Idagdag sa Saindong Pakatagal an Diosnon na Debosyon
Idagdag sa Saindong Pakatagal an Diosnon na Debosyon
“Idagdag sa saindong pagtubod . . . an pakatagal, sa saindong pakatagal an diosnon na debosyon.”—2 PEDRO 1:5, 6.
1, 2. (a) Anong klaseng pagtalubo an inaasahan sa kamugtakan nin sarong aki? (b) Gurano kaimportante an espirituwal na pagtalubo?
AN PAGTALUBO importante sa sarong aki, alagad bako sanang pisikal na pagtalubo an minamawot. Inaasahan man an pagtalubo nin isip asin emosyon. Pag-abot nin panahon, babayaan kan aki an mga ugale kaiyan na sa aki asin magigin sarong maygurang na lalaki o babae. Nanabihan ini ni apostol Pablo kan sia magsurat: “Kan ako aki pa, nagtataram ako kaidto siring sa aki, nag-iisip siring sa aki, nangangatanosan siring sa aki; alagad ngonyan na ako dakula na, binayaan ko na an mga ugale nin sarong aki.”—1 Corinto 13:11.
2 An mga tataramon ni Pablo may importanteng sinasabi manongod sa espirituwal na pagtalubo. An mga Kristiano kaipuhan na tumalubo hale sa pagigin espirituwal na omboy pasiring sa pagigin “maygurang sa mga kakayahan nin pagsabot.” (1 Corinto 14:20) Maninigo sindang maghingoa asin magmaigot na maabot an “sokol nin pagtalubo na kapareho kan kapanoan kan Cristo.” Kun siring dai sinda magigin “mga omboy, na inaanod nin mga alon asin ipinapadpad nin lambang doros nin katokdoan.”—Efeso 4:13, 14.
3, 4. (a) Ano an dapat niatong gibohon tanganing magin maygurang sa espirituwal? (b) Anong diosnon na mga kualidad an maninigo niatong ipaheling, asin gurano kaimportante an mga iyan?
3 Paano kita magigin maygurang sa espirituwal? Minsan ngani an pisikal na pagtalubo nagpapadagos nin haros automatiko sa normal na mga kamugtakan, an espirituwal na pagtalubo nangangaipo nin tuyong paghihingoa. Minapoon iyan paagi sa pagkua nin tamang kaaraman sa Tataramon nin Dios asin paghiro kaoyon kan satong nanonodan. (Hebreo 5:14; 2 Pedro 1:3) Mapangyari man ini sa sato na ikapaheling an diosnon na mga kualidad. Siring sa pisikal na pagtalubo asin sa konektadong mga aspekto kaiyan, an pagtalubo sa laen-laen na diosnon na kualidad sa parate nangyayari nin durungan. Si apostol Pedro nagsurat: “Paagi sa pagtao nindo bilang simbag kan gabos na odok na paghihingoa, idagdag sa saindong pagtubod an birtud, sa saindong birtud an kaaraman, sa saindong kaaraman an pagpopogol sa sadiri, sa saindong pagpopogol sa sadiri an pakatagal, sa saindong pakatagal an diosnon na debosyon, sa saindong diosnon na debosyon an kapadangatan sa tugang, sa saindong kapadangatan sa tugang an pagkamoot.”—2 Pedro 1:5-7.
4 An balang kualidad na isinurat ni Pedro mahalagang marhay, asin mayo nin puedeng haleon. Sinabi pa nia: “Kun an mga bagay na ini nasa saindo asin nagsusulwak, iingatan kamo kaiyan na dai magin inaktibo o daing bunga mapadapit sa tamang kaaraman kan satong Kagurangnan na Jesu-Cristo.” (2 Pedro 1:8) Magkonsentrar kita sa pangangaipo na idagdag sa satong pakatagal an diosnon na debosyon.
An Pangangaipo nin Pakatagal
5. Taano ta kaipuhan niato an pakatagal?
5 Ikinokonektar ni Pedro sagkod ni Pablo an diosnon na debosyon sa pakatagal. (1 Timoteo 6:11) An pagkaigwa nin pakatagal bako sanang nangangahulogan nin pakatios kun nasa kasakitan asin pagdadanay na determinado. Kalabot dian an pasensia, kosog nin boot, asin karigonan, na dai nawawaran nin paglaom kun napapaatubang sa mga pagbalo, balakid, sugot, o paglamag. Bilang mga namumuhay na may “diosnon na debosyon kaibahan ni Cristo Jesus,” inaasahan niato na kita paglalamagon. (2 Timoteo 3:12) Dapat kitang magtagal tanganing mapatunayan niato an satong pagkamoot ki Jehova asin mapatalubo an mga kualidad na kaipuhan sa kaligtasan. (Roma 5:3-5; 2 Timoteo 4:7, 8; Santiago 1:3, 4, 12) Kun mayo nin pakatagal, dai niato makakamtan an buhay na daing katapusan.—Roma 2:6, 7; Hebreo 10:36.
