Bareta kan mga Parabalangibog kan Kahadean

‘An Tataramon nin Dios Mapuersa’

SA MASALDANG na isla nin Jamaica sa Caribe, an kadaklan na tawo pamilyar sa Biblia. Sa katunayan, an King James Version manonompongan sa haros lambang harong, asin naeksperyensiahan kan nagkapira na “an tataramon nin Dios buhay asin mapuersa.” (Hebreo 4:12) An puersang ini nakapababago sa buhay, arog kan halimbawa na ipinaheheling sa minasunod na eksperyensia.

An sarong lalaki na an ngaran Cleveland kapupuli pa sana sa harong hale sa trabaho kan an saro sa Mga Saksi ni Jehova nagsongko sa saiya. Pakapaghiras nin nagkapirang punto hale sa Kasuratan, iwinalat saiya kan Saksi an pantabang sa pag-adal kan Biblia na Kaaraman na Minagiya Pasiring sa Buhay na Daing Katapusan. Mayong aram si Cleveland kun gurano kamagigin mapuersa kan Tataramon nin Dios sa buhay nia.

Kinatodan na ni Cleveland na mamibi nin tolong beses kada aldaw, na hinahagad sa Dios na tabangan siang manompongan an tamang paagi sa pagsamba sa Saiya. Kombensido si Cleveland na an saiyang mga magurang dai nagsasamba sa tamang paagi, alagad pagkatapos na magsiyasat sa iba pang relihion, sia nadesganar. Minsan ngani nadangog na nia an manongod sa Mga Saksi ni Jehova, duda sia kun baga yaon sa sainda an katotoohan. Sa ibong kan saiyang pagduda, nagtogot si Cleveland na makipag-adal sa Biblia sa Saksi na nagsongko sa saiya. Taano man? Huli ta gusto niang patunayan na sala an mga Saksi!

Dai nahaloy naaraman ni Cleveland na ikinaaanggot nin Dios an inmoral na relasyon nia sa duwang magkalaen na babae. (1 Corinto 6:​9, 10) Pakalihis sana nin duwang pag-adal, nagkaigwa sia nin kosog nin boot na taposon an saiyang relasyon sa mga babaeng iyan. Nagpoon na man siang mag-atender sa Kristianong mga pagtiripon sa Kingdom Hall. Alagad ini nagin saro pang pagbalo.

Si Cleveland imbueltong marhay sa grupo sa putbol sa saiyang komunidad, asin an mga kawat kaiyan nakakaolang sa pag-atender nia sa pagtiripon. Ano an gigibohon nia? Sa ibong kan grabeng pangigipit kan saiyang kairiba sa grupo, instruktor, asin mga katood, nagdesisyon si Cleveland na humale sa grupo sa putbol. Iyo, an Tataramon nin Dios nagpopoon nang magin mapuersa, na iniimpluwensiahan sia sa ikararahay!

An puersa kan Tataramon nin Dios nagin risang-risa giraray kan magpoon na ihiras ni Cleveland sa iba an saiyang kaaraman sa Biblia. (Gibo 1:8) Bilang resulta, duwa kan saiyang dating kagrupo an nagpoon nang mag-atender sa mga pagtiripon kan Mga Saksi ni Jehova. Pagkatapos na makualipikar si Cleveland na magin parahayag kan maogmang bareta, naeksperyensiahan nia an dakulang kagayagayahan sa ministeryo, na ginagamit an Tataramon nin Dios sa pagtabang sa iba.

Huling padagos na pinahihiro kan puersa kan Tataramon nin Dios, sa kahurihurihi sinimbolisaran ni Cleveland an saiyang pagdusay ki Jehova paagi sa pagpabautismo sa tubig asin nagkapribilehiong maglingkod bilang bilog na panahon na ministro asin ministeryal na lingkod sa kongregasyon.

Sa Jamaica asin sa bilog na kinaban, rinibong tawo an nakaaram na, tunay nanggad, an Tataramon nin Dios “buhay asin mapuersa.”

[Mapa/Ritrato sa pahina 8]

(Para sa aktuwal na format, hilingon an publikasyon)

JAMAICA

[Credit Line]

Mapa asin globo: Mountain High Maps® Copyright © 1997 Digital Wisdom, Inc.