Kultibaron an Pagkuyog Mantang Naghaharani an Katapusan

“Mapapasaiya [ki Silo] an pagkuyog kan mga banwaan.”—GENESIS 49:10.

1. (a) Kan nakaagi, ano an parateng kaiba sa pagkuyog ki Jehova? (b) Ano an ihinula ni Jacob may labot sa pagkuyog?

 AN PAGKUYOG ki Jehova parateng kaiba an pagkuyog sa saiyang mga representante. Kabale digdi an mga anghel, patriarka, hokom, saserdote, propeta, asin hade. An trono kan mga hade sa Israel inapod pa ngani na trono ni Jehova. (1 Cronica 29:23) Pero makamomondo, dakol sa mga namahala sa Israel an suminuway sa Dios, na ikinapahamak ninda mismo asin kan saindang mga sakop. Alagad dai pinabayaan ni Jehova an mga maimbod sa saiya na mayo nin paglaom; rinanga nia sinda paagi sa panuga na patutukawon nia an sarong Hade na dai napadadara sa karatan, na ikaoogmang marhay kan mga matanos na kuyogon. (Isaias 9:​6, 7) An madali nang magadan na patriarkang si Jacob naghula manongod sa magigin namamahala na ini, na nagsasabi: “An setro dai mahale ki Juda, ni an baston nin komandante hale sa tahaw kan saiyang mga bitis, sagkod na dumatong si Silo; asin mapapasaiya an pagkuyog kan mga banwaan.”​—Genesis 49:10.

2. Ano an kahulogan kan “Silo,” asin ano an magigin sakop kan saiyang pamamahala bilang hade?

² An “Silo” sarong termino sa Hebreo na nangangahulogan “Sia na Saiya Iyan,” o “Sia na Kagsadiri Kaiyan.” Iyo, mamanahon ni Silo an lubos na deretsong mamahala, na isinisimbolisar kan setro, asin an kapangyarihan na magboot, na irinerepresentar kan baston nin komandante. Dugang pa, an magigin sakop kan saiyang pamamahala bilang hade, bako sanang an mga gikan ni Jacob, kundi an gabos na “banwaan.” Kaoyon ini kan panuga ni  Jehova ki Abraham: “An saimong banhi makasasadiri kan tata kan saiyang mga kaiwal. Asin paagi sa saimong banhi an gabos na nasyon sa daga magbebendisyon nanggad kan saindang sadiri.” (Genesis 22:​17, 18) Kinompirmar ni Jehova kun siisay an “banhi” na ini kaidtong 29 C.E. kan lahidan nia nin banal na espiritu si Jesus na taga Nazaret.​—Lucas 3:21-23, 34; Galacia 3:16.

An Enot na Kahadean ni Jesus

3. Anong pamamahala an inako ni Jesus kan sia sumakat sa langit?

³ Kan sumakat si Jesus sa langit, dai nia ensegidang kinapotan an setro nin pamamahala sa mga banwaan kan kinaban. (Salmo 110:1) Minsan siring, talagang nag-ako sia nin sarong “kahadean” na may mga sakop na nagkukuyog sa saiya. Sinabi ni apostol Pablo kun ano an kahadean na iyan kan sia sumurat: ‘Kita [mga Kristianong linahidan nin espiritu] ilinigtas [nin Dios] hale sa autoridad kan kadikloman asin ibinalyo kita sa kahadean kan Aki nin saiyang pagkamoot.’ (Colosas 1:13) An pagliligtas na ini nagpoon kaidtong Pentecostes 33 C.E. kan ibubo an banal na espiritu sa fiel na mga parasunod ni Jesus.​—Gibo 2:1-4; 1 Pedro 2:9.

4. Sa anong mga paagi ipinaheling kan enot na mga disipulo ni Jesus an saindang pagkuyog, asin paano sinda ipinamidbid ni Jesus bilang grupo?

