Internasyonal na mga Kombension sa 2003

KAN Sabado, Oktubre 6, 2001, ginibo an taonan na miting kan mga miembro kan Watch Tower Bible and Tract Society of Pennsylvania sa Jersey City, New Jersey, E.U.A. Pagkatapos kan miting na iyan, sarong espesyal na programa an inatenderan kan mga miembro asin kan saindang mga bisita. Kan sumunod na aldaw, sa suplementaryong mga miting na ginibo sa apat na siudad sa Canada asin Estados Unidos, itinao kan mga miembro kan Namamahalang Grupo kan Mga Saksi ni Jehova an minasunod na paisi pagkatapos kan saindang pantapos na pahayag:

“Mantang tinatanaw niato an ngapit, importanteng marhay na an bilog na banwaan nin Dios dai pagpabayaan an saindang pagtorotiripon. Nagsadol si apostol Pablo na ini, kaiba an pagparinigonan nin boot, gibohon lalo na ta naheheling na niato na harani na an dakula asin makangingirhat na aldaw ni Jehova. (Hebreo 10:​24, 25) Kaoyon kan pagboot na ini na sono sa Kasuratan, naglalaom kita na magkaigwa nin pandistritong mga kombension sa gabos na parte kan kinaban sa masunod na taon [2002]. Dangan, sa taon 2003, kun bobooton ni Jehova, tibaad posibleng magkaigwa nin espesyal na internasyonal na mga kombension sa nagkapirang rehion kan kinaban. Ngonyan na an panahon na magpuka asin magdanay na mapagbantay, na minamansayan an mga pangyayari sa situwasyon sa kinaban.”

Sa ibong kan nag-oorog na kadaihan nin kasegurohan asin tension mantang an presenteng sistemang ini nagrarani na sa katapusan kaiyan, an aktibidad kan banwaan nin Dios kaipuhan na umabante. An maogmang bareta kan Kahadean, kaiba an nagpapatanid na mensahe kan Biblia, kaipuhan na ipahayag sa lambang nasyon, tribo, tataramon, asin banwaan, na inaapodan sinda na ‘matakot sa Dios asin pamurawayon sia huli ta nagrarani nang marhay an oras kan saiyang paghokom.’ (Kapahayagan 14:​6, 7) Kun siring, oyon sa kabotan asin marahay na kawilihan kan satong langitnon na Ama, pinaplano na magkaigwa nin internasyonal na mga kombension sa manlaenlaen na rehion kan kinaban para sa taon 2003.

Primero, an mga pagtiripon na iyan tentatibong iiniskedyul para sa pira sanang siudad sa Amerika del Norte asin dai mahaloy pakatapos kaiyan sa Europa. Pagtaodtaod sa 2003, isasagibo an mga areglo para sa mga grupo nin mga delegado na mabiahe sa pira sanang siudad sa Asia; asin sa pagtatapos kan taon, an dugang pang mga grupo mapasiring sa Aprika, Amerika del Sur, asin sa lugar nin Pasipiko. Hahagadon sa nagkapirang sangang opisina na magpadara nin limitadong kabilangan nin mga delegado sa espesipikong mga lugar kan kombension, kaya bakong posible na an gabos matawan nin imbitasyon na umatender. Minsan siring, nakaparirigon sa boot na magkaigwa nin limitadong mga delegado na magrerepresentar sa laen-laen na nasyon sa lambang lugar.

Dai na mahahaloy an mga kongregasyon kan Mga Saksi ni Jehova makareresibi nin impormasyon may labot sa mga pagtiripon na ini. An impormasyon manongod sa eksaktong mga petsa asin espesipikong mga siudad na maatenderan kan imbitadong mga delegado itatao kan kanya-kanya nindang sangang opisina. Huli kaini, hinahagad na dai kamo magsurat o magpadara nin mga hapot manongod digdi sa panahon na ini.

An mga mapipili pag-abot nin panahon bilang mga delegado limitado sana sa nagdusay asin bautisadong mga Saksi na magigin marahay na mga halimbawa asin mapaheling nin sa magturugang na kapadangatan sa mga tugang sa lokal. An mga ini man magkakaigwa nin marahayon na mga oportunidad na ipaabot sa mga bisita an mamomoton na pag-ako asin tunay na pag-istimar. (Hebreo 13:​1, 2) Maresulta ini sa “pagriribayan nin pagparigon sa boot.” (Roma 1:​11, 12) An dugang pang mga detalye mapadapit sa mga areglong ini itatao kan mga sangang opisina na inimbitaran na magpadara nin mga delegado sa sarong partikular na nasyon o mga nasyon.

Iaareglo an tolong aldaw na pandistritong mga kombension para sa taon 2003 sa kadaklan na nasyon siring sa dati. Paagi sa pagtorotiripon, an gabos magkakaigwa nin oportunidad na ‘maghinanyog, makanood, asin maparigon an boot.’ (Deuteronomio 31:12; 1 Corinto 14:31) Ini matao nin oportunidad sa gabos sa banwaan nin Dios na ‘manamitan asin maheling na si Jehova marahay.’ (Salmo 34:8) Sa gabos na internasyonal na kombension, saka sa dakol na pandistritong kombension, an mga misyonero magigin presente, na an nagkapira itatampok sa programa.

Durante kan taon na ini, aatenderan niato an “Maigot na mga Parabalangibog kan Kahadean” na Pandistritong mga Kombension, na mapahiro sa sato na magtao nin orog na patotoo. Mantang ginigibo niato ini, seguradong maorog an satong pag-antisipar sa itinatagama ni Jehova para sa maabot na taon. Matabang ini sa sato na ‘magdanay na mapagbantay, magdanay na puka, asin magin andam’ huli sa delikado asin importanteng mga panahon na ini.​—Mateo 24:42-44.