Mga Hoben na Namomoot sa Katotoohan

“PAANO lilinigan nin sarong hoben na lalaki an saiyang dana?” an hapot nin sarong salmistang Hebreo labing 2,400 na taon na an nakaagi. (Salmo 119:9) Balido pa man giraray an hapot na ini ngonyan huli ta napapaatubang an mga hoben sa dakol na problema sa kinaban. An pakikidorog minsan kiisay naglantad sa dakol na hoben sa AIDS, na mga kabanga kan mga naolakitan kan makatatakot na helang na ini an nasa pag-oltanan nin edad na 15 asin 24. Nagbubunga man nin dakol na problema an pagdodroga, na pinuputol nin mayo pa sa panahon an buhay nin nagkapirang hoben. An marigsok na musika; an madahas asin inmoral na mga pelikula, mga pasale sa TV, asin video; asin an pornograpiya sa Internet igwa nin nakalalaglag nin biyo na impluwensia sa mga hoben. Kun siring, an ihinapot kan salmista seryosong marhay na iniisip kan dakol na magurang asin hoben ngonyan.

Itinao kan iyo man sanang salmista an simbag na ini sa sadiri niang hapot: “Paagi sa pag-iingat segun sa saimong tataramon.” Tunay nanggad, an Tataramon nin Dios, an Biblia, igwa nin marahay na instruksion para sa mga hoben, asin paagi sa pagsunod dian, dakol na hoben an nagkakaigwa nin mapangganang buhay. (Salmo 119:105) Siyasaton niato an nagkapirang halimbawa nin mga hoben na namomoot sa Dios asin naghihingoang magdanay na makosog sa espirituwal sa sarong kinaban na mahilig sa kasingawan asin materyalistiko.

Pinasasalamatan Ninda an Paggiya nin mga Magurang

Si Jacob Emmanuel sarong bilog na panahon na ministrong payunir sa laog nin nagkapirang taon bago naglingkod sa sangang opisina kan Mga Saksi ni Jehova sa Mejico. Nagigirumdoman nia na may pagpasalamat kun paano nagtalubo an saiyang pagkamoot sa paglilingkod sa Dios: “An sakong mga magurang an pangenot na impluwensia, maski ngani nakatabang man na marhay an nagkapirang eksperyensiadong espirituwal na tugang na nagin katood ko. Sinda an nagmotibar sako na mamotan an paghuhulit. Maboot ninda akong giniyahan sa tamang dalan; nungka kong namatean na pinirit ninda ako.”

Nagigirumdoman ni David, na nagkapirang taon na sa bilog na panahon na ministeryo, kun paano sia naghanga na an saiyang mga magurang nagpoon na maglingkod bilang espesyal payunir kan sia asin an saiyang tugang na lalaki sadit pa. Kan nagadan an saiyang ama, ipinadagos kan saiyang ina an paglilingkod bilang espesyal payunir. Inataman nia sinda apuera pa sa paghuhulit kan maogmang bareta. “Nungka ninda akong inobligar na magpayunir,” an sabi ni David, “alagad ikinaogma niamong marhay an pagpapayunir bilang pamilya kaya an pag-iribaiba asin mga kamugtakan an nagpahiro sako na gibohon man iyan.” Mapadapit sa kahalagahan kan marahay na paggiya asin atension nin mga magurang, si David nagsabi: “Barobanggi, binabasahan kami kan sakong ina nin mga estorya sa librong Hale sa Paraisong Nawara Sagkod sa Paraisong Nakamtan-liwat. a An paagi nin pag-estorya nia kaiyan sa samo nakatabang samo na magustohan na marhay an pagkua nin espirituwal na kakanon.”

Pagpapahalaga sa mga Pagtiripon

An nagkapirang hoben nadedepisilan na pahalagahan an Kristianong mga pagtiripon. Nag-aatender sinda huli ta iiniiba sinda kan saindang mga magurang. Minsan siring, kun padagos sindang maatender sa pagtiripon, maabot an panahon na pahahalagahan na ninda  an mga pagtiripon. Estudyaran niato si Alfredo, na nagpoon sa bilog na panahon na paglilingkod kan sia 11 anyos. Inaadmitir nia na kan sia mga singko anyos, pinagmaigotan niang dai mag-iba sa mga pagtiripon huli ta tinutungka sia dian alagad dai sia tinotogotan kan saiyang mga magurang na magtorog durante kan mga pagtiripon. Natatandaan nia: “Mantang nagdadakula ako, luway-luway na nagigin mas interesado ako sa mga pagtiripon, nangorogna kan nakanood akong bumasa asin sumurat huli ta kaidto nagpoon na akong magkomento sa sadiri kong mga tataramon.”