⁴ Bilang “mga embahador na karibay ni Cristo,” makinuyog na pinonan kan mga disipulong linahidan nin espiritu na tiponon an iba pa na magigin mga “kapwa siudadano” sa espirituwal na kahadean na iyan. (2 Corinto 5:20; Efeso 2:19; Gibo 1:8) Saro pa, an mga ini kinaipuhan na magdanay na ‘dayupot na nagkakasararo sa saro sanang pag-isip’ tanganing kamtan an pag-oyon kan saindang Hadeng si Jesu-Cristo. (1 Corinto 1:10) Bilang grupo, sinda an minakompuesto sa sarong “fiel asin may diskresion na oripon,” o grupong fiel na mayordomo.​—Mateo 24:45; Lucas 12:42.

Binendisyonan Huli sa Pagkuyog sa “Mayordomo” nin Dios

5. Poon kan suanoy na mga panahon, paano tinokdoan ni Jehova an saiyang banwaan?

⁵ Si Jehova kaidto pa pirmeng nagtatao nin mga paratokdo sa saiyang banwaan. Halimbawa, pagkabalik kan mga Judio hale sa Babilonya, si Esdras asin an dakol na iba pang kualipikadong lalaki bako sanang binasa sa banwaan an Ley nin Dios, saindang ‘ipinaliwanag nin detalyado’ an ley na iyan, na ‘tinatawan iyan nin kahulogan asin ipinapasabot’ an Tataramon nin Dios.​—Nehemias 8:8.

6, 7. Paano nagtao nin napapanahon na espirituwal na kakanon an grupong oripon paagi sa Namamahalang Grupo kaiyan, asin taano ta angay an pagsunod sa grupong oripon?

⁶ Kan enot na siglo, kan an isyu dapit sa pagturi bumangon kan 49 C.E., an namamahalang grupo kan enot na grupong oripon na iyan mapagngayongayong inestudyaran an bagay na iyan asin naggibo nin konklusyon na sono sa Kasuratan.  Kan ipaisi ninda an saindang desisyon paagi sa surat, kinuyog kan mga kongregasyon an instruksion na itinao asin nagkamit nin nagsosopay na bendisyon nin Dios. (Gibo 15:6-15, 22-29; 16:​4, 5) Siring man sa presenteng mga panahon, klinaripikar kan fiel na oripon paagi sa Namamahalang Grupo kaiyan an importanteng mga isyu na arog kan Kristianong neutralidad, kabanalan nin dugo, asin paggamit nin droga asin tabako. (Isaias 2:4; Gibo 21:25; 2 Corinto 7:1) Binendisyonan ni Jehova an saiyang banwaan huli sa saindang pagkuyog sa saiyang Tataramon asin sa fiel na oripon.

⁷ Paagi sa pagsunod sa grupong oripon, ipinaheheling man kan banwaan nin Dios an saindang pagpasakop sa Kagurangnan, si Jesu-Cristo. An siring na pagpasakop nagkaigwa nin dugang na kahulogan sa presenteng mga panahon dahel sa pinahiwas na autoridad ni Jesus, segun sa sinabi sa hula ni Jacob kaidtong sia madali nang magadan.

Si Silo Nagin May Katanosan na Namamahala sa Daga

8. Paano asin kasuarin pinahiwas an autoridad ni Cristo?

⁸ Sinabi kan hula ni Jacob na mapapasa ki Silo “an pagkuyog kan mga banwaan.” Malinaw nanggad, an pamamahala ni Cristo lampas pa sa espirituwal na Israel. Gurano kahiwas an magigin sakop kaiyan? An Kapahayagan 11:15 minasimbag: “An kahadean kan kinaban nagin nang kahadean kan satong Kagurangnan asin kan saiyang Cristo, asin sia mamamahala bilang hade sagkod lamang.” Ihinahayag kan Biblia na inako ni Jesus an autoridad na iyan sa katapusan kan makahulang “pitong panahon”​—“an itinalaan na mga panahon kan mga nasyon”​—kan 1914. a (Daniel 4:​16, 17; Lucas 21:24) Kan taon na idto, nagpoon an dai naheheling na “presensia” ni Cristo bilang Mesiyanikong Hade, siring man an panahon nia na ‘mandaog sa tahaw kan saiyang mga kaiwal.’​—Mateo 24:3; Salmo 110:2.

