“Aram daw Nindo Kun Taano ta Iinuuli Ko an Kuarta Nindo?”

‘AY TALAGANG kaipuhan ko nin kuarta!’ an paghorophorop ni Nana, sarong nagsosolong ina na may tolong aking lalaki na nag-iistar sa Kaspi, sa Republika nin Georgia. Sarong aga nagkatotoo an kamawotan nia na makakua nin kuarta. Nakakua sia nin 300 na lari sa may presinto. Mayo ni sarong tawo sa palibot. Idto medyo dakulang kantidad nin kuarta. An totoo, dai pa nakaheling si Nana nin 100 na lari na papel sa laog nin limang taon poon kan magin nasyonal na kuarta an lari. An lokal na mga negosyante dai makagaganar nin siring kadakula pakatrabaho sa laog nin nagkapirang taon.

‘Sa ano ko kakaipuhanon an kuartang ini kun mawawara ko man an sakong pagtubod, diosnon na takot, asin espirituwalidad?’ an paghorophorop ni Nana. Nakultibar na nia an siring na Kristianong mga kualidad, na tinatagalan pa ngani an maringis na paglamag asin pambubugbog huli sa saiyang pagtubod.

Pagduman sa presinto, naheling ni Nana an limang opisyal na natatarantang naghahanap. Narealisar nia na hinahanap ninda an kuarta, kaya dinolok nia sinda asin nagsabi: “May nawara kamo?”

“Kuarta,” an simbag ninda.

“Gurano?”

“Tres sientos na lari!”

“Nakua ko an kuarta nindo,” an sabi ni Nana. Dangan naghapot sia: “Aram daw nindo kun taano ta iinuuli ko an kuarta nindo?” Dai ninda aram.

“Huli ta saro ako sa Mga Saksi ni Jehova,” an pagpadagos nia. “Kun bako, dai ko na kutana iinuli an kuarta nindo.”

An hepe de pulisiya na nawaran kan kuarta tinawan si Nana nin 20 lari bilang pag-apresyar sa saiyang sadiosan na gawe-gawe.

An estorya marikas na nakalakop sa bilog na distrito nin Kaspi. Kan sumunod na aldaw, an sarong babaeng paralinig na nagluwas hale sa presinto nagsabi ki Nana: “[An hepe] pirmeng igwa kan babasahon nindo sa saiyang opisina. Ngonyan pahahalagahan na nia gayod iyan nin orog pa.” An sarong opisyal kan pulisiya nagsabi pa ngani: “Kun an gabos na tawo Saksi ni Jehova, siisay an makomiter nin krimen?”