Paano Kamo Matatabangan kan Tunay na mga Santo?

SA Kasuratan, an Griegong termino na trinadusir na “santo” sa nagkapirang bersion puedeng tradusiron na “banal na saro.” Kiisay uminaplikar an terminong iyan? “Sa plural, kun nanonongod sa mga may pagtubod,” an sabi kan An Expository Dictionary of New Testament Words, “iyan an apod sa gabos na may pagtubod na iyan asin dai basta iinaplikar sa mga tawong pambihira an kabanalan, o sa mga tawo na, pagkagadan, namidbid sa pambihirang mga gibo nin pagigin santo.”

Kun siring inapod ni apostol Pablo an gabos na enot na Kristiano na tunay na mga santo, o mga banal. Halimbawa, nagsurat sia kan enot na siglo C.E. “sa kongregasyon nin Dios na yaon sa Corinto, kaiba an gabos na banal na yaon sa bilog na [probinsia nin Roma sa] Acaya.” (2 Corinto 1:1) Sa huri, nagsurat si Pablo “sa gabos na nasa Roma bilang mga namomotan na marhay nin Dios, na inapod na magin mga santo.” (Roma 1:​7, nota sa ibaba) An mga banal na ini malinaw na dai pa gadan, ni huli sa marahayon na birtud ilinangkaw sinda sa iba pang mga may pagtubod. Basado sa ano sinda minidbid na mga santo?

Sinantipikar nin Dios

Ipinaheheling kan Tataramon nin Dios na bakong mga tawo o organisasyon an nagdedeklarar sa saro bilang santo. An Kasuratan nagsasabi: “Ilinigtas . . . kita [nin Dios] asin inapod kita sa banal na pag-apod, bakong huli sa satong mga gibo, kundi huli sa saiya mismong katuyohan asin dai na kutana maninigong kabootan.” (2 Timoteo 1:9) An sarong banal sinantipikar huli sa pag-apod ni Jehova, segun sa dai na kutana maninigong kabootan nin Dios asin kaoyon kan Saiyang katuyohan.

An mga banal sa Kristianong kongregasyon mga partisipante sa “sarong bagong tipan.” An pinabolos na dugo ni Jesu-Cristo ginigibong balido an tipan na ini asin sinasantipikar an mga partisipante kaiyan. (Hebreo 9:15; 10:29; 13:​20, 24) Lininig sa pagheling nin Dios, sinda sarong ‘banal na kabilogan na grupo nin mga saserdote asin nagdodolot nin espirituwal na mga atang na inaako nin Dios paagi ki Jesu-Cristo.’​—1 Pedro 2:​5, 9.

Pag-arang sa Asin Pangongoltanan kan mga Santo

Sa paniniwala na an “mga santo” puedeng magtao nin espesyal na kapangyarihan sa mga may pagtubod, minilyon an nagsasamba sainda paagi sa paggamit nin mga relikya o pag-arang sainda bilang mga parapangoltanan. Itinotokdo daw ini sa Biblia? Sa Sermon sa Bukid, tinokdoan ni Jesus an saiyang mga parasunod kun paano madolok sa Dios, na nagsasabi: “Kun siring mamibi kamo nin arog kaini: ‘Ama niamo  na nasa langit, santipikaron logod an saimong ngaran.’” (Mateo 6:9) An mga pamibi angay na ipaabot ki Jehova Dios sana.

Sa paghihingoang suportaran an pangongoltanan kan “mga santo,” sinitar kan nagkapirang teologo an Roma 15:​30, kun saen mababasa niato: “Sinasadol ko kamo, mga tugang, paagi sa satong Kagurangnan na si Jesu-Cristo asin paagi sa pagkamoot kan espiritu, na kamo maghingoa kaiba ko sa pamimibi sa Dios para sako.” Ineenkaminar daw ni Pablo an mga may pagtubod na idto na mamibi sa saiya o arangon an saiyang ngaran sa pagdolok sa Dios? Dai. Minsan ngani ineenkaminar sa Biblia an mga pamibi para sa tunay na mga santo, o mga banal, mayo nin ipinagboboot sa sato an Dios na mamibi sa o paagi sa siring na mga banal.​—Filipos 1:​1, 3, 4.