6. An pakatagal sagkod sa katapusan nangangahulogan nin paggibo nin ano?
6 Gurano man karahay an pagpoon niato, an pinakamahalaga sa katapustapusi iyo na kita igwa nin pakatagal. Nagsabi si Jesus: “An nakatagal sagkod sa katapusan iyo an maliligtas.” (Mateo 24:13) Iyo, dapat kitang magtagal sagkod sa katapusan, baga man iyan sagkod sa katapusan kan presenteng buhay niato o sa katapusan kan maraot na sistemang ini nin mga bagay. Arin man dian, dapat niatong papagdanayon an satong integridad sa Dios. Minsan siring, kun dai idadagdag an diosnon na debosyon sa satong pakatagal, dai niato mapaoogma si Jehova, asin dai niato makakamtan an buhay na daing katapusan. Alagad ano an diosnon na debosyon?
Kun Ano an Boot Sabihon kan Diosnon na Debosyon
7. Ano an diosnon na debosyon, asin pinahihiro kita kaiyan na gibohon an ano?
7 An diosnon na debosyon personal na pagreberensiar, pagsamba, asin paglilingkod ki Jehova Dios huli sa kaimbodan sa saiyang unibersal na soberaniya. Tanganing magibo an diosnon na debosyon may labot ki Jehova, kaipuhan niato an tamang kaaraman dapit sa saiya asin sa saiyang mga dalan. Maninigo niatong booton na mamidbid nin personal asin dayupot an Dios. Pahihiroon kita kaini na pataluboon an odok sa pusong pagkamuya sa saiya, pagkamuya na naheheling sa satong mga hiro asin pamumuhay. Maninigo niatong mawoton na magin arog nanggad ki Jehova sagkod sa mapupuede—na arogon an saiyang mga dalan asin ipabanaag an saiyang mga kualidad asin personalidad. (Efeso 5:1) Tunay nanggad, an diosnon na debosyon nagmomotibar sa sato na booton na paogmahon an Dios sa gabos niatong ginigibo.—1 Corinto 10:31.
8. Paano magkakonektar an diosnon na debosyon asin an eksklusibong debosyon?
8 Tanganing magibo an tunay na diosnon na debosyon, dapat na si Jehova sana an sambahon niato, na dai tinotogotan an ano man na iba pang bagay na agawon an lugar nia sa satong puso. Bilang satong Kaglalang, may deretso sia na mapasaiya an satong eksklusibong debosyon. (Deuteronomio 4:24; Isaias 42:8) Minsan siring, dai kita pinipirit ni Jehova na sambahon sia. An satong gikan sa boot na debosyon an mawot nia. An satong pagkamoot sa Dios, basado sa tamang kaaraman dapit sa saiya, an nagpapahiro sa sato na linigon an satong buhay asin gumibo nin lubos na pagdusay sa saiya dangan otobon iyan.
Pataluboon an Relasyon sa Dios
9, 10. Paano niato mapatatalubo asin mapagdadanay an dayupot na relasyon sa Dios?
9 Pakatapos na simbolisaran an satong pagdusay sa Dios paagi sa pagpabautismo, kaipuhan pa man giraray niato na pataluboon an orog pang dayupot na personal na relasyon sa saiya. An satong pagmawot na gibohon ini asin maglingkod nin fiel ki Jehova kun siring nagpapahiro sa sato na padagos na pag-adalan an saiyang Tataramon asin horophoropon iyan. Mantang tinotogotan niato an espiritu nin Dios na maghiro sa satong isip asin puso, nagrararom an satong pagkamoot ki Jehova. An relasyon niato sa saiya nagpapadagos na iyo an pinakamahalaga sa satong buhay. Ibinibilang niato si Jehova na satong pinakadayupot na Katood asin boot na paogmahon sia sa gabos na panahon. (1 Juan 5:3) Nagtatalubo an satong dakulang pagkaogma sa satong marahayon na relasyon sa Dios, asin nagpapasalamat kita na kita mamomoton na tinotokdoan nia asin itinatanos kun kaipuhan.—Deuteronomio 8:5.
