Napahiro kan “Makangangalas na mga Bagay nin Dios”

“Nadadangog niato sindang nagtataram sa satong mga tataramon dapit sa makangangalas na mga bagay nin Dios.”​—GIBO 2:11.

1, 2. Ano an makangangalas na nangyari sa Jerusalem kan Pentecostes 33 C.E.?

 SARONG aga kan huring kabtang nin tigsoli kan taon 33 C.E., may makangangalas na nangyari sa sarong grupo nin mga lalaki asin babae, mga disipulo ni Jesu-Cristo na nagkatiripon sa sarong pribadong harong sa Jerusalem. “Sa panale nagdatong hale sa langit an ribok na siring sa hagobohob nin makosog na doros, asin iyan nakapano sa bilog na harong na saindang tinutukawan. Asin an mga dila na garo kalayo naheling ninda . . . , asin sinda gabos nagkaparano nin banal na espiritu asin nagpoon na magtaram nin manlaenlaen na tataramon.”​—Gibo 2:2-4, 15.

² Sarong dakulang kadaklan an nagkatiripon sa atubangan kan harong. Kabilang sa sainda an mga Judiong namundag sa ibang nasyon, “reberenteng mga lalaki” na nagdatong sa Jerusalem tanganing iselebrar an kapiestahan nin Pentecostes. Napangalas sinda huli ta nadangog kan lambang saro sa sainda an mga disipulo na nagtataram sa saiyang sadiring tataramon “dapit sa makangangalas na mga bagay nin Dios.” Paano nangyari iyan mantang an mga nagtataram gabos taga Galilea?​—Gibo 2:5-8, 11.

3. Anong mensahe an ipinaabot ni apostol Pedro sa mga kadaklan kaidtong Pentecostes?

³ An saro sa mga taga Galilea na idto iyo si apostol Pedro. Ipinaliwanag nia na pirang semana na an nakaagi, si Jesu-Cristo ginadan nin maraot na mga tawo. Minsan siring, ibinangon nin Dios an saiyang Aki hale sa mga gadan. Pakatapos kaiyan, nagpaheling si Jesus sa dakol kan saiyang mga disipulo, kabale si Pedro asin iba pa na presente ngonyan. Sampulong aldaw sana bago kaini, si Jesus nagsakat sa langit. Sia an nagbubo kan banal na espiritu sa saiyang mga disipulo. Igwa daw ini nin ano man na implikasyon sa mga nagselebrar kan Pentecostes? Igwa nanggad. An kagadanan ni Jesus an nagin basehan tanganing magkamit sinda nin kapatawadan sa saindang mga kasalan asin mag-ako kan “daing bayad na balaog kan banal na espiritu” kun sinda naggigibo nin pagtubod sa saiya. (Gibo 2:22-24, 32, 33, 38) Kaya ano an nagin reaksion kan mga nagmamasid na idto dapit sa “makangangalas na mga bagay nin Dios” na saindang nadangog? Asin paano makatatabang sa sato an pagkasaysay na ini na ebalwaron an sato mismong paglilingkod ki Jehova?

Napahiro!

4. Anong hula ni Joel an naotob kan aldaw nin Pentecostes 33 C.E.?

⁴ Huling nag-ako kan banal na espiritu, an mga disipulo sa Jerusalem dai nagsayang nin panahon na ihiras sa iba an maogmang bareta nin kaligtasan, magpoon sa kadaklan na nagkatiripon kan agang idto. An saindang paghuhulit uminotob sa sarong pambihirang hula, na isinurat ni Joel, na aki ni Petuel, kaidtong walong siglo na an nakaagi: “Ibububo ko an sakong espiritu sa gabos na klase nin laman, asin an saindong mga aking lalaki asin an saindong mga aking babae maghuhurula nanggad. Kun manongod sa saindong gurang na mga lalaki, mangangatorogan sinda nin mga pangatorogan. Kun manongod sa saindong hoben na mga lalaki, makakaheling sinda nin mga bisyon. Asin pati sa mga oripon na lalaki asin sa mga oripon na babae sa mga aldaw na iyan ibububo ko an sakuyang espiritu . . . bago an pagdatong kan dakula asin makangingirhat na aldaw ni Jehova.”​—Joel 1:1; 2:​28, 29, 31; Gibo 2:​17, 18, 20.

