Hula ni Isaias—Liwanag Para sa Bilog na Katawohan II

Kapitulo Tres: “An Sakong Pinili, na Inoyonan kan Sakong Kalag!”

Isaias 42:1-25

1, 2. Taano ta interesado an mga Kristiano ngonyan sa kapitulo 42 kan Isaias?

 “‘KAMO an sakong mga saksi,’ an sabi ni Jehova, ‘an sakong lingkod na sakong pinili.’” (Isaias 43:10) An deklarasyon na ini ni Jehova, na isinurat ni propeta Isaias kan ikawalong siglo B.C.E., nagpapaheling na an suanoy na katipan na banwaan ni Jehova sarong nasyon nin mga saksi. Sinda an piniling lingkod ni Jehova. Pakalihis nin mga 2,600 na taon, kan 1931, ipinahayag sa publiko kan linahidan na mga Kristiano na an mga tataramon na ini minaaplikar sa sainda. Ginamit ninda an ngaran na Mga Saksi ni Jehova asin bilog na pusong inako an mga paninimbagan na konektado sa pagigin lingkod nin Dios sa daga.

² Odok an pagmawot kan Mga Saksi ni Jehova na paogmahon an Dios. Sa dahelan na ini, an balang saro sa sainda igwa nin makosogon na interes sa ika-42 na kapitulo kan libro nin Isaias, huli ta ilinaladawan kaiyan an sarong lingkod na inooyonan ni Jehova asin an saro pang lingkod na hinahaboan nia. An pag-estudyar sa hulang ini asin sa kaotoban kaiyan nagtatao nin pakarorop sa kun ano an nagbubunga kan pag-oyon nin Dios asin ano an nagbubunga kan saiyang dai pag-oyon.

“Ibinugtak Ko an Sakong Espiritu sa Saiya”

3. Ano an ihinula ni Jehova paagi ki Isaias manongod sa “sakong lingkod”?

³ Paagi ki Isaias, ihinula ni Jehova an pagdatong nin sarong lingkod na sia mismo an mapili: “Uya! An sakong lingkod, na higot kong pinangangaptan! An sakong pinili, na inoyonan kan sakong kalag! Ibinugtak ko an sakong espiritu sa saiya. Hustisya sa mga nasyon an paluluwason nia. Dai sia magkukurahaw o ilalangkaw an saiyang tingog, asin sa lansangan dai nia ipadadangog an saiyang tingog. Dai sia mabari nin ronot nang gaho; asin kun dapit sa marumarom na linong mitsa, dai nia iyan paparongon. May kaimbodan na paluluwason nia an hustisya. Dai sia magigin marumarom ni maroronot sagkod na maestablisar nia an hustisya sa daga; asin an saiyang ley padagos na hahalaton kan mga isla.”​—Isaias 42:1-4.

4. Siisay an ihinulang “pinili,” asin paano niato ini naaaraman?

⁴ Siisay an Lingkod na nasambitan digdi? Dai kaipuhan na kita magduda. Manonompongan niato na an mga tataramon na ini kinotar sa Ebanghelyo ni Mateo asin iinaplikar ki Jesu-Cristo. (Mateo 12:15-21) Si Jesus an namomotan na Lingkod, an “pinili.” Kasuarin ibinugtak ni Jehova an saiyang espiritu ki Jesus? Kan 29 C.E., kan panahon na si Jesus binautismohan. An ipinasabong na rekord naglaladawan kan bautismong iyan asin nagsasabi na pakahawas ni Jesus sa tubig, “an langit nabukasan asin an banal na espiritu sa pormang salampati naghilig sa saiya, asin may tingog na naghale sa langit: ‘Ika an sakuyang Aki, an namomotan; inoyonan taka.’” Sa paaging ini personal na ipinamidbid ni Jehova an saiyang namomotan na Lingkod. An suminunod na ministeryo ni Jesus asin an ginibo niang mga milagro nagpatotoo na talagang nasa saiya an espiritu ni Jehova.​—Lucas 3:​21, 22; 4:14-21; Mateo 3:​16, 17.

