Ano Na an Nangyari sa Kalayo sa Impierno?

ANO an naiimahinar nindo sa terminong “impierno?” Naiimahinar daw nindo an impierno bilang sarong literal na lugar na may kalayo asin asupre, nin mayong katapusan na pasakit asin labi-labing kakologan? O an impierno daw tibaad simbolikong deskripsion nin sarong kamugtakan?

Sa laog nin dakol na siglo, sarong nagkakalayong impierno nin makologon na pagpasakit an inimahinar kan mga namomoon sa relihion nin Kakristianohan bilang an siertong padudumanan kan mga parakasala. Popular pa man giraray an ideyang ini sa tahaw kan dakol na iba pang relihiosong grupo. “Tibaad nagibo kan Kristianismo na magin midbid na marhay na termino an impierno,” an sabi kan U.S.News & World Report, “alagad bako sanang sinda an may arog kaiyan na doktrina. An patakot na makolog na padusa sa buhay pagkagadan igwa nin mga kapareho sa haros lambang pangenot na relihion sa kinaban saka sa nagkapirang saradit na relihion.” An mga Hindu, Budista, Muslim, Jainista, asin Taoista may pinaniniwalaan na sarong klase nin impierno.

Pero, nagkaigwa nin saro pang ideya sa kaisipan sa presenteng panahon manongod sa impierno. “Minsan ngani igwa pa man giraray nin mga nagtutubod sa tradisyonal na ideya na iyan nagkakalayo,” an sabi kan nasambit na magasin, “nagpopoon na maglataw an mga punto de vista sa presenteng panahon na an daing sagkod na pagkakondenar sarong partikularmenteng dai nakaoogmang pagkainkomunikado, na nagsusuherir na an impierno tibaad bako man talagang mainiton.”

An magasin na Jesuita na La Civiltà Cattolica nagsabi: “Nakakadaya . . . na isipon na an Dios, paagi sa mga demonyo, pinasasakitan nin makatatakot an mga kondenado arog kan paglaag sainda sa kalayo.” Idinugang kaiyan: “Igwa nin impierno, bakong sarong lugar kundi sarong kamugtakan, sarong kamugtakan kan tawo na nagdudusa kan kolog nin pagigin suway sa Dios.” Si Papa Juan Paulo II nagsabi kan 1999: “Imbes na sarong lugar, an impierno nagpaparisa kan kamugtakan kan mga nagsasadiring boot asin biyo na isinusuway an saindang sadiri sa Dios, an gikanan kan gabos na buhay asin kagayagayahan.” Kun dapit sa mga ideya na an impierno sarong nagkakalayong lugar, sia nagsabi: “Ipinaheheling kaiyan an biyong pagkadesganar asin pagkadaing halaga nin buhay kun mayo an Dios.” Kun ilinadawan kan papa an impierno bilang “nagkakalayo asin may diablo na nakasulot nin pula na may pantalsok,” an historyador sa iglesia na si Martin Marty nagsabi, “dai iyan tutubodon kan mga tawo.”

May kaparehong mga pagbabago sa iba pang mga denominasyon. An sarong report kan komisyon sa doktrina kan Iglesia nin Inglaterra nagsabi: “An impierno bakong daing sagkod na pasakit, kundi iyan an pinal asin dai mababagong pinili na pamumuhay na kontra sa Dios na lubos-lubos asin biyo-biyo kaya an solamenteng kasagkoran iyo an lubos na pagkapara.”

An katesismo kan Iglesia Episcopaliano sa Estados Unidos tinatawan nin kahulogan an impierno bilang “daing sagkod na kagadanan huli sa pagsikwal niato sa Dios.” Nagdadakol an mga tawo, sabi kan U.S.News & World Report, na nagsusuportar sa ideya na an “katapusan kan mga maraot kalaglagan, bakong daing sagkod na pagdusa. . . . Nag-iinsistir  [sinda] na an mga sa katapustapusi minasikwal sa Dios paparaon sana sa ‘nakatutumtom na kalayo’ nin impierno.”

