Panahon na Ihayag an Kompidensial na Bagay

An pagpapadanay na kompidensial kan nagkapirang bagay puedeng mangahulogan kan pagkakalaen nin katoninongan asin pasuruhay. Alagad may panahon daw na ihayag an kompidensial na bagay? Mangnoha an sinasabi ni propeta Amos manongod sa saiyang Dios: “[Si] Jehova dai magibo nin ano man sagkod na dai pa nia ikinapahahayag an saiyang kompidensial na bagay sa saiyang mga lingkod na propeta.” (Amos 3:7) Sa mga tataramon na ini, may manonodan kita may labot sa pagigin kompidensial. Tibaad papagdanayon ni Jehova na kompidensial an nagkapirang bagay sa laog nin sarong lawig nin panahon asin sa kahurihurihi ihayag iyan sa nagkapirang indibiduwal. Paano daw niato maaarog si Jehova sa bagay na ini?

Kun beses, nanonompongan nin nombradong mga pastor sa Kristianong kongregasyon na kapakipakinabang na papagdanayon na dai ihayag an sarong bagay. (Gibo 20:28) Halimbawa, huling nasa isip an kapakinabangan kan kongregasyon, tibaad magdesisyon sindang papagdanayon na kompidensial an mga detalye nin nagkapirang areglo o pagbabago sa mga paninimbagan sa kongregasyon sagkod sa sarong espesipikong panahon.

Minsan siring, sa kamugtakan na iyan, importante na liwanagon sa mga kalabot kun, noarin, asin sa anong paagi ihahayag an bagay na iyan. An pakaaram kun noarin ihahayag sa publiko an sarong bagay puedeng makatabang sainda na mapagdanay an pagigin kompidensial.​​—Talinhaga 25:9.