‘Paluluwason Nia an Hustisya sa mga Nasyon’

5. Taano ta kaipuhan na linawon an hustisya kan enot na siglo C.E.?

⁵ “Paluluwason,” o palalatawon, kan Pinili ni Jehova an tunay na hustisya. “Kun ano an hustisya liliwanagon nia sa mga nasyon.” (Mateo 12:18) Kaipuhan nanggad ini kan enot na siglo C.E.! An Judiong mga namomoon sa relihion nagtokdo nin biribid na pananaw sa hustisya asin katanosan. Hiningoa nindang kamtan an katanosan paagi sa pagsunod sa estriktong kodigo nin mga ley​—na an dakol gibo-gibo man sana ninda. An saindang legalistikong hustisya mayo nin pagkaherak asin pagkaludok.

6. Sa anong mga paagi ipinaaram ni Jesus an tunay na hustisya?

⁶ Sa kabaliktaran, ihinayag ni Jesus an pagmansay nin Dios sa hustisya. Paagi sa saiyang itinotokdo asin pamumuhay, ipinaheling ni Jesus na may pagkaludok asin maheherakon an tunay na hustisya. Isip-isipa na sana an saiyang bantog na Sermon sa Bukid. (Mateo, kapitulo 5-7) Kanigoan kahusay na eksplikasyon kun paano maninigong isagibo an hustisya asin katanosan! Kun binabasa niato an mga pagkasaysay sa Ebanghelyo, bako daw na kita napahihiro kan pagkaludok ni Jesus sa mga dukha asin nagsasakit nin makuri? (Mateo 20:34; Marcos 1:41; 6:34; Lucas 7:13) Dinara nia an saiyang nakararangang mensahe sa dakol na garo lanog na mga gaho, tiko asin napagsusuntok. Sinda garo nagbabagang linong mitsa, na haros nasigbo na an saindang ultimong silyab nin buhay.  Si Jesus dai nagbari nin “ronot nang gaho” ni nagparong nin “marumarom na linong mitsa.” Imbes, an saiyang mamomoton asin may pagkaludok na mga tataramon asin ginibo nagpaogma sa puso kan mga mahoyo.​—Mateo 11:28-30.

7. Taano ta sinasabi kan hula na si Jesus ‘dai magkukurahaw o ilalangkaw an saiyang tingog sa lansangan’?

⁷ Pero, taano ta sinasabi kan hula na si Jesus ‘dai magkukurahaw o ilalangkaw an saiyang tingog, asin dai nia ipadadangog an saiyang tingog sa lansangan’? Huli ta dai nia ipinag-orgolyo an saiyang sadiri, siring kan ginibo kan dakol sa saiyang kaaldawan. (Mateo 6:5) Kan pinaomayan an sarong leproso, sinabihan nia an tawong naomayan: “Siertohon mo na dai ka magsabi nin ano man sa kiisay man.” (Marcos 1:40-44) Imbes na magmawot nin publisidad asin pabayaan an mga tawo na makaabot sa konklusyon base sa mga bareta hale sa iba, gusto ni Jesus na masabotan ninda mismo basado sa marigon na ebidensia na sia an Cristo, an linahidan na Lingkod ni Jehova.

8. (a) Paano si Jesus nagpaluwas nin “hustisya sa mga nasyon”? (b) Ano an itinotokdo sa sato kan ilustrasyon ni Jesus manongod sa tataong makipagkapwa-tawong Samaritano kun dapit sa hustisya?

⁸ An Piniling Lingkod mapaluwas nin “hustisya sa mga nasyon.” Ginibo ini ni Jesus. Apuera sa pagdodoon kan may pagkaludok na kahulogan nin diosnon na hustisya, itinokdo ni Jesus na iyan maninigong nakasasakop sa gabos na tawo. Sarong beses ipinagirumdom ni Jesus sa sarong lalaki na madonong sa Ley na maninigo niang kamotan an Dios asin an saiyang kapwa. An lalaki naghapot ki Jesus: “Siisay man nanggad an sakuyang kapwa?” Tibaad linalaoman nia na masimbag si Jesus: “An kapwa mo Judio.” Alagad sinabi ni Jesus an parabola manongod sa tataong makipagkapwa-tawong Samaritano. Sa parabola tinabangan nin sarong Samaritano an sarong tawong sinalakay nin mga parahabon, mantang an sarong Levita asin sarong saserdote habong tumabang. Kinaipuhan na admitiron kan naghahapot na sa pangyayaring ini an hinahamak na Samaritano iyo an kapwa, bakong an Levita o an saserdote. Tinapos ni Jesus an saiyang ilustrasyon sa sadol na: “Gibohon mo man mismo an arog kaiyan.”​—Lucas 10:25-37; Levitico 19:18.

