Padagos na Gibohon an mga Bagay na Saindong Nanodan

“An mga bagay na saindong nanodan saka inako asin nadangog patin naheling mapadapit sa sako, gibohon nindo an mga ini; asin mapapasaindo an Dios nin katoninongan.”​—FILIPOS 4:9.

1, 2. Sa pankagabsan, igwa daw nin impluwensia an Biblia sa buhay kan mga tawo na nagsasabing sinda relihioso? Ipaliwanag.

 “AN RELIHION Nagkokosog, Alagad an Moralidad Nagluluya.” Sinumaryo kan titulong ini nin bareta sa pulyetong Emerging Trends an mga resulta nin sarong pambilog na nasyon na surbey sa Estados Unidos. Minalataw na duminakol sa nasyon na iyan an mga tawong nagsisimba asin nagsasabi na an relihion igwa nin mahalagang kabtang sa saindang buhay. Minsan siring, an bareta nagsasabi: “Sa ibong kan nakagugulat na pagdakol na ini, an dakol na Amerikano malinaw na pinagdududahan an epekto nin relihiosong pagtubod sa buhay nin mga indibiduwal asin sa sosyedad sa kabilogan.”

² An situwasyon na ini bakong sa saro sanang nasyon nangyayari. Sa bilog na kinaban, an dakol na tawong nagsasabi na nagtutubod sinda sa Biblia asin na sinda relihioso dai man tinotogotan an Kasuratan na magkaigwa nin ano man na tunay na impluwensia sa saindang buhay. (2 Timoteo 3:5) “Halangkaw pa man giraray an pagheling niamo sa Biblia,” an sabi kan namamayo sa sarong grupo nin pagsiyasat, “alagad kun manongod sa aktuwal  na pagtao nin panahon sa pagbasa kaiyan, pag-adal kaiyan asin pag-aplikar kaiyan​—iyan bagay na nakalihis na.”

3. (a) Ano an epekto kan Biblia sa mga nagigin tunay na Kristiano? (b) Paano iinaaplikar kan mga parasunod ni Jesus an hatol ni Pablo na nakasurat sa Filipos 4:9?

³ Minsan siring, bakong arog kaiyan an kamugtakan kan tunay na mga Kristiano. An pag-aplikar kan hatol hale sa Tataramon nin Dios nagbunga nin mga pagbabago sa saindang kaisipan asin paggawe. Asin risang-risa kan iba an bagong personalidad na ipinaheheling ninda. (Colosas 3:5-10) Para sa mga parasunod ni Jesus, an Biblia bakong dai ginagamit na libro na naaalpogan sana sa istante. Sa kabaliktaran, sinabihan ni apostol Pablo an mga Kristiano sa Filipos: “An mga bagay na saindong nanodan saka inako asin nadangog patin naheling mapadapit sa sako, gibohon nindo an mga ini; asin mapapasaindo an Dios nin katoninongan.” (Filipos 4:9) Bako sanang tinutubod kan mga Kristiano an katotoohan sa Tataramon nin Dios. Ginigibo ninda an saindang nanonodan, na padagos na iinaaplikar an hatol kan Biblia​—sa pamilya, sa trabaho, sa kongregasyon, asin sa gabos na iba pang kabtang nin buhay.

4. Taano ta masakit na isagibo an mga ley nin Dios?

⁴ Bakong pasil an pagsagibo kan mga ley asin prinsipyo nin Dios. Nabubuhay kita sa sarong kinaban na nasa kapangyarihan ni Satanas na Diablo, na inaapod kan Biblia na an “dios kan sistemang ini nin mga bagay.” (2 Corinto 4:4; 1 Juan 5:19) Kun siring, kaipuhan na magmaan tumang sa ano man na bagay na maolang sa pagpapadanay niato nin integridad ki Jehova Dios. Paano kita magdadanay na may integridad?