5. Sa anong sentido naghula an mga Kristiano kan enot na siglo? (Helingon an nota sa ibaba.)

⁵ An boot daw sabihon kaini an Dios magbabangon nin sarong bilog na kapag-arakian nin mga propeta, lalaki sagkod babae, kapareho ni David, Joel, asin Debora, asin gagamiton sinda tanganing ihula an mga mangyayari sa ngapit? Dai. An Kristianong ‘mga aking lalaki asin babae, mga oripon na lalaki asin mga oripon na babae’ maghuhula sa sentido na itutulod sinda kan espiritu ni Jehova na ipahayag an “makangangalas na mga bagay” na ginibo asin gigibohon pa ni Jehova. Kaya maserbi sindang mga representante sa pagtaram kan Kaharohalangkawe sa Gabos. a Pero ano an reaksion kan kadaklan?​— Hebreo 1:​1, 2.

6. Pakadangog kan diskurso ni Pedro, an dakol sa kadaklan napahiro na gibohon an ano?

⁶ Pagkadangog kan kadaklan sa paliwanag ni Pedro, an dakol sa sainda napahiro. Sinda “maogmang nag-ako kan saiyang tataramon” asin “binautismohan, asin sa aldaw na idto mga tolong ribong kalag an nakadugang.” (Gibo 2:41) Bilang mga Judio sa laman asin Judiong proselito, igwa na sinda dati nin pundamental na kaaraman sa Kasuratan. Iyan, kaiba an pagtubod sa nanodan ninda ki Pedro, an nagin basehan na sinda mabautismohan “sa ngaran kan Ama asin kan Aki patin kan banal na espiritu.” (Mateo 28:19) Pakatapos kan saindang bautismo “sinda nagpadagos sa pagdusay kan saindang sadiri sa katokdoan kan mga apostol.” Kadungan  kaiyan, pinonan nindang ihiras sa iba an saindang bagong manompongan na pagtubod. Sa katunayan, “aroaldaw sinda danay na nasa templo na may pagkasararo, . . . na nag-oomaw sa Dios asin nakakukua nin pabor sa bilog na banwaan.” Bilang resulta kan aktibidad na ini sa paghuhulit, “padagos na idinudugang sa sainda ni Jehova aroaldaw an mga naliligtas.” (Gibo 2:​42, 46, 47) Nagralataw an Kristianong mga kongregasyon sa dakol na kadagaan na ineerokan kan mga bagohan na ini. Daing duda na an pagdakol na ini, kisuerra sa sarong kabtang, resulta kan saindang maigot na mga paghihingoa na ihulit an “maogmang bareta” pagpuli ninda.​—Colosas 1:23.

An Tataramon nin Dios Mapuersa

7. (a) Ano an nakaaatraer sa mga tawo sa gabos na nasyon pasiring sa organisasyon ni Jehova ngonyan? (b) Anong potensial para sa dugang pang pag-oswag an naheheling nindo sa pambilog na kinaban na langtad asin sa lokal? (Helingon an nota sa ibaba.)

