Hula ni Isaias—Liwanag Para sa Bilog na Katawohan I

Kapitulo Biente-Otso: Ibinalik na Paraiso!

Isaias 35:1-10

1. Taano an dakol na relihion ta nag-aalok nin paglaom na buhay sa sarong paraiso?

 “AN PAGHIMUYAWOT sa paraiso kabilang sa mapuersang mga paghimuyawot na garo baga pabalikbalik sa isip nin mga tawo. Iyan tibaad an pinakamapuersa asin pinakadai nahahale sa gabos. An paghidaw sa paraiso maheheling sa gabos na kabtang nin relihiosong pamumuhay.” Iyan an sabi kan The Encyclopedia of Religion. Natural sana an siring na paghimuyawot, huling sinasabi sa sato kan Biblia na an buhay nin tawo nagpoon sa Paraiso​—sarong magayon na tatamnan na mayo nin helang asin kagadanan. (Genesis 2:8-15) Bakong makangangalas na an dakol sa mga relihion sa kinaban nag-aalok nin paglaom na buhay sa ngapit sa sarong paraiso ano man na klase iyan.

2. Saen niato manonompongan an tunay na paglaom na Paraiso sa ngapit?

² Sa dakol na kabtang kan Biblia, mababasa niato an sarong tunay na paglaom na Paraiso sa ngapit. (Isaias 51:3) Halimbawa, an kabtang kan hula ni Isaias na nakarekord sa kapitulo 35 naglaladawan sa pagkaliwat nin mga rehion nin kaawagan na nagin garo hardin na mga parke asin mabungang kaomahan. An mga buta nakakaheling na, an pula nakakataram na, asin an bungog nakakadangog na. Sa ipinanugang Paraiso na ini, mayo nin kamondoan o pag-agagha, na nagpapasentido na pati ngani kagadanan mayo na. Abaa kamakangangalas na panuga! Paano maninigong saboton an mga tataramon na ini? Nagtatao daw iyan nin paglaom sa sato ngonyan? An pag-estudyar sa kapitulong ini kan Isaias matao nin mga simbag sa mga hapot na ini.

Naggagayagaya an Sarong Gabang Daga

3. Segun sa hula ni Isaias, anong pagkaliwat an mangyayari sa daga?

³ An ipinasabong na hula ni Isaias manongod sa ibinalik na Paraiso nagpopoon sa mga tataramon na ini: “An kaawagan asin an alang na lugar magpapakagayagaya, saka an desierto maggagayagaya asin mamumurak arog kan azafran. Daing duwa-duwa na iyan mamumurak, asin iyan nanggad magigin magayagaya na may kagayagayahan asin may maogmang kurahaw. An kamurawayan nin Libano mismo itatao dian, an kagayonan nin Carmelo asin nin Saron. Igwa nin mga makaheheling kan kamurawayan ni Jehova, kan kagayonan kan satong Dios.”​—Isaias 35:​1, 2.

4. Kasuarin asin paano nagin siring sa sarong kaawagan an dagang tinuboan kan mga Judio?

⁴ Isinurat ni Isaias an mga tataramon na ini kaidtong mga taon 732 B.C.E. Pakalihis nin mga 125 taon, linaglag kan mga Babilonyo an Jerusalem asin an banwaan kan Juda idinistiero. An saindang daga pinabayaan na daing nag-iistar, gaba. (2 Hade 25:8-11, 21-26) Sa paaging ini naotob an patanid ni Jehova na ididistiero an banwaan nin Israel kun sinda magigin bakong fiel. (Deuteronomio 28:​15, 36, 37; 1 Hade 9:6-8) Kan an Hebreong nasyon nagin bihag sa ibang daga, an saindang mga oma asin tatamnan na may bastanteng patubig napabayaan sa laog nin 70 taon asin nagin siring sa sarong kaawagan.​—Isaias 64:10; Jeremias 4:23-27; 9:10-12.

