Mga Hapot Hale sa mga Parabasa

Anong giya an itinatao kan Kasuratan manongod sa pagpatood sa aki kun an sarong magurang saro sa Mga Saksi ni Jehova asin an saro bako?

Duwang pundamental na prinsipyo sa Kasuratan an nagtatao nin giya manongod sa pagpatood sa aki para sa sarong magurang na Saksi na an agom bakong Saksi. An saro: “Dapat na kuyogon niamo an Dios bilang namamahala imbes na mga tawo.” (Gibo 5:29) An saro pa: “An agom na lalaki iyo an payo kan saiyang agom na babae kun paanong si Cristo iyo man an payo kan kongregasyon.” (Efeso 5:23) An ikaduwa aplikado bako sanang sa mga agom na babae na an agom Saksi kundi siring man sa mga agom na babae na an agom bakong Saksi. (1 Pedro 3:1) Paano titimbangon nin sarong magurang na Saksi an mga prinsipyong ini kun nagtotokdo sa saiyang mga aki?

Kun an agom na lalaki saro sa Mga Saksi ni Jehova, sia an may paninimbagan sa pagtao nin espirituwal sagkod materyal na mga probisyon sa saiyang pamilya. (1 Timoteo 5:8) Minsan ngani an ina na daing pagtubod tibaad mas dakol an panahon sa saindang mga aki, an ama na Saksi maninigong tokdoan an saiyang mga aki paagi sa pagtao nin espirituwal na pagpatood sa harong asin paagi sa pag-iba sa sainda sa Kristianong mga pagtiripon, na dian makikinabang sinda sa pagtotokdo dapit sa moral asin sa nakapakokosog na pakikiasosyar.

Kumusta kun an saiyang agom na babae na daing pagtubod mag-insistir na ipag-iba an saindang mga aki sa saiyang lugar nin pagsamba o tokdoan sinda kan saiyang mga tinutubod? An ley kan nasyon puedeng magtao sa saiya nin deretso na gibohon iyan. Kun baga maaakit an mga aki na gumibo nin pagsamba sa siring na mga lugar tibaad nakadependeng marhay sa kualidad kan espirituwal na pagtotokdo kan ama. Mantang nagdadakula an mga aki, an pag-edukar sa Kasuratan kan saindang ama maninigong makatabang sa sainda na sunodon an katotoohan kan Tataramon nin Dios. Kanigoan an kaogmahan kan agom na lalaki na may pagtubod kun an saiyang mga aki maninindogan para sa katotoohan!

Kun an ina saro sa Mga Saksi ni Jehova, dapat niang igalang an prinsipyo nin pagkapayo minsan ngani iniisip an daing sagkod na ikararahay kan saiyang mga aki. (1 Corinto 11:3) Sa dakol na kamugtakan, an saiyang agom na daing pagtubod dai mahabo kun an agom kaini na Saksi nagtatao nin moral asin espirituwal na edukasyon sa saindang mga aki, asin an tabang para sa katuyohan na iyan makukua sa mga pagtiripon kan banwaan ni Jehova. Puedeng matabangan kan ina an saiyang agom na daing pagtubod na maheling an mga pakinabang kan nakaparirigon na edukasyon na inaako kan saindang mga aki paagi sa organisasyon ni Jehova. Puede niang idoon sa mataktikang paagi an karahayan kan pagtadom nin moral na mga prinsipyo sa Biblia sa saindang mga aki, mantang napapaatubang sinda sa sarong kinaban na maraot an moral.