⁷ Kumusta man an mga nagmamaigot na magin lingkod nin Dios ngonyan? Kaipuhan man nindang maingat na pag-adalan an Tataramon nin Dios. Mantang ginigibo ninda iyan, namimidbid ninda si Jehova bilang Dios na “maheherakon asin maugayon, maluway sa pagkaanggot asin abunda sa mamomoton na kabootan asin katotoohan.” (Exodo 34:6; Gibo 13:48) Nanonodan ninda an dapit sa maboot na probisyon ni Jehova na pantubos paagi ki Jesu-Cristo, na an pinabulos na dugo puedeng maglinig sa sainda sa gabos na kasalan. (1 Juan 1:7) Inaapresyar man ninda an katuyohan nin Dios na magkaigwa nin “pagkabuhay liwat an mga matanos sagkod an mga bakong matanos.” (Gibo 24:15) Pano sinda nin pagkamoot sa Gikanan kan “makangangalas na mga bagay” na ini, asin napahihiro sinda na ihulit an mahalagang marhay na mga katotoohan na ini. Dangan sinda nagigin dusay, bautisadong mga lingkod nin Dios asin padagos na “nag-ooswag sa tamang kaaraman dapit sa Dios.” b​—Colosas 1:10b; 2 Corinto 5:14.

8-10. (a) Paano pinatutunayan kan eksperyensia nin sarong Kristiana na an Tataramon nin Dios “mapuersa”? (b) Ano an itinotokdo sa saindo kan eksperyensiang ini manongod ki Jehova asin sa pagtratar nia sa saiyang mga lingkod? (Exodo 4:12)

⁸ An kaaraman na nakukua kan mga lingkod nin Dios gikan sa saindang pag-adal sa Biblia bakong hababaw. Pinahihiro kan siring na kaaraman an saindang puso, binabago an saindang pag-iisip, asin nagigin kabtang ninda. (Hebreo 4:12) Halimbawa, an sarong babae na an ngaran Camille nagtatrabaho bilang paraasikaso sa mga may edad na. Saro sa mga inaasikaso nia si Martha, saro sa Mga Saksi ni Jehova. Huling si Martha apektado nin grabeng pagkaraot nin isip, sia nangangaipo nin dayaday na pagbantay. Kaipuhan siang pagirumdomon na kumakan​—na halonon pa ngani an saiyang pagkakan. Minsan siring, sarong bagay an dai mahahale an pagkatadom sa isip ni Martha, siring kan maheheling niato.

⁹ Sarong aldaw, naheling ni Martha si Camille na naghihibi huli sa pagkapurisaw sa sarong personal na problema. Kinugos ni Martha si Camille asin inagda ini na makipag-adal sa saiya sa Biblia. Alagad puede daw na mamayo nin pag-adal sa Biblia an sarong tawo na siring ki Martha an kamugtakan? Iyo, magigibo nia! Minsan ngani dakol na an nawara sa saiyang memorya, dai nalingawan ni Martha an saiyang makangangalas na Dios; ni nalingawan nia an mahalagang marhay na mga katotoohan na nanodan nia sa Biblia. Durante kan pag-adal, pinapabasa ni Martha ki Camille an kada parapo, pinabubuksan an sitadong mga teksto, pinapabasa an hapot sa ibaba kan pahina, dangan pinasisimbag iyan. Nagpadagos ini sa laog nin pirang panahon, asin apisar kan mga limitasyon ni Martha, si Camille nag-oswag sa kaaraman sa Biblia. Aram ni Martha na kaipuhan ni Camille na makiasosyar sa iba na interesadong maglingkod sa Dios. Nasa isip iyan, tinawan nia an saiyang inaadalan nin bado asin sapatos, tanganing igwa si Camille nin angay na ikakasulot sa enot niang pag-atender sa pagtiripon sa Kingdom Hall.

¹⁰ Napahiro si Camille kan mamomoton na interes, halimbawa, asin kombiksion ni Martha. Ikinonklusyon nia na an pinagmamaigotan ni Martha na itokdo sa saiya gikan sa Biblia mahalagang  marhay, huling haros gabos na bagay nalingawan na ni Martha apuera sa nanodan nia sa Kasuratan. Kan huri, kan si Camille ibalyo sa saro pang institusyon, narealisar nia na panahon nang sia humiro. Sa enot na oportunidad, nagduman sia sa sarong Kingdom Hall, sulot an bado asin sapatos na itinao sa saiya ni Martha, asin nakiolay na adalan sia sa Biblia. Marahay an pag-oswag ni Camille asin nabautismohan.