“Dai Sia Magigin Marumarom ni Maroronot”

9. Paano makakaapektar sa sato an pakasabot sa kahulogan kan tunay na hustisya?

⁹ Huling lininaw ni Jesus an kahulogan nin tunay na hustisya, an saiyang mga disipulo nakanood na ipaheling an kualidad na ini. Dapat na manodan ta man iyan. Enot sa gabos, kaipuhan na akoon niato an mga pamantayan nin Dios sa marahay asin maraot, huling sia an may deretso sa pagdeterminar kun ano an may hustisya asin matanos. Mantang kita nagmamaigot na gibohon an mga bagay segun sa paagi ni Jehova, an satong tanos na paggawe malinaw na maghahayag kun ano an tunay na hustisya.​—1 Pedro 2:12.

10. Taano ta kalabot sa pagpaheling nin hustisya an pakikikabtang sa paghuhulit asin pagtotokdo?

¹⁰ Ipinaheheling ta man an tunay na hustisya kun kita mahigos na nagpapartisipar sa paghuhulit asin pagtotokdo. Si Jehova buka an palad na nagtao kan panligtas-buhay na kaaraman dapit sa saiya, sa saiyang Aki, asin sa saiyang mga katuyohan. (Juan 17:3) Bakong tama o makatanosan na sadirihon niato an kaaraman na iyan. “Dai ipanguri an marahay sa mga nanonongdan kaiyan, kun nasa kapangyarihan kan saimong kamot na gibohon iyan,” an sabi ni Salomon. (Talinhaga 3:27) Bilog na puso niatong ihiras sa gabos na tawo an aram niato manongod sa Dios, ano man an saindang pinaghalean na rasa, etniko, o nasyon.​—Gibo 10:​34, 35.

11. Bilang pag-arog ki Jesus, paano niato maninigong trataron an iba?

¹¹ Dugang pa, an pagtratar nin sarong tunay na Kristiano sa iba kapareho kan ginibo ni Jesus. Dakol ngonyan an napapaatubang sa mga problema na nakapanluluya nin boot asin nangangaipo nin pagkaludok asin pamparigon sa boot. Dawa an nagkapirang nagdusay na Kristiano puedeng rogado nang marhay sa mga pangyayari kaya sinda garo na mga ronot na gaho o nagbabagang mitsa. Bako daw na kaipuhan ninda an satong suporta? (Lucas 22:32; Gibo 11:23) Nakarerepresko nanggad na magin kabtang nin sarong asosasyon nin tunay na mga Kristiano, na naghihingoang arogon si Jesus sa paggibo nin hustisya!

12. Taano ta makakokompiar kita na an hustisya para sa gabos madali nang magkatotoo?

¹² Magkakaigwa pa daw nin hustisya para sa gabos? Iyo nanggad. An Pinili ni Jehova “dai . . . magigin marumarom ni maroronot sagkod na maestablisar nia an hustisya sa daga.” Sa dai na nanggad mahahaloy an pinatukaw sa tronong Hade, an binuhay liwat na si Cristo Jesus, ‘mamamalos sa mga dai nakamimidbid sa Dios.’ (2 Tesalonica 1:6-9; Kapahayagan 16:14-16) An pamamahala nin tawo sasalidahan kan Kahadean nin Dios. An hustisya asin katanosan malakop. (Talinhaga 2:​21, 22; Isaias 11:3-5; Daniel 2:44; 2 Pedro 3:13) May galagang pag-antisipar, an mga lingkod ni Jehova sa gabos na lugar​—dawa idtong nasa harayong mga lugar, an “mga isla”​—naghahalat sa aldaw na iyan.