10 Kun dai kita dayaday na maghihingoa na pakosogon an satong mahalagang marhay na relasyon ki Jehova, puedeng lumuya iyan. Kun mangyari iyan, bako iyan na sala nin Dios, huli ta “sia bakong harayo sa lambang saro sa sato.” (Gibo 17:27) Abaang ogma niato na dai pinadedepisil ni Jehova an pagrani sa saiya! (1 Juan 5:14, 15) Siempre, dapat kitang maghingoa na papagdanayon an dayupot na personal na relasyon ki Jehova. Minsan siring, tinatabangan nia kita na rumani sa saiya paagi sa pagtao sa sato kan gabos na probisyon na kaipuhan niato sa pagpatalubo asin pagpadanay nin diosnon na debosyon. (Santiago 4:8) Paano niato lubos na magagamit an gabos na mamomoton na probisyon na ini?
Magdanay na Makosog sa Espirituwal
11. Ano an nagkapirang kapahayagan kan satong diosnon na debosyon?
11 An satong hararom an pagkagamot na pagkamoot sa Dios mamotibar sa sato na ipaheling an rarom kan satong diosnon na debosyon, kaoyon kan hatol ni Pablo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.” (2 Timoteo 2:15) An paggibo kaini naghahagad na kita magpadanay nin marahay na kaugalean nin regular na pag-adal sa Biblia, pag-atender sa mga pagtiripon, asin pakikikabtang sa ministeryo sa langtad. Mapagdadanay man niatong dayupot kita ki Jehova paagi sa ‘pamimibi nin daing ontok.’ (1 Tesalonica 5:17) Ini makahulogan na mga kapahayagan kan satong diosnon na debosyon. An pagpabaya sa arin man kaiyan puedeng magbunga nin helang sa espirituwal asin gigibohon kitang madaling mabiktima kan mga pakana ni Satanas.—1 Pedro 5:8.
12. Paano niato mapapangganahan an mga pagbalo?
12 An pagdadanay na makosog asin aktibo sa espirituwal nagtatabang man sa sato na atubangon an dakol na pagbalo na minaagi sa sato. An mga pagbalo puedeng maggikan sa mga bagay na puedeng bumalo sa sato nin grabe. An pagkaindiperente, pagtumang, asin paglamag puedeng mas masakit tagalan kun iyan gikan sa haraning mga miembro nin pamilya, paryente, o kataraed. An daing gayo risang mga pangigipit na ikompromiso an satong Kristianong mga prinsipyo puedeng bumangon sa satong pinagtatrabawohan o sa eskuelahan. An pagkadesganar, helang, asin depresyon puedeng magpaluya sa sato sa pisikal asin gibohon na mas masakit pangganahan an mga pagbalo sa pagtubod. Alagad puede niatong mapangganahan an gabos na pagbalo kun magpapadagos kita “sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova.” (2 Pedro 3:11, 12) Asin mapagdadanay niato an satong kagayagayahan sa paggibo kaiyan, na nagsasarig sa bendisyon nin Dios.—Talinhaga 10:22.
13. Ano an dapat niatong gibohon tanganing makapadagos kita sa paggibo nin diosnon na debosyon?
13 Minsan ngani punteriya ni Satanas an mga naggigibo nin diosnon na debosyon, dai kita kaipuhan na matakot. Taano? Huli ta “si Jehova tataong magligtas sa mga tawong may diosnon na debosyon hale sa pagbalo.” (2 Pedro 2:9) Tanganing matagalan an mga pagbalo asin maeksperyensiahan an siring na pagliligtas, dapat niatong “isikwal an kabikoan asin an kinabanon na mga mawot asin mamuhay na may toltol na isip asin katanosan patin diosnon na debosyon sa tahaw kan presenteng sistemang ini nin mga bagay.” (Tito 2:12) Bilang mga Kristiano, dapat kitang magmaan tanganing an ano man na kaluyahan may labot sa makalaman na mga mawot asin aktibidad dai makaentremeter sa satong diosnon na debosyon asin raoton iyan. Pag-olayan niato ngonyan an nagkapira sa mga huma na ini.
