa nin kapangyarihan na gibohon iyan? Seguradong dai.

Dai man talaga inangat kan mga rebeldeng iyan an makakamhan sa gabos na kapangyarihan nin Dios. Mas partikularmente nindang inangat an legal na deretso asin pagigin tama kan saiyang paagi nin pamamahala. Tanganing resolberan nin sararoan sana an prinsipal na isyung ibinangon, tinogotan ni Jehova an saiyang mga linalang na pamahalaan an saindang sadiri na mayo an saiyang direktang pagkontrol sa sarong limitadong panahon. (Eclesiastes 3:1; Lucas 21:24) Kun matapos na an panahon na iyan, sia mainterbenir na tanganing kapotan giraray an lubos na kontrol sa daga. Sa panahon na iyan magigin malinaw na marhay na an saiyang paagi nin pamamahala iyo an solamenteng paagi na naggagarantiya nin nagdadanay na katoninongan, kaogmahan, asin abundansia para sa mga nag-iistar sa daga. Dangan an gabos na nan-aapi sa kinaban hahaleon sagkod lamang.​—Salmo 72:12-14; Daniel 2:44.

“Bago Pa an Pagtugdas kan Kinaban”

Katuyohan ni Jehova na gibohon an gabos na ini kan suanoy pang panahon. Sinasabi ni Pablo na “bago pa an pagtugdas kan kinaban.” (Efeso 1:4) Bako iyan na bago kan paglalang kan daga o paglalang ki Adan asin Eva. An kinaban na iyan “marahayon,” asin mayo pa an pagrebelde. (Genesis 1:31) Kun siring, anong “kinaban” an boot sabihon ni Pablo? An kinaban kan mga aki ni Adan asin Eva​​—sarong makasalan, bakong sangkap na kinaban nin katawohan na may esperansang balukaton. Bago pa mamundag an siisay man na aki, aram na ni Jehova kun paano nia aasikasohon an mga bagay-bagay tanganing tawan nin pakaginhawa an mababalukat na mga gikan ni Adan.​—Roma 8:20.

Siempre, bako ining pagsuherir na aasikasohon kan Soberano kan uniberso an mga bagay na arog kan paagi nin mga tawo. Rinerekonoser na tibaad lumataw an sarong emerhensia, nagpaplano sinda nin manlaenlaen na detalyadong estratehiya tanganing asikasohon iyan. Dai, iinaatubang sana kan makakamhan sa gabos na Dios an saiyang katuyohan asin ginigibo iyan. Pero, ipinaliliwanag nanggad ni Pablo kun paano dinesisyonan ni Jehova na husayon an mga bagay tanganing magtao nin permanenteng pakaginhawa sa katawohan. Ano an mga aksion na idto na ginibo?

Siisay an Matao nin Pakaginhawa?

Ipinaliliwanag ni Pablo na an linahidan nin espiritung mga disipulo ni Cristo igwa nin espesyal na kabtang sa paghale sa danyos na resulta kan Adanikong kasalan. “Pinili . . kita [ni Jehova] na kaiba [ni Cristo],” an sabi ni Pablo, tanganing mamahala kaiba ni Jesus sa saiyang langitnon na Kahadean. Ipinaliliwanag ini nin dugang pa, sinasabi ni Pablo na “itinalaga . . kita [ni Jehova] sa pagpaniakia paagi ki Jesu-Cristo bilang mga aki nia.” (Efeso 1:​4, 5) Siempre, dai sinda pinili, o itinalaga ni Jehova, bilang mga indibiduwal. Minsan siring, talagang itinalaga nia an sarong grupo nin fiel asin debotong mga tawo na makikikabtang ki Cristo sa paghale sa danyos na dinara ni Satanas na Diablo, kaiba ni Adan asin Eva, sa pamilya nin tawo.​—Lucas 12:32; Hebreo 2:14-18.

Abaa kamakangangalas! Sa enot niang pag-angat sa soberaniya nin Dios, ipinasentido ni Satanas na an tawong linalang nin Dios may depekto​​—na kun igong gigipiton o eenganyaron, gabos sinda marebelde sa pamamahala nin Dios. (Job 1:7-12; 2:2-5) Sa sarong pambihirang pagpaheling kan “saiyang mamuraway na dai na kutana  maninigong kabootan,” ipinaheling ni Jehova Dios pag-abot nin panahon an saiyang kompiansa sa saiyang daganon na linalang paagi sa pag-ampon sa nagkapira na hale sa makasalan na pamilya ni Adan tanganing magin espirituwal na mga aki nia. An mga kabilang sa sadit na grupong ini kukuanon tanganing maglingkod sa langit. Sa anong katuyohan?​—Efeso 1:3-6; Juan 14:​2, 3; 1 Tesalonica 4:15-17; 1 Pedro 1:​3, 4.

An inampon na mga aki na ini nin Dios, an sabi ni apostol Pablo, nagin “kaibang mga paramana ni Cristo” sa saiyang langitnon na Kahadean. (Roma 8:14-17) Bilang mga hade asin saserdote, magkakaigwa sinda nin kabtang sa pagpatalingkas sa pamilya nin tawo hale sa kakologan asin pagdusa na naeeksperyensiahan kaiyan ngonyan. (Kapahayagan 5:10) Totoo, “an gabos na linalang padagos na nag-aaragrangay nin iriba asin nagtitios nin kolog nin iriba sagkod ngonyan.” Pero, dai na mahahaloy an espesyalmenteng piniling mga aki na ini nin Dios masunod ki Jesu-Cristo sa paggibo nin aksion, asin sa giraray an gabos na makinuyog na tawo “patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.”​—Roma 8:18-22.