Pangaptan “an Arogan nin Ikararahay na mga Tataramon”

5. Ano an ipinapakahulogan kan sinabi ni Jesus na: “Padagos na magsunod sa sako”?

⁵ An sarong aspekto nin paggibo kan satong nanodan nagkakaipo nin maimbod na pagsuportar sa tunay na pagsamba, sa ibong nin pagtumang kan mga daing pagtubod. An pakatagal naghahagad nin paghihingoa. “Kun an siisay man boot na maglakaw sa hudian ko,” sabi ni Jesus, “paindahan nia an saiyang sadiri asin pasanon an saiyang hariging pasakitan patin padagos na magsunod sa sako.” (Mateo 16:24) Dai sinabi ni Jesus na maninigo kitang sumunod sa saiya nin saro sanang semana, sarong bulan, o sarong taon. Imbes, an sabi nia: “Padagos na magsunod sa sako.” Ipinaririsa kan saiyang mga tataramon na an pagkadisipulo niato dai puedeng magin saro sanang kabtang kan satong buhay o naagi sanang debosyon na ngonyan yaon asin sa aga mayo na. An maimbod na pagsuportar sa tunay na pagsamba nangangahulogan na fiel kitang nagtatagal sa pinili niatong dalan, ano man an mangyari. Paano niato iyan magigibo?

6. Ano an arogan nin ikararahay na mga tataramon na nanodan ki Pablo kan mga Kristiano kan enot na siglo?

⁶ Sinadol ni Pablo an saiyang kapwa trabahador na si Timoteo: “Padagos mong pangaptan an arogan nin ikararahay na mga tataramon na nadangog mo sa sako kaiba kan pagtubod asin pagkamoot na mapadapit ki Cristo Jesus.” (2 Timoteo 1:13) Ano an boot sabihon ni Pablo? An termino sa Griego na trinadusir digdi na “arogan” literal na nanonongod sa mga krokis nin sarong pintor. Minsan ngani bakong sobra an mga detalye, an siring na drowing igwa nin klarong mga sagkodan tanganing mamansayan nin may pagmansay na nagheheling an kabilogan na retrato. Kaagid kaiyan, an arogan kan katotoohan na itinokdo ni Pablo ki Timoteo asin sa iba pa dai dinisenyo na magtao nin espesipikong simbag sa gabos na maiisip na hapot. Pero, an kabilogan na katokdoan na ini nagtatao nin igong giya​—mga krokis, sabi ngani​—tanganing mamansayan kan mga sadiosan an puso kun ano an hinahagad ni Jehova sa sainda. Siempre, tanganing mapaogma an Dios kaipuhan nindang padagos na pangaptan an arogan na iyan kan katotoohan paagi sa paggibo kan nanodan ninda.

7. Paano makapagdadanay an mga Kristiano sa arogan nin ikararahay na mga tataramon?

⁷ Kan enot na siglo, an mga indibiduwal na arog ki Himeneo, Alejandro, asin Fileto nagpapalakop nin mga ideya na bakong sono sa “arogan nin ikararahay na mga tataramon.” (1 Timoteo 1:18-20; 2 Timoteo 2:​16, 17) Paano makalilikay an enot na mga Kristiano na malagalag kan mga apostata? Paagi sa maingat na pag-adal sa ipinasabong na mga kasuratan asin pag-aplikar kaiyan sa buhay. Nahimo kan mga naglalakaw segun sa halimbawa ni Pablo asin kan iba pang mga fiel na mamidbid asin sayumahan an ano man na bakong oyon sa arogan kan katotoohan na itinokdo sa sainda. (Filipos 3:17; Hebreo 5:14) Imbes na “nagkakadiperensia  an isip dapit sa mga pagduwaduwa asin debate manongod sa mga tataramon,” padagos sindang nag-abante sa saindang tamang dalan nin diosnon na debosyon. (1 Timoteo 6:3-6) Iyan man an ginigibo niato kun padagos niatong isinasagibo an mga katotoohan na nanodan niato. Nakapakokosog nanggad sa pagtubod na maheling na an minilyon na naglilingkod ki Jehova sa bilog na daga danay na nangangapot nin higot sa arogan kan katotoohan sa Biblia na itinokdo sa sainda.​—1 Tesalonica 1:2-5.