Napahiro na Ipabanaag an mga Pamantayan ni Jehova

11. Apuera sa pagigin maigot sa paghuhulit, paano niato ikapaheheling na kita napahiro kan mensahe kan Kahadean?

¹¹ Ngonyan, igwa na nin labing anom na milyon na Saksi ni Jehova na, arog ki Martha asin ngonyan ki Camille, naghuhulit kan ‘maogmang bareta kan kahadean’ sa bilog na kinaban. (Mateo 24:14; 28:​19, 20) Arog kan mga Kristiano kan enot na siglo, sinda odok na napahihiro kan “makangangalas na mga bagay nin Dios.” Inaapresyar ninda na sinda nagkapribilehio na magdara kan ngaran ni Jehova asin na ibinubo nia an saiyang espiritu sa sainda. Bilang resulta, ginigibo ninda an gabos na paghihingoa “tanganing maglakaw na angay ki Jehova sa katuyohan na lubos na makapaogma sa saiya,” na iinaaplikar an saiyang mga pamantayan sa lambang aspekto kan saindang buhay. Kabale sa mga bagay na ini an paggalang sa mga pamantayan nin Dios sa paggubing asin pag-alinyar.​—Colosas 1:10a; Tito 2:10.

12. Anong espesipikong hatol dapit sa paggubing asin pag-alinyar an maheheling niatong nakasurat sa 1 Timoteo 2:​9, 10?

¹² Iyo, nagbugtak si Jehova nin mga pamantayan may labot sa satong personal na itsura. Sinabi ni apostol Pablo an nagkapira sa mga kahagadan nin Dios sa bagay na ini. “Sakuyang minamawot na an mga babae magsamno sa saindang sadiri nin husay na gubing, na may kabinian asin toltol na isip, bakong nin mga estilo nin mga pagsalapid nin buhok asin bulawan o perlas o mamahalon na gayong gubing, kundi sa paagi na angay sa mga babae na naghihingakong sinda may reberensia sa Dios, arin na  baga, paagi sa marahay na mga gibo.” c Ano an manonodan niato sa mga tataramon na ini?​—1 Timoteo 2:​9, 10.

13. (a) Ano an boot sabihon nin “husay na gubing”? (b) Taano ta masasabi niato na rasonable an mga pamantayan ni Jehova?

¹³ An mga tataramon ni Pablo nagpapaheling na an mga Kristiano maninigo na “magsamno sa saindang sadiri nin husay na gubing.” Dai sinda dapat na magin pabaya, bagla, o daing kahusayan sa saindang itsura. Haros gabos, dawa an mga tios, makakaabot sa siring na rasonableng mga pamantayan paagi sa pagsegurado na an saindang gubing husay, malinig, asin presentable. Halimbawa, kada taon an mga Saksi sa sarong nasyon sa Amerika del Sur naglalakaw nin dakol na kilometro na nangangaragi sa kadlagan dangan nagbabangka nin dakol na oras tanganing umatender sa saindang pandistritong kombension. Normal nang may nahoholog sa salog o nasasabit an bado sa palongpong mantang nagbibiahe. Kaya pag-abot kan mga kombensionista sa lugar na pagkokombensionan, an saindang itsura sa parate medyo daing kahusayan. Kun siring tinatawan ninda nin panahon na itahi an mga butones, hirahayon an mga siper, asin labahan patin plantsahon an mga gubing na isusulot ninda sa kombension. Pinahahalagahan nindang marhay an imbitasyon sa sainda na kumakan sa lamesa ni Jehova, asin boot nindang maggubing nin angay.