‘Itatao Ko Sia Bilang Liwanag kan mga Nasyon’

13. Ano an ihinula ni Jehova manongod sa saiyang Piniling Lingkod?

¹³ Si Isaias nagpapadagos: “Iyo ini an isinabi kan tunay na Dios, si Jehova, an Kaglalang kan kalangitan asin an Sarong Kaharohalangkawe na nagbibiklad sa sainda; an Saro na nagpapamugtak kan daga asin kan mga bunga kaiyan, an Saro na nagtatao nin hinangos sa mga tawong yaon dian, asin nin espiritu sa mga naglalakaw dian.” (Isaias 42:5) Kanigoan kamapuersang deskripsion ki Jehova, an Kaglalang! An pagirumdom na ini manongod sa kosog ni Jehova nagtatao nin dakulaon na puersa sa saiyang sinasabi. Si Jehova nagsasabi: “Ako mismo,  si Jehova, an nag-apod sa saimo sa katanosan, asin kinapotan ko an saimong kamot. Asin iingatan taka asin itatao taka bilang tipan kan banwaan, bilang liwanag kan mga nasyon, tanganing buklaton mo an mga matang buta, tanganing paluwason mo sa kalabos an bilanggo, sa harong nin pagkabilanggo an mga nagtutukaw sa kadikloman.”​—Isaias 42:​6, 7.

14. (a) Ano an boot sabihon kan pagkapot ni Jehova sa kamot kan saiyang inooyonan na Lingkod? (b) Ano an papel kan Piniling Lingkod?

¹⁴ An Kaharohalangkaweng Kaglalang kan uniberso, an Paratao nin asin Parasustenir sa buhay, nakakapot sa kamot kan saiyang Piniling Lingkod asin nanunuga nin lubos asin dayaday na suporta. Kanigoan kanakapakokosog liwat sa boot kaiyan! Apuera kaini, iniingatan sia ni Jehova tanganing ikatao sia bilang “tipan kan banwaan.” An tipan sarong kontrata, sarong napagkaoyonan, sarong solemneng panuga. Iyan sarong maaasahan na ordinansa. Iyo, ginibo ni Jehova an saiyang Lingkod na “sarong panuga sa banwaan.”​—An American Translation.

15, 16. Sa anong paagi si Jesus nagserbing “liwanag kan mga nasyon”?

¹⁵ Bilang “liwanag kan mga nasyon,” bubuklaton kan ipinanugang Lingkod “an mga matang buta” asin patatalingkason “an mga nagtutukaw sa kadikloman.” Ginibo ini ni Jesus. Paagi sa pagpatotoo sa katotoohan, pinamuraway ni Jesus an ngaran kan saiyang langitnon na Ama. (Juan 17:​4, 6) Ibinuyagyag nia an relihiosong mga kaputikan, ihinulit an maogmang bareta kan Kahadean, asin binuksan an tata pasiring sa espirituwal na katalingkasan para sa mga nasa relihiosong kaoripnan. (Mateo 15:3-9; Lucas 4:43; Juan 18:37) Nagpatanid sia tumang sa paggibo nin mga gibo kan kadikloman asin ibinuyagyag si Satanas bilang “an ama kan kaputikan” asin “an namamahala sa kinaban na ini.”​—Juan 3:19-21; 8:44; 16:11.

¹⁶ Sinabi ni Jesus: “Ako iyo an liwanag kan kinaban.” (Juan 8:12) Pinatunayan nia sa pambihirang paagi na sia an liwanag kan idolot nia an saiyang sangkap na buhay na tawo bilang pantubos. Sa siring binuksan nia an dalan para sa mga naggigibo nin pagtubod tanganing magkaigwa nin kapatawadan nin mga kasalan, inooyonan na relasyon sa Dios, asin esperansang mabuhay na daing sagkod. (Mateo 20:28; Juan 3:16) Paagi sa pagpapadanay nin sangkap na diosnon na debosyon sa bilog niang buhay, sinuportaran ni Jesus an soberaniya ni Jehova asin pinatunayan na putikon an Diablo. Talagang si Jesus an paratao nin pagheling sa mga buta asin parakalda sa mga nabibilanggo sa espirituwal na kadikloman.

17. Sa anong mga paagi kita nagseserbing mga paradara nin liwanag?

¹⁷ Sa Sermon sa Bukid, sinabi ni Jesus sa saiyang mga disipulo: “Kamo iyo an liwanag kan kinaban.” (Mateo 5:14) Bako daw na kita man mga paradara nin liwanag? Paagi sa satong pamumuhay asin paghuhulit, may pribilehio kita na giyahan an iba pasiring ki Jehova, an Gikanan nin tunay na kaliwanagan. Bilang pag-arog ki Jesus, ipinamimidbid niato an ngaran ni Jehova, sinusuportaran an Saiyang soberaniya, asin ibinabalangibog an Saiyang Kahadean bilang an solamenteng paglaom nin katawohan. Dugang pa, bilang mga paradara nin liwanag ibinubuyagyag niato an relihiosong mga kaputikan, nagpapatanid tumang sa maating mga gibo kan kadikloman, asin ibinubuyagyag si Satanas, an maraot.​—Gibo 1:8; 1 Juan 5:19.