Minsan siring, nagnombra an Dios nin sarong Parapangoltanan para sa satong mga pamibi. “Ako iyo an dalan asin an katotoohan patin an buhay,” an sabi ni Jesu-Cristo. “Mayo nin makaduduman sa Ama kun bakong huli sa sako.” Sinabi man ni Jesus: “Ano man an hagadon nindo sa ngaran ko, gigibohon ko ini, tangani na an Ama mapamuraway may labot sa Aki. Kun kamo maghagad nin ano man sa ngaran ko, gigibohon ko iyan.” (Juan 14:​6, 13, 14) Kompiado kita sa pagigin andam ni Jehova na dangogon an mga pamibi sa ngaran ni Jesus. May labot ki Jesus, an Biblia nagsasabi: “Sia man lubos na makapagliligtas duman sa mga minadolok sa Dios paagi sa saiya, huli ta sia danay na buhay tanganing makimaherak [“mangoltanan,” nota sa ibaba] para sa sainda.”​—Hebreo 7:25.

Kun andam si Jesus na mangoltanan para sato, taano ta an “mga santo” an parateng inaarang sa pamibi kan mga parasamba sa Kakristianohan? Sa saiyang librong The Age of Faith, sinusog kan historyador na si Will Durant an ginikanan kan kaugalean na ini. Minsan ngani naheheling na kinatatakotan an Makakamhan sa Gabos na Dios asin na mas madaling dolokon si Jesus, si Durant nagsasabi: “An saro dai nanggad mangangahas na kaolayon si [Jesus] nin atubangan pagkatapos na biyong dai intindihon an Saiyang mga Beatitud. Garo baga mas madonong na ipaabot an mga pamibi sa sarong santo na inaprobaran paagi sa pagdeklarar sa saiya na mapasalangit, asin hagadon sa saiya na sia an makimaherak ki Cristo.” Balido daw an mga ikinahahadit na ini?

Itinotokdo sa sato kan Biblia na paagi ki Jesus puede kitang magkaigwa nin “katalingkasan sa pagtaram asin pagdolok na may pagsarig” sa pagpamibi sa Dios. (Efeso 3:​11,12) An Makakamhan sa Gabos na Dios bakong harayoon sa katawohan  tanganing dangogon an satong mga pamibi. An salmistang si David kompiadong namibi: “O Paradangog nin pamibi, sa saimo an mga tawo nin gabos na laman madorolok.” (Salmo 65:2) Imbes na magtao nin kapangyarihan paagi sa mga relikya nin gadan nang “mga santo,” itinatao ni Jehova an saiyang banal na espiritu sa mga may pagtubod na naghahagad kaiyan. Si Jesus nangatanosan: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!”​—Lucas 11:13.

An Kabtang kan mga Banal

An mga banal na sinuratan ni Pablo dakol na siglo nang gadan asin, pag-abot nin panahon, maako nin “korona nin buhay,” sarong pagkabuhay liwat sa langit. (Kapahayagan 2:10) Aram kan mga parasamba ki Jehova Dios na an pagsamba sa tunay na mga santong ini bakong sono sa Kasuratan asin dai makatatao nin proteksion sa helang, natural na mga kalamidad, kadaihan nin kasegurohan kan ekonomiya, paggurang, o kagadanan. Huli kaini, tibaad ihapot nindo, ‘Talaga daw na may pagmakolog sa sato an mga banal nin Dios? Maninigo daw niatong laoman na sinda mahiro para sato?’

An mga banal risang-risang ilinadawan sa sarong hula na isinurat ni Daniel. Kan ikaanom na siglo B.C.E., naheling nia an sarong nakapupukaw sa boot na bisyon, na an kaotoban kaiyan nakaabot sa satong kaaldawan. Nagluwas sa dagat an apat na makatatakot na hayop na nagsisimbolisar sa mga gobyerno nin tawo, na dai kayang panigoan an tunay na mga pangangaipo kan katawohan. Dangan si Daniel naghula: “Alagad an mga banal kan Supremo mag-aako kan kahadean, asin sasadirihon ninda an kahadean sa panahon na daing talaan, sa sunod-sunod pa nganing panahon na daing talaan.”​—Daniel 7:​17, 18.