14. (a) Ano an boot sabihon nin paggubing na “may kabinian asin toltol na isip”? (b) Ano an kalabot sa satong paggubing ‘bilang mga tawo na naghihingakong may reberensia sa Dios’?

¹⁴ Sinabi pa ni Pablo na maninigo kitang maggubing na “may kabinian asin toltol na isip.” Nangangahulogan ini na an satong itsura maninigo na bakong mapagpasikat, palaen an estilo, nakapupukaw, garo kinulang nin tela, o masyadong sunod sa moda. Dugang pa, maninigo kitang maggubing sa paagi na nagpapabanaag nin “reberensia sa Dios.” Dapat iyan na pag-isipan, bako daw? An kalabot dian bakong paggubing sana nin angay kun nag-aatender sa mga pagtiripon kan kongregasyon dangan dai na nagmamaan sa ibang mga panahon. An satong personal na itsura maninigo na pirmeng magpabanaag nin pagigin kagalanggalang asin may onra huli ta kita mga Kristiano asin ministro sa laog nin 24 oras. Siempre pa, an satong mga badong pantrabaho asin pan-eskuela ibabagay niato sa trabahong gigibohon niato. Pero, maninigo kitang maggubing na may kabinian asin dignidad. Kun an satong gubing pirmeng nagpapabanaag kan satong pagtubod sa Dios, nungka kitang makakamateng napopogolan na magpatotoo sa impormal huli ta nasusupog kita sa satong itsura.​—1 Pedro 3:15.

“Dai Kamo Mamoot sa Kinaban”

15, 16. (a) Taano ta mahalaga na likayan niato an pag-arog sa kinaban may labot sa paggubing asin pag-alinyar? (1 Juan 5:19) (b) Huli sa anong praktikal na dahelan maninigo niatong likayan an mga uso sa paggubing asin pag-alinyar?

¹⁵ An hatol na nakasurat sa 1 Juan 2:​15, 16 nagtatao man nin giya sa satong pagpili nin gubing asin pag-alinyar. Satong mababasa: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban​​—an mawot kan laman asin an mawot kan mga  mata asin an pagpaabaw-abaw kan kaya sa buhay​​—bakong gikan sa Ama, kundi gikan sa kinaban.”

¹⁶ Kanigoan kanapapanahon kan hatol na iyan! Sa panahon na ini na an pangigipit nin kairiba mas makosog, dai niato dapat pagtogotan an kinaban na iyong magdikta sa satong igugubing. An mga estilo nin paggubing asin pag-alinyar nagruro sa nakaagi pa sanang mga taon. Maski an pamantayan sa paggubing nin mga negosyante asin propesyonal bakong pirmeng iyo an masasarigan na pamantayan sa kun ano an angay para sa mga Kristiano. Dugang pa ining dahelan kun taano ta maninigo niatong pirmeng isipon an pangangaipo na ‘dai na magpamolde sa sistemang ini nin mga bagay’ tanganing kita makapamuhay sono sa mga pamantayan nin Dios asin sa siring ‘masamnohan an katokdoan kan satong Paraligtas, an Dios, sa gabos na bagay.’​—Roma 12:2; Tito 2:10.

17. (a) Anong mga hapot an puede niatong estudyaran kun namamakal nin gubing o nagpipili nin estilo? (b) Taano ta maninigong magreparo an mga payo nin pamilya sa personal na itsura kan mga miembro nin pamilya?

