Ano Talaga an Impierno?

ANO man an naiimahinar mo sa terminong “impierno,” sa pankagabsan an impierno pinaghohona na sarong lugar nin pagpadusa huli sa kasalan. May labot sa kasalan asin sa epekto kaiyan, an Biblia nagsasabi: “Paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) An Kasuratan nagsasabi man: “An ibinabayad nin kasalan kagadanan.” (Roma 6:23) Mantang an padusa sa kasalan kagadanan, an pundamental na hapot sa pagdeterminar sa tunay na kahulogan kan impierno iyo an: Ano an mangyayari sa sato kun kita magadan?

May saro daw na klase, sarong porma, nin buhay na nagpapadagos pagkagadan? Ano an impierno, asin anong klase nin mga tawo an minaduman? Igwa daw nin ano man na paglaom para sa mga yaon sa impierno? An Biblia nagtatao nin sadiosan asin nakakokontentong simbag sa mga hapot na ini.

Buhay Pagkagadan?

Igwa daw nin sarong bagay sa laog niato, na arog nin sarong kalag o espiritu, na nagdadanay na buhay pagkagadan kan hawak? Estudyare kun paano nagkaigwa nin buhay an enot na tawong si Adan. An Biblia nagsasabi: “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hinangos nin buhay.” (Genesis 2:7) Minsan ngani sinususteniran nin paghangos an saiyang buhay, an kalabot sa pagbugtak kan “hinangos nin buhay” sa saiyang dongo labi pang marhay kisa paglaag sana nin doros sa saiyang pulmon. Nangangahulogan iyan na ibinugtak nin Dios sa daing buhay na hawak ni Adan an silyab nin buhay​—an “puersa nin buhay,” na aktibo sa gabos na daganon na linalang. (Genesis 6:17; 7:22) An puersang ini na nagtatao nin buhay inaapod kan Biblia na “espiritu.” (Santiago 2:26) An espiritung iyan puedeng ikomparar sa koryente na nagpapaandar sa sarong makina o kasangkapan asin pinapangyayari iyan na magpunsionar. Kun paanong an koryente dai noarin man nagkakaigwa nin mga karakteristiko kan kasangkapan na pinaaandar kaiyan, an puersa nin buhay dai man nagkakaigwa nin ano man na karakteristiko kan mga linalang na tinatawan nin buhay kaiyan. Mayo iyan nin personalidad asin mayo nin kakayahan sa pag-iisip.

Ano an nangyayari sa espiritu kun magadan an sarong tawo? An Salmo 146:4 nagsasabi: “An saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.” Kun an sarong tawo magadan, an saiyang impersonal na espiritu dai na nagpapadagos na mag-eksister sa ibang rona bilang sarong espiritung linalang. Iyan “minabalik sa tunay na Dios na nagtao kaiyan.” (Eclesiastes 12:7) Nangangahulogan ini na an ano man na paglaom sa buhay sa ngapit kan tawong iyan biyong minadepende na ngonyan sa Dios.

An suanoy na mga pilosopong Griego na si Socrates asin Plato nagtutubod na may kalag sa laog nin tawo na nagdadanay na buhay pagkagadan  asin dai noarin man magagadan. Ano daw an itinotokdo kan Biblia manongod sa kalag? Si Adan “nagin buhay na kalag,” sabi sa Genesis 2:7. Dai sia tinawan nin kalag; sia sarong kalag​—sarong bilog na persona. Sinasabi kan Kasuratan na an kalag nagtatrabaho, nagmamawot nin kakanon, dinudukot, dai napapatorog, asin iba pa. (Levitico 23:30; Deuteronomio 12:20; 24:7; Salmo 119:28) Iyo, an tawo mismo sarong kalag. Kun magadan an saro, an kalag na iyan nagagadan.​—Ezequiel 18:4.

Kun siring, ano an kamugtakan kan mga gadan? Kan sinesentensiahan si Adan, si Jehova nagsabi: “Ika kabokabo asin sa kabokabo ka man mabalik.” (Genesis 3:19) Yaon saen si Adan bago sia pinorma nin Dios hale sa kabokabo kan daga asin tinawan nin buhay? Tara, sia malinaw na dai nag-eeksister! Kan sia magadan, nagbalik si Adan sa kamugtakan na iyan nin biyong pagigin mayo nin buhay. An kamugtakan kan mga gadan lininaw sa Eclesiastes 9:​5, 10, kun saen mababasa niato: “An mga gadan mayo nin pakaaram . . . Sa lolobngan, na saimong padudumanan, mayo nin gigibohon ni pagplano ni kaaraman ni kadonongan.” (New International Version) Segun sa Kasuratan, an kagadanan sarong kamugtakan nin dai pag-eksister. An mga gadan mayo nin pakaaram, mayo nin pakamate, mayo nin kaisipan.

Daing Katapusan na Pagpasakit o Pankagabsan na Lolobngan?

