Yoga—Saro Sana daw na Ehersisyo o Labi Pa Dian?

AN PAGKAIGWA nin maniwang asin nasa marahay na kondisyon na hawak kinababangkagan kan mga tawo ngonyan. Huli kaini dakol an naglaog sa mga dyimnasium asin klab na pansalud para sa tabang. Sa iyo man sanang dahelan, rinibong tawo sa kinaban sa Solnopan an naggamit kan teknika nin yoga sa Sirangan.

An mga tawo na natetension, may depresyon, asin nadedesganar nagyoyoga na man tanganing maranga asin makanompong nin mga solusyon. Partikularmente poon kan mga taon nin 1960, an dekada nin mga hippie asin flower children, luminakop sa bilog na Solnopan an interes sa mga relihion nin Sirangan asin sa mistikong mga kaugalean kaiyan. An meditasyon transendental, sarong supang kan yoga, ginibong popular kan sikat na mga artista asin musikero nin rock. Huli sa nagdadakulang interes sa yoga, tibaad ihapot niato: ‘An yoga daw saro sanang rutina nin ehersisyo na matao nin marahay na salud, maniwang na hawak asin katoninongan nin isip sa naggigibo kaiyan? An yoga daw puedeng gibohon na mayo nin ano man na koneksion sa relihion? Angay daw sa mga Kristiano an yoga?’

An Pinaghalean kan Yoga

An ginikanan kan terminong “yoga” konektado sa termino sa Ingles na “yoke” (sa Bicol, “sakal”). Puede iyan na mangahulogan na pagsaroon o pag-ibanon sa sakal o bugtakan nin sakal, gayakan o kontrolon. Para sa sarong Hindu, an yoga sarong teknika o sarong disiplina na nagreresulta sa pakisumaro sa sarong dakulang lihis sa natural na puersa o espiritu. Iyan ilinadawan bilang “an pagsararo kan gabos na kapangyarihan kan hawak, isip asin kalag sa Dios.”

Gurano na kasuanoy kan kasaysayan nin yoga? May mga ladawan nin mga tawo na nakatukaw sa manlaenlaen na posisyon nin yoga an maheheling sa mga selyo na manonompongan sa Kababan nin Indus, sa Pakistan sa presenteng panahon. An sibilisasyon sa Kababan nin Indus pinetsahan kan mga arkeologo na nasa pag-oltanan kan ikatolo asin ikaduwang milenyo B.C.E., na haraning marhay sa panahon kan kultura kan Mesopotamia. An mga gibo nin tawo hale sa duwang lugar na iyan may ladawan nin sarong tawo, na nagrerepresentar sa sarong dios, na nakokoronahan nin mga sungay  nin hayop asin napalilibotan nin mga hayop, na nagpapagirumdom ki Nimrod, an “makosog na paraayam.” (Genesis 10:​8, 9) An mga Hindu naghihingako na an mga ladawan na iyan na nakatukaw sa mga posisyon nin yoga mga imahen kan dios na si Siva, kagurangnan kan mga hayop asin kagurangnan nin yoga, na sa parate sinasamba paagi sa lingam, simbolo kan ikinabuhay nin lalaki. Sa siring, an librong Hindu World inaapod an yoga na “sarong kodigo nin mga kaugalean na ascetiko, na prinsipalmenteng nagpoon bago kan mga Aryano, na igwa kan mga relikya kan dakol na suanoy na mga pagsabot asin seremonya.”

An mga metodo kan yoga sa primero ipinaabot sa berbal na paagi. Dangan an mga iyan detalyadong isinurat kan sarong Bombay na may kabatidan sa yoga na si Patañjali bilang an Yoga Sutra, na iyo pa man giraray an libro sa pundamental na mga instruksion sa yoga. Segun ki Patañjali, an yoga “sarong may sinusundan na metodong paghihingoa tanganing kamtan an pagkasangkap, paagi sa pagkontrol kan manlaenlaen na elemento kan naturalesa nin tawo, pisikal asin lihis sa natural.” Poon sa kapinonan kaiyan sagkod sa presenteng panahon, an yoga nagin mahalagang kabtang kan mga relihion sa Sirangan, ngonyan partikularmente sa Hinduismo, Jainismo, asin Budismo. An nagkapirang nagyoyoga naniniwala na iyan magiya sa sainda sa pagkamit nin moksha, o pakabutas, paagi sa pakisumaro sa lakop na marhay na espiritu.