5. (a) Paano ibinalik sa daga an garo paraisong mga kamugtakan? (b) Sa anong sentido na an banwaan ‘nakaheheling kan kamurawayan ni Jehova’?

⁵ Minsan siring, isinabi bago pa kan hula ni Isaias na an daga dai magdadanay na gaba sagkod lamang. Iyan ibabalik sa pagigin talagang paraiso. “An kamurawayan nin Libano” asin “an kagayonan nin Carmelo asin nin Saron” itatao dian. a Paano? Pagbalik ninda hale sa pagkadistiero, nakultibar asin napatubigan  liwat kan mga Judio an saindang mga oma, asin an saindang daga nakabalik sa pagigin mabungang marhay na arog kan dati. Sa bagay na ini, an kredito para sana ki Jehova. Huli sana sa saiyang kabotan saka sa saiyang pagsuportar asin bendisyon kaya nakamtan kan mga Judio an siring na garo paraisong mga kamugtakan. Naheheling kan banwaan an “kamurawayan ni Jehova, [an] kagayonan kan [saindang] Dios” kun rinerekonoser ninda an kamot ni Jehova sa makangangalas na pagkaliwat kan saindang daga.

6. Anong importanteng kaotoban kan mga tataramon ni Isaias an naheling?

⁶ Minsan siring, sa ibinalik sa dati na daga nin Israel, may mas importanteng kaotoban an mga tataramon ni Isaias. Sa espirituwal na sentido, an kamugtakan kan Israel nagin alang, garo desierto sa laog nin dakol na taon. Mantang an mga desterrado nasa Babilonya, an dalisay na pagsamba nalimitaran na marhay. Mayo nin templo, mayo nin altar, asin mayo nin organisadong grupo nin mga saserdote. Suspendido an pan-aroaldaw na mga atang. Ngonyan, ihinuhula ni Isaias an sarong pagkabaliktad nin mga kamugtakan. Sa pamomoon kan mga lalaki na siring ki Zorobabel, Esdras, asin Nehemias, an mga representante hale sa enterong 12 tribo nin Israel nagbalik sa Jerusalem, itinogdok liwat an templo, asin talingkas na nagsamba ki Jehova. (Esdras 2:​1, 2) Tunay nanggad na ini sarong espirituwal na paraiso!

Malaad sa Espiritu

7, 8. Taano ta kaipuhan kan desterradong mga Judio an positibong aktitud, asin paano nagtatao nin pamparigon sa boot an mga tataramon ni Isaias?

⁷ An mga tataramon kan Isaias kapitulo 35 may tanog nin kagayagayahan. An propeta nagbabalangibog nin sarong maogmang ngapit para sa nagsosolsol na nasyon. Tunay nanggad, sia nagtataram na may kombiksion asin optimismo. Pakalihis nin duwang siglo, sa kapinonan kan saindang pagbabalik, kaipuhan kan desterradong mga Judio an iyo man sanang kombiksion asin optimismo. Paagi ki Isaias, sinda sinadol ni Jehova sa makahulang paagi: “Pakosoga nindo an maluyang mga kamot, kamo banwaan, asin paposoga nindo an nagkokobogkobog na mga tuhod. Sabihi nindo an may naghahadit na puso: ‘Magpakakosog kamo. Dai kamo matakot. Uya! An saindong Dios maabot na may pamalos, an Dios na may pagbalos. Sia mismo maabot asin ililigtas kamo.’”​—Isaias 35:​3, 4.

⁸ An katapusan kan halawig na pagkadistiero panahon para sa paghiro. Si Hadeng Ciro nin Persia, an instrumento ni Jehova sa pamamalos tumang sa Babilonya, nagdeklarar na ibabalik sa Jerusalem an pagsamba ki Jehova. (2 Cronica 36:​22, 23) Rinibong Hebreong pamilya an kaipuhan na organisaron tanganing gibohon an peligrosong pagbaklay hale sa Babilonya pasiring sa Jerusalem. Pag-abot ninda duman, kakaipuhanon nindang magtogdok nin igong mga pasilidad na maiistaran asin mag-andam para sa dakulaon na gibohon na pagtogdok liwat kan templo asin kan siudad. Para sa nagkapirang Judio sa Babilonya, ini gabos tibaad garo baga nakapanluluya sa boot. Minsan siring, bako ining panahon na manluya o mahandal. Kaipuhan kan mga Judio na magpakinorosogkosogan asin manarig ki Jehova. Inaasegurar nia sinda na sinda ililigtas.

