“Magtao nin Orog Kisa Dating Atension”

“Kinakaipuhan na kita magtao nin orog kisa dating atension sa mga bagay na satong nadangog, tanganing dai kita noarin man ikaanod.”​—HEBREO 2:1.

1. Ipaheling kun paano an pagkadisturbo puedeng magresulta sa kapahamakan.

 MGA 37,000 katawo an nagagadan sa mga aksidente sa auto kada taon sa Estados Unidos sana. An mga eksperto nagsasabi na an dakol sa mga aksidenteng ini puedeng nalikayan kutana kun an mga nagmamaneho nagin mas atento sa tinampo. An nagkapirang motorista nadidisturbo kan mga karatula asin paskilan o kan paggamit kan saindang cell phone. Yaon man an mga nagkakakan mantang sinda nagmamaneho. Sa gabos na situwasyon na ini, an pagkadisturbo puedeng magresulta sa kapahamakan.

2, 3. Ano an ikinonseho ni Pablo sa mga Kristianong Hebreo, asin taano ta angay an hatol nia?

² Haros 2,000 na taon bago naimbento an auto, may sinabi si apostol Pablo na sarong klase nin pagkadisturbo na ikinapahamak nin nagkapirang Kristianong Hebreo. Idinoon ni Pablo na an binuhay liwat na si Jesu-Cristo tinawan nin katongdan na mas halangkaw kisa gabos na anghel, ta sia pinatukaw sa too nin Dios. Dangan sinabi kan apostol: “Kaya ngani kinakaipuhan na kita magtao nin orog kisa dating atension sa mga bagay na satong nadangog, tanganing dai kita noarin man ikaanod.”​—Hebreo 2:1.

³ Taano ta kaipuhan kan mga Kristianong Hebreo na ‘magtao nin orog kisa dating atension sa mga bagay na nadangog’ may labot ki Jesus? Huli ta haros 30 taon na an uminagi poon kan maghale si Jesus sa daga. Mantang mayo an saindang Kagurangnan, an nagkapirang Kristianong Hebreo nagpoon na ianod parayo sa tunay na pagtubod. Sinda nadisturbo kan Judaismo, an saindang dating paagi nin pagsamba.

Kaipuhan Sindang Magtao nin Orog na Atension

4. Taano ta tibaad nasugotan na bumalik sa Judaismo an nagkapirang Kristianong Hebreo?

⁴ Taano ta tibaad masugotan kaidto an sarong Kristiano na bumalik sa Judaismo? Bueno, an sistema nin pagsamba sa irarom kan Ley may kaibang naheheling na mga bagay. Naheheling kan mga tawo an mga saserdote asin napaparong ninda an sinosolo na mga atang. Minsan siring, sa nagkapirang bagay an Kristianismo medyo napapalaen. An mga Kristiano igwa nin Halangkaw na Saserdote, si Jesu-Cristo, alagad tolong dekada na siang dai naheheling kaidto sa daga. (Hebreo 4:14) Igwa sinda nin templo, alagad an banal na lugar kaiyan iyo an langit mismo. (Hebreo 9:24) Bakong arog nin pisikal na pagturi sa irarom kan Ley, an Kristianong pagturi iyo “an sa puso paagi sa espiritu.” (Roma 2:29) Kun siring, para sa mga Kristianong Hebreo, an Kristianismo tibaad nagpoon na magin garo medyo abstrakto.

5. Paano ipinaheling ni Pablo na an sistema nin pagsamba na inintrodusir ni Jesus nakalalabi kisa pagsamba sa irarom kan Ley?

 ⁵ Kinaipuhan na marealisar kan mga Kristianong Hebreo an sarong bagay na mahalagang marhay manongod sa sistema nin pagsamba na inintrodusir ni Cristo. Iyan mas basado sa pagtubod kisa pakaheling, alagad ta nakalalabi iyan sa Ley na itinao paagi ki propeta Moises. “Kun an dugo nin mga kanding asin nin mga toro asin an abo nin bakang babae na iwinirik sa mga nadigtaan nagpapagin banal sagkod sa kalinigan kan laman,” an isinurat ni Pablo, “gurano pa daw kaorog na an dugo kan Cristo, na paagi sa daing katapusan na espiritu nagdolot kan saiyang sadiri na daing kanawayan sa Dios, malilinigan an satong mga konsensia sa gadan na mga gibo tangani kitang makatao nin sagradong paglilingkod sa nabubuhay na Dios?” (Hebreo 9:​13, 14) Iyo, an kapatawadan na makakamtan paagi sa pagtubod sa atang na pantubos ni Jesu-Cristo nakalalabing marhay sa dakol na paagi kisa kapatawadan na itinatao kan mga atang na idinodolot sa irarom kan Ley.​—Hebreo 7:26-28.