Minsan siring, tibaad iinsistir kan agom na lalaking daing pagtubod na isagibo kan saiyang mga aki an saiyang relihion, na iiniiba sinda sa saiyang lugar nin pagsamba asin tinatawan sinda nin relihiosong edukasyon oyon sa saiyang pagtubod. O an agom na lalaki tibaad kontra sa gabos na relihion asin mag-insistir na an saiyang mga aki dai mag-ako nin relihiosong edukasyon. Bilang payo kan pamilya, sia an may pangenot na paninimbagan sa paggibo kan desisyon na iyan. a

Minsan ngani iginagalang an pagkapayo kan saiyang agom na lalaki, bilang nagdusay na Kristiana, gigirumdomon kan agom na babae na may pagtubod an aktitud ni apostol Pedro asin Juan, na nagsabi: “Kun para sa samo, dai kami puedeng mag-ontok sa pagtaram dapit sa mga bagay na samong naheling asin nadangog.” (Gibo 4:​19, 20) Huli sa pagmalasakit  sa espirituwal na ikararahay kan mga aki, an ina na Saksi mahanap nin mga oportunidad na magtao nin moral na paggiya para sa sainda. May paninimbagan sia sa atubangan ni Jehova na tokdoan an iba manongod sa aram niang tama, asin maninigo na dai ipuera an saiyang mga aki. (Talinhaga 1:8; Mateo 28:​19, 20) Paano puedeng atubangon kan ina na Saksi an masakit na kamugtakan na ini?

Halimbawa an manongod sa pagtubod sa Dios. An agom na babaeng Saksi tibaad dai mahihimong magkaigwa nin pormal na pag-adal sa Biblia sa saiyang mga aki huli sa mga pagbabawal kan saiyang agom. Sa dahelan daw na ini maninigo na siang maglikay sa pagsabi sa saiyang mga aki nin ano man manongod ki Jehova? Dai. An saiyang mga tataramon asin gibo naturalmenteng magpapabanaag kan saiyang pagtubod sa Kaglalang. Daing duda na an saiyang mga aki igwa nin mga hapot manongod sa temang iyan. Sia maninigo na libreng magsagibo kan saiyang katalingkasan sa relihion paagi sa pagpahayag kan saiyang pagtubod sa Kaglalang, kaiba an saiyang mga aki. Dawa kun dai nia mahihimong makapamayo nin pag-adal sa Biblia sa mga aki o iiba sinda nin regular sa mga pagtiripon, puede siang magtao sa sainda nin kaaraman manongod ki Jehova Dios.​​—Deuteronomio 6:7.

May labot sa relasyon nin sarong Saksi asin kan saiyang daing pagtubod na agom, si apostol Pablo nagsurat: “An agom na lalaki na daing pagtubod nasasantipikar dian sa saiyang agom na babae, asin an agom na babae na daing pagtubod nasasantipikar dian sa tugang na lalaki; ta kun dai, an saindong mga aki magigin maramog nanggad, alagad ngonyan sinda banal.” (1 Corinto 7:14) Minamansay ni Jehova na banal an relasyon nin mag-agom huli sa agom na may pagtubod, asin an mga aki ibinibilang na banal sa pagheling ni Jehova. An agom na babaeng Saksi maninigong gibohon an pinakamakakaya nia na tabangan an saiyang mga aki na masabotan an katotoohan, na ipinapabaya an pinal na resulta sa mga kamot ni Jehova.

Mantang nagdadakula an mga aki, kaipuhan nindang magdesisyon kun ano an magigin paninindogan ninda basado sa impormasyon na inako ninda sa saindang mga magurang. Puede sindang magdesisyon na humiro oyon sa mga tataramon ni Jesus: “Sia na may orog na kapadangatan sa ama o ina kisa sa sako bakong maninigo sa sako.” (Mateo 10:37) Pinagbobotan man sinda: “Mga aki, magin makinuyog sa saindong mga magurang na nasa Kagurangnan.” (Efeso 6:1) Dakol na hoben an nagdesisyon na ‘kuyogon an Dios bilang namamahala’ imbes na an magurang na bakong Saksi, sa ibong kan pagsakit sa magurang na iyan. Kanigoan kanakakokontento para sa magurang na Saksi na maheling an mga aki na magdesisyon na paglingkodan si Jehova sa ibong nin pagtumang!

[Nota sa Ibaba]