Kiisay Kamo Maninigo na Magin Maimbod?

“An satong nasyon: . . . Logod na iyan pirmeng tama; alagad iyan an satong nasyon, magin tama man o sala.”​—Stephen Decatur, opisyal sa naval kan E.U., 1779-​1820.

AN DAING pagduwaduwang kaimbodan sa nasyon nin saro ibinibilang nin dakol na pangenot nindang obligasyon. An iba binabago an mga tataramon ni Stephen Decatur, ‘An sakong relihion, logod na iyan pirmeng tama; alagad iyan an sakong relihion, magin tama man o sala.’

Sa katotoohan, an nasyon o relihion na naghahagad kan satong kaimbodan sa parate dinedeterminaran kan lugar na namundagan niato, alagad an desisyon manongod sa kun kiisay kita maninigong magin maimbod mahalagang marhay tanganing ipabaya sa pagkanorongod sana. Minsan siring, an pagkuestion sa kaimbodan na nagimatan nin saro nangangaipo nin kosog nin boot asin nagbubunga nin mga angat.

Sarong Pagbalo sa Kaimbodan

An sarong babae na nagdakula sa Zambia nagsabi: “Relihiosa ako poon kan ako aki pa. Kabtang na kan pagpadakula sa sako an aroaldaw na pamimibi sa kuarto na yaon an altar kan pamilya, pag-otob sa mga aldaw para sa relihion, asin regular na pagsimba  sa templo. An sakong relihion asin pagsamba konektadong marhay sa sakong kultura, komunidad, asin pamilya.”

Pero, kan sia nasa huring mga taon kan saiyang pagkatinedyer, nagpoon siang makipag-adal sa Biblia sa mga Saksi ni Jehova asin dai nahaloy pakatapos kaiyan nagdesisyon na magbago nin saiyang relihion. Akto daw ini nin kadaihan nin kaimbodan?

Si Zlatko nagdakula sa Bosnia, asin sa laog nin kadikit na panahon nakilaban sia sa guerra na lakop sa saiyang ginikanan na nasyon. Nagpoon man siang makipag-adal sa Biblia sa mga Saksi ni Jehova. Ngonyan nagsasayuma na siang kumapot nin armas tumang sa siisay man. Sia daw nagigin bakong maimbod?

An pagsimbag nindo sa mga hapot na iyan minadepende sa saindong punto de vista. An babaeng nasambitan sa kapinonan nagsasabi: “Sa sakong komunidad, an pagsalida nin relihion nin saro daing kapatawadan na kasupganan; ibinibilang iyan na akto nin kadaihan nin kaimbodan, sarong pagtraydor sa pamilya asin komunidad.” Siring man, an mga dating kairiba sa militar ni Zlatko minamansay bilang traydor an siisay man na magsayumang makipaglaban sa kampi ninda. Alagad naniniwala an babaeng iyan sagkod si Zlatko na an sarong mas halangkaw na klase nin kaimbodan—kaimbodan sa Dios—an nagmomotibar sa saindang mga paghiro. Mas importante, ano an pagmansay nin Dios sa mga gustong magin maimbod sa saiya?

Tunay na Kaimbodan—Sarong Kapahayagan nin Pagkamoot

Si Hadeng David nagsabi ki Jehova Dios: “Sa sarong maimbod ika mahiro sa kaimbodan.” (2 Samuel 22:26) An Hebreong termino na trinadusir digdi na “kaimbodan” nagtatao nin ideya nin kabootan na mamomoton na nakikisumaro sa sarong bagay sagkod na maotob an katuyohan kaiyan para sa bagay na iyan. Kapareho kan aktitud nin sarong ina sa pasusohon na aki, si Jehova mamomoton na nakikisumaro sa mga maimbod sa saiya. Sa saiyang maimbod na mga lingkod sa suanoy na Israel, sinabi ni Jehova: “Malilingaw daw an agom na babae sa saiyang pinasususo tanganing dai sia maherak sa aki kan saiyang tulak? Minsan makalingaw an mga babaeng ini, pero ako dai malilingaw sa saimo.” (Isaias 49:15) An mga andam na enoton an kaimbodan sa Dios nin orog sa gabos nakaseseguro kan saiyang mamomoton na pagmakolog.

An kaimbodan ki Jehova nakabasar sa pagkamoot. Minomotibar kaiyan an saro na mamotan kun ano an namomotan ni Jehova asin ikaongis an maraot na mga bagay na ikinaoongis ni Jehova. (Salmo 97:10) Mantang pagkamoot an nangingibabaw na kualidad ni Jehova, an kaimbodan sa Dios an nagtatabang na malikayan nin saro na gumawe sa iba sa bakong mamomoton na paagi. (1 Juan 4:8) Kaya kun huli sa kaimbodan sa Dios an sarong tawo magbago nin relihiosong mga tinutubod, dai iyan nangangahulogan na dai na nia namomotan an saiyang pamilya.

