Maninigo daw Kamong Magpapasilpasil sa Buhay?

TIBAAD an kadaklan na tawo nagsasaboot na kaomawan an mamidbid bilang saro na pinapapasilpasil an buhay, saro na may pagkarelaks, kalmado, mapagpabaya sa iba. Minsan siring, igwa nin saro pang aspekto an pagpasilpasil sa buhay. An Biblia nagsasabi: “An pagpasilpasil sa buhay kan lolong an malaglag sa sainda.” (Talinhaga 1:32) Ano an boot sabihon kaiyan?

An ibang bersion kan Biblia trinadusir an orihinal na terminong Hebreo sa mga fraseng arog kan “daing ingat na kapasilan” (American Standard Version), “pagigin tubod na marhay sa sadiri” (The New American Bible), asin “daing pag-intindi.” (The New English Bible) Sa kahulogan na ini, an pagpasilpasil sa buhay konektado sa kahugakan asin kadaihan nin pag-iingat patin siring man sa pagigin lolong o pagigin rungaw.

Kan enot na siglo, an mga Kristiano sa kongregasyon sa Laodicea pabayang marhay o daing pag-intindi sa saindang espirituwal na mga kakulangan. Tubod na marhay sinda sa sadiri asin naghahambog na “dai [sinda] nagkakaipo nin ano man.” Ikinorehir sinda ni Jesu-Cristo, na hinahagad na ibalik liwat an Kristianong kaigotan ninda.​—Kapahayagan 3:14-19.

An pagpapasilpasil sa buhay na daing pag-intindi saro man na karakteristiko kan mga tawo kan kaaldawan ni Noe. Sibot sinda sa pan-aroaldaw na mga bagay sa buhay, “nagkakarakan asin nag-iirinom, an mga lalaki nag-aaragom asin an mga babae nagpapaaragom . . . , asin dai sinda nagmangno sagkod na dumatong an baha asin iinanod sinda gabos.” Dangan idinugang ni Jesus: “Magigin siring man kaiyan an presensia kan Aki nin tawo.”​—Mateo 24:37-39.

An naotob na mga hula sa Biblia nag-iindikar na nabubuhay na kita durante kan “presensia kan Aki nin tawo,” si Jesu-Cristo. Logod na nungka kitang magin daing pag-intindi, daing ingat, tubod na marhay sa sadiri​​—pinapapasilpasil an buhay sa salang paagi.​—Lucas 21:29-36.