Karangahan sa Tamang Kaaraman Manongod sa Dios

PARA sa nagkapira, an sinasabi kan Biblia manongod sa pagkamoot asin pagkaherak nin Dios nagpapalataw nin nakapupurisaw na mga hapot. Ihinahapot ninda: Kun gusto nin Dios na haleon an karatan, aram nia kun paano gigibohon iyan, asin igwa sia nin kapangyarihan na gibohon iyan, taano ta padagos an paglakop kan karatan? Para sainda an problema iyo na resolberan an tolong proposisyon: (1) an Dios makapangyarihan sa gabos; (2) an Dios mamomoton asin marahay; asin (3) padagos na nangyayari an mga kapahamakan. Nangangatanosan sinda na huling an ikatolong proposisyon dai manenegaran na totoo, kun siring an kisuerra saro sa duwa pang proposisyon dai puedeng totoo. Para sa sainda, magsalang dai kayang pondohon nin Dios an karatan o sia daing labot.

Nagkapirang aldaw pakalihis kan pagkagaba kan World Trade Center sa Nueva York, sarong prominenteng namomoon sa relihion sa Estados Unidos an nagsabi: “Ihinapot sako . . . nin dakolon nang beses sa buhay ko kun taano ta tinotogotan nin Dios an trahedya asin pagdusa. Kaipuhan na admitiron ko na biyong dai ko talaga aram an simbag, dawa sa paaging makokontento mismo ako.”

Bilang reaksion sa komentong ini, nagsurat an sarong propesor sa teolohiya na sia naghanga sa “marahay na teolohiya” na ihinulit kan namomoon na ini sa relihion. Inoyonan man nia an punto de vista nin sarong intelektuwal na nagsurat: “An pagkaimposibleng masabotan an pagdusa kabtang kan pagkaimposibleng masabotan an Dios.” Alagad imposible daw talaga na masabotan kun taano ta tinotogotan nin Dios an karatan?

An Ginikanan nin Karatan

Kabaliktaran sa tibaad sinasabi kan mga namomoon sa relihion, an Biblia dai nagsasabi na an pagtogot nin Dios sa karatan imposibleng masabotan. An importanteng marhay na paagi tanganing masabotan an isyu manongod sa karatan iyo na rekonoseron na si Jehova dai naglalang nin maraot na kinaban. Linalang nia an enot na tawong mag-agom na sangkap, mayong kasalan. Hineling ni Jehova an saiyang linalang asin iyan “marahayon.” (Genesis 1:​26, 31) An katuyohan nia para ki Adan asin Eva iyo na pahiwason sa bilog na kinaban an Paraiso sa Eden asin istaran iyan nin maogmang mga tawo sa irarom kan pagprotehir kan saiyang mamomoton na soberaniya.​—Isaias 45:18.

An karatan nagpoon kan an sarong espiritung linalang na, minsan ngani sa kapinonan fiel sa Dios, nagkaigwa nin kamawotan na sambahon. (Santiago 1:​14, 15) An saiyang pagrebelde naheling sa daga kan impluwensiahan nia an enot na tawong mag-agom na umiba sa saiya sa pagtumang sa Dios. Imbes na magpasakop sa malinaw na instruksion nin Dios na dai pagkakanon o pagdotdoton an bunga kan kahoy kan pakamidbid sa marahay asin maraot, si Adan asin Eva nagkua patin nagkakan kaiyan. (Genesis 3:1-6) Sa paggibo kaiyan, bako sanang nakisuway sinda sa Dios kundi patin ipinaheling na gusto nindang magin independiente sa saiya.

Pinalataw an Sarong Isyu sa Moral

An rebelyon na ini sa Eden nagpalataw nin sarong isyu sa moral, sarong angat na may unibersal na importansia. Kinuestion kan rebeldeng mga tawo kun baga tama an pamamahala ni Jehova sa  saiyang mga linalang. May deretso daw an Kaglalang na hagadon an lubos na pagkuyog kan katawohan? Mas mapaparahay daw an mga tawo kun sinda humiro nin independiente?

Inasikaso ni Jehova an angat na ini sa saiyang pamamahala sa paagi na nagpaheling kan saiyang sangkap an pagkabalanseng pagkamoot, hustisya, kadonongan, asin kapangyarihan. Puede kutanang ginamit nia an saiyang kapangyarihan tanganing paontokon tolos-tolos an rebelyon. Tibaad garo baga makatanosan iyan, huling may deretso siang gibohon iyan. Alagad dai masisimbag an ibinangon na mga isyu sa moral kun gigibohon iyan. Sa ibong na lado, puede kutanang dai na sana intindihon nin Dios an kasalan. Para sa nagkapira ngonyan an siring na aksion tibaad garo baga iyo an mamomoton na opsion. Pero, dai man masisimbag kaini an paghihingako ni Satanas na an mga tawo mapaparahay kun pamamahalaan ninda an saindang sadiri. Apuera kaini, bako daw na eenkaminaron kan arog kaiyan na aksion an iba pa na sumuway sa dalan ni Jehova? Daing katapusan na pagdusa an magigin resulta.

