Pinagagayon ni Jehova an Saiyang Banwaan Paagi sa Liwanag

“Tumindog ka, O babae, pasiranga an liwanag, huli ta an saimong liwanag nagdatong na asin sa saimo an mismong kamurawayan ni Jehova suminirang.”​—ISAIAS 60:1.

1, 2. (a) Ano an kamugtakan nin katawohan? (b) Siisay an nasa likod kan kadikloman nin katawohan?

 “AY, kaipuhan nanggad niato an kapareho ni Isaias o ni San Pablo!” Iyan an hinagayhay ni Presidente Harry Truman kan E.U. kaidtong mga taon nin 1940. Tadaw ta sinabi nia iyan? Huli ta namatean nia na kaipuhan an mga namomoon na may pinakahalangkaw na kalibre sa moral sa kinaban kan panahon nia. Kaaagi pa sana kan katawohan sa pinakamadiklom na peryodo kan ika-20 siglo, an ikaduwang guerra mundial. Minsan siring, dawa ngani tapos na an guerra, an kinaban bakong matoninong. Nagpapadagos kaidto an kadikloman. Tunay nanggad, 57 taon pagkatapos kan guerrang idto, an kinaban nasa kadikloman pa man giraray. Kun buhay pa ngonyan si Presidente Truman, daing duwa-duwa na maheheling pa giraray nia na kaipuhan an mga namomoon na an kalibre sa moral kapareho ni Isaias o ni apostol Pablo.

² Baga man aram iyan o dai ni Presidente Truman, si apostol Pablo nagtaram manongod sa kadikloman na nagpapasakit sa katawohan, asin sa saiyang mga isinurat sia nagpatanid manongod dian. Halimbawa, sia nagpatanid sa mga kapagtubod: “Kita nakikipaglaban, bakong tumang sa dugo asin laman, kundi tumang sa mga gobyerno, tumang sa mga autoridad, tumang sa mga namamahala sa kinaban sa kadikloman na ini, tumang sa maraot na mga puersang espiritu sa langitnon na mga lugar.” (Efeso 6:12) Paagi sa mga tataramon na ini ipinaheling ni Pablo na bako sanang aram nia an espirituwal na kadikloman na nakatatakop sa kinaban kundi na midbid man nia an tunay na gikanan kaiyan​—an makapangyarihan na mga puersa nin demonyo na sinasabing “mga namamahala sa kinaban.” Huling an makapangyarihan na mga espiritu an nasa likod kan kadikloman sa kinaban, ano an magigibo nin mga tawo sana tanganing haleon iyan?

3. Apisar kan madiklom na kamugtakan nin katawohan, ano an ihinula ni Isaias para sa mga fiel?

³ Si Isaias may sinabi man manongod sa kadikloman na nagpapasakit sa katawohan. (Isaias 8:22; 59:9) Minsan siring, sa pagtanaw sa panahon niato, ihinula nia paagi sa pasabong na maski sa madiklom na mga panahon na ini, paliliwanagon ni Jehova an pananaw kan mga namomoot sa liwanag. Iyo, minsan ngani dai na niato kaibanan nin personal si Pablo o si Isaias, yaon sa sato an ipinasabong na mga isinurat ninda na magiya sa sato. Tanganing maheling kun gurano kadakulang bendisyon iyan para sa mga namomoot ki Jehova, estudyaran niato an makahulang mga tataramon ni Isaias na yaon sa ika-60 kapitulo kan saiyang libro.

An Sarong Makahulang Babae Nagpapasirang nin Liwanag

4, 5. (a) Ano an ipinagboot ni Jehova na gibohon nin sarong babae, asin ano an ipinanuga nia? (b) Anong nakapupukaw sa boot na impormasyon an laog kan Isaias kapitulo 60?

⁴ An enot na mga tataramon sa Isaias 60 ipinanonongod sa sarong babae na nasa mamondong marhay na kamugtakan​—nasa kadikloman, na nakalaob sa daga. Bigla na sana, may liwanag na tuminaros sa kaduloman, asin si Jehova nagkurahaw: “Tumindog ka, O babae, pasiranga an liwanag, huli ta an saimong liwanag nagdatong na asin sa saimo an mismong kamurawayan ni Jehova suminirang.” (Isaias 60:1) Uminabot na an panahon tanganing an babae tumindog asin ipabanaag an liwanag nin Dios, an saiyang kamurawayan. Taano? Maheheling niato an simbag sa minasunod na bersikulo: “Uya! an kadikloman mismo makalalakop sa daga, asin an mahibog na kaduloman sa mga nasyon; alagad sa saimo si Jehova masirang, asin sa saimo an saiyang kamurawayan maheheling.” (Isaias 60:2) Kun kuyogon kan babae an pagboot ni Jehova, sia nakaseseguro sa makangangalas  na resulta. Nagsasabi si Jehova: “An mga nasyon maduruman nanggad sa saimong liwanag, asin an mga hade sa kaliwanagan kan saimong pagsirang.”​—Isaias 60:3.