“Awit Kamo ki Jehova nin Bagong Awit”

18. Ano an ipinaaaram ni Jehova sa saiyang banwaan?

¹⁸ Itinao ngonyan ni Jehova an saiyang atension sa saiyang banwaan, na nagsasabi: “Ako si Jehova. Iyan an sakong ngaran; asin dai ko itatao sa iba an sakong kamurawayan, ni an sakong kaomawan sa kinortihan na mga imahen. An enot na mga bagay​—uya na an mga iyan, alagad ipinapahayag ko an mga bagong bagay. Bago sinda magruluwas, ipinapaisi ko na iyan sa saindo.” (Isaias 42:​8, 9) An hula manongod sa “sakong lingkod” itinaram, bako kan saro sa mga daing kamanungdanan na mga dios, kundi kan iyo sanang nabubuhay asin tunay na Dios. Iyan siertong maootob, asin iyan talagang naotob. Tunay nanggad na si Jehova Dios an Autor nin bagong mga bagay, asin ipinaaaram nia iyan sa saiyang banwaan bago iyan mangyari. Paano kita maninigong maghimate?

19, 20. (a) Anong awit an dapat na awiton? (b) Siisay ngonyan an nag-aawit kan awit nin pag-omaw ki Jehova?

¹⁹ Nagsurat si Isaias: “Awit kamo ki Jehova nin bagong awit, nin saiyang kaomawan magpoon sa kaporoporohi kan daga, kamo na mga nagdadalhog sa dagat asin sa nakapapano dian, kamong mga isla asin kamong mga nag-eerok dian. Kumurahaw an kaawagan asin an mga siudad kaiyan, an mga istaran na ineerokan kan Kedar. Kumurahaw sa kagayagayahan an mga nag-eerok sa kantil. Hale sa alitoktok kan mga bukid kumurahaw nin makosog an mga tawo. Iatribwir ninda ki Jehova an kamurawayan, asin sa mga isla magtaram sinda pati kan saiyang kaomawan.”​—Isaias 42:10-12.

²⁰ An mga nag-eerok sa mga siudad, sa mga baryo sa kaawagan, sa mga isla, dawa sa “Kedar,” o mga kampamento sa desierto​—an mga tawo sa gabos na lugar​—sinasadol na umawit nin awit nin pag-omaw ki Jehova. Nakaoogma nanggad na sa satong kaaldawan minilyon an naghimate sa makahulang pakiolay na ini! Maogma nindang inako an katotoohan kan Tataramon nin Dios asin minidbid ninda si Jehova bilang saindang Dios. Inaawit kan banwaan ni Jehova an bagong awit na ini​—na iinaatribwir ki Jehova an kamurawayan​—sa labing 230 kadagaan. Nakapupukaw sa boot nanggad na umawit sa korong ini na kompuesto nin dakol na laen-laen na kultura, lenguahe, asin rasa!

21. Taano ta dai magigin mapanggana an mga kaiwal kan banwaan nin Dios sa pagpaontok sa awit nin pag-omaw ki Jehova?

²¹ Kaya daw kan mga nagkokontra na tumindog laban sa Dios asin paontokon an awit na ini nin pag-omaw? Imposible! “Siring sa tawong makosog si Jehova maluwas. Siring sa parapakilaban pupukawon nia an kaigotan. Sia makurahaw, iyo, saiyang ikukurahaw  an kurahaw nin ralaban; patutunayan nia na sia orog na makapangyarihan sa saiyang mga kaiwal.” (Isaias 42:13) Anong kapangyarihan an makatitindog tumang ki Jehova? Mga 3,500 na taon na an nakalihis, an propetang si Moises asin an mga aki ni Israel nag-awit: “Si Jehova parapakilaban na lalaking-lalaki. Jehova an saiyang ngaran. An mga karuwahe ni Faraon asin an saiyang mga puersa militar iinapon nia sa dagat, asin an mga pili sa saiyang mga parapakilaban rinulunod sa Dagat na Pula.” (Exodo 15:​3, 4) Nanggana si Jehova tumang sa pinakamakapangyarihan na puersa militar kan panahon na idto. Mayong kaiwal kan banwaan nin Dios an manggagana kun si Jehova lumuwas na bilang makapangyarihan na parapakilaban.

