Paano Niato Maninigong Mansayon an mga Pagbalo?

MGA pagbalo! An gabos kaipuhan na atubangon iyan. Tibaad an dahelan kaiyan mga pagkakalaen sa personalidad, kadepisilan sa pagbuhay, maluyang salud, sugot, pan-iimpluwensia nin kairiba na gumibo nin sala, paglamag, angat sa satong paninindogan manongod sa neutralidad o tumang sa idolatriya, asin dakol pang ibang bagay. Ano man na klaseng mga pagbalo an inaatubang niato, sa parate iyan nagigin dahelan nin grabeng kahaditan. Paano daw niato iyan makakaya nin mapanggana? Igwa daw nin ano man na paagi na nakikinabang kita dian?

An Pinakamarahay na Suporta

Si Hadeng David kan suanoy nag-agi nin mga pagbalo sa bilog niang buhay, pero sia nagadan na fiel. Paano daw sia nakatagal? Itinokdo nia an gikanan kan saiyang kosog kan sia magsabi: “Si Jehova an sakuyang Pastor. Dai ako magkukulang nin ano man.” Dangan an sabi pa nia: “Minsan ako maglakaw sa kababan nin kadikloman, dai ako natatakot sa ano man na maraot, huli ta ika kaibanan ko; an saimong badas asin an saimong sogkod iyo an mga nakararanga sa sako.” (Salmo 23:​1, 4) Iyo, si Jehova an gikanan nin daing sagkod na suporta. Inataman nia si David sa mga panahon na nakakatension na marhay, asin sia andam man na gibohon iyan sa sato kun kaipuhan.

Paano niato puedeng makamtan an suporta ni Jehova? Itinotokdo kan Biblia an paagi kan iyan magsabi: “Namitan nindo asin helingon nindo na si Jehova marahay.” (Salmo 34:8) Iyan mainit na imbitasyon, alagad ano an kahulogan kaiyan? Iyan pamparigon sa boot na maglingkod ki Jehova asin ioyon nin lubos an satong buhay sa saiyang kabotan. An siring na pamumuhay nangangahulogan nin pagbutas sa nagkapira niatong katalingkasan, na naggigibo nin mga pagsakripisyo. Sa nagkapirang kamugtakan, iyan puede pa nganing magbunga nin mga pagbalo​​—paglamag asin pagdusa. Pero, an mga bilog na puso na nag-aako kan imbitasyon ni Jehova dai noarin man kaipuhan na magbasol sa paggibo kaiyan. Magigin marahayon sa sainda si Jehova. Gigiyahan nia sinda asin aatamanon nia sinda sa  espirituwal na paagi. Sususteniran nia sinda sa mga pagbalo paagi sa saiyang Tataramon, saiyang banal na espiritu, asin Kristianong kongregasyon. Asin pag-abot nin panahon babalosan nia sinda nin buhay na daing katapusan.​​—Salmo 23:6; 25:9; Isaias 30:21; Roma 15:5.

An mga nagdedesisyon na liwaton an buhay tangani na maglingkod ki Jehova asin nagdadanay sa desisyon na iyan nanonompongan na inootob ni Jehova an gabos niang panuga. Iyan an inagihan kan mga Israelita na nagsunod ki Josue pasiring sa Dagang Panuga. Pakabalyo ninda sa Jordan, igwa nin mga pagbalo na dapat na tagalan, mga pakikipaglaban na dapat atubangon, asin makolog na mga leksion na dapat na manodan. Alagad an henerasyon na iyan mas fiel kisa saindang mga ama, na nagluwas hale sa Egipto asin nagadan sa kaawagan. Huli kaini, sinuportaran ni Jehova an mga fiel, asin may labot sa saindang kamugtakan sa katapusan kan buhay ni Josue, an rekord kan Biblia nagsasabi: “Tinawan sinda ni Jehova nin kapahingaloan sa bilog na palibot, segun sa gabos na bagay na isinumpa nia sa saindang mga apoon . . . Mayo ni sarong panuga an nasudya sa gabos na marahay na ipinanuga ni Jehova sa harong ni Israel; iyan gabos naotob.” (Josue 21:​44, 45) Iyan puede man na maeksperyensiahan niato kun kita mananarig nin lubos ki Jehova kun nasa irarom nin pagbalo asin sa gabos na iba pang panahon.