9. Anong marahayon na panuga an iinaalok sa nagpuling mga Judio?

⁹ An mga binutasan sa pagkabihag sa Babilonya magkakaigwa nin marahay na dahelan na maggayagaya, huli ta sarong marahayon na ngapit an naghahalat sa sainda pagpuli ninda sa Jerusalem. Ihinuhula ni Isaias: “Sa panahon na iyan an mga mata kan mga buta magkakaburuklat, asin an mismong mga talinga kan mga bungog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.”​—Isaias 35:​5, 6a.

10, 11. Para sa nagpuling mga Judio, taano ta seguradong may espirituwal na kahulogan an mga tataramon ni Isaias, asin ano an ipinasesentido kan mga iyan?

¹⁰ Malinaw na nasa isip ni Jehova an espirituwal na kamugtakan kan saiyang banwaan. Sinda pinadusahan nin 70 taon na pagkadistiero huli sa saindang apostasiya bago kaidto. Pero, sa pagtao kan saiyang disiplina, dai pinadusahan ni Jehova an saiyang banwaan nin pagkabuta, pagkabungog, pagkapilay, asin pagkapula. Huli kaini, an pagbalik sa dati kan nasyon nin Israel dai nangangaipo nin pagpaomay nin pisikal na mga diperensia. Ibinabalik ni Jehova an nawara, arin na baga, an espirituwal na salud.

¹¹ An nagsosolsol na mga Judio pinaomayan sa bagay na nakabalik an saindang espirituwal na mga sentido​—an saindang espirituwal na pakaheling asin an saindang abilidad na madangog, kuyogon, asin sabihon an tataramon ni Jehova. Namansayan ninda an saindang pangangaipo na magdanay na dayupot ki Jehova. Paagi sa saindang marahay na paggawe,  sinda ‘nagkukurahaw’ sa magayagayang pag-omaw sa saindang Dios. An dating “pilay” nagigin galaga asin mabagsik sa saiyang pagsamba ki Jehova. Sa piguratibong pagtaram, sia “matukad na garo lalaking usa.”

Pinarerepresko ni Jehova an Saiyang Banwaan

12. Sagkod saen bebendisyonan ni Jehova nin tubig an daga?

¹² Depisil imahinaron an sarong paraiso na mayong tubig. An orihinal na Paraiso sa Eden igwa nin abundang tubig. (Genesis 2:10-14) An daga na itinao sa Israel saro man na “daga nin mga kababan kan sapang masulog, nin kaburabodan asin kararoman na nagluluwas.” (Deuteronomio 8:7) Tamang-tama, kun siring, itinatao ni Isaias an nakarerepreskong panuga na ini: “An katubigan maburakbusak sa kaawagan, asin an mga sapang masulog sa desierto. Asin an alang na daga magigin siring sa danaw na may mga gaho, asin an pahang daga siring sa mga burabod nin tubig. Sa erokan nin mga layas na ayam, na pahingaloan ninda, magkakaigwa nin berdeng doot na may mga gaho asin papiro.” (Isaias 35:6b, 7) Kun asikasohon na liwat kan mga Israelita an daga, an gabang mga lugar na dian dating naglalagawlagaw an mga layas na ayam matatakopan nin berde, marambong na mga pananom. An alang asin maalpog na daga magigin “matubig na lugar” na puedeng tuboan nin mga papiro asin iba pang mga tambo na nabubuhay sa tubig.​—Job 8:11.