Magmaan sa mga Huma sa Diosnon na Debosyon
14. Ano an maninigo niatong girumdomon kun kita natetentaran kan siod nin materyalismo?
14 An materyalismo siod sa dakol. Puede niatong dayaon maski an satong sadiri, sa ‘paghona na an diosnon na debosyon sarong paagi nin [materyal na] pagkinabang.’ Sa siring, puedeng magkosog an satong boot na salang aprobetsaran an tiwala nin mga kapagtubod. (1 Timoteo 6:5) Tibaad salang isipon pa ngani niato na dai man nin maraot na piriton an sarong may kayang Kristiano na pautangon kita mantang imposibleng marhay na makakabayad kita. (Salmo 37:21) Alagad an diosnon na debosyon, bakong an pagkaigwa nin materyal na mga bagay, an “may panuga sa buhay ngonyan asin sa madatong.” (1 Timoteo 4:8) Huling ‘dai kita nagdara nin ano man sa kinaban asin dai makadadara nin ano man hale dian,’ orog niatong desididong gibohon an “diosnon na debosyon kaiba an pagigin naninigoan sa sadiri” asin togotan an satong sadiri na ‘manigoan na sa kakanon asin gubing.’—1 Timoteo 6:6-11.
15. Ano an puede niatong gibohon kun an pag-aaabot sa kasingawan naghuhumang makahale kan satong diosnon na debosyon?
15 An pag-aaabot sa kasingawan puedeng makahale kan diosnon na debosyon. Ano, kaipuhan daw kitang gumibo nin tolos-tolos na pagliliwat sa bagay na ini? Totoo, may nakukuang nagkapirang pakinabang sa pisikal na pagsasanay asin pag-aling-aling. Pero, an siring na mga balos sadit kun ikokomparar sa buhay na daing katapusan. (1 Juan 2:25) Ngonyan, dakol an “mamomoton sa kasingawan imbes na mga mamomoton sa Dios, na may porma nin diosnon na debosyon alagad nagpapainda sa kapangyarihan kaiyan,” asin kaipuhan kitang rumayo sa siring na mga indibiduwal. (2 Timoteo 3:4, 5) An mga nagpapahalaga sa diosnon na debosyon “nagririmpos para sa sainda man sana nin marahay na pasisikadan para sa ngapit, tangani sindang makapangapot nin marigon sa tunay na buhay.”—1 Timoteo 6:19.
16. Anong makasalan na mga pagmawot an nakapopogol sa nagkapira na maotob an matanos na mga kahagadan nin Dios, asin paano niato madadaog an mga pagmawot na ini?
16 An pag-abuso sa inomon na de alkohol asin droga, inmoralidad, asin makasalan na mga pagmawot puedeng raoton an satong diosnon na debosyon. An pagpadara sa mga ini puedeng makaolang sa sato sa pag-otob sa matanos na mga kahagadan nin Dios. (1 Corinto 6:9, 10; 2 Corinto 7:1) Maski si Pablo nangaipong tagalan an nagpapadagos na pakikilaban sa makasalan na laman. (Roma 7:21-25) Kaipuhan an makosog na paghihingoa na haleon an salang mga pagmawot. Enot, dapat kitang magin determinadong magdanay na malinig sa moral. Sinasabihan kita ni Pablo: “Gadanon nindo . . . an mga kabtang kan saindong hawak na yaon sa ibabaw kan daga kun dapit sa pakikisaro, karigsokan, seksuwal na horot, nakakokolog na mawot, asin kaaraan, na idolatriya.” (Colosas 3:5) An paggadan sa mga kabtang kan satong hawak kun dapit sa makasalan na mga bagay nagkakaipo nin determinasyon tanganing haleon iyan, na pinapara iyan. An odok na pamibi para sa tabang nin Dios mapangyari sa sato na isikwal an salang mga pagmawot asin magibo an katanosan patin diosnon na debosyon sa tahaw kan maraot na sistemang ini nin mga bagay.
17. Paano niato maninigong mansayon an disiplina?
17 An pagkadesganar puedeng magpaluya kan satong pakatagal asin makadanyar sa satong diosnon na debosyon. An dakol sa mga lingkod ni Jehova nakaeksperyensia na nin pagkadesganar. (Bilang 11:11-15; Esdras 4:4; Jonas 4:3) An pagkadesganar nangorognang puedeng makapaluya nin biyo sa sato kun iyan may kaibang paghinanakit huli sa pakakolog sa boot niato o kun kita makosog na sinagwe o dinisiplina. Minsan siring, an pagsagwe asin disiplina ebidensia nin interes asin mamomoton na pagmakolog nin Dios. (Hebreo 12:5-7, 10, 11) An disiplina maninigo na bako sanang ibilang na padusa kundi sarong paagi nin pagpatood sa sato sa dalan nin kabanalan. Kun kita mapakumbaba, pahahalagahan asin aakoon niato an hatol, sa pakaaram na “an mga pagsagwe nin disiplina iyo an dalan nin buhay.” (Talinhaga 6:23) Makatatabang ini sa sato na gumibo nin marahay na pag-oswag sa espirituwal sa paggibo nin diosnon na debosyon.
