Bareta kan mga Parabalangibog kan Kahadean

Medalya nin Pagrekonoser Para sa Sarong Kingdom Hall

AN Ministry of Environment sa Finlandia pinili an taon 2000 bilang “Taon nin Landscaping.” An saro sa mga nag-organisar nagsabi na an “katuyohan kan paggamit kan landscaping bilang tema kan taon iyo na ipagirumdom sa sato gabos an impluwensia kan berdeng palibot sa satong pangaroaldaw na buhay asin ikararahay niato.”

Kan Enero 12, 2001, sarong surat hale sa Finnish Association of Landscape Industries an nag-abot sa sangang opisina kan Mga Saksi ni Jehova sa Finlandia. Ipinaliwanag kan surat na an Kingdom Hall kan Mga Saksi ni Jehova sa Tikkurila tinawan kan saro sa mga medalya na landscaping bilang tema kan taon huli sa pambihirang disenyo kan palibot kaiyan asin sa aregladong hardin kaiyan. Idinugang pa kan surat na “an pankagabsan na itsura kan palibot, sa tig-init sagkod tiglipot, nakaoogma, magayon sa artistikong paagi, asin halangkaw an kalidad.”

Itinao an medalya sa mga Saksi ni Jehova sa Rosendahl Hotel sa Tampere, Finlandia, sa sarong okasyon na inatenderan nin 400 na propesyonal asin negosyante. An Finnish Association of Landscape Industries nagpaluwas man nin opisyal na deklarasyon sa prensa, na nagsasabi: “Sa manlaenlaen na parte kan nasyon, an mga Kingdom Hall kan Mga Saksi ni Jehova haros pirmeng magayon an pagkaplano. An pag-ataman sa palibot naririsa kan haros gabos na nag-aagi dian. An Kingdom Hall sa Tikkurila sarong halimbawa nin sarong kahangahangang hardin sa kabilogan. An edipisyo asin an mahiwas na natad parehong nagpapaheling nin katrangkilohan asin pagigin balanse.”

Sa Finlandia igwa nin 233 na Kingdom Hall, na an dakol napalilibotan nin magagayon na hardin. Minsan siring, an totoong nagpapagayon sa mga lugar na ini iyo na iyan mga sentro nin tunay na pagsamba asin edukasyon sa Biblia. Para sa labing anom na milyon na Saksi ni Jehova sa bilog na kinaban, an Kingdom Hall​​—plinanong marhay o simple sana​​—sarong namomotan na marhay na lugar. Iyan an dahelan kaya gustong-gusto asin namomotan nindang asikasohon iyan. An mga pinto kan mga Kingdom Hall bukas para sa gabos sa saindong lugar!