13. Anong abundang espirituwal na tubig an makukua kan ibinalik na nasyon?

¹³ Pero an mas mahalaga iyo an espirituwal na tubig nin katotoohan, na makakamtan nin abunda kan mga Judio na pinapuli sa sadiring daga. Si Jehova matao nin kaaraman, pamparigon sa boot, asin karangahan paagi sa saiyang Tataramon. Dugang pa, an fiel na kamagurangan na lalaki asin mga prinsipe magigin “siring sa mga sapa nin tubig sa sarong desierto.” (Isaias 32:​1, 2) An mga nagsusuportar sa dalisay na pagsamba, na siring baga ki Esdras, Haggeo, Jesua, Nehemias, Zacarias, Zorobabel, magigin nanggad nabubuhay na patotoo kan kaotoban kan hula ni Isaias.​—Esdras 5:​1, 2; 7:​6, 10; Nehemias 12:47.

An “Dalan nin Kabanalan”

14. Iladawan an pagbaklay sa pag-oltanan nin Babilonya asin Jerusalem.

¹⁴ Minsan siring, bago makamtan kan desterradong mga Judio an siring na pisikal asin espirituwal na paraisong mga kamugtakan, kakaipuhanon nindang gibohon an halawig asin peligrosong pagbaklay hale sa Babilonya pasiring sa Jerusalem. An pag-agi sa direktang ruta mangangahulogan nin pagbalyo sa mga 800 kilometros na mara, dai makasusustentong daga. An bakong gayong masakit na ruta mangangaipo nin pagbaklay nin 1,600 kilometros. An arin man sa duwang pagbaklay mangangahulogan nin dakol na bulan na pagkabalad sa kamugtakan kan panahon asin pamemeligrong makaengkuentro nin mabangis na mga hayop sagkod nin garo hayop na mga tawo. Pero, an mga nagtutubod sa hula ni Isaias dai naghahadit nin labi-labi. Taano?

15, 16. (a) Anong proteksion an itinatao ni Jehova sa fiel na mga Judio sa pagbaklay ninda papuli? (b) Sa anong iba pang sentido na si Jehova nagtatao nin daing peligrong tinampo para sa mga Judio?

¹⁵ Paagi ki Isaias, si Jehova nanunuga: “Magkakaigwa nanggad dian nin tinampo, nin sarong dalan; asin aapodon iyan na Dalan nin Kabanalan. Dai maagi dian an marigsok. Asin iyan magigin para sa naglalakaw sa dalan, asin mayo nin mga mangmang na maglalakawlakaw dian. Dai dian magkakaigwa nin leon, asin an naninibang mabangis na mga hayop dai matukad dian. Mayo nin manonompongan dian; asin an mga tinubos maglalakaw dian.” (Isaias 35:​8, 9) Kinalda ni Jehova an saiyang banwaan! Sinda an saiyang “mga tinubos,” asin ginarantiyahan nia sinda nin proteksion sa saindang pagpuli. Igwa daw nin literal na pinatag, ilinangkaw, asin kinudalan na tinampo hale sa Babilonya pasiring sa Jerusalem? Mayo, kundi an proteksion ni Jehova sa saiyang banwaan sa saindang pagbaklay seguradong marhay kaya garo man sana sinda nasa siring na tinampo.​—Ikomparar an Salmo 91:1-16.

¹⁶ An mga Judio protehido man sa espirituwal na mga peligro. An piguratibong tinampo iyo an “Dalan nin Kabanalan.” An mga daing galang sa sagradong mga bagay o mga maati sa espirituwal dai kualipikadong umagi dian. Dai sinda kaipuhan sa dagang ibinalik sa dati. An mga aprobado igwa nin tamang motibasyon. Dai sinda minabalik sa Juda asin Jerusalem na may espiritu nin nasyonal na pag-orgolyo o huli sa pag-aaabot sa personal na mga interes. An mga Judio na espirituwal an kaisipan biyong nakaaaram na an prinsipal na dahelan kan saindang pagbalik iyo na tanganing establisaron liwat an dalisay na pagsamba ki Jehova sa dagang iyan.​—Esdras 1:1-3.