6, 7. (a) Ano an situwasyon kaya apurado na an mga Kristianong Hebreo ‘magtao nin orog kisa dating atension sa mga bagay na nadangog’? (b) Kan magsurat si Pablo sa mga Hebreo, gurano pa kadakol na panahon an natatada para sa Jerusalem? (Helingon an nota sa ibaba.)

⁶ Igwa nin saro pang dahelan kun taano ta kaipuhan kan mga Kristianong Hebreo na magtao nin estriktong atension sa mga bagay na nadangog manongod ki Jesus. Ihinula nia na lalaglagon an Jerusalem. Nagsabi si Jesus: “Madatong sa saimo an mga aldaw na an saimong mga kaiwal matogdok sa palibot mo nin kuta na may matarom na mga taldok asin lalaomon ka patin pasasakitan ka sa gabos na lado, asin ika asin an saimong mga aki dian sa saimo papasubsobon ninda sa daga, asin dai ka ninda tatadaan nin gapo sa ibabaw nin gapo, huli ta dai mo namansayan an panahon na ika sisiyasaton.”​—Lucas 19:​43, 44.

⁷ Noarin ini mangyayari? Dai ihinayag ni Jesus an aldaw asin oras. Imbes, itinao nia an instruksion na ini: “Kun maheling na nindo an Jerusalem na napalilibotan nin nagkakampong mga hukbo, dangan aramon nindo na harani na an paggaba sa saiya. Dangan an mga nasa Judea magpoon nang dumulag pasiring sa kabukidan, asin an mga nasa tahaw nia magruluwas, patin an mga nasa oma dai na magralaog sa saiya.” (Lucas 21:​20, 21) Durante kan 30 taon pakatapos na itaram iyan ni Jesus, an nagkapirang Kristiano sa Jerusalem nawaran kan saindang pakamate nin pagkaapurado asin nadisturbo. Garo man sana naparayo an saindang atension mantang nagmamaneho. Kun dai ninda itatanos an saindang kaisipan, segurado an kapahamakan. Baga man iniisip ninda iyan o dai, madali na an pagkalaglag kan Jerusalem! a Awot pa man na an konseho ni Pablo nagin pampagimata sa mga  Kristiano sa Jerusalem na nagtutungka sa espirituwal.

Pagtao nin “Orog Kisa Dating Atension” Ngonyan

8. Taano ta kaipuhan kitang “magtao nin orog kisa dating atension” sa mga katotoohan sa Tataramon nin Dios?

⁸ Arog kan mga Kristiano kan enot na siglo, kaipuhan kitang “magtao nin orog kisa dating atension” sa mga katotoohan sa Tataramon nin Dios. Taano? Huli ta napapaatubang man kita sa nagdadangadang na kalaglagan, bakong nin saro sanang nasyon, kundi nin enterong sistema nin mga bagay. (Kapahayagan 11:18; 16:​14, 16) Siempre, dai ta aram an eksaktong aldaw asin oras kun noarin mahiro si Jehova. (Mateo 24:36) Minsan siring, naheheling mismo niato an kaotoban kan mga hula sa Biblia na malinaw na nagpapaheling na kita nabubuhay na sa “huring mga aldaw.” (2 Timoteo 3:1-5) Huli kaini, maninigo kitang magmaan tumang sa ano man na puedeng makadisturbo sa sato. Kaipuhan kitang magtao nin atension sa Tataramon nin Dios asin papagdanayon an listong pakamate nin pagkaapurado. Paagi sana sa paggibo kaiyan na kita magigin “mapanggana sa pagdulag sa gabos na ining bagay na nakatalagang mangyari.”​—Lucas 21:36.

9, 10. (a) Paano niato ikapaheheling na kita atento sa espirituwal na mga bagay? (b) Paanong an tataramon nin Dios ‘ilawan sa satong bitis’ asin ‘liwanag sa satong dalan’?

⁹ Sa importanteng mga panahon na ini, paano niato ikapaheheling na kita nagtatao nin “orog kisa dating atension” sa espirituwal na mga bagay? An sarong paagi iyo an magin regular sa satong pag-atender sa Kristianong mga pagtiripon, asamblea, asin kombension. Maninigo man kitang magin mahigos na mga estudyante sa Biblia tanganing mapadayupot kita sa Autor kaiyan, si Jehova. (Santiago 4:8) Kun nagkukua kita nin kaaraman dapit ki Jehova paagi sa personal na pag-adal asin mga pagtiripon, kita magigin arog kan salmista na nagsabi sa Dios: “An saimong tataramon ilawan sa sakong bitis, asin liwanag sa sakong dalan.”​—Salmo 119:105.

