Maigot na Paghihingoa—Noarin Iyan Binebendisyonan ni Jehova?

“BUTASI na ako, ta maagahon na.”

“Dai taka bubutasan sagkod na bendisyonan mo nguna ako.”

“Ano an ngaran mo?”

“Jacob.”

“An saimong ngaran dai na aapodon na Jacob kundi Israel huli ta ika nakipaglaban sa Dios asin sa mga tawo asin sa katapustapusi ika nanggana.”​—Genesis 32:26-28.

An interesanteng pag-oolay na iyan resulta nin pambihirang pagpaheling nin atletikong liksi kan 97 anyos na si Jacob. Minsan ngani dai man sia ilinaladawan kan Biblia na sarong atleta, sia nakipaggumolan, o nakipagtusayan, sa bilog na banggi sa sarong anghel. Taano man? Biyong interesado si Jacob sa panuga ni Jehova sa saiyang apoon​​—an saiyang mana.

Dakol na taon bago kaidto ipinatunod ki Jacob kan saiyang tugang na si Esau an deretso nin pagigin panganay karibay nin sarong mangko nin linaga. Ngonyan nabaretaan ni Jacob na si Esau padangadang na may kaibang 400 na tawohan. Natural sanang nahahadit, gustong makompirmar ni Jacob an panuga ni Jehova na an saiyang pamilya magigin mapanggana sa daga na yaon sa ibong kan Salog nin Jordan. Kaoyon kan saiyang mga pamibi, si Jacob desididong naghiro. Nagpadara sia nin dakol na regalo sa padangadang na si Esau. Guminibo man sia nin mga aksion bilang pagdepensa, na binanga sa duwa an saiyang kampo asin ibinalyo an saiyang mga agom asin aki sa dakitan nin Jabok. Paagi sa daing kapagalan na paghihingoa asin dakol na pagluha, dinugangan pa nia an saiyang paghihingoa ngonyan paagi sa pakipagtusayan sa bilog na banggi sa sarong anghel tanganing “makimaherak para sa saiyang sadiri.”​—Oseas 12:4; Genesis 32:1-32.

Estudyare an mas naenot na halimbawa, si Raquel, an ikaduwang agom asin enot na namomotan ni Jacob. Aram na marhay ni Raquel an panuga ni Jehova na bebendisyonan si Jacob. An saiyang tugang na si Lea, an enot na agom ni Jacob, binendisyonan nin apat na aking lalaki mantang si Raquel nagdanay na baog. (Genesis 29:31-35) Imbes na magpadaog sa pagkaherak sa sadiri, padagos siang nakimaherak ki Jehova sa pamibi asin positibong naghiro kaoyon kan saiyang mga pamibi. Arog kan ginibo kan saiyang apoon na si Sara ki Agar, dinara ni Raquel an saiyang surugoon na si Bilha asin itinao ini ki Jacob bilang panduwang agom tangani na, arog kan sabi ni Raquel, “Ako, pati  ako, magkaigwa nin mga aki hale sa saiya.” a Si Bilha nagkaaki nin duwang aking lalaki ki Jacob​—si Dan asin Neftali. Kan mamundag si Neftali ipinahayag ni Raquel kun sagkod saen an saiyang emosyonal na paghihingoa: “Paagi sa daing kapagalan na pakikigumol ako nakipaggumolan sa sakong tugang. Ako nanggana man!” Si Raquel binendisyonan pa nin duwang aking lalaki na saiya mismo, si Jose asin Benjamin.​—Genesis 30:1-8; 35:24.

Taano ta binendisyonan ni Jehova an pisikal asin emosyonal na mga paghihingoa ni Jacob asin Raquel? Pinagdanay nindang pangenot an kabotan ni Jehova asin minahal ninda an saindang mana. Namibi sinda nin odok para sa saiyang bendisyon sa saindang buhay asin positibong naghiro kaoyon kan kabotan nin Dios asin kan sainda mismong mga pakimaherak.