 Naggagayagaya an Banwaan ni Jehova

17. Paano an hula ni Isaias nakaranga sa fiel na mga Judio durante kan saindang halawig na pagkadistiero?

¹⁷ An kapitulo 35 kan hula ni Isaias nagtatapos sa magayagayang tataramon: “An mismong mga binalukat ni Jehova mabalik asin sierto nanggad na maduman sa Sion na may magayagayang kurahaw; asin an paggayagaya sagkod sa panahon na daing talaan mamumugtak sa saindang payo. Maaabot ninda an labi-labing kagayagayahan asin paggayagaya, asin madulag an kamondoan asin pag-agagha.” (Isaias 35:10) An bihag na mga Judio na nag-asa sa hulang ini para sa karangahan asin paglaom durante kan saindang pagkadistiero tibaad nag-isip-isip kun paano maootob an manlaenlaen na detalye kaiyan. Posibleng marhay na dai ninda nasabotan an dakol na aspekto kan hula. Pero, nagin arog kalinaw sa kristal na sinda “mabalik asin sierto nanggad na maduman sa Sion.”

18. Sa anong paagi na an kamondoan asin pag-agagha sa Babilonya nasalidahan nin labi-labing kagayagayahan asin paggayagaya sa dagang ibinalik sa dati?

¹⁸ Huli kaini, kan taon 537 B.C.E., mga 50,000 na lalaki (kabale an labing 7,000 na oripon) kaiba an mga babae asin aki nagbaklay nin apat na bulan pabalik sa Jerusalem, na may bilog na kompiansa ki Jehova. (Esdras 2:​64, 65) Pakalihis sana nin pirang bulan, itinogdok liwat an altar ni Jehova bilang preliminaryong lakdang sa bilog na pagtogdok liwat kan templo. Naotob an 200 na taon nang hula ni Isaias. An kamondoan asin pag-agagha kan nasyon mantang nasa Babilonya nasalidahan nin labi-labing kagayagayahan asin paggayagaya sa dagang ibinalik sa dati. Inotob ni Jehova an saiyang panuga. An Paraiso​—literal sagkod espirituwal​—ibinalik!

An Pagkamundag nin Sarong Bagong Nasyon

19. Taano ta masasabi na limitado sana an kaotoban kan hula ni Isaias kan ikaanom na siglo B.C.E.?

¹⁹ Siempre, kan ikaanom na siglo B.C.E., limitado an kaotoban kan Isaias kapitulo 35. An paraisong mga kamugtakan na nakamtan kan mga Judio na pinapuli sa sadiring daga dai nagdanay. Pag-abot nin panahon, naatian nin falsong relihiosong katokdoan asin nasyonalismo an dalisay na pagsamba. An mga Judio nakaeksperyensia giraray nin kamondoan asin pag-agagha sa espirituwal. Sa kahurihurihi hinaboan sinda ni Jehova bilang saiyang banwaan. (Mateo 21:43) Huli sa inotrong pakisuway, an saindang paggayagaya bakong permanente. Ini gabos nagtotokdo sa dugang pa, mas dakulang kaotoban kan Isaias kapitulo 35.

20. Anong bagong Israel an naglataw kan enot na siglo C.E.?

²⁰ Sa itinalaan na panahon ni Jehova, naglataw an saro pang Israel, saro na espirituwal. (Galacia 6:16) Iinandam ni Jesus an dalan para sa pagkamundag kan bagong Israel na ini durante kan saiyang ministeryo digdi sa daga. Ibinalik nia an dalisay na pagsamba, asin paagi sa saiyang katokdoan, nagpoon giraray na bumolos an mga tubig nin katotoohan. Pinaomayan nia an mga may helang, sa pisikal sagkod espirituwal. Sarong magayagayang kurahaw an nag-aniningal mientras na ibinabalangibog an maogmang bareta kan Kahadean nin Dios. Pakalihis nin pitong semana pagkagadan asin pagkabuhay liwat sa saiya, inestablisar kan pinamuraway na si Jesus an Kristianong kongregasyon, sarong espirituwal na Israel na kompuesto nin mga Judio asin iba pa na binalukat kan pinabulos na dugo ni Jesus, pinaniaki bilang espirituwal na mga aki nin Dios asin tugang ni Jesus, asin linahidan nin banal na espiritu.​—Gibo 2:1-4; Roma 8:​16, 17; 1 Pedro 1:​18, 19.