“Ako Nagdanay na Daing Girong sa Haloy na Panahon”

22, 23. Taano si Jehova ta ‘nagdadanay na daing girong sa haloy na panahon’?

²² Si Jehova mayong ipinaoorog asin may hustisya, dawa kun naggigibo nin paghokom tumang sa saiyang mga kaiwal. Sia nagsasabi: “Ako nagdanay na daing girong sa haloy na panahon. Nagpadagos akong daing girong. Nagpadagos akong magpogol. Siring sa babae na nangangaki ako maagrangay, mahangoshangos, asin mahalhal nin sabay-sabay. Raradason ko an mga bukid asin bulod, asin papaalangon ko an gabos nindang pananom. Asin an mga salog gigibohon kong mga isla, asin papaatihon ko an magahong mga danaw-danaw.”​—Isaias 42:​14, 15.

²³ Bago gumibo nin hudisyal na aksion, pinalilihis nguna ni Jehova an panahon tanganing tawan nin oportunidad an mga paragibo nin sala na talikdan an saindang maraot na mga dalan. (Jeremias 18:7-10; 2 Pedro 3:9) Estudyare an nangyari sa mga Babilonyo, na, bilang an nangingibabaw na kapangyarihan pankinaban, guminaba sa Jerusalem kan taon 607 B.C.E. Itinogot ini ni Jehova tanganing disiplinahon an mga Israelita huli sa saindang pagigin bakong fiel. Minsan siring, dai nasabotan kan mga Babilonyo an saindang papel. Pinagringisan ninda an banwaan nin Dios nin labi-labi kisa hinahagad kan paghokom nin Dios. (Isaias 47:​6, 7; Zacarias 1:15) Seguradong nakolgan na marhay an tunay na Dios na maheling na nagdudusa an saiyang banwaan! Alagad nagpogol sia sa paghiro sagkod sa saiyang itinalaan na panahon. Sa panahon na idto, sia naghingoa​—siring sa sarong babae na nangangaki​—na patalingkason an saiyang katipan na banwaan asin pinaluwas sinda bilang independienteng nasyon. Tanganing mahaman ini, kan 539 B.C.E., pinaalang asin rinadas nia an Babilonya asin an mga pandepensa kaiyan.

24. Anong oportunidad an binuksan ni Jehova para sa saiyang banwaan na Israel?

²⁴ Seguradong napalukso an puso kan banwaan nin Dios kan sa katapustapusi, pakalihis nin kadakol na taon nin pagkadistiero, nabuksan sa sainda an dalan papuli! (2 Cronica 36:​22, 23) Seguradong naogma sindang marhay na maeksperyensiahan an kaotoban kan panuga ni Jehova: “Palalakawon ko an mga buta sa dalan na dai pa ninda aram; sa dana na dai pa ninda aram paaagihon ko sinda. Gigibohon kong liwanag an madiklom na lugar sa atubangan ninda, asin patag na daga an garanggasangon na daga. Ini an mga bagay na gigibohon ko para sa sainda, asin dai ko sinda babayaan.”​—Isaias 42:16.

25. (a) Sa ano makasesegurado an banwaan ni Jehova ngonyan? (b) Ano an maninigong magin determinasyon niato?

²⁵ Paano minaaplikar ngonyan an mga tataramon na ini? Bueno, halawig na panahon na ngonyan​—sa laog nin dakol nang siglo​—na pinabayaan ni Jehova na gibohon kan mga nasyon an gusto ninda. Minsan siring, harani na an saiyang itinalaan na panahon tanganing husayon an mga bagay-bagay. Sa presenteng mga panahon nagbangon sia nin sarong banwaan na magpapatotoo sa saiyang ngaran. Mantang garo pinapatag an ano man na pagtumang sa sainda, pinapantay nia an dalan tangani na masamba sia ninda “sa espiritu asin katotoohan.” (Juan 4:24) Sia nanuga: “Dai ko sinda babayaan,” asin inotob nia an saiyang tataramon. Kumusta man an mga nagpapadagos na sumamba sa falsong mga dios? Si Jehova nagsasabi: “Pababalikon sinda, mapapasupog sinda nin grabe, an mga nagtitiwala sa inukit na imahen, an mga nagsasabi sa minoldeng imahen: ‘Kamo an samong mga dios.’” (Isaias 42:17) Mahalagang marhay na kita magdanay na fiel ki Jehova, siring kan ginibo kan saiyang Pinili!