9. Ano an ginibo ni Jesus kan akoon nia an saiyang Kahadean, asin ano an nagin indirektang epekto kaini sa katawohan, nangorogna sa saiyang mga disipulo?

⁹ An enot na ginibo ni Jesus pagkaako kan sa hadeng kapangyarihan iyo an paghulog “sa daga” kan pinakapersonipikasyon nin pagsuway​—si Satanas​—kaiba an saiyang mga demonyo. Poon kaidto, an maraot na mga espiritung ini nagsutsut nin dai pang kaagid na grabeng sakit sa katawohan, apuera sa pagpalakop nin mga kamugtakan na pinagigin masakit an pagkuyog ki Jehova. (Kapahayagan 12:7-12; 2 Timoteo 3:1-5) Sa katunayan, an pangenot na punteriya kan pakikilaban ni Satanas iyo an mga linahidan ni Jehova, na “nagkukuyog sa mga togon nin Dios asin igwa kan gibohon nin pagpatotoo ki Jesus,” asin an kairiba nindang “ibang karnero.”​—Kapahayagan 12:17; Juan 10:16.

10. An pagkaotob nin anong mga hula sa Biblia an naggagarantiya kan pagkasudya kan pakikilaban ni Satanas tumang sa tunay na mga Kristiano?

¹⁰ Minsan siring, si Satanas seguradong masusudya huli ta ini an “aldaw kan Kagurangnan,” asin mayo nin makapopogol ki Jesus sa “pagtapos kan saiyang pandadaog.” (Kapahayagan 1:10; 6:2) Halimbawa, seseguradohon nia an pangultimong pagtatak sa 144,000 na espirituwal na Israelita.  Poprotehiran man nia “an sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon.” (Kapahayagan 7:1-4, 9, 14-16) Minsan siring, bakong arog kan saindang linahidan na kairiba, an mga ini magigin makinuyog na mga sakop ni Jesus digdi sa daga. (Daniel 7:​13, 14) An mismong presensia ninda sa kinaban totoo nang ebidensia na si Silo talagang Namamahala sa “kahadean kan kinaban.”​—Kapahayagan 11:15.

Ngonyan Na an Panahon na ‘Kuyogon an Maogmang Bareta’

11, 12. (a) Sairisay sana an makaliligtas sa katapusan kan presenteng sistema nin mga bagay? (b) Ano an nagigin mga ugale kan mga inaako an “espiritu kan kinaban”?

¹¹ An gabos na gusto nin buhay na daing katapusan dapat na makanood nin pagkuyog, ta an Biblia malinaw na nagsasabi na an “mga dai nakamimidbid sa Dios asin [an] mga dai nagkukuyog kan maogmang bareta manongod sa satong Kagurangnan na si Jesus” dai makaliligtas sa aldaw nin pamamalos nin Dios. (2 Tesalonica 1:8) Minsan siring, an presenteng maraot na mga kamugtakan asin an espiritu kaiyan nin pagrebelde tumang sa mga ley asin prinsipyo kan Biblia nagpapagin masakit sa pagkuyog sa maogmang bareta.

¹² An espiritung ini nin pakisuway sa Dios inaapod kan Biblia na “an espiritu kan kinaban.” (1 Corinto 2:12) Sa pagpaliwanag kan epekto kaiyan sa mga tawo, si apostol Pablo nagsurat sa mga Kristiano sa Efeso kan enot na siglo, na nagsasabi: “Kamo kaidto naglakaw segun sa sistema nin mga bagay kan kinaban na ini, sono sa namamahala sa autoridad kan doros, an espiritu na naghihiro ngonyan sa mga aki nin kasumbikalan. Iyo, sa tahaw ninda kita gabos kaidto namuhay oyon sa mga mawot kan satong laman, na naggigibo kan mga bagay na binoot kan laman asin kan mga pag-isip, asin kita kaidto sa kanaturalan mga aki nin kaanggotan arog kan iba.”​—Efeso 2:​2, 3.

13. Paano epektibong malalabanan kan mga Kristiano an espiritu kan kinaban, asin may anong kapakipakinabang na mga resulta?