Kaimbodan sa Dios—Sarong Kapakipakinabang na Puersa

Ipinaliliwanag kan babaeng nasambitan kasubago an saiyang mga ginibo sa paaging ini: “Paagi sa pag-adal ko sa Biblia, namidbid ko si Jehova bilang tunay na Dios, asin nakapatalubo ako nin personal na relasyon sa saiya. Si Jehova bakong arog kan arin man sa mga dios na sinamba ko dati; sangkap an saiyang pagkatimbang sa pagkamoot, hustisya, kadonongan, asin kapangyarihan. Mantang hinahagad ni Jehova an dai nababangang debosyon, kaipuhan kong bayaan an iba pang mga dios.

“Paorootro akong sinabihan kan sakong mga magurang na naanggot sindang marhay sako asin nasudya an linalaoman ninda sa sako. Depisil na marhay ini sa sako, huli ta mahalagang marhay sa sako an pag-oyon kan sakong mga magurang. Alagad mantang gradwal na nagtatalubo an sakong kaaraman sa katotoohan sa Biblia, an pagpili nagin malinaw para sa sako. Dai ko puedeng talikdan si Jehova.

“An pagpili na magin maimbod ki Jehova imbes na sa mga tradisyon sa relihion dai nangangahulogan na ako nagigin bakong maimbod sa sakong pamilya. Naghingoa akong ipaheling sa sainda paagi sa sinasabi asin ginigibo ko na nasasabotan ko an saindang namamatean. Alagad kun bako akong maimbod ki Jehova, sa siring mapopogolan ko an sakong pamilya na mamidbid sia, asin iyan an magigin totoong akto nin kadaihan nin kaimbodan.”

 Siring man, an sarong tawo bakong traydor kun an kaimbodan sa Dios naghahagad na magdanay siang neutral sa politika asin dai magkapot nin armas tumang sa iba. Arog kaini an paliwanag ni Zlatko sa saiyang mga ginibo: “Maski nagdakula ako na Kristiano sa ngaran sana, inagom ko an saro na bakong arog kaiyan. Kan pumutok an guerra, an mag-ibong na lado hinahagad an sakong kaimbodan. Napiritan akong pilion an kakampihan ko sa laban. Nakipaglaban ako sa guerra sa laog nin tolo may kabangang taon. Sa kahurihurihi nagdulag kaming mag-agom pasiring sa Croatia, kun saen mi nanuparan an mga Saksi ni Jehova.

“Sa samong pag-adal sa Biblia, nasabotan mi na si Jehova an pangenot na maninigong tawan mi nin kaimbodan asin gusto niang mamotan niato an satong kapwa ano man an relihion o rasa nia. Ngonyan kaming mag-agom nagkakasaro na sa samong pagsamba ki Jehova, asin naaraman ko na dai ako puedeng magin maimbod sa Dios asin makipaglaban sa sakong kapwa.”

Kaimbodan na Minolde nin Tamang Kaaraman

Mantang si Jehova an satong Kaglalang, angay na an kaimbodan sa saiya an maenot sa gabos na iba pang naghahagad kan satong kaimbodan. (Kapahayagan 4:11) Minsan siring, tanganing malikayan na an kaimbodan sa Dios magliwat na magin panatiko asin mapanlaglag na puersa, kaipuhan na moldehon iyan kan tamang kaaraman. Sinasadol kita kan Biblia: “Magin bago sa puersa na nagpapahiro sa saindong isip, asin . . . magsolog kan bagong personalidad na linalang segun sa kabotan nin Dios sa tunay na . . . kaimbodan.” (Efeso 4:​23, 24) An bantog na lalaking nagsurat kan ipinasabong na mga tataramon na iyan igwa nin kosog nin boot na kuestionon an kaimbodan na nagimatan nia. An saiyang pagsiyasat nagbunga nin kapakipakinabang na pagbabago.

Iyo, si Saulo napaatubang sa pagbalo nin kaimbodan, arog man nin dakol sa satong panahon. Si Saulo pinadakula sa estriktong mga tradisyon kan saiyang pamilya, asin sia nagin maimbod na marhay sa relihion na nagimatan nia. An kaimbodan sa saiyang obheto nagmotibar pa ngani sa saiya na gumibo nin kadahasan tumang sa mga dai minaoyon sa saiyang punto de vista. Nabantog si Saulo sa paglaog sa mga harong nin mga Kristiano asin pagguyod sa sainda tanganing padusahan asin gadanon pa ngani.​—Gibo 22:3-5; Filipos 3:4-6.