Sayumahan an “Falsong mga Estorya”

8. (a) Paano hinihingoa ni Satanas na raoton an satong pagtubod ngonyan? (b) Anong patanid ni Pablo an manonompongan sa 2 Timoteo 4:​3, 4?

⁸ Hinihingoa ni Satanas na raoton an satong integridad paagi sa pagsabwag nin mga pagduda manongod sa mga itinokdo sa sato. Ngonyan, arog kaidtong enot na siglo, hinihingoa kan mga apostata asin iba pa na raoton an pagtubod kan mga daing kadayaan. (Galacia 2:4; 5:​7, 8) Kun minsan ginagamit ninda an media tanganing magpalakop nin biribid na impormasyon o hayag na kaputikan pa ngani manongod sa mga pamamaagi asin motibo kan banwaan ni Jehova. Nagpatanid si Pablo na an nagkapira itatalikod sa katotoohan. “Madatong an panahon,” an isinurat nia, “na dai na sinda matagal sa ikararahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga; asin irarayo ninda an saindang talinga sa katotoohan, mantang sinda makiling sa falsong mga estorya.”​—2 Timoteo 4:​3, 4.

9. Ano an tibaad nasa isip ni Pablo kan masambitan nia an “falsong mga estorya”?

⁹ Imbes na pangaptan an arogan nin ikararahay na mga tataramon, an nagkapira napukaw an interes sa “falsong mga estorya.” Ano an falsong mga estorya na ini? Tibaad nasa isip ni Pablo an inimbento sanang mga leyenda, arog kan mga yaon sa apokripal na libro nin Tobit. a Tibaad kabale man sa falsong mga estorya an nakabibigla asin banabana na mga huringhuding. Dangan an nagkapira man​—“oyon sa saindang sadiring mga mawot”​—tibaad natentaran sa madonong na paagi kaidtong mga nagpapalakop nin mapagkonsinteng pagheling sa mga pamantayan nin Dios o nagkikritika sa mga nangengenot sa kongregasyon. (3 Juan 9, 10; Judas 4) Ano man na singkogan an kalabot, an nagkapira minalataw na mas gusto an kaputikan kisa mga katotoohan sa Tataramon nin Dios. Dai nahaloy nagpondo na sinda sa paggibo kan mga bagay na saindang nanodan, asin ini an ikinapahamak ninda sa espirituwal.​—2 Pedro 3:​15, 16.

10. Ano an nagkapirang falsong estorya sa presenteng panahon, asin paano idinoon ni Juan an pangangaipong mag-ingat?

¹⁰ Makakalikay kitang maakit sa falsong mga estorya ngonyan kun sinisiyasat niato asin pinipili an satong hinihinanyog asin binabasa. Halimbawa, an media parateng nagpapalakop nin inmoralidad. Dakol an nag-eenkaminar nin agnostisismo o hayag na ateismo. Pinag-oolog-olog kan  mas halangkaw na gradong mga kritiko an sinasabi kan Biblia na iyan ipinasabong nin Dios. Asin an mga apostata sa presenteng aldaw padagos na naghihingoang magsabwag nin pagduda tanganing raoton an pagtubod kan mga Kristiano. Mapadapit sa kaagid na peligrong iinatubang kan falsong mga propeta kan enot na siglo, si apostol Juan nagpatanid: “Mga namomotan, dai kamo tumubod sa gabos na ipinasabong na tataramon, kundi baloon an ipinasabong na mga tataramon kun baga iyan gikan sa Dios, huli ta kadakol na falsong propeta na nagruluwas sa kinaban.” (1 Juan 4:1) Kaya kaipuhan kitang mag-ingat.