Kaya sa giraray kita maghahapot: ‘An yoga daw puedeng gibohon bilang saro sanang pisikal na ehersisyo tanganing magkaigwa nin makosog na hawak asin relaks na isip, na mayo nin ano man na pagkaimbuelto sa relihion?’ Huli sa pinaghalean kaiyan, an simbag dai.

Saen Ka Puedeng Darahon kan Yoga?

An obheto kan yoga bilang sarong disiplina iyo na giyahan an sarong tawo sa espirituwal na pakaeksperyensia nin ‘pakipagsakal’ o pakisumaro sa sarong espiritu na nakalalabi sa tawo. Alagad anong espiritu daw iyan?

Sa Hindu World, an autor na si Benjamin Walker nagsasabi manongod sa yoga: “Iyan puedeng sarong sistema nin mga rituwal sa mahika kaidto, asin an yoga sagkod ngonyan igwa nin ipinaririsang okultismo asin panraratak sa kahulogan kaiyan.” Inaadmitir kan mga pilosopong Hindu na an pagyoyoga puedeng magtao nin lihis sa natural na mga kapangyarihan, minsan ngani sinda sa parate naghihingako na bako ini an pinakapasohan kan yoga. Halimbawa, sa librong Indian Philosophy, an dating presidente kan India, si Dr. S. Radhakrishnan, nagsasabi manongod sa sarong nagyoyoga na an “kontrol kan hawak paagi sa mga postura nagreresulta sa pagkaindiperente sa labi-labing init asin lipot. . . . An nagyoyoga nakaheheling asin nakadadangog kan nasa harayo . . . An pagpaabot nin kaisipan hale sa sarong indibiduwal pasiring sa saro pa na dai naggagamit kan normal na mga mekanismo sa pagkomunikar posibleng marhay. . . . Puedeng gibohon kan nagyoyoga na dai naheheling an saiyang hawak.”

An ladawan nin sarong nagyoyoga na nagtotorog sa higdaan na anas pako o naglalakaw sa mainit na mga baga tibaad garo baga panloloko para sa nagkapira asin sarong pangisi para sa iba. Alagad ini komun na nangyayari sa India, siring man an kaugalean na pagtindog na sarong bitis an ginagamit mantang direktang nakaturuhok sa saldang sa laog nin dakol na oras asin pagpogol sa paghangos na minatogot sa saro na italbong sa baybay sa laog nin halawig na peryodo. Kan Hunyo 1995, nagbareta an The Times of India na an sarong tolo may kabangang taon na aking babae nakahigda na pinalilipadngan mantang an sarong kotse na nagtitimbang nin labing 750 kilos pinaagi sa ibabaw kan saiyang tulak. Sa pagngalas kan kadaklan, sia biyong dai naano kan sia magmata. Idinugang kan bareta: “Idto purong kapangyarihan nin yoga.”

Daing duda, mayo nin normal na tawo an makagigibo kan arin man sa mga gibong ini. Huli kaini, dapat ihapot nin sarong Kristiano: Ano an ipinaririsa kan mga gibong ini? Iyan daw hale ki Jehova Dios, “an Kaharohalangkawe sa bilog na daga,” o iyan daw may laen na ginikanan? (Salmo 83:18) An Biblia klaro sa puntong ini. Kan an mga Israelita palaog na sa Dagang Panuga, na sakop kan mga Cananeo, sinabihan ni Jehova an mga aki ni Israel paagi ki Moises: “Dai ka dapat na mag-adal na gumibo kan arog sa makauuyam nin makuring mga bagay kan mga nasyon na iyan.” Anong “makauuyam nin makuring mga bagay”? Si Moises nagpatanid tumang sa “siisay man na minagamit nin pagtoodtood, paramahika o siisay man na naghahanap nin mga signos o pararatak.”  (Deuteronomio 18:​9, 10) An mga bagay na ini makauuyam nin makuri sa Dios huli ta an mga iyan gibo nin mga demonyo asin kan makasalan na laman.​—Galacia 5:19-21.