¹⁰ An Biblia nagseserbing ‘liwanag sa satong dalan’ pagsinasabi kaiyan sa sato an mga katuyohan nin Dios para sa ngapit. Iyan ‘ilawan [man] sa satong bitis.’ Sa ibang pagtaram, makakatabang iyan sa sato sa sunod niatong gigibohon kun napapaatubang kita sa masakit na mga problema sa buhay. Kaya mahalagang marhay na kita “magtao nin orog kisa dating atension” kun kita nagtitiripon tanganing matokdoan kaiba kan mga kapagtubod asin kun kita personal na nagbabasa kan Tataramon nin Dios. An impormasyon na ilinalaog niato sa isip matabang sa sato na gumibo nin madonong asin kapakipakinabang na mga desisyon na nakapaoogma ki Jehova asin nakapagagayagaya sa saiyang puso. (Talinhaga 27:11; Isaias 48:17) Paano niato mapalalawig an oras na kita nakakokonsentrar sa mga pagtiripon asin durante nin personal na pag-adal tanganing kita lubos na makinabang sa espirituwal na mga probisyon nin Dios?

Pagpaoswag kan Satong Konsentrasyon sa mga Pagtiripon

11. Taano ta bakong madali kun beses an pagtao nin atension sa Kristianong mga pagtiripon?

¹¹ Kun beses, bakong madali an pagtao nin atension sa Kristianong mga pagtiripon. An isip madaling madisturbo, tibaad nin naghihibing omboy o nin huring nag-abot na naghahanap nin matutukawan. Pakatapos nin maghapon na trabaho, tibaad talagang pagal na kita. An nagpapahayag sa plataporma tibaad bakong gayong mahusay na ispiker, asin bago niato maaraman, kita nangangatorogan na mata​—tibaad nalilipat pa ngani! Huli sa mahalagang marhay na impormasyon na iinaatubang, marahay na paoswagon niato an satong mga kakayahan nin pagkonsentrar sa mga pagtiripon kan kongregasyon. Alagad paano niato ini magigibo?

12. Ano an makatatabang sa sato na magin mas pasil na magtao nin atension sa mga pagtiripon?

¹² Sa parate mas madaling magtao nin atension sa mga pagtiripon kun kita andam na marhay. Kaya, kun siring, taano ta dai magtagama nin panahon tanganing patienot na pag-isipan an mga bagay na totokaron? Pirang minuto sana an kaipuhan kada aldaw tanganing basahon asin horophoropon an sarong kabtang kan asignadong mga kapitulo para sa babasahon sa Biblia sa semana. Paagi sa pagplano, makanonompong man kita nin panahon tanganing mag-andam para sa Pag-adal sa Libro kan Kongregasyon asin Pag-adal sa Torrengbantayan. Ano man na iskedyul an pilion niato, sarong bagay an segurado: An pag-andam matabang sa sato na makatao nin atension sa mga bagay na tinotokar sa mga pagtiripon kan kongregasyon.

13. Ano an puedeng makatabang sa sato na magdanay na nakakonsentrar sa mga bagay na tinotokar sa mga pagtiripon?

¹³ Apuera sa pagigin andam na marhay, nanonompongan  nin nagkapira na mas atento sinda sa mga pagtiripon kun sinda nakatukaw harani sa atubangan kan Kingdom Hall. An pagturuhok sa nagpapahayag, na sinusundan sa Biblia kun may binabasang teksto, asin pagkua nin nota dagdag pang paagi tanganing malikayan na maglagawlagaw an satong isip. Minsan siring, an pagkaigwa nin andam na puso orog nanggad na mahalaga kisa ano man na partikular na paagi nin pagkonsentrar. Kaipuhan niatong masabotan an katuyohan kan satong pagtorotiripon. Kita nakikipagtipon sa mga kapagtubod sa pangenot tanganing sambahon si Jehova. (Salmo 26:12; Lucas 2:​36, 37) An mga pagtiripon mahalagang paagi nin pagpakakan sa sato sa espirituwal. (Mateo 24:45-47) Dugang pa, tinatawan kita kaiyan nin mga oportunidad na ‘mandagka sa lambang saro sa pagkamoot asin sa marahay na mga gibo.’​—Hebreo 10:​24, 25.