⁵ An nakapupukaw sa boot na mga tataramon sa tolong bersikulong ini parehong introduksion asin sumaryo kan laog kan iba pang kabtang kan Isaias kapitulo 60. Ihinuhula kaiyan an mga naeeksperyensiahan nin sarong makahulang babae asin ipinaliliwanag kun paano kita makaeerok sa liwanag ni Jehova apisar kan kadikloman na tuminahob sa katawohan. Pero sa ano nagrerepresentar an mga simbolo sa tolong pambukas na bersikulong ini?

6. Siisay an babae sa Isaias kapitulo 60, asin siisay an nagrerepresentar sa saiya digdi sa daga?

⁶ An babae sa Isaias 60:​1-3 iyo an Sion, an langitnon na organisasyon ni Jehova nin mga linalang na espiritu. Ngonyan, an Sion irinerepresentar digdi sa daga kan mga natatada kan “Israel nin Dios,” an internasyonal na kongregasyon nin linahidan nin espiritung mga Kristiano, na igwang paglaom na mamahala kaiba ni Cristo sa langit. (Galacia 6:16) An espirituwal na nasyon na ini nagkaigwa nin total na 144,000 na miembro, asin an kaotoban sa presenteng panahon kan Isaias kapitulo 60 nakasentro sa mga nabubuhay pa digdi sa daga durante kan “huring mga aldaw.” (2 Timoteo 3:1; Kapahayagan 14:1) Dakol man an sinasabi kan hula manongod sa kairiba kan linahidan na mga Kristianong ini, an “dakulang kadaklan” nin “ibang karnero.”​—Kapahayagan 7:9; Juan 10:16.

7. Ano an kamugtakan kan Sion kaidtong 1918, asin paano ini ihinula?

⁷ Nagkaigwa daw nin panahon na an “Israel nin Dios” namugtak sa kadikloman, na ipinanganino kan makahulang babae na iyan? Igwa, nangyari ini kaidtong labing 80 taon na an nakaagi. Durante kan enot na guerra mundial, an linahidan na mga Kristiano maigot na marhay na naghingoa tanganing magpadagos an pagpatotoo. Alagad kan 1918, an ultimong taon kan guerra, an organisadong paghuhulit haros napondo. Si Joseph F. Rutherford, na nangangataman sa pambilog na kinaban na paghuhulit, asin an iba pang pangenot na mga Kristiano sinentensiahan nin halawig na pagkabilanggo base sa falsong mga sahot. Sa libro nin Kapahayagan, an linahidan na mga Kristiano na sa panahon na iyan yaon pa sa daga makahulang ilinadawan na mga bangkay na nakahutad sa “tinampo kan dakulang siudad na sa espirituwal na sentido inaapod Sodoma asin Egipto.” (Kapahayagan 11:8) Totoong madiklom na panahon idto para sa Sion, na irinerepresentar kan saiyang linahidan na mga aki digdi sa daga!

8. Anong pambihirang pagbabago an nangyari kan 1919, na may anong resulta?

⁸ Minsan siring, an taon 1919 nag-agi nin pambihirang pagbabago. Si Jehova nagpasirang nin liwanag  sa Sion! An buhay pang mga kabilang sa Israel nin Dios tuminindog tanganing ipabanaag an liwanag nin Dios, na daing takot na isinagibo giraray an pagbalangibog kan maogmang bareta. (Mateo 5:14-16) Huli sa nabuhay giraray na kaigotan kan mga Kristianong ini, may mga iba pang nadara sa liwanag ni Jehova. Sa primero, an mga bagong abot linahidan bilang dugang pang mga miembro kan Israel nin Dios. Sinda inaapod na mga hade sa Isaias 60:​3, huling sinda magigin kapwa paramana ni Cristo sa langitnon na Kahadean nin Dios. (Kapahayagan 20:6) Sa huri, sarong dakulang kadaklan nin ibang karnero an pinonan na darahon sa liwanag ni Jehova. Ini an “mga nasyon” na nasambitan sa hula.