18. Ano an paninimbagan niato kun dapit sa personal na mga kolog nin boot?
18 An mga dai pagkasinabotan asin personal na kolog nin boot puedeng magin angat sa satong diosnon na debosyon. Puede iyan na magbunga nin kahaditan o magtulod sa nagkapira na may kamangmangan na isuhay an saindang sadiri sa saindang espirituwal na mga tugang na lalaki asin babae. (Talinhaga 18:1) Alagad marahay na girumdomon na an padagos na paghinanakit o pagtanom nin karaotan nin boot sa iba puedeng makaraot sa satong relasyon ki Jehova. (Levitico 19:18) Sa katunayan, “an dai namomoot sa saiyang tugang, na saiyang naheheling, dai makahihimong mamoot sa Dios, na dai nia naheheling.” (1 Juan 4:20) Sa saiyang Sermon sa Bukid, idinoon ni Jesus an pangangaipo na gumibo tolos-tolos nin paagi na husayon an personal na mga problema. Sinabihan nia an mga nagdadangog sa saiya: “Kun siring, kun dinadara mo an saimong regalo sa altar asin dian saimong magirumdoman na an saimong tugang igwa nin tumang sa saimo, bayaan mo nguna an saimong regalo sa atubangan kan altar, asin maghale ka; makipagkatoninongan ka nguna sa saimong tugang, dangan, kun nakabalik ka na, idolot mo na an saimong regalo.” (Mateo 5:23, 24) An paghagad nin dispensasyon puedeng makatabang na mapila an lugad na bunga nin bakong maboot na pananaram o paghiro. Puedeng maomayan an danyos asin ikabalik an matoninong na relasyon kun kita mahagad nin tawad asin aadmitiron ta na napasala kita. Nagtao man si Jesus nin iba pang hatol dapit sa paghusay sa mga problema. (Mateo 18:15-17) Abaang ogma niato kun nagigin mapanggana an mga paghihingoa na husayon an mga problema!—Roma 12:18; Efeso 4:26, 27.
Arogon an Halimbawa ni Jesus
19. Taano ta importanteng marhay na arogon an halimbawa ni Jesus?
19 Talagang maagi kita nin mga pagbalo, alagad dai iyan kaipuhan na makapasuki sa sato sa paorumbasan para sa buhay na daing katapusan. Girumdomon na puede kitang iligtas ni Jehova sa pagbalo. Mantang ‘binabayaan ta an gabos na kagabatan’ asin ‘nagdadalagan na may pakatagal sa paorumbasan na ibinugtak sa atubangan ta,’ kita ‘magheling nin maingat sa Pangenot na Ahente asin Parasangkap kan satong pagtubod, si Jesus.’ (Hebreo 12:1-3) An maingat na pagsiyasat sa halimbawa ni Jesus asin paghihingoang arogon sia sa tataramon asin gibo matabang sa sato na kultibaron an diosnon na debosyon asin ipaheling iyan nin orog pa.
20. Anong mga balos an ibinubunga nin pagtagal asin paggibo nin diosnon na debosyon?
20 Magkatabang an pakatagal asin diosnon na debosyon sa pagsegurado kan satong kaligtasan. Paagi sa pagpaheling kan mahalagang marhay na mga kualidad na ini, ikakapadagos niato nin fiel an satong sagradong paglilingkod sa Dios. Dawa binabalo, mapapasatuya an kaogmahan mantang naeeksperyensiahan niato an mamomoton na kapadangatan asin bendisyon ni Jehova huli ta kita nakatagal asin naggigibo nin diosnon na debosyon. (Santiago 5:11) Dugang pa, si Jesus mismo inaasegurar kita: “Huli sa saindong pakatagal makakamtan nindo an saindong kalag.”—Lucas 21:19.
Ano an Isisimbag Nindo?
• Taano ta importante an pakatagal?
• Ano an diosnon na debosyon, asin paano iyan ipinaheheling?
• Paano niato mapatatalubo asin mapagdadanay an dayupot na relasyon sa Dios?
• Ano an nagkapirang huma sa satong diosnon na debosyon, asin paano niato iyan malilikayan?
[Mga Hapot Para sa Pag-adal]
[Mga ritrato sa pahina 12, 13]
An diosnon na debosyon ipinaheheling sa dakol na paagi
[Mga ritrato sa pahina 14]
Magmaan sa mga huma sa saindong diosnon na debosyon