Dai Dapat Pilion nin mga Kristiano

Ano man an tibaad sabihon nin mga instruktor sa salud kontra dian, an yoga bako sanang pisikal na ehersisyo. An librong Hindu Manners, Customs and Ceremonies nagsasaysay kan mga eksperyensia nin duwang nagpopoon pa sanang magyoga na ginigiyahan nin sarong guru. An saro kinotar na nagsasabi: “Ginibo ko an nakalalabi sa tawong mga paghihingoa na pogolan an sakong paghangos sagkod sa mapupuede, asin minahangos sana kun ako madidismayo na. . . . Sarong aldaw, sa kaodtohan, sa boot ko nakaheling ako nin sarong maliwanag na bulan, na garo naghihiro asin nagtataratabyon. Sa iba man na panahon paghona ko napapatos ako nin mahibog na kadikloman sa odto. An sakong direktor . . . naogmang marhay kan sambiton ko sa saiya an mga bisyon na ini. . . . Madali nang dumatong an oras, an pag-asegurar nia sa sako, na maeeksperyensiahan ko an orog pang makangangalas na mga resulta kan sakong pagpenitensia.” An ikaduwang lalaki nagsasaysay: “Inobligar nia ako na tumuruhok sa langit aroaldaw na dai ikinikimat an sakong mga mata o liniliwat an sakong posisyon. . . . Kun beses sa boot ko ako nakakaheling nin mga silyab nin kalayo sa aire; sa ibang panahon garo ako nakakaheling nin nagkakalayong mga globo asin iba pang mga bulalakaw. Naogmang marhay an sakong paratokdo sa kapangganahan kan sakong mga paghihingoa.”

An ekstraordinaryong mga pakaheling nin mga bagay minalataw na iyo an ibinibilang kan mga guru na tamang mga resulta na magiya pasiring sa tunay na katuyohan kan mga ehersisyo nin yoga. Iyo, an pinakapasohan kan yoga iyo an moksha, na ipinaliliwanag bilang an pakisumaro sa sarong impersonal na dakulang espiritu. Ilinaladawan iyan na “an (tuyong) pagpondo kan natural na aktibidad kan isip.” Ini malinaw nanggad na sarongat sa pasohan na itinao para sa mga Kristiano, na sinasadol: “Idolot nindo an saindong hawak na siring sa buhay na atang, banal, inaako nin Dios, sarong sagradong paglilingkod na igwa kan saindong kakayahan na mangatanosan. Asin dai na kamo magpamolde sa sistemang ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.”​—Roma 12:​1, 2.

An pagpili kun anong pisikal na ehersisyo an gigibohon personal na bagay. Minsan siring, dai totogotan kan mga Kristiano an ano man na bagay​—baga man pagpatood sa hawak, pagkakan, pag-inom, paggubing, pag-aling-aling, o ano pa man na bagay​—na makaraot sa saindang relasyon ki Jehova Dios. (1 Corinto 10:31) Para sa mga nag-eehersisyo para sana sa saindang salud, igwa nin dakol na paagi na daing kalabot na pagkalantad sa mga peligro nin espiritismo asin okultismo. Paagi sa paglikay sa mga kaugalean asin paniniwala na nakagamot sa falsong relihion, puede niatong antisiparon an bendisyon nin Dios na sarong matanos na bagong sistema nin mga bagay na dian puede niatong kamtan an sangkap na salud sa hawak asin isip sa panahon na daing sagkod.—2 Pedro 3:13; Kapahayagan 21:​3, 4.

[Mga ritrato sa pahina 22]

Dakol an may mga aktibidad na marahay sa salud na daing kalabot na pagkalantad sa espiritismo