Kinompirmar ni Pablo an “pamana [na ini] sa mga banal,” an pagigin kaibang mga paramana ni Cristo sa kalangitan. (Efeso 1:18-21) An dugo ni Jesus an nagbukas kan dalan tanganing an 144,000 na banal buhayon liwat sa langitnon na kamurawayan. Nagpahayag si apostol Juan: “Maogma asin banal an siisay man na may kabtang sa enot na pagkabuhay liwat; sa mga ini mayo na nin autoridad an ikaduwang kagadanan, kundi sinda magigin mga saserdote nin Dios asin kan Cristo, patin mamamahala bilang mga hade sa kaibanan nia sa laog kan sangribong taon.” (Kapahayagan 20:​4, 6; 14:​1, 3) Sa bisyon, nadangog ni Juan an sarong hukbo nin langitnon na mga linalang na nag-aawit sa atubangan kan pinamuraway na si Jesus: “Paagi kan saimong dugo binakal mo an mga tawo manongod sa Dios hale sa lambang tribo asin tataramon asin banwaan patin nasyon, asin ginibo mo sinda na mani kahadean asin mga saserdote kan satuyang Dios, asin sinda mamamahala bilang mga hade sa daga.” (Kapahayagan 5:​9, 10) Kanigoan kanakapakokosog liwat sa boot! Si Jehova Dios mismo an maingat na nagpili sa mga lalaki asin babaeng ini. Dugang pa, fiel sindang naglingkod sa daga, na inaatubang an haros gabos na problema na naeeksperyensiahan kan mga tawo. (1 Corinto 10:13) Puede kitang magkompiar, kun siring, na an binuhay liwat na mga banal na ini, o mga santo, magigin maheherakon asin mapagsabot na mga namamahala, na kinokonsiderar an satong mga kaluyahan asin limitasyon.

Mga Bendisyon sa Irarom kan Pamamahala kan Kahadean

Madali nang humiro an gobyernong Kahadean sa paghale kan gabos na karatan asin pagdusa sa daga. Sa panahon na iyan, an mga tawo magigin mas dayupot sa Dios kisa kasuarin man. Isinurat ni Juan: “Dangan nakadangog ako nin makosog na tingog hale sa trono na nagsabi: ‘Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda.’” Matao ini nin dai mabilang na bendisyon sa katawohan, huli ta an hula nagsasabi pa: “Papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:​3, 4.

 Kanigoan kagayagayang panahon iyan! An mga resulta kan sangkap na pamamahala ni Cristo Jesus asin kan 144,000 na banal orog pang ilinaladawan sa mga tataramon na ini na nakasurat sa Miqueas 4:​3, 4: “[Si Jehova] maghohokom nanggad sa tahaw nin dakol na banwaan, asin maghuhusay mapadapit sa makokosog na nasyon sa harayo. Asin pupulpogon ninda an saindang mga espada na magin tarom nin arado asin an saindang mga budyak na magin mga gunting na pan-awan. Dai sinda mabingat nin espada, an nasyon tumang sa nasyon, ni mag-aadal pa man sinda sa pakilaban. Asin sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.”

Itinatao kan mga banal an pangagda na makikabtang sa siring na mga bendisyon. An tunay na mga santo, na sinisimbolisaran nin sarong nobya, padagos na nagsasabi: “Madia!” An teksto nagsasabi pa: “Asin an siisay man na makadangog magsabi: ‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.” (Kapahayagan 22:17) Ano an kaiba sa “tubig nin buhay”? Kabilang sa iba pang bagay, an tamang kaaraman sa mga katuyohan nin Dios. Sa pagpamibi sa Dios, si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Makukua an kaaraman na ini paagi sa regular na pag-adal sa Biblia. Kanigoan kaogma niato na paagi sa Tataramon nin Dios puede niatong mamansayan kun siisay talaga an mga banal asin maaraman kun paano nia sinda gagamiton para sa daing sagkod na pakinabang kan katawohan!

[Ritrato sa pahina 4]

Nagsurat si Pablo nin ipinasabong na mga surat sa tunay na mga santo

[Ritrato sa pahina 4, 5]

An fiel na mga apostol ni Jesus nagin tunay na mga santo, o mga banal

[Ritrato sa pahina 6]

Makakapamibi kita na may kompiansa sa Dios paagi ki Jesu-Cristo

[Ritrato sa pahina 7]

An binuhay liwat na mga santo, o mga banal, magigin maheherakon na mga namamahala sa daga