11. Ano an sarong paagi tanganing baloon asin aramon kun kita nasa pagtubod?

¹¹ Mapadapit digdi, si Pablo nagsurat: “Padagos na baloon kun baga kamo nasa pagtubod.” (2 Corinto 13:5) Sinadol kita kan apostol na padagos na baloon an satong sadiri tanganing aramon kun baga kita nagdadanay sa kabilogan kan Kristianong mga tinutubod. Kun kita nagdadangog sa mga maraot an boot, kaipuhan niatong analisaron nin mapagngayongayo an satong sadiri. (Salmo 139:​23, 24) Kita daw igwa nin tendensia na hanapan nin sala an banwaan ni Jehova? Kun iyo, taano? Nakolgan daw an boot niato sa sinabi o ginibo nin saro? Kun iyo, pinagdadanay ta daw an tamang pagmansay sa mga bagay-bagay? Temporaryo sana an ano man na kahorasaan na inaatubang niato sa sistemang ini nin mga bagay. (2 Corinto 4:17) Dawa kun makaeksperyensia kita nin pagbalo sa kongregasyon, taano ta maninigo kitang umontok sa paglilingkod sa Dios? Kun kita naaaburido sa sarong bagay, bako daw na mas marahay pa nanggad na gibohon an makakaya niato na husayon an problema dangan bayaan iyan sa kamot ni Jehova?​—Salmo 4:4; Talinhaga 3:​5, 6; Efeso 4:26.

12. Paano nagtao nin marahay na halimbawa para sa sato an mga taga Berea?

¹² Imbes na magin mapagkritika, papagdanayon niato an nakararahay sa espirituwal na pagmansay sa impormasyon na inaako paagi sa personal na pag-adal asin mga pagtiripon kan kongregasyon. (1 Corinto 2:​14, 15) Asin imbes na kuestionon an Tataramon nin Dios, mas madonong nanggad na arogon an aktitud kan mga taga Berea kaidtong enot na siglo na maingat na siniyasat an Kasuratan! (Gibo 17:​10, 11) Kun siring, iaplikar niato an satong nanonodan, na sinasayumahan an falsong mga estorya asin nangangapot sa katotoohan.

13. Paano tibaad mangyari na kita nagpapalakop na palan nin falsong mga estorya na dai man tinutuyo?

¹³ Igwa nin saro pang klase nin falsong estorya na kaipuhan kitang magmaan. Kadakol na nakabibiglang estorya an naglalakop, sa parate paagi sa E-mail. Madonong na magmaan manongod sa siring na mga estorya, nangorogna kun dai niato aram an orihinal na ginikanan kan impormasyon. Dawa kun an sarong eksperyensia o estorya ipinadara nin sarong marahay an dangog na Kristiano, an indibiduwal na iyan tibaad dai man nakakaaram mismo kan aktuwal na mga pangyayari. Kaya mahalaga na magmaan manongod sa pag-otro o pagpasa nin bakong kompirmadong mga estorya. Daing duwa-duwa na dai niato gugustohon na otrohon an “daing Dios na mga eroestorya sana,” o “falsong mga estorya na minabalga sa banal.” (1 Timoteo 4:7; New International Version) Huling igwa man kita nin obligasyon na magtaram nin totoo sa lambang saro, kita naghihirong may kadonongan  paagi sa paglikay sa ano man na magigin dahelan na kita nagpapalakop na palan nin mga bagay na daing katotoohan dawa dai man tinutuyo.​—Efeso 4:25.

Positibong mga Ibinubunga kan Pagsagibo kan Katotoohan

14. Anong mga pakinabang an ibinubunga kan paggibo kan mga bagay na satong nanodan sa Tataramon nin Dios?

¹⁴ An pagsagibo kan satong nanonodan sa personal na pag-adal sa Biblia asin sa Kristianong mga pagtiripon matao nin dakol na pakinabang. Halimbawa, tibaad maheling niato na nagrarahay an satong relasyon sa mga kapagtubod niato. (Galacia 6:10) An satong sadiring disposisyon mas mapaparahay kun iinaaplikar niato an mga prinsipyo sa Biblia. (Salmo 19:8) Dugang pa, paagi sa paggibo kan satong nanonodan, ‘sinasamnohan niato an katokdoan nin Dios’ asin posibleng marhay na madadagka niato an iba sa tunay na pagsamba.​—Tito 2:6-10.