¹⁷ Bago magdesisyon kun baga babakalon an sarong gubing, madonong na hapoton an saindong sadiri: ‘Taano ta nagugustohan ko an estilong ini? Iyan daw midbid na konektadong marhay sa sarong bantog na enterteyner​—saro na hinahangaan ko? Ginagamit daw iyan kan mga miembro nin sarong gang sa kalye o nin sarong grupo na nagpapalakop nin espiritu nin pagigin independiente asin rebelde?’ Maninigo man niatong maanan na marhay an gubing. Kun iyan bestida o palda, kumusta an laba? An tabas? An gubing daw mabini, angay, asin may dignidad, o iyan daw yapit na marhay, nakapupukaw, o bagla? Hapota an saindong sadiri, ‘Ikakasingkog daw an pagsulot ko kan gubing na ini?’ (2 Corinto 6:​3, 4) Taano ta maninigo niatong pag-isipan iyan? Huli ta an Biblia nagsasabi: “Dawa si Cristo dai nagpanigo sa saiya man sana.” (Roma 15:3) An Kristianong mga payo nin pamilya dapat na magreparo sa itsura kan mga miembro nin pamilya. Huli sa paggalang sa mamuraway na Dios na sinasamba ninda, an mga payo nin pamilya dai maninigong mag-alangan na tumao nin marigon, mamomoton na hatol kun kinakaipuhan iyan.​—Santiago 3:13.

18. Ano an nagmomotibar sa saindo na tawan nin maingat na atension an saindong gubing asin pag-alinyar?

¹⁸ An mensaheng dara niato hale ki Jehova, an mismong personipikasyon nin dignidad asin kabanalan. (Isaias 6:3) Sinasadol kita kan Biblia na arogon sia “bilang mga aki na namomotan na marhay.” (Efeso 5:1) An satong paggubing asin pag-alinyar puedeng magtao nin marahay o maraot na impresyon sa satong langitnon na Ama. Sierto nanggad na boot niatong paogmahon an saiyang puso!​—Talinhaga 27:11.

19. Anong mga pakinabang an nakakamtan sa pagpahayag sa iba kan “makangangalas na mga bagay nin Dios”?

¹⁹ Ano an saboot nindo manongod sa “makangangalas na mga bagay nin Dios” na nanodan nindo? An totoo, kanigoan an pribilehio niato na nanodan an katotoohan! Huling naggigibo kita nin pagtubod sa pinabolos na dugo ni Jesu-Cristo, an satong mga kasalan napatatawad. (Gibo 2:38) Bilang resulta, igwa kita nin katalingkasan sa pagtaram sa atubangan nin Dios. Dai kita natatakot sa kagadanan na arog kan mga dai nin paglaom. Imbes, sinisierto sa sato ni Jesus na sa maabot na aldaw “an gabos na nasa mga lolobngan na girumdoman makadadangog kan saiyang tingog asin maruluwas.” (Juan 5:​28, 29) Si Jehova nagin maugayon sa paghayag sa sato kan gabos na bagay na ini. Dugang pa, ibinubo nia sa sato an saiyang espiritu. Kun siring, an pagpasalamat sa gabos na marahay na balaog na ini maninigong magpahiro sa sato na igalang an saiyang halangkaw na mga pamantayan asin omawon sia na may kaigotan, na ipinahahayag sa iba an “makangangalas na mga bagay [na ini] nin Dios.”

[Mga Nota sa Ibaba]

Ano an Isisimbag Nindo?

• Anong “makangangalas na mga bagay” an nadangog kan mga tawo kaidtong Pentecostes 33 C.E., asin ano an nagin reaksion ninda?

• Paano an saro nagigin disipulo ni Jesu-Cristo, asin ano an kaiba sa pagigin disipulo?

• Taano ta mahalagang tawan niato nin atension an satong paggubing asin pag-alinyar?

• Anong mga bagay an maninigo na konsideraron kun inaaram kun baga angay an sarong gubing o estilo?

[Mga Hapot Para sa Pag-adal]

[Ritrato sa pahina 15]

Ipinaisi ni Pedro na si Jesus binuhay liwat hale sa mga gadan

[Mga ritrato sa pahina 17]

An personal na itsura daw nindo nagtatao nin marahay na impresyon sa Dios na saindong sinasamba?

[Mga ritrato sa pahina 18]

An Kristianong mga magurang dapat na magreparo sa itsura kan mga miembro nin pamilya