Huli sa saiyang kadonongan, tinogotan ni Jehova an mga tawo na magin independiente sa laog nin kadikit na panahon. Minsan ngani nangangahulogan ini nin pagtogot na magdanay nin temporaryo an karatan, sa siring an mga tawo nagkaigwa nin oportunidad na ipaheling kun baga mapanggana nindang mapamamahalaan an saindang sadiri na independiente sa Dios, na namumuhay sa sadiri nindang mga pamantayan sa kun ano an tama asin sala. Ano an nagin resulta? An kasaysayan nin tawo pirmeng masasabing igwa nin guerra, inhustisya, pan-aapi, asin pagdusa. An pangultimong pagkasudya kan rebelyon tumang ki Jehova an maresolber nin sararoan sana sa mga isyu na ibinangon sa Eden.

Mientras tanto, ipinaheling nin Dios an saiyang pagkamoot paagi sa pagtao sa saiyang Aki, si Jesu-Cristo, na itinao an saiyang buhay bilang tawo bilang atang na pantubos. Ini an nagpapangyari sa makinuyog na mga tawo na makatalingkas sa pagkakondenar sa kasalan asin kagadanan na resulta kan pagsuway ni Adan. An pantubos an nagbukas kan dalan pasiring sa buhay na daing katapusan para sa gabos na naggigibo nin pagtubod ki Jesus.​—Juan 3:16.

 Yaon sato an nakararangang garantiya ni Jehova na an pagdusa nin tawo temporaryo sana. “Dai na mahahaloy, asin ta an maraot mawawara na,” an isinurat kan salmista. “Hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo makasasadiri kan daga, asin manonompongan nanggad ninda an saindang labi-labi nanggad na kaogmahan sa nagsosopay na katoninongan.”​—Salmo 37:​10, 11.

Sarong Ngapit na May Katiwasayan Asin Kaogmahan

Ipinaheheling kan kaotoban kan mga hula sa Biblia na harani na an panahon na tataposon nin Dios an helang, pagmondo, asin kagadanan. Mangnohon kun gurano kamakangangalas na patanaw kan mga bagay na maabot an itinao ki apostol Juan sa sarong bisyon. Isinurat nia: “Naheling ko an sarong bagong langit asin sarong bagong daga; huli ta nakalihis na an dating langit asin an dating daga, asin an dagat mayo na. . . . Asin an Dios mismo masasakaibanan [nin katawohan]. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Sa sarong deklarasyon na idinodoon an pagkamapagtitiwalaan kan mga panugang ini, sinabihan si Juan: “Isurat mo, huli ta an mga tataramon na ini fiel asin totoo.”​—Kapahayagan 21:1-5.

Kumusta man an binilyon na inosenteng tawo na nagadan poon kan pagrebelde sa Eden? Nanuga si Jehova na bubuhayon nia liwat an mga tawong natotorog na ngonyan sa kagadanan. Si apostol Pablo nagsabi: “May paglaom ako sa Dios . . . na magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) An mga ini magkakaigwa nin esperansang mabuhay sa sarong kinaban kun saen “magdadanay an katanosan.”​—2 Pedro 3:13.

Kun paanong an sarong mamomoton na ama matogot na umagi sa sarong makolog na operasyon an saiyang aki kun aram nia na matao iyan nin nagdadanay na mga pakinabang, tinogotan man ni Jehova na maeksperyensiahan kan mga tawo an temporaryong pag-eksister nin karatan sa daga. Pero, naghahalat an daing sagkod na mga bendisyon sa gabos na naghihingoang gibohon an kabotan nin Dios. Ipinaliwanag ni Pablo: “An mga linalang ipinasakop sa kasayangan, bakong sa sadiring boot kaiyan kundi paagi sa saiya na nagpasakop kaiyan, basado sa paglaom na an mga linalang man mismo patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.”​—Roma 8:​20, 21.

Ini totoong bareta​​—bakong arog kan nadadalan niato sa telebisyon o nababasa sa peryodiko kundi maogmang bareta. Iyan an pinakamarahay na bareta hale sa “Dios nin gabos na karangahan,” na talagang may pagmakolog sa sato.​—2 Corinto 1:3.

[Mga ritrato sa pahina 6]

Ipinaheling nin panahon na an katawohan dai mapamamahalaan nin mapanggana an saindang sadiri na independiente sa Dios

[Credit Lines]

Pamilyang taga Somalia: UN PHOTO 159849/M. GRANT; bomba atomika: Retrato kan USAF; kampo de konsentrasyon: Retrato kan U.S. National Archives