¹³ Marahay sana ta an mga Kristiano sa Efeso dai nagdanay na oripon kan espiritung iyan nin pagsuway. Imbes, sinda nagin makinuyog na mga aki nin Dios paagi sa pagsunod sa saiyang espiritu saka pag-ani nin abunda asin kapakipakinabang na mga bunga. (Galacia 5:​22, 23) Siring man ngonyan, minilyon an tinatabangan kan espiritu nin Dios​—an pinakamakapangyarihan na puersa sa uniberso​—na magin makinuyog ki Jehova, na an resulta puedeng mapasainda an “biyong kasiertohan kan paglaom sagkod sa katapusan.”​—Hebreo 6:11; Zacarias 4:6.

14. Paano pinatanidan ni Jesus an gabos na Kristianong nabubuhay sa huring mga aldaw dapit sa espesipikong mga bagay na mabalo sa saindang pagkuyog?

¹⁴ Tandaan man na yaon sa sato an mapuersang pagsuportar ni Silo, na kaiba kan saiyang Ama dai totogotan an kaiwal​—demonyo o tawo​—na baloon an satong pagkuyog nin labi sa satong makakaya. (1 Corinto 10:13) Sa katunayan, tanganing tabangan kita sa satong espirituwal na pakikilaban, isinabi ni Jesus an dakol na espesipikong problema na aatubangon niato durante kan huring mga aldaw na ini. Isinabi nia iyan paagi sa pitong surat, na itinao nia sa sarong bisyon ki apostol Juan. (Kapahayagan 1:​10, 11) Daing duwa-duwa, igwa iyan nin mahalagang marhay na hatol sa mga Kristiano kan panahon na idto, alagad an pangenot na aplikasyon kaiyan para sa “aldaw kan Kagurangnan,” poon kan 1914. Kun siring, angay nanggad na tawan niato nin atension an mga mensaheng ini! b

Likayan an Pagkaindiperente, Inmoralidad, Materyalismo

15. Taano ta dapat kitang magmaan sa problema na nakaapektar sa kongregasyon nin Efeso, asin paano niato iyan magigibo? (2 Pedro 1:5-8)

¹⁵ An enot na surat ni Jesus para sa kongregasyon nin Efeso. Pakatapos na komendaran an kongregasyon huli sa pakatagal kaiyan, nagsabi si Jesus: “Minsan siring, ibinibilang ko ining tumang sa saimo, na binayaan mo an saimong pagkamoot kan enot.” (Kapahayagan 2:1-4) Ngonyan, an nagkapirang dati maigot na mga Kristiano iwinara man an malaad na pagkamoot ninda sa Dios kaidto. An siring na pagkawara puedeng magpaluya kan relasyon nin saro sa Dios asin dapat na asikasohon tolos-tolos. Paano mapakokosog liwat an siring na pagkamoot? Paagi sa regular na pag-adal  sa Biblia, pag-atender sa mga pagtiripon, pamimibi, asin paghorophorop. (1 Juan 5:3) Totoo, nagkakaipo ini nin “odok na paghihingoa,” alagad seguradong bawi man iyan. (2 Pedro 1:5-8) Kun ihayag nin sadiosan na pagsiyasat sa sadiri na naglipot na an saindong pagkamoot, kun siring itanos tolos-tolos an situwasyon, bilang pagkuyog sa sadol ni Jesus: “Girumdoma kun saen ka nahulog, asin magsolsol ka asin giboha an enot na mga gibo.”​—Kapahayagan 2:5.

16. Anong mga impluwensia na peligroso sa espirituwal an yaon kaidto sa kongregasyon nin Pergamo asin Tiatira, asin taano an mga tataramon ni Jesus sa sainda ta angay ngonyan?

