“Madia Kamo sa Sako, . . . Asin Pagiginhawahon Ko Kamo”

“Gumibo Kita kan Marahay sa Gabos”

AN PANGENOT na aktibidad ni Jesus iyo an ihulit asin itokdo an maogmang bareta kan Kahadean nin Dios. (Marcos 1:14; Lucas 8:1) Huli ta nagmamawot an mga parasunod ni Cristo na arogon sia, minamansay ninda an gibohon na pagtotokdo kan mensahe sa Biblia manongod sa Kahadean nin Dios na iyo an pangenot na aktibidad ninda sa buhay. (Lucas 6:40) Tunay nanggad na nakaoogma na maheling kan Mga Saksi ni Jehova kun paano nagtatao nin nagdadanay na kaginhawahan an mensahe kan Kahadean sa mga nag-aako kaiyan​​—siring kan nangyari kaidtong yaon sa daga si Jesus.​—Mateo 11:28-30.

Apuera sa pagtotokdo kan Tataramon nin Dios, naggibo si Jesus nin iba pang marahay na mga gibo, arog kan pagpaomay sa mga may helang asin pagpakakan sa mga nagugutom. (Mateo 14:14-21) Kaagid kaiyan, iniibanan kan Mga Saksi ni Jehova an saindang pagtotokdo sa Biblia nin mga gibo na nakakatabang sa mga tawong nangangaipo. Total, sinasangkapan kan Kasuratan an mga Kristiano “para sa lambang marahay na gibo” asin sinasadol sinda na gibohon an “marahay sa gabos.”​—2 Timoteo 3:​16, 17; Galacia 6:10.

“Yaon an Samong mga Tugang Tanganing Tumabang”

Kan Setyembre 1999, an Taiwan natanyog nin linog na nandestroso nin grabe. Pakalihis nin pira sanang bulan, an makosog an sulog na oran asin mga pagtupas an dahelan kan saro sa pinakagrabeng natural na mga kalamidad sa kasaysayan nin Venezuela. Mas bago pa sana, dinestrosar kan grabeng mga pagbaha an nasyon nin Mozambique. Sa gabos na tolong pangyayaring ini, an mga Saksi ni Jehova tolos na nag-abot sa pinangyarihan na lugar na may darang mga suplay na kakanon, tubig, bolong, gubing, tolda, asin kasangkapan sa pagluto para sa mga biktima. An mga boluntaryo na may abilidad sa pagbolong naggibo nin temporaryong mga impirmarya tanganing bolongon an mga naerido, asin an boluntaryong mga trabahador sa pagtogdok nagtogdok nin bagong mga harong para sa mga nawaran nin harong.

Napukaw an boot kan mga biktima huli sa napapanahon na tabang na inako ninda. “Kan kami desesperado nang marhay, yaon an samong mga tugang tanganing  tumabang,” an sabi ni Malyori na nagabaan nin harong huli sa pagtupas sa Venezuela. Pagkatapos na magtogdok an mga boluntaryo nin bagong harong para sa saiyang pamilya, si Malyori nagkagsing: “Nungka ming mapasasalamatan nin igo si Jehova huli sa gabos na ginibo nia para sa samo!” Asin kan maresibi kan mga biktima nin baha sa Mozambique an mga liabe kan saindang bagong togdok na mga harong, an bilog na grupo biglang nag-arawit nin awit na pan-Kahadean na “Si Jehova an Satong Pailihan.” a

Nakagiginhawa man para sa mga boluntaryo an pagtabang sa mga nangangaipo. “Nakakaogmang maglingkod sa mga tugang na ini na naapektaran na marhay,” an sabi ni Marcelo, na naglingkod bilang nars sa sarong kampo nin mga dulag sa Mozambique. Si Huang, sarong boluntaryo sa Taiwan, nagsabi: “Dakulang kagayagayahan an makikabtang sa paghatod nin mga kakanon asin tolda sa mga tugang na nangangaipo. Iyan nakapakokosog sa pagtubod.”