Arog ni Jacob asin Raquel, dakol an makakapatotoo ngonyan na kaipuhan an maigot na paghihingoa tanganing maako an bendisyon ni Jehova. An saindang mga paghihingoa parateng may kaibang mga pagluha, panluluya kan boot, asin pagkadesganar. Nagigirumdoman nin sarong Kristianang ina, si Elizabeth, an maigot na paghihingoang kinaipuhan tanganing makaatender liwat nin regular sa Kristianong mga pagtiripon pakalihis nin haloy na dai pag-atender. Dakulang angat an pagkaigwa nin limang saradit na aking lalaki, daing pagtubod na agom na lalaki, asin pagmaneho nin 30 kilometros pasiring sa pinakaharaning Kingdom Hall. “An pagmamaigot na makaatender sa mga pagtiripon nin regular nangangaipo nin dakulang pagdisiplina sa sadiri, na aram kong kapakipakinabang para sa sako asin sa mga aki ko. Natabangan sinda kaiyan na maheling na ini an dalan na may pakinabang na pag-aaboton.” Binendisyonan ni Jehova an saiyang mga paghihingoa. Sa tolong aki nia na aktibo sa Kristianong kongregasyon, duwa an yaon sa bilog na panahon na ministeryo. Naggagayagaya sa saindang espirituwal na pag-oswag, sia nagsabi: “Nalabihan ninda ako sa espirituwal na pag-oswag.” Kanigoan na bendisyon sa saiyang maigot na paghihingoa!

Maigot na Paghihingoa na Binebendisyonan ni Jehova

An maigot na paghihingoa asin paghigos seguradong igwa nin mga balos. Mientras na dakula an paghihingoa niato sa sarong proyekto o asignasyon, orog man na satispaksion an naaako niato. Arog kaini an pagkagibo sa sato ni Jehova. “An lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios,” an isinurat ni Hadeng Salomon. (Eclesiastes 3:13; 5:​18, 19) Pero tanganing mag-ako nin bendisyon hale sa Dios, dapat na seguradohon niato na tama an satong mga pinaghihingoahan. Halimbawa, rasonable daw na asahan na bebendisyonan ni Jehova an sarong estilo nin pamumuhay na ilinalaag an espirituwal na mga bagay sa sekondaryong lugar? Makaaasa daw nin pag-oyon ni Jehova an sarong nagdusay na Kristiano kun akoon nia an trabaho o pag-asenso sa ranggo na magigin dahelan nin pagpalta nin regular sa nakapakokosog sa pagtubod na pakikiasosyar asin pagtotokdo sa Kristianong mga pagtiripon?​—Hebreo 10:23-25.

An bilog na buhay na paghigos huli sa pag-aaabot sa sarong sekular na karera o materyal na prosperidad dai pirmeng mangangahulogan na an saro “makaheheling nin marahay” kun iyan gigibohon na ipinupuera na an espirituwal na mga bagay. Ilinadawan ni Jesus sa saiyang ilustrasyon kan parasabwag an mga resulta nin salang obheto nin paghihingoa. Mapadapit sa banhi na “nakasabwag sa matonok,” ipinaliwanag ni Jesus na “ini an nagdadangog kan tataramon, alagad an kahaditan kan sistemang ini nin mga bagay asin an mapandayang kapangyarihan nin kayamanan minalamos kan tataramon, asin dai sia nagbunga.” (Mateo 13:22) Nagpatanid man si Pablo dapit sa iyo man sanang siod asin nagsabi pa na an mga nag-aaabot sa materyalistikong pamumuhay “nahoholog sa sugot asin sa siod patin sa dakol na daing isip asin nakararaot  na mawot, na nagdadara sa mga tawo sa kalaglagan asin kapahamakan.” Ano an remedyo sa siring na pamumuhay na nakakaraot sa espirituwal? Ipinadagos ni Pablo: ‘Dumulag kamo sa mga bagay na ini asin ibugtak an saindong paglaom, bakong sa kayamanan na bakong segurado, kundi sa Dios, na mayaman na nagtatao sa sato kan gabos na bagay para sa satong pagkaogma.’​—1 Timoteo 6:​9, 11, 17.

