Karangahan sa mga Panahon nin Krisis

AN MGA bareta sa mga aldaw na ini dai nanggad nakararanga. An sarong tawo nagsurat: “An presenteng mga pangyayari makatatakot na marhay kaya sa parate dai kita makadesisyon kun baga may kosog kita nin boot na magdalan o dai kan pan-alas sais na bareta.” An kinaban pano nin guerra, makatatakot na mga gibo, pagdusa, krimen, asin helang​​—mga karatan na sa dai mahaloy puedeng makaapektar sa sato nin direkta kun dai pa iyan nakakaapektar.

Ihinula nin eksakto kan Biblia an mga kamugtakan na ini. Sa paglaladawan kan satong panahon, sinabi ni Jesus na magkakaigwa nin darakulang guerra, peste, kakulangan nin kakanon, asin linog. (Lucas 21:​10, 11) Kaagid kaiyan, nagsurat si apostol Pablo manongod sa “delikadong mga panahon na masakit pakibagayan,” na an mga tawo magigin mga maringis, mamomoton sa kuarta, asin mayong pagkamoot sa karahayan. Inapod nia an peryodong iyan na “huring mga aldaw.”​—2 Timoteo 3:1-5.

Huli kaini, sa paglaladawan kan mga kamugtakan sa kinaban, an mga bareta may mga pagkakaagid sa ihinula sa Biblia. Alagad sagkod na sana dian an pagkakaagid kaiyan. An Biblia nagtatao nin sarong punto de vista na mayo sa mga bareta. Paagi sa ipinasabong na Tataramon nin Dios, bako sanang masasabotan niato kun taano ta igwa nin grabeng karatan kundi patin kun ano an mangyayari sa ngapit.

Kun Paano Minamansay nin Dios an Karatan

Ipinaliliwanag kan Biblia kun paano minamansay nin Dios an makamomondong mga  kamugtakan sa satong kaaldawan. Minsan ngani naheling na nia antes pa an presenteng mga problema, dai nia inooyonan iyan ni intension niang togotan iyan sa panahon na daing talaan. “An Dios pagkamoot,” an isinurat ni apostol Juan. (1 Juan 4:8) Si Jehova odok na nagmamakolog sa mga tawo asin ikinaoongis an gabos na karatan. Tama nanggad na tibaad dumolok kita sa Dios para sa karangahan, huli ta sia marahay asin maheherakon patin may kapangyarihan asin gustong haleon an karatan sa daga. Isinurat kan salmista: “Ililigtas [kan ninombrahan nin Dios na langitnon na Hade] an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.”​—Salmo 72:12-14.

Naheherak daw kamo sa mga nagdudusa? Iyo gayod. An empatiya sarong kualidad na ibinugtak ni Jehova sa sato, huli ta kita linalang sa ladawan nia. (Genesis 1:​26, 27) Kun siring, makakokompiar kita na si Jehova bakong daing labot sa pagdusa nin tawo. Si Jesus, na mas midbid nin personal si Jehova kisa siisay man, nagtokdo na si Jehova interesadong marhay sa sato asin pano nin mamomoton na pagkaludok.​—Mateo 10:​29, 31.

An mga linalang mismo nagpapatotoo na an Dios nagmamakolog sa katawohan. Sinabi ni Jesus na “pinasisirang [nin Dios] an saiyang aldaw sa maraot asin sa marahay asin pinapaoranan nia an matanos asin bakong matanos.” (Mateo 5:45) Sa mga taga siudad kan Listra, si apostol Pablo nagsabi: “Dai . . . pinabayaan [nin Dios] an saiyang sadiri na dai nin saksi sa bagay na sia guminibo nin marahay, na tinatawan kamo nin oran hale sa langit asin mabungang mga panahon, na biyong binabasog an saindong mga puso nin kakanon asin kaogmahan.”​—Gibo 14:17.

Siisay an Responsable?

Mahalagang mangnohon na sinabi man ni Pablo sa mga taga Listra: “Sa mga kapag-arakian na nag-agi na pinabayaan [nin Dios] an gabos na nasyon na magralakaw sa sadiri nindang mga dalan.” Sa siring, an mga nasyon​​—o mga tawo mismo​—an pangenot na responsable sa kadaklan kan masakit na mga kamugtakan ninda. Bakong an Dios an dapat na basolon.​—Gibo 14:16.

Taano ta tinotogotan ni Jehova na mangyari an maraot na mga bagay? May gigibohon pa daw siang ano man dapit kaiyan? An simbag sa mga hapot na ini manonompongan sana sa Tataramon nin Dios. Iyan huli ta an simbag konektadong marhay sa saro pang espiritung persona asin sa sarong isyu na pinalataw nia sa dai naheheling na rona nin mga espiritu.

[Mga ritrato sa pahina 4]

An mga tawo may empatiya. An Dios pa daw an magigin daing labot sa pagdusa nin tawo?

 [Picture Credit Lines sa pahina 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Picture Credit Line sa pahina 3]

Nasa itaas sa wala, Croatia: UN PHOTO 159208/S. Whitehouse; nagugutom na aki: UN PHOTO 146150 NI O. MONSEN