Nag-arabot an mga Aki kan Babae!

9, 10. (a) Ano an pambihirang naheling kan babae, asin ano an ipinanganino kaini? (b) May anong dahelan an Sion tanganing maggayagaya?

⁹ Ngonyan, pinonan ni Jehova na tawan nin dugang pang detalye an impormasyon na sinabi sa Isaias 60:1-3. May saro pa siang ipinagboot sa babae. Hinanyoga an saiyang sinasabi: “Tingkalagan an saimong mga mata sa palibot asin helinga!” Kuminuyog an babae, asin abaa kanakaoogma an naheheling nia! Nag-aarabot an saiyang mga aki. An teksto nagsasabi pa: “Sinda gabos tiniripon; sinda nagdorolok sa saimo. Gikan sa harayo an saimong mga aking lalaki nag-aarabot, asin an saimong mga aking babae na aatamanon sa gilid.” (Isaias 60:4) An pambilog na kinaban na pagbalangibog kan Kahadean na nagpoon kan 1919 nakatipon nin rinibong bagohan sa paglilingkod ki Jehova. An mga ini man nagin “mga aking lalaki” asin “mga aking babae” kan Sion, an linahidan na mga miembro kan Israel nin Dios. Sa siring, pinagayon ni Jehova an Sion paagi sa pagdara sa liwanag kan ultimong mga miembro kan 144,000.

¹⁰ Maiimahinar daw nindo an kagayagayahan kan Sion na makaibanan an saiyang mga aki? Pero, si Jehova nagtatao sa Sion nin dugang pang mga dahelan na maggayagaya. Satong mababasa: “Sa panahon na iyan ika makaheheling asin tunay na makintab, asin an saimong puso tunay na magtatakig asin madakula, huli ta sa saimo madolok an kayamanan kan dagat; an mismong mga kayamanan kan mga nasyon mapadigdi sa saimo.” (Isaias 60:5) Kaoyon kan makahulang mga tataramon na iyan, poon kan mga taon nin 1930, kadakoldakol na Kristiano na an paglaom mabuhay digdi sa daga sagkod lamang an nagburunyog sa Sion. Nagruluwas sinda hale sa “dagat” nin katawohan na suhay sa Dios asin nagrerepresentar sa mga kayamanan kan mga nasyon. Sinda “an kawiliwiling mga bagay kan gabos na nasyon.” (Haggeo 2:7; Isaias 57:20) Mangnoha man na an “kawiliwiling mga bagay” na ini dai naglilingkod ki Jehova nin kanya-kanya. Dai, nakadadagdag sinda sa gayon kan Sion paagi sa pag-abot tanganing sumamba sa kaibanan kan saindang linahidan na mga tugang, na nagigin “sarong aripompon” sa kaibanan ninda sa irarom nin “sarong pastor.”​—Juan 10:16.

An mga Negosyante, Pastor, Asin Komersiante Nagdorolok sa Sion

11, 12. Iladawan an mga grupo na naheling na minaarabot sa Sion.

¹¹ An resulta kan ihinulang pagtipon na ini iyo an pambihirang pagdakol kan mga paraomaw ki Jehova. Ihinula ini sa minasunod na mga tataramon kan hula. Imahinara na kamo nagtitindog sa kataed kan makahulang babae sa Bukid nin Sion. Magtanaw kamo sa sirangan, asin ano an naheheling nindo? “Matatahoban ka nin may kargang dakol na kamelyo, an ogbon pang mga kamelyong lalaki nin Midian asin nin Efa. An gabos na hale sa Seba​​—sinda maarabot. Madarara sinda nin bulawan asin kamangyan. Asin mapahayag sinda nin mga pag-omaw ki Jehova.” (Isaias 60:6) An mga grupo nin negosyante ginigiyahan an saindang mga karaban nin kamelyo sa dalan na pasiring sa Jerusalem. Tara, an mga kamelyo garo baha na nakalalantop sa daga! An mga komersiante may darang mamahalon na mga regalo, “bulawan asin kamangyan.” Asin an mga negosyanteng ini nagdorolok sa liwanag nin Dios tanganing omawon sia sa publiko, tanganing ‘ipahayag an mga pag-omaw ki Jehova.’