Sarong Programa nin Pagboluntaryo na Igwa nin Resulta

An pagboluntaryo nagbunga man nin espirituwal na kaginhawahan sa manampulong ribong preso sa bilog na kinaban. Paano? Kan nakaagi pa sanang mga taon, an mga Saksi ni Jehova nanao nin mga babasahon sa Biblia sa labing 30,000 na indibiduwal na napepreso sa mga 4,000 na bilanggoan sa Estados Unidos sana. Dugang pa, kun posible, an mga Saksi personal na minadalaw sa mga bilanggoan tanganing adalan sa Biblia an mga preso asin mamayo nin Kristianong mga pagtiripon. Nakikinabang daw an mga preso?

An nagkapirang preso na nag-aadal sa Biblia nagpoon na ihiras sa mga kapwa preso an nakagiginhawang mga katokdoan sa Tataramon nin Dios. Bilang resulta, sa dakol na bilanggoan sa bilog na kinaban igwa na ngonyan nin mga grupo nin mga preso na sararong nagsasamba ki Jehova. “An samong grupo nag-ooswag,” an report kan sarong preso sa Oregon, E.U.A., kan 2001. “Igwa kami nin 7 parahayag kan Kahadean asin namamayo nin 38 pag-adal sa Biblia. Labing 25 katawo an nag-aatender sa pampublikong pahayag asin Pag-adal sa Torrengbantayan, asin 39 an nag-atender samo sa Memorial [kan kagadanan ni Cristo]. Tolo pa an mababautismohan sa dai na mahahaloy!”

Mga Pakinabang Asin Kagayagayahan

Nariparo kan mga opisyal sa bilanggoan na an programa nin pagboluntaryo na ini igwa nin resulta. An hinangaan na marhay kan mga opisyal iyo an naghahaloy na pakinabang kan programang ini nin pagboluntaryo. An sarong report nagsasabi: “Sa sampulong taon na pagpunsionar kan programang ini, mayo ni saro sa presong nakaluwas na nabautismohan sa bilanggoan bilang saro sa Mga Saksi ni Jehova an nagbuelta duman​​—kabaliktaran kan 50-60 porsientong pagbuelta kan iba pang mga grupo.” Napukaw an boot huli sa mga resulta na nagibo kan mga boluntaryong Saksi, an sarong kapelyan sa bilanggoan sa Idaho nagsabi sa sarong surat sa pankinaban na opisina prinsipal kan Mga Saksi ni Jehova: “Minsan ngani personalmenteng dai ako oyon sa saindong teolohiya, hanga akong marhay sa saindong organisasyon.”

An pagtabang sa mga preso nagigin kapakipakinabang man sa mga boluntaryo. Pagkatapos na pamayohan an pagtiripon sa sarong grupo nin mga preso na uminawit nin awit na pan-Kahadean sa kaenot-enote, an sarong boluntaryo nagsurat: “Nakaparirigon sa boot na masdan an 28 lalaki na nakikiayon sa pag-awit nin pag-omaw ki Jehova. Asin sinda nag-aarawit nin makosog! Abaang pribilehio na magin presente sa arog kaiyan na okasyon!” An sarong boluntaryo na nagdadalaw sa mga bilanggoan sa Arizona nagsabi: “Kanigoan na bendisyon an makikabtang sa arog kaining espesyal na gibohon!”

An mga boluntaryong Saksi sa bilog na kinaban tolos na maoyon ki Jesus, na nagsabi: “Igwang orog na kaogmahan sa pagtao kisa pag-ako.” (Gibo 20:35) Kinokompirmar man ninda na an pagsunod sa konseho kan Biblia na gumibo nin marahay sa gabos nakagiginhawa nanggad.​—Talinhaga 11:25.

[Nota sa Ibaba]

[Ritrato sa pahina 8]

Venezuela

[Ritrato sa pahina 8]

Taiwan

[Ritrato sa pahina 8]

Mozambique