Maski ngani an tendensia sa presenteng aldaw iyo an paghabo sa mentalidad na pagtubod sa kalayo asin asupre, dakol an padagos na naniniwala na an impierno sarong literal na lugar nin pasakit. “Malinaw nanggad na ihinahayag kan Kasuratan na an impierno sarong pisikal na lugar nin nagkakalayong pagpasakit,” an sabi ni Albert Mohler kan Seminaryo sa Teolohiya kan mga Baptista sa Timog sa Louisville, Kentucky, E.U.A. Asin an report na The Nature of Hell, na iinandam kan Komisyon nin Ebanghelikong Alyansa, nagsasabi: “An impierno sarong may pag-aram na eksperyensia nin pagsikwal asin pagpasakit.” Idinugang kaiyan: “May mga grado an padusa asin pagdusa sa impierno na minadepende sa gabat nin mga kasalan na nakomiter sa daga.”

Sa giraray, an impierno daw nagkakalayong lugar nin daing sagkod na pagpasakit o nin pagkapara? O iyan daw saro sanang kamugtakan nin pagigin suway sa Dios? Ano talaga an impierno?

[Kahon/Mga ritrato sa pahina 4]

Sarong Halipot na Kasaysayan kan Kalayo sa Impierno

KASUARIN inaprobaran kan naghihingakong mga Kristiano an paniniwala sa kalayo sa impierno? Halawig nang panahon pakalihis kan panahon ni Jesu-Cristo asin kan saiyang mga apostol. “An Apocalypse of Peter (ika-2 siglo C.E.) an enot na [apokripal na] Kristianong publikasyon na nagladawan kan pagpadusa asin mga pagpasakit sa mga parakasala sa impierno,” an sabi kan Encyclopædia Universalis sa Pransia.

Minsan siring, may dai pagkakaoroyon sa tahaw kan Mga Ama kan Iglesia manongod sa impierno. Si Justinong Martir, Clemente na taga Alejandria, Tertuliano, asin Cipriano nagtutubod na an impierno sarong nagkakalayong lugar. Si Origen asin an teologong si Gregorio na taga Nisa nagtutubod na an impierno sarong lugar nin pagigin suway sa Dios​​—nin espirituwal na pagdusa. Sa ibong na lado, naniniwala si Agustin na taga Hipo na an pagdusa sa impierno parehong espirituwal asin pisikal​​—sarong punto de vista na inako nin dakol. “Pag-abot kan ikalimang siglo naglakop sa gabos na lugar an estriktong doktrina na an mga parakasala mayo na nin ikaduwang paglaom pakatapos kan buhay na ini asin na an kalayo na matumtom sainda nungkang masisigbo,” an isinurat ni Propesor J.N.D. Kelly.

Kan ika-16 na siglo, sinabot kan Protestanteng mga repormador na arog ni Martin Luther asin John Calvin na an nagkakalayong pagpasakit sa impierno naglaladawan sa daing sagkod na pagigin suway sa Dios. Minsan siring, an ideya na an impierno sarong lugar nin pagpasakit nagbalik kan suminunod na duwang siglo. An Protestanteng parahulit na si Jonathan Edwards tinatakot kaidto an puso kan mga Amerikanong Kolonyal kan ika-18 siglo kan detalyadong mga paglaladawan sa impierno.

Pero, dai nahaloy pakatapos kaiyan, an kalayo sa impierno nagpoon nang magpirawpitaw asin maparong. “An ika-20 siglo haros iyo na an pagkagadan nin impierno,” an sabi kan U.S.News & World Report.

[Mga Ritrato]

Si Justinong Martir nagtutubod na an impierno sarong nagkakalayong lugar

Si Agustin na taga Hipo nagtokdo na an pagdusa sa impierno espirituwal asin pisikal