14. Ano talaga an nagpapagin mapanggana sa sarong pagtiripon?

¹⁴ An nagkapira tibaad may tendensiang husgaran an kualidad nin sarong pagtiripon base sa mga kakayahan sa pagtotokdo kan mga may kabtang. Kun mahusay na marhay an mga nagpapahayag, tibaad sabihon ninda na marahay an pagtiripon. Alagad kun garo baga bakong epektibo an pagtotokdo, tibaad kabaliktaran an sabihon niato. Totoo na an mga may kabtang sa programa maninigo na gibohon an saindang pinakamakakaya na gumamit kan teknika sa pagtotokdo asin nangorogna tanganing taroson an puso. (1 Timoteo 4:16) Pero, kita na mga naghihinanyog maninigo na dai magin sobra kamapagkritika. Minsan ngani mahalaga an kakayahan nin pagtotokdo kan mga may kabtang, bako iyan an solamenteng nakakokontribwir sa kapangganahan nin pagtiripon. Bako daw na maoyon kamo na an maninigo niatong pangenot na isipon, bakong kun gurano kahusay magpahayag an ispiker, kundi kun gurano kita kahusay maghinanyog? Kun kita nag-aatender sa mga pagtiripon asin nagtatao nin atension sa iinaatubang, kita nagsasamba sa Dios kaoyon kan saiyang kabotan. Iyan an nagpapagin mapanggana sa pagtiripon. Kun kita galagang magkua nin kaaraman dapit sa Dios, kita makikinabang sa mga pagtiripon, ano man an kakayahan nin sarong  nagpapahayag. (Talinhaga 2:1-5) Tunay nanggad, kun siring, magin determinado kita na “magtao nin orog kisa dating atension” sa mga pagtiripon niato.

Lubos na Makinabang sa Personal na Pag-adal

15. Paano kita makikinabang sa pag-adal asin paghorophorop?

¹⁵ Dakula an pakinabang niato sa ‘pagtao nin orog kisa dating atension’ durante nin personal na pag-adal asin paghorophorop. An pagbasa asin pagpensar sa Biblia asin sa Kristianong mga publikasyon matao sa sato nin mahalagang marhay na mga oportunidad na itadom sa puso niato an mga katotoohan sa Tataramon nin Dios. Ini magkakaigwa man nin hararom na epekto sa paagi nin pag-isip asin paghiro niato. Tunay nanggad, tatabangan kita kaiyan na makanompong nin dakulang kaogmahan sa paggibo kan kabotan ni Jehova. (Salmo 1:2; 40:8) Kun siring, kaipuhan niatong pataluboon an satong mga kakayahan nin pagkonsentrar tanganing makatabang iyan sa sato kun kita nag-aadal. Madalion na madisturbo! An saradit na disturbo​—apod sa telepono o ribok puedeng magin dahelan na mawara an satong konsentrasyon. O tibaad ngani talagang halipot an oras na kita nakakokonsentrar. Tibaad magtukaw kita na marahay an intension na kumakan sa espirituwal, alagad dai mahaloy an isip garo man sana nananabsab na sa ibang sabsaban. Paano kita ‘makatatao nin orog kisa dating atension’ durante nin personal na pag-adal sa Tataramon nin Dios?

16. (a) Taano ta mahalaga na kita mag-iskedyul nin panahon para sa personal na pag-adal? (b) Paano kamo nakapagtao nin panahon sa pag-adal sa Tataramon nin Dios?

¹⁶ Kapakipakinabang na gumibo nin iskedyul asin pumili nin kamugtakan na nakatatabang na gayo sa pag-adal. An kadaklan sa sato kadikiton na sana an panahon para sa satong sadiri. Tibaad an pagmate niato garo kita nadadara kan marikas na dalagan kan aroaldaw na mga pangyayari siring sa sarong sanga na inaanod sa sarong masulog na sapa. Totoo nanggad, kaipuhan niatong labanan an sulog, sabi ngani, asin humanap nin sarong sadit na isla na toninong. Dai niato puedeng basta na sana halaton na magkaigwa nin oportunidad na mag-adal. Imbes, kaipuhan niatong kontrolon an situwasyon paagi sa pagtao nin panahon na mag-adal. (Efeso 5:​15, 16) An nagkapira nagtatagama nin halipot na panahon kun aga na dikit pa an disturbo. Nanonompongan kan iba na sa banggi igwa nin mas marahay na oportunidad. An importante iyo na dai niato dapat ignorohon an mahalagang marhay na pangangaipo na ilaog sa isip an tamang kaaraman dapit sa Dios asin sa saiyang Aki. (Juan 17:3) Kun siring mag-iskedyul kita nin panahon para sa personal na pag-adal dangan magdanay sa iskedyul na iyan.