¹⁶ An mga Kristiano sa Pergamo asin Tiatira kinomendaran huli sa saindang integridad, pakatagal, asin kaigotan. (Kapahayagan 2:​12, 13, 18, 19) Pero, naimpluwensiahan sinda nin nagkapira na nagpapaheling kan maraot na espiritu ni Balaam asin Jezabel, na paagi sa seksuwal na inmoralidad asin pagsamba ki Baal guminawe bilang nakararaot na mga impluwensia sa suanoy na Israel. (Bilang 31:16; 1 Hade 16:​30, 31; Kapahayagan 2:​14, 16, 20-23) Alagad kumusta man sa panahon niato​—sa “aldaw kan Kagurangnan”? Naririsa daw an kaparehong maraot na mga impluwensia? Iyo, ta an inmoralidad iyo nanggad an pangenot na dahelan nin pagtitiwalag sa tahaw kan banwaan nin Dios. Kun siring, mahalaga nanggad na likayan niato an pakikiibaiba sa gabos na indibiduwal​—sa laog asin luwas kan kongregasyon​—na impluwensiang nakararaot sa moral! (1 Corinto 5:9-11; 15:33) Lilikayan man kan mga gustong magin makinuyog na sakop ni Silo an kuestionableng mga aling-alingan saka an pornograpiya sa mga babasahon asin Internet.​—Amos 5:15; Mateo 5:​28, 29.

17. Ano an kalaenan kan punto de vista asin aktitud kan mga taga Sardis asin Laodicea kun ikokomparar sa pagheling ni Jesus sa saindang kamugtakan sa espirituwal?

¹⁷ Apuera sa pirang indibiduwal, an kongregasyon sa Sardis mayo lamang nin inakong komendasyon. Iyan igwa “kan ngaran,” o nagsasagin, na iyan buhay alagad tuminadom nang marhay an espirituwal na pagkaindiperente kaya sa pagheling ni Jesus iyan “gadan.” An pagkuyog sa maogmang bareta nagin haros mekanikal na sana. Kanigoan na pagdenunsiar! (Kapahayagan 3:1-3) Iyan man an kamugtakan kan kongregasyon sa Laodicea. Ipinaghambog kaiyan an materyal na kayamanan, na nagsasabi, “Ako mayaman,” pero para ki Cristo iyan “nasasakitan asin kaherakherak asin dukha asin buta patin huba.”​—Kapahayagan 3:14-17.

18. Paano malilikayan nin saro na magin gabinhod sa espirituwal sa pagheling nin Dios?

¹⁸ Ngonyan, an nagkapirang dati fiel na Kristiano nahulog man sa kaparehong pagsuway. Tibaad tinogotan ninda an espiritu kan kinaban na  paluyahon an saindang pakamate nin pagkaapurado, na sa siring nagigin gabinhod sa espirituwal kun dapit sa pag-adal sa Biblia, pamimibi, Kristianong mga pagtiripon, asin ministeryo. (2 Pedro 3:​3, 4, 11, 12) Kanigoan kaimportante na kuyogon ninda si Cristo paagi sa paggamit nin espirituwal na mga kayamanan​—iyo, “bumakal [ki Cristo] nin bulawan na dinalisay sa kalayo”! (Kapahayagan 3:18) Kabale sa tunay na kayamanan na iyan an pagigin ‘mayaman sa marahay na mga gibo, matinao, andam na manhiras.’ Paagi sa paggamit kan totoong mahal na marhay na kayamanan na ini, kita ‘nagririmpos para sa sato man sana nin marahay na pasisikadan para sa ngapit, tanganing makapangapot nin marigon sa tunay na buhay.’​—1 Timoteo 6:17-19.