21. Mapadapit sa Kristianong kongregasyon kan enot na siglo, anong mga pangyayari an puedeng mansayon bilang kaotoban kan nagkapirang kabtang kan hula ni Isaias?

²¹ Kan sinusuratan an mga miembro kan espirituwal na Israel, nasambitan ni apostol Pablo an mga tataramon sa Isaias 35:3 sa pagsabi: “Itaasan an mga kamot na nagtotonton asin an mga tuhod na lopog.” (Hebreo 12:12) Kun siring, minalataw na may kaotoban kan enot na siglo C.E. an mga tataramon sa Isaias kapitulo 35. Sa literal na sentido, si Jesus asin an saiyang mga disipulo milagrosong ibinalik an pagheling kan mga buta asin an pagdangog kan mga bungog. Pinalakaw ninda “an mga pilay” asin pinataram liwat an mga pula. (Mateo 9:32; 11:5; Lucas 10:9) Orog na mahalaga, an mga tama an kamugtakan nin puso nakadulag sa falsong relihion asin nagkamit nin sarong espirituwal na paraiso sa laog kan Kristianong kongregasyon. (Isaias 52:11; 2 Corinto 6:17) Siring kan mga Judio na nagbalik hale sa Babilonya, an mga nakadulag na ini nakaaram na kaipuhan an positibo, makosog an boot na espiritu.​—Roma 12:11.

22. Paano nabihag sa Babilonya an sinsero, naghahanap nin katotoohan na mga Kristiano sa presenteng mga panahon?

 ²² Kumusta man sa satong kaaldawan? An hula daw ni Isaias may saro pang kaotoban, saro na mas kompleto na may labot sa Kristianong kongregasyon ngonyan? Iyo. Pagkagadan kan mga apostol, nainaan na marhay an kabilangan kan tunay na linahidan na mga Kristiano, asin an falsong mga Kristiano, an “mga doot,” luminakop sa kinaban. (Mateo 13:36-43; Gibo 20:30; 2 Pedro 2:1-3) Dawa kaidtong ika-19 siglo, kan ponan kan sinserong mga indibiduwal na sumiblag sa Kakristianohan asin hanapon an dalisay na pagsamba, an saindang pakasabot nagdanay na may kasalak na katokdoan na bakong sono sa Kasuratan. Kan 1914, si Jesus pinatukaw sa trono bilang Mesiyanikong Hade, alagad dai nahaloy pakatapos kaiyan, an situwasyon garo baga daing paglaom para sa sinserong mga naghahanap na ini nin katotoohan. Bilang kaotoban kan hula, an mga nasyon ‘nakilaban sa sainda asin nadaog sinda,’ asin napaontok an mga pagprobar kan sinserong mga Kristianong ini na ihulit an maogmang bareta. Garo man sana sinda nabihag sa Babilonya.​—Kapahayagan 11:​7, 8.

23, 24. Sa anong mga paagi na an mga tataramon ni Isaias naotob sa tahaw kan banwaan nin Dios poon kan 1919?