Ano man an satong edad o gurano man kita kahaloy nang naglilingkod ki Jehova, gabos kita makikinabang sa pag-arog sa maigot na paghihingoa na ipinaheling ni Jacob asin Raquel. Sa paghingoa ninda na makamtan an pag-oyon nin Dios, nungka nindang linilingawan an saindang mana, gurano man tibaad kanakatatakot o nakapanluluya sa boot an saindang mga sirkunstansia. Ngonyan, an mga pangigipit asin kadepisilan na inaatubang niato tibaad siring man kaiyan kanakatatakot, nakapanluluya sa boot, o nagtatao nin makuring kamondoan pa ngani. An sugot iyo na umontok sa pakikipaglaban asin magin saro pang biktima kan pananalakay ni Satanas. Puede niang gamiton an ano man na paaging magagamit nia, magin man iyan aling-alingan o dibersion, isport o apisyon, karera o materyal na prosperidad, tanganing magibo an saiyang katuyohan. Kawiliwiling mga resulta an parateng ipinanunuga alagad bihirang maotob. An mga nadadaya o natetentaran na magpadara sa arog kaiyan na mga pinag-aaabot parateng marhay na nanonompongan na sa kadaklan iyan minasagkod sa pagkadesganar. Arog ni Jacob asin Raquel kan suanoy, kultibaron niato an espiritu nin sarong maigot na parapakilaban asin pangganahan an mga pakana ni Satanas.

Gustong marhay kan Diablo na maheling kitang nagpapadaog na sana, na makamate na an ‘situwasyon dai nang paglaom. Mayo nang puedeng magibo. Mayo nang serbi an maghingoa.’ Mahalagang marhay, kun siring, na gabos kita magmaan tumang sa pagkaigwa nin dai na maliliwat na aktitud, na nagsasaboot na ‘mayo nin namomoot sa sako’ asin ‘nalingawan na ako ni Jehova.’ An pagpadaog sa arog kaiyan na kaisipan makakaraot sa sadiri. Ipinaririsa daw kaiyan na puminondo na kita asin dai na nakikipaglaban sagkod na maako niato an bendisyon? Girumdomon, binebendisyonan ni Jehova an satong maigot na paghihingoa.

Magdanay na Nakikipaglaban Para sa Bendisyon ni Jehova

An satong espirituwal na ikararahay nakadepende sa dakulang kabtang sa satong pakasabot sa duwang pundamental na katotoohan manongod sa buhay niato bilang lingkod ni Jehova. (1) Mayo ni saro na iyo sana an igwa nin mga problema, kamatean, o depisil na situwasyon sa buhay, asin (2) dinadangog ni Jehova an mga pagtangis kan mga maigot na nakikimaherak para sa saiyang tabang asin bendisyon.​—Exodo 3:7-10; Santiago 4:​8, 10; 1 Pedro 5:​8, 9.

Gurano man kadepisil kan saindong sirkunstansia o gurano man tibaad kalimitado kan saindong magigibo sa pagmate nindo, dai kamo magpadaog sa “kasalan na pasil sanang nakagagapos sa sato”​​—an kadaihan nin pagtubod. (Hebreo 12:1) Padagos kamong makipaglaban sagkod na maako nindo an bendisyon. Magin mapasensia, na ginigirumdom an gurang nang si Jacob, na nakipaggumolan sa bilog na banggi para sa bendisyon. Arog kan paraoma na nagsasabwag sa tigsoli asin naghahalat sa tig-ani, pasensiosong umasa sa bendisyon ni Jehova sa espirituwal na mga aktibidad nindo, gurano man kalimitado sa pagmate nindo kan aktibidad nindo. (Santiago 5:​7, 8) Asin perming girumdomon an mga tataramon kan salmista: “An mga nagsasabwag nin banhi na may mga luha mag-aaraning may magayagayang kurahaw.” (Salmo 126:5; Galacia 6:9) Manindogan na marigon, asin magdanay na kabilang sa mga nakikipaglaban.

[Nota sa Ibaba]