Kinomendaran sa Saindang Pagkuyog

19. Anong mga komendasyon asin sadol an itinao ni Jesus sa mga Kristiano sa Smirna asin Filadelfia?

¹⁹ An kongregasyon sa Smirna asin Filadelfia pambihirang mga halimbawa sa pagkuyog, ta an mga surat sa sainda ni Jesus mayo nin pagsagwe. Sa mga taga Smirna, sia nagsabi: “Aram ko an saimong kahorasaan asin kadukhaan​​—alagad ta ika mayaman.” (Kapahayagan 2:9) Kanigoan an kalaenan sa mga taga Laodicea, na ipinaghambog an kinabanon na kayamanan alagad an totoo nagtitios! Siempre, an Diablo dai naoogmang maheling an siisay man na nagpapaheling nin pagigin fiel asin pagkuyog ki Cristo. Huli kaini, nagpatanid si Jesus: “Dai ka matakot sa mga bagay na saimong titioson. Uya! Ibibilanggo kan Diablo an nagkapira sa saindo tanganing kamo lubos na mabalo, asin tanganing magkaigwa kamo nin kahorasaan sa laog nin sampulong aldaw. Patunayan mo na ika fiel sagkod sa kagadanan, asin ta itatao ko sa saimo an korona nin buhay.” (Kapahayagan 2:10) Kaagid kaiyan, kinomendaran ni Jesus an mga taga Filadelfia, na nagsasabi: “Inotob mo an sakong tataramon [o, kinuyog mo ako] asin dai nagpainda sa sakong ngaran. Ako madatong sa madali. Padagos mong pangaptan nin higot an nasa saimo na, tanganing mayo nin makakua kan saimong korona.”​—Kapahayagan 3:​8, 11.

20. Paano inotob kan minilyon ngonyan an tataramon ni Jesus, asin sa ibong nin anong mga situwasyon?

²⁰ Sa “aldaw kan Kagurangnan,” na nagpoon kan 1914, an sarong fiel na natatada asin an kairiba nindang ibang karnero, na minilyon na ngonyan an kabilangan, inotob man an tataramon ni Jesus paagi sa maigot na pakikikabtang sa ministeryo asin pangangapot nin marigon sa saindang integridad. Arog kan saindang mga tugang kaidtong enot na siglo, an nagkapira nagdusa huli sa saindang pagkuyog ki Cristo, na iinapon pa ngani sa mga bilanggoan asin kampo de konsentrasyon. An iba inotob an tataramon ni Jesus paagi sa pagpapadanay nin ‘simpleng mata,’ apisar kan nakapalibot na prosperidad asin kahanaban. (Mateo 6:​22, 23) Iyo, sa lambang kamugtakan asin sa lambang situwasyon, an tunay na mga Kristiano, paagi sa saindang pagkuyog, padagos na pinagagayagaya an puso ni Jehova.​—Talinhaga 27:11.

21. (a) Anong espirituwal na obligasyon an padagos na ootobon kan grupong oripon? (b) Paano niato ikapaheheling na talagang boot niatong kuyogon si Silo?

²¹ Mantang kita nagdadangadang sa dakulang kahorasaan, “an fiel asin may diskresion na oripon” nagdadanay na desididong dai ipagkompromiso an pagkuyog kaiyan sa Kagurangnan, si Cristo. Kabale digdi an pag-andam nin napapanahon na espirituwal na kakanon para sa pamilya nin Dios. Kaya padagos niatong pahalagahan an makangangalas na teokratikong organisasyon ni Jehova asin an mga probisyon kaiyan. Paagi kaini, ipinaheheling niato an satong pagpasakop ki Silo, na babalosan nin buhay na daing katapusan an gabos niang makinuyog na sakop.​—Mateo 24:45-47; 25:40; Juan 5:22-24.

[Mga Nota sa Ibaba]

Nagigirumdoman daw Nindo?

• Ano an magigin papel ni Jesus segun sa sinabi sa hula ni Jacob kan sia madali nang magadan?

• Paano niato minimidbid si Jesus bilang Silo, asin anong espiritu an dapat niatong likayan?

• Anong angay na hatol para sa satong kaaldawan an yaon sa mga surat sa pitong kongregasyon sa Kapahayagan?

• Sa anong mga paagi niato maaarog an mga nasa kongregasyon kan suanoy na Smirna asin Filadelfia?

[Mga Hapot Para sa Pag-adal]

[Mga ritrato sa pahina 18]

Binebendisyonan ni Jehova an saiyang banwaan huli sa pagkuyog sa fiel na “mayordomo”

[Ritrato sa pahina 19]

An impluwensia ni Satanas pinagigin masakit an pagkuyog sa Dios

[Mga ritrato sa pahina 21]

An makosog na relasyon ki Jehova nakatatabang sa sato na magin makinuyog sa saiya