‘Sarong Lingkod na Bungog Asin Buta’

26, 27. Paano an Israel nagin ‘sarong lingkod na bungog asin buta,’ asin ano an mga resulta?

²⁶ An Piniling Lingkod nin Dios, si Jesu-Cristo, nagdanay na fiel sagkod sa kagadanan. Pero, an banwaan ni Jehova na Israel nagin bakong fiel na lingkod, bungog asin buta sa espirituwal na sentido. Sa pagkaolay sa sainda, si Jehova nagsasabi: “Dangoga nindong mga bungog; asin magheling kamong mga buta tanganing makaheling. Siisay an buta, kun bakong an sakong lingkod, asin siisay an bungog na siring kan sakong mensahero na isinusugo ko? Siisay an buta na siring kan tinawan nin balos, o buta na siring kan lingkod ni Jehova? May labot iyan sa pakaheling sa dakol na bagay, alagad dai ka padagos na nagmasid. May labot iyan sa pagbukas sa mga talinga, alagad dai ka padagos na naghinanyog. Si Jehova mismo naogmang marhay dahel kan saiyang katanosan kaya padadakulaon nia an ley asin gigibohon iyan na mamuraway.”​—Isaias 42:18-21.

²⁷ Kanigoan kamakamomondo an pagkasudya kan Israel! An mga namamanwaan dian paorootrong nahulog sa pagsamba sa mga dios na demonyo kan mga nasyon. Paorootrong isinusugo ni Jehova an saiyang mga mensahero, alagad dai naghihimate an saiyang banwaan. (2 Cronica  36:14-16) Ihinula ni Isaias an mga resulta: “Iyan sarong banwaan na sinalakat asin sinamsaman, kaya sinda gabos nalaom sa mga labot, asin sa mga harong nin pagkabilanggo itinago sinda. Sinda nagin para sa pananalakat na mayong paraligtas, sa pananamsam na mayo nin siisay man na magsasabi: ‘Ibalik mo!’ Siisay sa saindo an madangog kaini? Siisay an matao nin atension asin mahinanyog para sa maabot na mga panahon? Siisay an nagtao sa Jacob bilang samsam, asin sa Israel sa mga parasalakat? Bako daw na si Jehova, an Saro na pinagkasalaan niato, asin na sa saiyang mga dalan habo nindang maglakaw asin na sa saiyang ley dai sinda naghinanyog? Kaya Sia padagos na nagbubo sa saiya nin kabangisan, kan saiyang kaanggotan, asin kan kosog nin guerra. Asin padagos siang tinumtom kaini sa palibot, alagad dai sia nagmangno; asin iyan padagos na nag-arab-adab tumang sa saiya, alagad mayo siang isinasapuso na ano man.”​—Isaias 42:22-25.

28. (a) Ano an manonodan niato sa halimbawa kan mga nag-eerok sa Juda? (b) Paano niato mahihingoa na makamtan an pag-oyon ni Jehova?

²⁸ Huli sa pagigin bakong fiel kan mga nag-eerok dian, itinogot ni Jehova na salakaton asin samsaman an daga nin Juda kan 607 B.C.E. Sinolo kan mga Babilonyo an templo ni Jehova, ginaba an Jerusalem, asin dinarang bihag an mga Judio. (2 Cronica 36:17-21) Isapuso logod niato an panalmingan na ini asin dai noarin man magbinungog sa mga instruksion ni Jehova o magbinuta sa saiyang nasusurat na Tataramon. Imbes, hingoahon ta logod na kamtan an pag-oyon ni Jehova paagi sa pag-arog ki Cristo Jesus, an Lingkod na inooyonan ni Jehova mismo. Arog ki Jesus, ipaaram logod niato an tunay na hustisya paagi sa satong sinasabi asin ginigibo. Sa paaging ini, magdadanay kita na kabilang sa banwaan ni Jehova, na naglilingkod bilang mga paradara nin liwanag na nag-oomaw sa tunay na Dios asin nagtatao nin kamurawayan sa saiya.

[Mga Hapot Para sa Pag-adal]