¹² Bako sanang an mga negosyante an nag-aarabot. An mga pastor nagbuburunyog man sa Sion. An hula nagsasabi pa: “An gabos na kahayopan nin Kedar​​—iyan titiponon sa saimo. An mga karnero sa Nebaiot​​—an mga iyan maglilingkod sa saimo.” (Isaias 60:7a) An mga tribo nin mga pastor minaarabot sa banal na siudad tanganing idolot ki Jehova an pinakamarahay hale sa saindang kahayopan. Nagpepresentar pa ngani sindang maglingkod sa  Sion! Paano inaako ni Jehova an mga taga ibang daga na ini? An Dios mismo minasimbag: “An mga iyan may pag-aprobar na masarakat sa ibabaw kan sakuyang altar, asin pagagayonon ko an sakuyang harong nin kagayonan.” (Isaias 60:7b) Maugayon na inaako ni Jehova an mga dolot asin an paglilingkod kan mga taga ibang daga na ini. An saindang presensia nagpapagayon sa saiyang templo.

13, 14. Ano an natanaw na nag-aarabot hale sa solnopan?

¹³ Ikiling nindo ngonyan an saindong payo asin mangalagkalag sa solnopan. Ano an natatanaw nindo? Sa harayo, igwa nin garo maputing panganoron na nabibiklad sa ibabaw kan dagat. Ihinapot ni Jehova an hapot na nasa isip nindo: “Sairisay ining nagrurulupad na garo panganoron, asin garo mga salampati sa mga gaha kan saindang harong-harong?” (Isaias 60:8) Sinimbag ni Jehova an saiya man sanang hapot: “Sa sakuya padagos na maglalaom an mga isla, siring man an mga barko kan Tarsis arog kan enot, tanganing darahon an saimong mga aking lalaki hale sa harayo, na kaiba an saindang pirak asin an saindang bulawan, sa ngaran ni Jehova na saimong Dios asin sa Banal kan Israel, ta ika saiyang pinagayon.”​—Isaias 60:9.

¹⁴ Maiimahinar daw nindo an eksena? An maputing panganoron na iyan mas harani na asin ngonyan garo grupo nin mga tuldok sa harayong solnopan. Garo iyan sarong bunyog nin mga gamgam na nagrurulupad sa mga alon. Alagad mantang an mga iyan mas nagrarani pa, naheling nindo na an mga iyan mga barko na nakabiklad an mga layag tanganing sabaton an doros. Kadakol na barko an naglalayag pasiring sa Jerusalem kaya garo na iyan sarong bunyog nin mga salampati. Hale sa harayong duongan, an mga barko nagbibiahe sa pinakamarikas na dalagan kaiyan, na nagdadara nin mga nagtuturubod sa Jerusalem tanganing sumamba ki Jehova.

 Naghihiwas an Organisasyon ni Jehova

15. (a) Anong pagdakol an ihinula kan mga tataramon sa Isaias 60:​4-9? (b) An tunay na mga Kristiano nagpapaheling nin anong espiritu?

¹⁵ Kanigoan kalinaw na makahulang paglaladawan an ipinaheheling kan bersikulo 4 sagkod 9 dapit sa pambilog na kinaban na paghiwas na nangyari poon kan 1919! Taano ta binendisyonan ni Jehova an Sion nin siring na pagdakol? Huli ta poon kan 1919, an Israel nin Dios makinuyog asin daing liwat-liwat na pinasisirang an liwanag ni Jehova. Pero narisa daw nindo na segun sa bersikulo 7, an mga bagong abot ‘nagsasarakat sa ibabaw kan altar nin Dios’? Sa altar ginigibo an mga pag-atang, asin an kabtang na ini kan hula nagpapagirumdom sa sato na an paglilingkod ki Jehova may kaibang sakripisyo. Si apostol Pablo nagsurat: “Ako nakikimaherak sa saindo . . . na idolot nindo an saindong hawak na siring sa buhay na atang, banal, inaako nin Dios, sarong sagradong paglilingkod na igwa kan saindong kakayahan na mangatanosan.” (Roma 12:1) Kaoyon kan mga tataramon ni Pablo, an tunay na mga Kristiano dai kontento sa basta pag-atender sa relihiosong mga pagtiripon sarong beses kada semana. Ginagamit ninda an saindang panahon, kosog, asin mga rekurso sa pagpalakop kan dalisay na pagsamba. Bako daw na nagpapagayon sa harong ni Jehova an presensia kan siring na debotong mga parasamba? Iyo an sabi kan hula ni Isaias. Asin makasisierto kita na an maigot na mga parasambang iyan magayon man sa pagheling ni Jehova.