15. (a) Paano an sarong hoben nagkaigwa nin kosog nin boot na magpatotoo sa eskuelahan? (b) Ano an nanodan nindo sa eksperyensiang ini?

¹⁵ Kabilang sa mga Saksi ni Jehova an dakol na hoben na naggigibo kan saindang nanodan sa personal na pag-adal sa Biblia asin sa Kristianong mga publikasyon saka sa regular na pag-atender sa mga pagtiripon kan kongregasyon. An saindang marahay na gawe-gawe sarong mapuersang patotoo sa mga maestra asin kapwa estudyante sa eskuelahan. (1 Pedro 2:12) Isipon nindo si Leslie, sarong 13 anyos na daragita sa Estados Unidos. Inaadmitir nia na dati nasasakitan siang makipag-olay sa mga kaeskuela manongod sa saiyang pagtubod, alagad sarong aldaw nagbago iyan. “Pinag-oolayan sa klase an manongod sa kun paano an mga tawo naghihingoang bentahan kamo. An sarong daragita nag-itaas nin kamot asin sinambit an mga Saksi ni Jehova.” Bilang Saksi, ano an reaksion ni Leslie? “Idinepensa ko an sakong pagtubod,” sabi nia, “na segurado akong ikinabigla kan gabos, huling parate akong toninong na gayo sa eskuelahan.” An resulta kan pagkapusoan ni Leslie? “Napasakamotan ko nin sarong brosyur asin pulyeto an estudyanteng idto, huli ta may iba pa siang mga hapot,” an sabi ni Leslie. Seguradong kanigoan an kagayagayahan ni Jehova kun nagkakaigwa nin kosog nin boot na magpatotoo sa eskuelahan an mga hoben na naggigibo kan saindang nanodan!​—Talinhaga 27:11; Hebreo 6:10.

16. Paano nakinabang sa Teokratikong Paadalan sa Pagmiministro an sarong hoben na Saksi?

¹⁶ Saro pang halimbawa si Elizabeth. Poon sa edad na siete asin durante kan sia nasa elementarya, iniimbitaran kan aking babaeng ini an saiyang mga maestra sa Kingdom Hall kun sia igwa nin asignasyon sa Teokratikong Paadalan sa Pagmiministro. Kun dai makakaatender an maestra, nagpapawalat si Elizabeth pagkaretira asin iinaatubang sa maestra an asignasyon nia. Sa ultimo anyo nia sa haiskul, si Elizabeth nagsurat nin sampulong pahinang report dapit sa mga pakinabang sa Teokratikong Paadalan sa Pagmiministro asin iprinesentar iyan sa atubangan nin sarong panel nin apat na paratokdo. Inimbitaran man siang magtao nin modelong kabtang sa Teokratikong Paadalan sa Pagmiministro, na pinili nia an temang “Taano ta Tinotogotan nin Dios an Karatan?” Nakinabang si Elizabeth sa programa nin edukasyon na ginigibo kan Mga Saksi ni Jehova sa Teokratikong Paadalan sa Pagmiministro. Saro sana sia sa dakol na hoben na Kristiano na nagtatao nin kaomawan ki Jehova paagi sa paggibo kan mga bagay na saindang nanodan sa saiyang Tataramon.

17, 18. (a) Anong hatol an itinatao kan Biblia mapadapit sa pagkasadiosan? (b) Ano an nagin epekto sa sarong lalaki kan sadiosan na paggawe kan saro sa Mga Saksi ni Jehova?

