Sarong Leksion Gikan sa Kagang

“MINSAN an kagang sa kalangitan​​—aram na gayo kaiyan an itinalaan na mga panahon para kaiyan . . . Alagad kun dapit sa sakong banwaan, dai ninda namidbid an paghokom ni Jehova.” (Jeremias 8:7) Paagi sa mga tataramon na iyan, ibinalangibog ni propeta Jeremias an paghokom ni Jehova tumang sa apostatang banwaan nin Juda, na binayaan si Jehova na saindang Dios asin nagsamba sa mga dios nin ibang nasyon. (Jeremias 7:​18, 31) Taano ta pinili ni Jeremias an kagang bilang praktikal na leksion para sa bakong fiel na mga Judio?

Para sa mga Israelita, an kagang, asin nangorogna an puting kagang, ordinaryo nang maheheling kun minabalyo iyan sa mga kadagaan sa Biblia. An ngaran sa Hebreo para sa dakula, halaba an bitis na nagnonognog na gamgam na ini iyo an pambabaeng porma nin sarong termino na nangangahulogan “maimbod; may mamomoton na kabootan.” Angay ini, huli ta bakong arog kan kadaklan na iba pang gamgam, an lalaki asin babaeng puting kagang nagdadanay na mag-agom sagkod na nabubuhay. Pakatapos na magpalihis nin tiglipot sa mas mainit na mga lugar, an kadaklan na kagang minabalik kada taon, na sa parate sa iyo man sanang tataghan na ginamit ninda kaidto.

An kanaturalan nang ginigibo kan kagang ipinaheheling an kualidad na kaimbodan sa iba pang pambihirang mga paagi. An lalaki sagkod an babaeng gamgam na iyan magkatabang sa paghilumlom sa mga sogok asin pagpakakan sa mga siyo. An librong Our Magnificent Wildlife nagpapaliwanag: “Bilang mga magurang, an mga kagang pambihira kafiel. An sarong lalaking kagang sa Alemania tuminogdon sa darakulang kable nin koryente asin nakoryente. Ipinadagos kan agom kaini na hilumloman nin solo an mga sogok sa laog nin 3 aldaw, na durante kaiyan sarong beses sana niang binayaan sa halipot na panahon an tataghan tanganing humanap nin kakanon. . . . Sa saro pang pangyayari, kan mabadil an babaeng kagang, an ama an nagpadakula sa mga siyo.”

Tunay nanggad, paagi sa kanaturalan nang pagpaheling nin pagkafiel sa pambilog na panahon na agom kaiyan asin nin mamomoton na pag-asikaso sa mga siyo kaiyan, inootob kan kagang an kahulogan kan ngaran kaiyan​—“maimbod.” Sa siring, an kagang nagseserbi nanggad na mapuersang leksion sa bakong fiel asin sumbikalan na mga Israelita.

Para sa dakol na tawo ngonyan, an kaimbodan asin pagigin fiel lihis na sa usong mga ideya​—kahangahanga alagad bakong praktikal. An pagdakol nin diborsio, pag-abandonar, pagdispalko, asin iba pang klase nin pandadaya nagpapaheling na an kaimbodan dai na tinatawan nin halaga. Sa kabaliktaran, halangkaw an pagpahalaga kan Biblia sa kaimbodan na motibado nin pagkamoot asin kabootan. Sinasadol kaiyan an mga Kristiano na “magsolog kan bagong personalidad na linalang segun sa kabotan nin Dios sa tunay na katanosan asin kaimbodan.” (Efeso 4:24) Iyo, tinatabangan kita kan bagong personalidad na magin maimbod, alagad may manonodan man kitang leksion manongod sa kaimbodan gikan sa kagang.