Mantang an mga gadan mayo na nin pakaaram, an impierno dai puedeng magin sarong nagkakalayong lugar nin pagpasakit kun saen an mga maraot nagdudusa pagkagadan. Kun siring, ano an impierno? An pagsiyasat sa nangyari ki Jesus pagkagadan nia an makatatabang sa pagsimbag sa hapot na iyan. An parasurat sa Biblia na si Lucas nagsasaysay: “[Si Jesus] dai pinabayaan sa Hades [impierno, King James Version] ni nakaheling man nin kalapaan an saiyang laman.” a (Gibo 2:31) Yaon saen an impierno na dinumanan dawa ni Jesus? Si apostol Pablo nagsurat: “Itinao ko sa saindo . . . na si Cristo nagadan para sa satong mga kasalan oyon sa Kasuratan; asin na sia ilinobong, iyo, na sia binuhay liwat sa ikatolong aldaw oyon sa Kasuratan.” (1 Corinto 15:​3, 4) Kaya si Jesus yaon sa impierno, an lolobngan, alagad dai sia binayaan dian, huli ta sia ibinangon, o binuhay liwat.

Estudyare man an nangyari sa matanos na tawong si Job, na nagdusang marhay. Nagmamawot na makadulag sa saiyang mamondong kamugtakan, sia nakimaherak: “Siisay daw an matao kaini sa sako, na protehiran mo ako sa impierno [Sheol], asin itago mo ako sagkod na makalihis an grabe mong kaanggotan?” b (Job 14:​13, Douay Version) Bako nanggad na rasonableng isipon na mamawoton ni Job na mapaduman sa sarong nagkakalayong lugar para sa proteksion! Para ki Job, an “impierno” iyo sana an lolobngan, na dian matatapos an saiyang pagdusa. Kun siring, an impierno sa Biblia iyo an pankagabsan na lolobngan nin katawohan na mapasiring dian an marahay na mga tawo siring man an mga maraot.

An Kalayo sa Impierno​—Biyong Pagkatumtom?

Posible daw na an kalayo sa impierno simbolo  nin biyong pagkatumtom, o lubos, na pagkalaglag? Ilinalaen an kalayo sa Hades, o impierno, an Kasuratan nagsasabi: “An kagadanan asin Hades iinapon sa danaw nin kalayo.” “An danaw” na sinambit digdi simboliko, huli ta an kagadanan asin impierno (Hades) na iinapon dian dai man literal na masosolo. “Ini [an danaw nin kalayo] iyo an ikaduwang kagadanan”​​—kagadanan na mayo na nin paglaom na mabuhay liwat.​—Kapahayagan 20:14.

An danaw nin kalayo kapareho an kahulogan kan “nagkakalayong Gehenna [kalayo sa impierno, King James Version]” na sinabi ni Jesus. (Mateo 5:22; Marcos 9:​47, 48) An Gehenna minalataw nin 12 beses sa Kristianong Griegong Kasuratan, asin iyan nanonongod sa kababan nin Hinnom, sa luwas kan lanob nin Jerusalem. Kan si Jesus yaon pa digdi sa daga, an kababan na ini ginagamit na aponan nin basura, “kun saen iinaapon an mga bangkay nin mga kriminal, asin bangkay nin mga hayop, patin gabos na iba pang klase nin basura.” (Smith’s Dictionary of the Bible) An kalayo padagos na pinalalaad paagi sa paglaag nin asupre tanganing masolo an mga basura. Ginamit ni Jesus an kababan na iyan bilang angay na simbolo kan daing katapusan na kalaglagan.

Kapareho kan Gehenna, an danaw nin kalayo nagsisimbolisar sa daing sagkod na kalaglagan. An kagadanan asin Hades “iinapon” dian huli sa bagay na hahaleon iyan kun an katawohan nakatalingkas na sa kasalan asin sa pagkakondenar sa kagadanan. An tinutuyo, habong magsolsol na mga parakasala magkakaigwa man kan saindang “kabtang” sa danaw na iyan. (Kapahayagan 21:8) Popohoon man sinda sagkod lamang. Sa ibong na lado, an mga yaon sa memorya nin Dios na yaon sa impierno​​—an pankagabsan na lolobngan nin katawohan​​—igwa nin marahayon na ngapit.

Hinalean nin Laog an Impierno!

An Kapahayagan 20:13 nagsasabi: “Itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian.” Iyo, an impierno sa Biblia hahalean nin laog. Arog kan panuga ni Jesus, “an oras maabot na an gabos na nasa mga lolobngan na girumdoman makadadangog kan . . . tingog [ni Jesus] asin maruluwas.” (Juan 5:​28, 29) Maski ngani sa presente dai na nag-eeksister sa ano man na porma, an minilyon na gadan na yaon sa memorya ni Jehova Dios bubuhayon liwat sa ibinalik na daganon na paraiso.​—Lucas 23:43; Gibo 24:15.

Sa bagong kinaban nin Dios, an binuhay liwat na mga tawo na masunod sa matanos niang mga ley dai na noarin man kaipuhan pang magadan liwat. (Isaias 25:8) “Papahidon [ni Jehova] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.” Sa katunayan, “an enot na mga bagay nakalihis na.” (Kapahayagan 21:4) Kanigoan na bendisyon an nakatagama sa mga yaon sa impierno​​—an “mga lolobngan na girumdoman”! Tunay nanggad na an bendisyon na ini igo nang dahelan na kita kumua nin orog pang kaaraman manongod ki Jehova Dios asin sa saiyang Aki, si Jesu-Cristo.​—Juan 17:3.

[Mga Nota sa Ibaba]

[Ritrato sa pahina 5]

Si Job namibi na protehiran sa impierno

[Ritrato sa pahina 6]

Nagkakalayong Gehenna​​—sarong simbolo nin daing sagkod na kalaglagan

[Ritrato sa pahina 7]

‘An nasa mga lolobngan na girumdoman maruluwas’