²³ Minsan siring, kan 1919 nabago an kamugtakan. Binutasan ni Jehova sa pagkabihag an saiyang banwaan. Pinonan nindang haboan an falsong katokdoan na nakaraot kaidto sa saindang pagsamba. Bilang resulta, nakamtan ninda an pagpaomay. Sinda napasa espirituwal na paraiso, na dawa ngonyan padagos na naglalakop sa bilog na daga. Sa espirituwal na sentido, an mga buta nakanonood na makaheling asin an bungog, na makadangog​—na nagigin biyong alisto sa paghiro kan banal na espiritu nin Dios, na pirmeng nakamamansay sa pangangaipo na magdanay na dayupot ki Jehova. (1 Tesalonica 5:6; 2 Timoteo 4:5) Huling bako nang pula, an tunay na mga Kristiano galagang ‘magkurahaw,’ na ipinahahayag sa iba an mga katotoohan sa Biblia. (Roma 1:15) An mga maluya, o “pilay” kaidto sa espirituwal, nagpapaheling na ngonyan nin kaigotan asin kagayagayahan. Sa piguratibong paagi, nahihimo nindang ‘magtukad na garo lalaking usa.’

²⁴ An ibinalik na mga Kristianong ini naglalakaw sa “Dalan nin Kabanalan.” An “Dalan” na ini, na paluwas sa Dakulang Babilonya asin pasiring sa espirituwal na paraiso, bukas para sa gabos na parasamba na malinig sa espirituwal. (1 Pedro 1:13-16) Makakalaom sinda ki Jehova para sa proteksion asin makakokompiar na si Satanas dai magigin mapanggana sa saiyang makahayop na mga pagsalakay tanganing haleon an tunay na pagsamba. (1 Pedro 5:8) An mga suwayan asin an siisay man na minagawe na garo masibang mabangis na mga hayop dai totogotan na manraot sa mga nasa tinampo nin kabanalan nin Dios. (1 Corinto 5:11) Sa laog kan protehidong kamugtakan na ini, an mga binalukat ni Jehova​—linahidan asin “ibang karnero”​—nakanonompong nin kagayagayahan sa paglilingkod sa iyo sanang tunay na Dios.​—Juan 10:16.

25. Magkakaigwa daw nin pisikal na kaotoban an Isaias kapitulo 35? Ipaliwanag.

²⁵ Kumusta man sa ngapit? Maootob pa daw sa pisikal na paagi an hula ni Isaias? Iyo. An milagrosong mga pagpaomay ni Jesus asin kan saiyang mga apostol kan enot na siglo nagpaheling kan kamawotan asin kakayahan ni Jehova na gibohon an siring na mga pagpaomay sa mas mahiwas na sokol sa ngapit. An ipinasabong na mga Salmo nagtataram manongod sa buhay na daing katapusan sa matoninong na mga kamugtakan digdi sa daga. (Salmo 37:​9, 11, 29) Si Jesus nanuga nin buhay sa Paraiso. (Lucas 23:43) Sagkod sa pinakaultimong libro kaiyan, an Biblia nagtatao nin paglaom para sa sarong literal na paraiso. Sa panahon na iyan, an mga buta, bungog, pilay, asin pula paoomayan sa pisikal asin nin permanente. An pagmondo asin pag-agagha mawawara na. An paggayagaya tunay nanggad na magigin sagkod sa panahon na daing talaan, sagkod lamang pa ngani.​—Kapahayagan 7:​9, 16, 17; 21:​3, 4.

26. Paano pinaririgon kan mga tataramon ni Isaias an mga Kristiano ngonyan?

²⁶ Minsan ngani hinahalat kan tunay na mga Kristiano an pagbabalik kan pisikal na daganon na Paraiso, dawa ngonyan nakakamtan na ninda an mga bendisyon kan espirituwal na paraiso. Inaatubang ninda na may optimismo an mga pagbalo asin kahorasaan. May marigon na kompiansa ki Jehova, sinda nagpaparinigonan, na hinihimate an konseho: “Pakosoga nindo an maluyang mga kamot, kamo banwaan, asin paposoga nindo an nagkokobogkobog na mga tuhod. Sabihi nindo an may naghahadit na puso: ‘Magpakakosog kamo. Dai kamo matakot.’” Sinda may lubos na tiwala sa makahulang garantiya: “Uya! An saindong Dios maabot na may pamalos, an Dios na may pagbalos. Sia mismo maabot asin ililigtas kamo.”​—Isaias 35:​3, 4.

[Nota sa Ibaba]

[Mga Hapot Para sa Pag-adal]