¹⁷ Sinasadol kan Biblia an mga Kristiano na  gumawe nin sadiosan sa gabos na bagay. (Hebreo 13:18) An pandadaya puedeng makaraot sa relasyon niato sa iba asin, orog na mahalaga, ki Jehova mismo. (Talinhaga 12:22) An mapagtitiwalaan na paggawe niato ebidensia na ginigibo niato an mga bagay na nanodan niato, asin nagin dahelan iyan kaya dakol an nagkaigwa nin orog na paggalang sa Mga Saksi ni Jehova.

¹⁸ Helinga an eksperyensia nin sarong militar na an ngaran Phillip. Nawara nia an sarong blangko, pirmadong tseke asin naaraman sana nia ini kaidtong iuli ini sa saiya paagi sa koreo. An tseke nakua kan saro sa Mga Saksi ni Jehova, asin an sarong surat na ilinakip dian nagsasabi na an relihiosong mga tinutubod kan nakakua an nagmotibar na iuli iyan. Namungnan si Phillip. “Nahabonan kutana ninda ako nin $9,000!” an sabi nia. Nadesganar sia saro naman na beses kan an saiyang kupya hinabon sa simbahan. Minalataw na sarong kamidbid an nagkua kan saiyang kupya, mantang an sarong estranghero iinuli an tseke na nagkakantidad nin rinibong dolyar! Totoo nanggad, an sadiosan na mga Kristiano nagtatao nin onra ki Jehova Dios!

Padagos na Gibohon an Saindong Nanodan

19, 20. Paano kita makikinabang sa paghiro kaoyon kan mga nanonodan niato sono sa Kasuratan?

¹⁹ An mga naggigibo kan saindang nanodan sa Tataramon nin Dios nag-aani nin dakol na pakinabang. Si disipulo Santiago nagsurat: “An nagtuturuhok sa sangkap na ley para sa katalingkasan asin nagdadanay dian, an tawong ini, huli ta sia nagin, bakong malilingawon na paradangog, kundi paraotob kan gibohon, maoogma sa paggibo nia kaiyan.” (Santiago 1:25) Iyo, kun kita naghihiro kaoyon kan mga nanonodan niato sono sa Kasuratan, magkakaigwa kita nin tunay na kaogmahan asin mas makakaya niatong atubangon an mga sakit sa buhay. Orog sa gabos, mapapasato an bendisyon ni Jehova asin an paglaom na buhay na daing katapusan!​—Talinhaga 10:22; 1 Timoteo 6:6.

²⁰ Tunay nanggad, kun siring, padagos na magmaigot sa pag-adal sa Tataramon nin Dios. Regular na makipagtipon sa mga nagsasamba ki Jehova, asin magtao nin atension sa mga bagay na iinaatubang sa Kristianong mga pagtiripon. Iaplikar an saindong nanonodan, padagos na gibohon iyan, asin “mapapasaindo an Dios nin katoninongan.”​—Filipos 4:9.

[Nota sa Ibaba]

Nagigirumdoman daw Nindo?

• Ano “an arogan nin ikararahay na mga tataramon,” asin paano kita padagos na makapangangapot dian?

• Anong “falsong mga estorya” an kaipuhan niatong sayumahan?

• Anong mga pakinabang an nakakamtan kan mga naggigibo kan mga bagay na saindang nanonodan sa Tataramon nin Dios?

[Mga Hapot Para sa Pag-adal]

[Ritrato sa pahina 17]

Paano makalilikay an enot na mga Kristiano na ikalagalag kan mga apostata?

[Mga ritrato sa pahina 18]

An mga banhi nin pagduda puedeng isabwag kan media, paagi sa Internet, asin kan mga apostata sa presenteng aldaw

[Ritrato sa pahina 19]

Bakong madonong na magpalakop nin bakong kompirmadong mga bareta

[Mga ritrato sa pahina 20]

Sa trabaho, sa eskuelahan, asin sa iba pang lugar, iinaaplikar kan Mga Saksi ni Jehova an nababasa ninda sa Tataramon nin Dios