“Sueltong Magpatarawadtawadan”

NAGTUTUBOD daw kamo na pinatawad na nin Dios an mga kasalan nindo? Sa Estados Unidos, an kadaklan na nasa edad na garo baga nagtutubod. Si Dr. Loren Toussaint, pangenot na autor nin sarong pag-adal na ginibo sa Institusyon Para sa Pagsiyasat sa Sosyedad sa Unibersidad nin Michigan, nagreport na sa 1,423 na Amerikanong sinurbey, mga 80 porsiento kan mga nasa edad na na labing 45 anyos an nagsabi na pinatawad na sinda nin Dios sa saindang mga kasalan.

Pero, interesante na 57 porsiento sana kan mga sinurbey an nagsabi na sinda nagpatawad sa iba. An estadistikang iyan nagpapagirumdom sa sato kan mga tataramon ni Jesus sa Sermon sa Bukid: “Kun pinatatawad nindo an mga tawo sa saindang mga kasalan, patatawadon man kamo kan saindong langitnon na Ama; mantang kun dai nindo pinatatawad an mga tawo sa saindang kasalan, dai man patatawadon kan saindong Ama an saindong mga kasalan.” (Mateo 6:​14, 15) Iyo, an pagpatawad nin Dios sa satong mga kasalan kondisyonal, sa sarong kabtang, sa satong pagigin andam na magpatawad sa iba.

Ipinagirumdom ni apostol Pablo sa mga Kristiano sa Colosas an prinsipyong ini. Sinadol nia sinda: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo.” (Colosas 3:13) Totoo, ini bakong pirmeng pasil na gibohon. Halimbawa, kun kamo an pinagsabihan nin dai inisip o makolog na mga tataramon, puedeng masakit na palampason iyan.

Sa ibong kaiyan, dakol an pakinabang sa pagpapatawad. Si Dr. David R. Williams, sarong sosyologo, nagsabi mapadapit sa pagsiyasat nia: “Nanonompongan mi na igwa nin partikularmenteng makosog na koneksion an pagpatawad sa iba saka an kamugtakan kan isip kan mga medyo may edad na asin mas may edad nang mga Amerikano.” Kaoyon iyan kan mga tataramon kan madonong na si Hadeng Salomon, na nagsurat mga 3,000 na taon na an nakaagi: “An trangkilong puso iyo an buhay kan laman.” (Talinhaga 14:30) Huling an espiritu nin pagigin mapagpatawad nagpapaoswag kan marahay na relasyon sa Dios asin sa satong kapwa, may marahay kitang dahelan na magin andam na sueltong magpatarawadtawadan gikan sa puso.​​—Mateo 18:35.