16. Sairisay an nagtabang sa pagtogdok liwat sa suanoy na mga panahon, asin sairisay an naggigibo kaiyan sa mga panahon sa presente?

¹⁶ An mga bagong abot gustong magtrabaho. An hula padagos na nagsasabi: “An mga taga ibang daga an matogdok kan saimong mga lanob, asin an saindang mga hade maglilingkod sa saimo.” (Isaias 60:10) Sa enot na kaotoban kan mga tataramon na ini kaidtong panahon kan pagbalik hale sa pagkadistiero sa Babilonya, an mga hade asin iba pa hale sa mga nasyon talagang nagtabang sa pagtogdok liwat kan templo asin kan siudad nin Jerusalem. (Esdras 3:7; Nehemias 3:26) Sa kaotoban sa presenteng panahon, sinusuportaran kan dakulang kadaklan an linahidan na natatada sa pagtogdok kan tunay na pagsamba. Nagtabang sinda sa pagtogdok nin Kristianong mga kongregasyon asin sa siring pinaririgon an “mga lanob” kan arog-siudad na organisasyon ni Jehova. Nakikikabtang man sinda sa literal na pagtogdok​—an konstruksion nin mga Kingdom Hall, Assembly Hall, asin mga pasilidad kan Bethel. Sa gabos na paaging ini, sinusuportaran ninda an linahidan na mga tugang ninda sa pag-asikaso kan mga pangangaipo kan naghihiwas na organisasyon ni Jehova!

17. Ano an sarong paagi na pinagagayon ni Jehova an saiyang banwaan?

¹⁷ Kanigoan kanakaparirigon sa boot an ultimong mga tataramon sa Isaias 60:10! Si Jehova nagsasabi: “Sa sakuyang gurobgutob linugad taka, alagad ta sa sakuyang marahay na boot kaheherakan taka nanggad.” Iyo, kaidtong 1918/19, talagang dinisiplina ni Jehova an saiyang banwaan. Alagad kaidto pang nakaagi iyan. Ngonyan na an panahon na ipahayag ni Jehova an pagkaherak sa saiyang linahidan na mga lingkod asin sa saindang kairibang ibang karnero. An ebidensia na totoo ini iyo an pambihirang pagdakol na paagi kaiyan binendisyonan nia sinda, na ‘pinagagayon sinda,’ sabi ngani.

18, 19. (a) Ano an ipinanunuga ni Jehova kun dapit sa mga bagong nag-aarabot sa saiyang organisasyon? (b) Ano an sinasabi sa sato kan natatada pang mga bersikulo kan Isaias kapitulo 60?

¹⁸ Kada taon, ginatos na ribo pang “taga ibang daga” an nakikiasosyar sa organisasyon ni Jehova, asin magdadanay pang bukas an dalan para sa dakol pang masunod sa sainda. Nagsasabi si Jehova sa Sion: “An saimong mga tata papagdadanayon nanggad na pirmeng bukas; iyan dai pipintoan  dawa sa aldaw o sa banggi, tanganing darahon sa saimo an mga kayamanan kan mga nasyon, asin an saindang mga hade iyo an mangengenot.” (Isaias 60:11) May mga paratumang na naghihingoang pintoan an “mga tata” na iyan, alagad aram niato na dai sinda magigin mapanggana. Si Jehova mismo nagsabi na minsan paano, an mga tata magdadanay na bukas. Magpapadagos an pagdakol.

¹⁹ May iba pang mga paagi na binendisyonan ni Jehova an saiyang banwaan, na pinagagayon sinda, sa huring mga aldaw na ini. Makahulang ihinahayag kan natatada pang mga bersikulo kan Isaias 60 kun ano an mga paaging iyan.

Ikapaliliwanag daw Nindo?

• Siisay an “babae” nin Dios, asin siisay an nagrerepresentar sa saiya digdi sa daga?

• Kasuarin nakalaob an mga aki nin Sion, saka kasuarin asin paano sinda ‘tuminindog’?

• Naggagamit nin laen-laen na simbolo, paano ihinula ni Jehova an pagdakol ngonyan kan mga parahulit kan Kahadean?

• Sa anong mga paagi pinasirang ni Jehova an saiyang liwanag sa saiyang banwaan?

[Mga Hapot Para sa Pag-adal]

[Ritrato sa pahina 10]

An “babae” ni Jehova pinagbotan na tumindog

[Ritrato sa pahina 12]

An mga barko garo mga salampati sa harayo