“Pagkabutas Paagi sa Pantubos”

An gabos na ini pinagin posible paagi sa masasabing pinakapambihira asin pinakadakulang kapahayagan kan dai na kutana maninigong kabootan nin Dios para sa kinaban na ini nin mababalukat na katawohan​​—an atang na pantubos ni Jesu-Cristo. Isinurat ni Pablo: “Huli [ki Jesu-Cristo] igwa kita kan pagkabutas paagi sa pantubos huli sa dugo kan sarong iyan, iyo, kan kapatawadan sa satong mga kalapasan, sono sa mga kayamanan kan saiyang dai na kutana maninigong kabootan.”​—Efeso 1:7.

Si Jesu-Cristo an pangenot na personahe sa pagkaotob kan katuyohan nin Dios. (Hebreo 2:10) An saiyang atang na pantubos nagtatao nin legal na basehan sa pag-ampon ni Jehova sa nagkapirang gikan ni Adan na mapabilang sa saiyang langitnon na pamilya asin tanganing palibrehon an katawohan sa mga epekto kan Adanikong kasalan, na dai pinaluluya an kompiansa sa Saiyang mga ley asin prinsipyo. (Mateo 20:28; 1 Timoteo 2:6) Ginibo ni Jehova an mga bagay sa paagi na sinusuportaran an saiyang katanosan asin nakakaabot sa mga kahagadan nin sangkap na hustisya.​—Roma 3:22-26.

An “Sagradong Hilom” nin Dios

Sa laog nin rinibong taon, dai eksaktong ihinayag nin Dios kun paano nia isasagibo an saiyang katuyohan para sa daga. Kan enot na siglo C.E., “ipinaaram nia sa [mga Kristiano] an sagradong hilom kan saiyang kabotan.” (Efeso 1:9) Malinaw na nasabotan ni Pablo asin kan kapwa nia linahidan na mga Kristiano an kahangahangang kabtang na itinao ki Jesu-Cristo sa pagkaotob kan katuyohan nin Dios. Nagpoon man nindang masabotan an saindang espesyal na kabtang bilang kaibang mga paramana ni Cristo sa saiyang langitnon na Kahadean. (Efeso 3:​5, 6, 8-11) Iyo, an gobyernong Kahadean sa kamot ni Jesu-Cristo asin kan kairiba niang namamahala an ahensia na gagamiton nin Dios sa pagdara nin nagdadanay na katoninongan bako sanang sa kalangitan kundi patin sa daga. (Mateo 6:​9, 10) Paagi kaiyan, ibabalik ni Jehova sa dati an dagang ini sa kamugtakan na sa kapoonpooni iyo an katuyohan nia para kaiyan.​—Isaias 45:18; 65:21-23; Gibo 3:21.

An itinalaan niang panahon para sa direktang aksion sa paghale kan gabos na pan-aapi asin inhustisya sa daga mangyayari sa harani nang ngapit. Alagad sa katunayan pinonan na ni Jehova an proseso nin pagbabalik sa dati kaidtong Pentecostes 33 C.E. Paano? Paagi sa pagpopoon nin pagtipon kaidto sa “mga bagay sa kalangitan,” an mga mamamahala kaiba ni Cristo sa kalangitan. Kaiba digdi an mga Kristianong taga Efeso. (Efeso  2:4-7) Mas bago pa sana, sa satong kapanahonan, tinitipon na ni Jehova an “mga bagay sa daga.” (Efeso 1:10) Paagi sa lakop sa globong kampanya nin paghuhulit, ipinaaaram nia sa gabos na nasyon an maogmang bareta manongod sa saiyang gobyernong Kahadean sa kamot ni Jesu-Cristo. An mga naghihimate tinitiripon na dawa ngonyan sa sarong lugar nin espirituwal na proteksion asin pagpapaomay. (Juan 10:16) Dai na mahahaloy, sa sarong lininig na paraisong daga, maeeksperyensiahan ninda an lubos na katalingkasan sa gabos na inhustisya asin pagdusa.​—2 Pedro 3:13; Kapahayagan 11:18.

“Dakol na kahangahangang pag-oswag” an nagibo na sa mga paghihingoang humanitaryo tanganing tabangan an inaaping katawohan. (The State of the World’s Children 2000) Pero, an pinakakahangahangang aksion iyo an madali nang pag-interbenir ni Cristo Jesus asin kan saiyang kairibang namamahala sa langitnon na gobyernong Kahadean. Biyo nindang reresolberan an gabos na pinakadahelan nin iriwal asin an gabos na iba pang karatan na minapurisaw sa sato. Tataposon ninda an gabos na problema nin katawohan.​—Kapahayagan 21:1-4.

[Mga ritrato sa pahina 4]

An mga gibong humanitaryo dai nakaresolber sa mga problema nin katawohan

[Ritrato sa pahina 6]

An atang na pantubos ni Cristo nagtao sa katawohan nin pakaginhawa sa Adanikong kasalan

[Ritrato sa pahina 7]

Posibleng manompongan an espirituwal na proteksion asin pagpapaomay ngonyan

[Mga ritrato sa pahina 7]

Dai na mahahaloy, paagi sa Mesiyanikong Kahadean, maabot an lubos na pakaginhawa sa mga problema