Naogmang Marhay na Nakanood Sindang Magbasa!

SA NAGKAPIRANG parte kan Islas Salomon, sagkod 80 porsiento kan mga Saksi ni Jehova na ngonyan an kinaipuhan na pangganahan an dai pakabasa asin pakasurat. Dai sana kaini linimitaran an saindang pakikikabtang sa semanal na mga pagtiripon kan kongregasyon kundi mas pinadepisil man para sa sainda na magtokdo sa iba kan mga katotoohan kan Kahadean. Posible daw talaga para sa mga nasa edad na na dai pa ngani noarin man nakakapot nin lapis na magin tataong magbasa asin magsurat?

An brosyur na Apply Yourself to Reading and Writing, na ipinublikar kan Mga Saksi ni Jehova, ginagamit na sa mga klase para sa pagbasa asin pagsurat sa haros gabos na kongregasyon kan Mga Saksi ni Jehova sa bilog na Islas Salomon. An minasunod na mga eksperyensia nag-iilustrar kun paano natabangan an ginatos na paoswagon an kakayahan paagi sa programang ini. Mas mahalaga, an pakanood na magbasa nagpangyari sainda na magpatotoo nin mas marahay manongod sa saindang pagtubod.​​—1 Pedro 3:15.

Nariparo nin sarong misyonera na nadestino sa sarong kongregasyon na igwa nin labing sanggatos na parahayag kan Kahadean na sa semanal na pag-adal sa Biblia na ginagamit An Torrengbantayan, pira sana an igwa nin sadiri nindang kopya kan magasin asin mas dikit pa ngani an nagkokomento. An dahelan? Dai pakabasa asin pakasurat. Kan ipaisi kan kongregasyon an pagporma nin sarong paadalan na matokdo nin pagbasa asin pagsurat, maogmang nagboluntaryo an misyonera na magin paratokdo. Kan primero, pira sanang estudyante an nag-abot, alagad dai nahaloy labing 40 katawo na laen-laen an edad an nagpoon nang umatender.

Ano an nagin mga resulta? An misyonera nagsaysay: “Dai nahaloy pakapoon kan klase para sa pagbasa asin pagsurat, nagduman ako sa sadan nin alas sais nin aga tangani na bumakal nin kakanon para sa erokan kan mga misyonero. Duman naheling ko an nagkapirang estudyante, pati saradit pang marhay, na nagtitinda nin mga niyog asin gulay. Taano? Huli ta boot nindang magkaigwa nin igong kuarta na  pambakal nin pansurat asin kuaderno na gagamiton sa klase para sa pagbasa asin pagsurat! Siring man, an pag-atender sa klaseng iyan an motibo sa pagkaigwa nin personal na kopya kan magasin na Torrengbantayan.” Dagdag pa nia: “Ngonyan durante kan Pag-adal sa Torrengbantayan kan kongregasyon, an mga hoben asin gurang pareho nagpapartisipar, asin buhay an samong pag-orolay.” An misyonerang ini partikularmenteng naogma kan maghapot an apat na miembro kan klase kun puede na sindang makikabtang sa pampublikong paghuhulit huli ta, arog kan sabi ninda, sinda “dai na natatakot.”

An positibong mga epekto sa mga estudyante sa mga klase para sa pagbasa asin pagsurat luminampas pa sa pakanood na magbasa asin magsurat. Halimbawa, sa laog nin dakol na taon an daing pagtubod na agom na babae nin sarong Saksi nagin dahelan nin sarong problema sa kongregasyon. Ginagapo nia an mga tawo huli sa saditon sanang pagprobokar asin dinadaguso pa ngani an ibang mga babae nin kapidasong kahoy. Kun sia paminsanminsan na nag-aatender sa Kristianong mga pagtiripon kaiba kan agom nia, sia nag-iimon na marhay sa agom na lalaki kaya naggagamit an lalaki nin sunglass tangani na dai nia ini masahotan na nagheheling sa ibang mga babae.

Minsan siring, dai nahaloy pakapoon kan mga klase para sa pagbasa asin pagsurat, an babaeng ini toninong na naghapot: “Puede daw akong umayon sa klase?” Iyo an simbag. Poon kaidto padagos sia dai noarin man nagpalta sa klase o pagtiripon kan kongregasyon. Nagmaigot sia sa saiyang mga leksion sa pagbasa asin makangangalas an pag-oswag, na ikinaogma niang marhay. An sunod niang kahagadan iyo ini: “Puede daw akong magkaigwa nin pag-adal sa Biblia?” An agom nia maogmang nagpoon na adalan sia, asin sia padagos na nag-ooswag sa saiyang abilidad sa pagbasa asin pagsurat patin sa saiyang kaaraman manongod sa Biblia.

Para sa sarong 50 anyos na dai pa noarin man nakakapot nin lapis, an pagkapot sana nin pansurat asin pagsurat kan mga letra kan abece puedeng magin garo-bukid na balakid. An nagkapira nalapak an saindang mga moro huli sa higot na pagkapot ninda sa lapis asin papel durante kan enot na mga tangga nin pag-adal. Pakalihis nin mga semana nin maigot na paghihingoa na kapotan asin kontrolon an lapis, an nagkapirang estudyante nagkagsing na may dakulang huyom: “Nahihiro ko na an kamot ko nin magian sa ibabaw nin papel!” An pakaheling sa pag-oswag kan mga estudyante nakapaoogma man sa mga paratokdo. An sarong paratokdo nagsabi: “An pagtotokdo sa klase magayagaya nanggad, asin an tunay na pag-apresyar kan mga estudyante sa probisyon na ini hale ki Jehova parateng ipinahahayag paagi sa pag-upak sa katapusan kan klase.”

Kaiba kan mga misyonero, naggagayagaya an mga Saksing ini na ngonyan tatao nang magbasa asin magsurat. Taano? Huli ta magagamit na ninda ngonyan an saindang kakayahan na magbasa asin magsurat sa pagtaong-onra ki Jehova.

[Mga ritrato sa pahina 8, 9]

An mga hoben sagkod gurang inaapresyar an mga klase para sa pagbasa asin pagsurat