Pero, kaidtong nakua ni Saulo an tamang kaaraman sa Biblia, ginibo nia an dai lamang pepensaron kan dakol sa saiyang kairiba. Nagbago sia nin saiyang relihion. Pinili ni Saulo, na namidbid sa huri na apostol Pablo, na magin maimbod sa Dios imbes na sa tradisyon. An kaimbodan sa Dios na basado sa tamang kaaraman an nagmotibar ki Saulo na magin mapagpabaya sa iba, mamomoton, asin nakaparirigon sa boot, kabaliktaran kan dati niang mapanlaglag, panatikong gawe-gawe.

Taano ta Dapat na Magin Maimbod?

An pagtogot na moldehon kan mga pamantayan nin Dios an satong kaimbodan nagbubunga nin heling-heling na mga pakinabang. Halimbawa, an sarong report kan 1999 hale sa Institusyon nin mga Pag-adal sa Pamilya sa Australia nagsabi na kabilang sa mga pundamental na kahagadan para sa naghahaloy asin nakakokontentong pag-agoman iyo an “pagtitiwala asin pagigin fiel . . . [asin] pakamate nin espirituwalidad.” Naaraman kan iyo man sanang pag-adal na an “marigon asin nakakokontentong pag-agoman” nakakokontribwir tanganing an mga  lalaki asin babae magin mas maogma, mas marahay an salud, asin mas halawig an buhay patin an marigon na pag-agoman nagtatao sa mga aki nin mas marahay na oportunidad na kamtan an maogmang buhay.

Sa kinaban ngonyan na daing kasegurohan, an kaimbodan garo sarong salbabida na itinatakod an sarong nasasakitan na paralangoy sa masapod na sakayan. Kun an “paralangoy” mayo nin kaimbodan, manonompongan nia an saiyang sadiri na inaanod nin mga alon asin doros. Alagad kun mapasala an saiyang kaimbodan, garo man sana an saiyang salbabida nakatakod sa nalulunod na barko. Arog ni Saulo, puedeng manompongan nia an saiyang sadiri na naguguyod pasiring sa kapahapahamak na paghiro. Minsan siring, an kaimbodan ki Jehova, basado sa tamang kaaraman, sarong salbabida na nagtatao sato nin karigonan asin minagiya sa satong kaligtasan.​—Efeso 4:13-15.

Ini an panuga ni Jehova sa mga maimbod sa saiya: “Si Jehova mamomoton sa hustisya, asin dai nia pababayaan an saiyang mga maimbod. Sagkod sa panahon na daing talaan sinda babantayan nanggad.” (Salmo 37:28) Dai na mahahaloy, an gabos na maimbod ki Jehova gigiyahan pasiring sa paraisong daga, kun saen sinda magkakamit nin katalingkasan sa pagmondo asin kolog patin maoogmang marhay sa nagdadanay na relasyon na mayo nin relihioso asin politikal na pagkabaranga.​—Kapahayagan 7:​9, 14; 21:​3, 4.

Dawa ngonyan, minilyon na indibiduwal sa bilog na globo an nakadiskobre na an tunay na kaogmahan hale sana sa saindang kaimbodan ki Jehova. Taano ta dai togotan an mga Saksi ni Jehova na tabangan kamo na siyasaton an saindong punto de vista manongod sa kaimbodan sa liwanag kan katotoohan sa Biblia? Sinasabi sa sato kan Biblia: “Padagos na baloon kun baga kamo nasa pagtubod, padagos na patunayan kun ano man nanggad kamo.”​—2 Corinto 13:5.

Kaipuhan an kosog nin boot tanganing kuestionon an satong pagtubod asin kun taano ta kita maimbod dian, alagad an mga balos bawi nanggad sa paghihingoa kun an resulta mas mapadayupot sa sato ki Jehova Dios. Ipinahahayag kan babaeng nasambitan kasubago an saboot kan dakol na tawo kan sia magsabi: “Nanodan ko na an pagigin maimbod ki Jehova asin sa saiyang mga pamantayan nakatatabang sa sato na magin balanse sa satong pagtratar sa satong mga pamilya asin tanganing magin mas marahay na miembro kan komunidad. Gurano man kadepisil an mga pagbalo, kun kita maimbod ki Jehova, sia pirmeng magigin maimbod sa sato.”

[Mga ritrato sa pahina 6]

An tamang kaaraman an nagpahiro ki Saulo na sanglian an tinatawan nia nin kaimbodan

[Ritrato sa pahina 7]

Taano ta dai siyasaton an saindong kaimbodan sa liwanag kan katotoohan sa Biblia?

[Picture Credit Lines sa pahina 4]

Churchill, nasa itaas sa wala: Retrato kan U.S. National Archives; Joseph Göbbels, nasa harayong too: Library of Congress