Likayan na Madaya

AN PANDADAYA kagubay haros nin katawohan. An saro sa pinakaenot na mga pangyayari sa nakarekord na kasaysayan sarong akto nin pandadaya. Nangyari iyan kan dayaon ni Satanas si Eva sa tatamnan nin Eden.​—Genesis 3:13; 1 Timoteo 2:14.

Maski ngani nungkang nagkaigwa nin panahon poon kaidto na bakong lakop an pandadaya sa daga, iyan partikularmenteng lakop ngonyan. Sa pagtanaw sa presenteng mga panahon, an Biblia nagpatanid: “An mga maraot asin nandadaya orog na magraraot, na nanlalagalag asin ikinalalagalag.”​—2 Timoteo 3:13.

An mga tawo dinadaya huli sa gabos na klase nin dahelan. Dinadaya kan mga manloloko asin paratikas an mga biktima tanganing makua an saindang kuarta. An nagkapirang politiko dinadaya an saindang mga konstituente, na determinadong magdanay sa kapangyarihan ano man an mangyari. Dinadaya ngani kan mga tawo an sadiri ninda. Imbes na atubangon an dai nakaoogmang katotoohan, kinokombensir ninda an saindang sadiri na dai nakakaraot an padagos na paggibo nin peligrosong mga gibo-gibo, arog kan paninigarilyo, pagdodroga, o seksuwal na inmoralidad.

Dangan yaon an pandadaya sa mga bagay may labot sa relihion. Dinadaya kan mga namomoon sa relihion kan kaaldawan ni Jesus an mga tawo. Dapit sa mga madayang idto, nagsabi si Jesus: “Sinda mga butang parakabit. Kun siring, kun an buta magkabit sa buta, pareho sinda mahoholog sa kotkot.” (Mateo 15:14) Dugang pa, dinadaya kan mga tawo an saindang sadiri sa mga bagay may labot sa relihion. An Talinhaga 14:12 nagsasabi: “Igwa nin dalan na tanos sa pagheling nin tawo, alagad ta mga dalan nin kagadanan an kasagkodan kaiyan.”

Arog kan panahon ni Jesus, dakol ngonyan an nadadaya sa mga bagay may labot sa relihion asin bakong makangangalas! Sinabi ni apostol Pablo na “binuta [ni Satanas] an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.”​—2 Corinto 4:4.

Kun kita madaya nin sarong tikas, nawawaran kita nin kuarta. Kun kita madaya nin sarong politiko, tibaad mawara sa sato an satong katalingkasan bilang resulta. Alagad kun madaya kita ni Satanas kaya hinahaboan na niato an katotoohan manongod ki Jesu-Cristo, mawawara sa sato an buhay na daing katapusan! Kaya likayan na madaya! Buksan an saindong isip asin puso sa saro na dai madidiskutir na gikanan nin relihiosong katotoohan, an Biblia. Ta kun dai dakulang marhay an mawawara sa sato.​—Juan 17:3.