Ano an tibaad magpaluya sa satong kompiansa ki Jehova? Sinambit ni Jesus an sarong bagay kan sia magsabi: “Mayo nin siisay man na makapaglilingkod sa duwang kagurangnan . . . Dai kamo makapaglilingkod sa Dios asin sa Kayamanan.” (Mateo 6:24) Kun kita nagtitiwala ki Jehova, dai kita mahanap nin seguridad kun saen an kadaklan sa kinaban naghahanap kaiyan, sa materyal na mga bagay. Hinatolan ni Jesus an mga parasunod nia: “Kun siring, padagos na hanapon nguna an kahadean asin an saiyang katanosan, asin ini gabos na ibang [kaipuhan na materyal na] bagay idadagdag na sana sa saindo.” (Mateo 6:33) An sarong Kristiano na timbang an pagmansay sa materyal na mga bagay asin ineenot an Kahadean nin Dios sa saiyang buhay tama an pagpili. (Eclesiastes 7:12) Siempre, iyan puedeng mangahulogan nin sarong bagay para sa saiya. Tibaad magsakripisyo sia sa materyal na paagi. Alagad mag-aani sia nin dakol na balos. Asin sususteniran sia ni Jehova.​​—Isaias 48:​17, 18.

Kun Ano an Nanonodan Niato sa mga Pagbalo

Siempre, an pagdesisyon na ‘namitan asin helingon na si Jehova marahay’ dai nagpoprotehir sa saro sa dai linalaoman na mga pangyayari sa buhay; ni na biyong pinoprotehiran kita kaiyan sa mga pagsalakay ni Satanas asin kan saiyang mga tawong representante. (Eclesiastes 9:11) Bilang resulta, puedeng mabalo an sinseridad asin determinasyon nin sarong Kristiano. Taano ta pinababayaan ni Jehova an mga nagsasamba sa saiya na mapaatubang sa siring na mga pagbalo? Si apostol Pedro nagtao nin sarong dahelan kan sia magsurat: “Sa madali sana ngonyan, na kun mangyari, kamo nagmondo sa manlaenlaen na pagbalo, tanganing an nabalong kualidad kan saindong pagtubod, na may orog nanggad na halaga kisa sa bulawan na napapara minsan ngani iyan napatunayan sa kalayo, magin dahelan nin pag-omaw asin kamurawayan patin onra sa pagkahayag ni Jesu-Cristo.” (1 Pedro 1:​6, 7) Iyo, an mga pagbalo tinotogotan kita na ipaheling an kualidad kan satong pagtubod asin kan satong pagkamoot ki Jehova. Asin iyan nakakatabang na masimbag an mga pagduhagi asin sahot ni Satanas na Diablo.​​—Talinhaga 27:11; Kapahayagan 12:10.

An mga pagbalo nakakatabang man sa sato na pataluboon an iba pang Kristianong mga kualidad. Bilang halimbawa, estudyare an mga tataramon kan salmista: “Naheheling [ni Jehova] an mapakumbaba; alagad harayo an pagheling nia sa mapalangkaw.” (Salmo 138:6) An dakol sa sato bakong natural na mapakumbaba, alagad makakatabang sa sato an mga pagbalo na pataluboon an kaipuhan na kualidad na iyan. Girumdoma an pangyayari kaidtong kaaldawan ni Moises kan an nagkapira sa Israel sawa na sa pagkakan nin mana serosemana, bulan-bulan. Minalataw na idto sarong pagbalo sa sainda, dawa ngani an mana milagrosong probisyon. Ano an katuyohan  kan pagbalong iyan? Sinabi sa sainda ni Moises: “[Si Jehova] nagpakakan saimo nin mana duman sa kaawagan . . . tanganing pakumbabaon ka asin tanganing baloon ka.”​—Deuteronomio 8:16.