17. Ano an paghorophorop, asin paano kita nakikinabang dian?

¹⁷ Mahalagang marhay an paghorophorop​—an proseso nin pagpensar sa satong nanodan sa pag-adal. Iyan nakatatabang sa sato na makua an mga kaisipan nin Dios sa satong binabasa asin ikalaog iyan sa satong puso. An paghorophorop nakatatabang sa sato na masabotan kun paano iaaplikar an hatol kan Biblia tanganing kita magin “mga paraotob kan tataramon, asin bakong mga paradangog sana.” (Santiago 1:22-25) Dugang pa, an paghorophorop nakatatabang sa sato na orog pang mapadayupot ki Jehova, ta pinapangyari kita kaiyan na mapag-isip-isip an saiyang mga kualidad asin kun paano iyan itinatampok sa pinag-aadalan durante kan mga panahon nin pag-adal.

18. Anong mga kamugtakan an kaipuhan para sa epektibong paghorophorop?

¹⁸ Tanganing lubos na makinabang sa pag-adal asin paghorophorop, dapat niatong haleon sa isip an mga disturbo. Tanganing ikalaog sa isip an bagong impormasyon kun kita naghohorophorop, kaipuhan niatong haleon an mga disturbo kan pamumuhay sa presenteng aldaw. An paggibo kaini nagkakaipo nin panahon asin pagsosolo, alagad ta kanigoan kanakagiginhawa na kumakan kan espirituwal na kakanon asin kan tubig nin katotoohan na yaon sa Tataramon nin Dios!

19. (a) Kun dapit sa personal na pag-adal, ano an nakatabang sa nagkapira na mapalawig an oras na sinda nakakokonsentrar? (b) Ano an maninigo na magin aktitud niato dapit sa pag-adal, asin anong mga pakinabang an makukua niato sa importanteng aktibidad na ini?

 ¹⁹ Paano kun halipot an oras na kita nakakokonsentrar asin an isip niato nagpopoon nang maglagawlagaw pakatapos nin halipot na pag-adal? Nanompongan nin nagkapira na mapapaoswag ninda an saindang mga kakayahan nin pagkonsentrar mantang nag-aadal paagi sa mas halipot ngunang mga pag-adal asin gradwal na pinalalawig iyan. An pasohan niato maninigo na maghaloy sa pag-adal imbes na maghidali. Kaipuhan niatong pataluboon an galagang interes sa temang tinotokar. Asin puede kitang gumibo nin dugang pang pagsiyasat na ginagamit an kadakol na materyal na itinao kan grupong fiel asin may diskresion na oripon. Dakula an kahalagahan nin pagsiyasat sa “hararom na mga bagay nin Dios.” (1 Corinto 2:10) An paggibo kaiyan nagpapangyari sa sato na mapaoswag an satong kaaraman dapit sa Dios asin mapatalubo an satong mga kakayahan nin pagmansay. (Hebreo 5:14) Kun kita mahigos na mga estudyante kan Tataramon nin Dios, kita magigin man “biyong kualipikado na magtokdo sa iba.”​—2 Timoteo 2:2.

20. Paano niato mapatatalubo asin mapagdadanay an dayupot na relasyon ki Jehova Dios?

²⁰ An pag-atender sa Kristianong mga pagtiripon asin personal na pag-adal makatatabang nin dakula sa sato na mapatalubo asin mapagdanay an dayupot na relasyon ki Jehova. Minalataw na totoo iyan sa salmista na nagsabi sa Dios: “Kanigoan an sakong pagkamoot sa saimong ley! Sa bilog na aldaw iyan sakong pinagmamalasakitan.” (Salmo 119:97) Tunay nanggad, kun siring, umatender kita nin regular sa mga pagtiripon, asamblea, asin kombension. Asin logod na tuboson niato an panahon para sa pag-adal asin paghorophorop sa Biblia. Kita babalosan nin igo huli sa pagtao nin “orog kisa dating atension” sa Tataramon nin Dios?

[Nota sa Ibaba]

Nagigirumdoman daw Nindo?

• Taano ta iinanod parayo sa tunay na pagtubod an nagkapirang Kristianong Hebreo?

• Paano kita magdadanay na atento sa Kristianong mga pagtiripon?

• Ano an matabang sa sato na makinabang sa personal na pag-adal asin paghorophorop sa Biblia?

[Mga Hapot Para sa Pag-adal]

[Ritrato sa pahina 11]

An mga Kristianong Hebreo kinaipuhan na magin listo sa madali nang pagkalaglag kan Jerusalem

[Ritrato sa pahina 13]

Matatabangan kan mga magurang an saindang mga aki na makinabang sa Kristianong mga pagtiripon