An satong kapakumbabaan puede man na mabalo. Paano? Bueno, ano an reaksion niato sa mga pagliliwat sa organisasyon? (Isaias 60:17) Nagtatao daw kita nin bilog na pusong suporta sa paghuhulit asin pagtotokdo? (Mateo 24:14; 28:​19, 20) Galaga daw niatong inaako an mga paliwanag kan katotoohan sa Biblia na itinatao kan “fiel asin may diskresion na oripon”? (Mateo 24:45-47; Talinhaga 4:18) Linalabanan daw niato an impluwensia na magkaigwa kan pinakabagong mekanikal o elektronikong gamit, kan pinakabagong moda, o kan pinakabagong modelo nin auto? An sarong mapakumbaba makasisimbag nin iyo sa siring na mga hapot.​—1 Pedro 1:14-16; 2 Pedro 3:11.

An mga pagbalo nakakatabang na pataluboon sa sato an saro pang mahalagang marhay na kualidad​​—an pakatagal. Nagsabi an disipulong si Santiago: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo, sa pakaaram na ining nabalong kualidad kan saindong pagtubod nagbubunga nin pakatagal.” (Santiago 1:​2, 3) An mapangganang pagtagal sa sunod-sunod na pagbalo na may lubos na pagsarig ki Jehova nakapatatalubo nin karigonan, pagkadayaday, asin integridad. Pinakokosog kita kaiyan na labanan an mga pagsalakay ni Satanas sa ngapit, an anggot na dios kan kinaban na ini.​—1 Pedro 5:8-10; 1 Juan 5:19; Kapahayagan 12:12.

Papagdanayon an Tamang Pagmansay sa mga Pagbalo

An sangkap na Aki nin Dios, si Jesu-Cristo, napaatubang sa dakol na pagbalo kan yaon pa digdi sa daga asin nag-ani nin dakulang mga pakinabang huli sa pagtagal kaiyan. Si Pablo nagsurat na si Jesus “nakanood nin pagkuyog hale sa mga bagay na saiyang pinagdusahan.” (Hebreo 5:8) An kaimbodan nia sagkod sa kagadanan nagtaong kaomawan sa ngaran ni Jehova asin nagpagin posible para ki Jesus na itao bilang pantubos para sa katawohan an halaga kan saiyang sangkap na buhay bilang tawo. Binuksan kaiyan an dalan para sa mga nagtubod ki Jesus na magkaigwa nin paglaom na buhay na daing katapusan. (Juan 3:16) Huling si Jesus nagdanay na fiel sa irarom nin pagbalo, sia ngonyan an satong Halangkaw na Saserdote asin pinatukaw sa tronong Hade.​​—Hebreo 7:26-28; 12:2.

Kumusta man kita? An satong kaimbodan sa ibong nin mga pagbalo nagtatao man nin dakulang mga pakinabang. Dapit sa mga may langitnon na paglaom, an Biblia nagsasabi: “Maogma an tawo na padagos na nagtatagal sa pagbalo, huli ta sa pagigin inooyonan aakoon nia an korona nin buhay, na ipinanuga ni Jehova sa mga padagos na namomoot saiya.” (Santiago 1:12) An mga may daganon na paglaom igwa nin garantiya na kun sinda fiel na magtatagal, sinda magmamana nin buhay na daing katapusan sa paraiso sa daga. (Kapahayagan 21:3-6) Asin mas importante, an fiel na pakatagal ninda nagtatao nin kaomawan sa ngaran ni Jehova.

Mantang sinusundan niato an mga lakad ni Jesus, makakokompiar kita na an gabos na pagbalo na napapaatubang sa sato sa sistemang ini nin mga bagay makakaya nin mapanggana. (1 Corinto 10:13; 1 Pedro 2:21) Paano? Paagi sa satong pagsarig ki Jehova, na nagtatao nin “puersa na labi sa ordinaryo” sa mga nagsasarig sa saiya. (2 Corinto 4:7) Logod na an satong kombiksion magin siring kan ki Job, na dawa ngani sia nagtagal nin masakit na mga pagbalo may kompiansang nagpatotoo: “Pakatapos na ako mabalo nia, maluwas akong garo bulawan.”​​—Job 23:10.

[Ritrato sa pahina 31]

An kaimbodan ni Jesus sa irarom nin pagbalo nagtaong kaomawan sa ngaran ni Jehova. Iyo man kita