Sinabi ni Cintia, sarong 17 anyos na daragita na naglilingkod bilang regular payunir, kun paano nagkaigwa nin dakulang kabtang sa pakapatalubo nia nin pagkamoot sa paglilingkod sa Dios an marahay na pakikiasosyar. Sabi nia: “An marahay na relasyon sa mga tugang asin an regular na pag-atender sa mga pagtiripon an nagpogol sa sako na hanaphanapon an sakong kinabanon na mga katood asin an mga aktibidad na popular sa mga hoben, arog baga kan pagdisko. An paghinanyog sa mga komento asin eksperyensia sa mga pagtiripon an nagpatalubo sa sako nin pagmawot na itao ki Jehova an gabos na yaon sako, asin sa pagmate ko an pinakamarahay na bagay na yaon sa sako iyo an pagigin hoben ko. Kaya nagdesisyon ako na gamiton iyan sa paglilingkod sa saiya.”

Minsan siring, inaadmitir nia: “May panahon kaidto, bago ako mabautismohan, na pasil sanang magpalta sa pag-atender sa mga pagtiripon, na ginagamit an leksion na pag-aadalan o iba pang aktibidad sa eskuelahan bilang sarahotan. Nagpalta ako sa nagkapirang pagtiripon, asin nagpoon na maapektaran ako kaini sa espirituwal. Nagpoon akong makiibaiba sa sarong hoben na lalaki na dai nag-aadal sa Biblia. Sa tabang ni Jehova, nag-abot an panahon na ikinatanos ko an mga bagay.”

Sarong Personal na Desisyon

Kan hapoton si Pablo, saro pang hoben na naglilingkod nin bilog na panahon ki Jehova, kun ano an kinokonsiderar niang pinakaimportanteng bagay sa pagpatalubo nin pagkamoot sa katotoohan kan Tataramon nin Dios, sia nagsabi: “Sa heling ko igwa nin duwang bagay: regular na personal na pag-adal asin kaigotan sa paghuhulit. Nagpapasalamat ako sa sakong mga magurang sa pagtokdo sako kan katotoohan manongod ki Jehova, asin namamatean ko na ini an pinakamarahay na bagay na ikatatao ninda sako. Minsan siring, kaipuhan na personal akong makombensir kun taano ta namomotan ko si Jehova. Huli kaiyan, kaipuhan na maaraman ‘an lakbang asin rarom’ kan katotoohan sa Biblia. Sa paaging ini sana makakamate kita nin pagmawot sa Tataramon ni Jehova, na nagpapatalubo nin ‘naglalaad na kalayo’ sa laog niato tanganing isabi sa iba an manongod kaiyan. An kaigotan na iyan para sa paghuhulit an mapadanay na buhay an satong pagpapahalaga sa katotoohan.”​—Efeso 3:18; Jeremias 20:9.

Nagigirumdoman man ni Jacob Emmanuel, na nasambitan kasubago, an halaga kan paggibo nin personal na pagpili tanganing maglingkod ki Jehova. Sinabi nia na nungkang iininsistir kan saiyang mga magurang na magpabautismo sia. “Naniniwala ako na ini an pinakamarahay huli ta naheling ko an marahay na mga resulta. Halimbawa, an nagkapirang hoben na parate kong nakaibaiba nagdesisyon na magpabautismo nin sarabay. Minsan ngani marahay man iyan, naheling ko na an nagkapira ginibo iyan huli sana sa emosyon, asin dai nahaloy pakatapos kaiyan, an saindang kaigotan para  sa mga aktibidad na pan-Kahadean nagluya. Sa kamugtakan ko dai ako pinirit kan sakong mga magurang na magdesisyon na idusay an sakong sadiri ki Jehova. Iyan personal na desisyon.”

An Kabtang kan Kongregasyon

Nanodan kan nagkapirang hoben an katotoohan kan Tataramon nin Dios sa sadiri nindang paghihingoa, na mayong tabang hale sa saindang mga magurang. Bako nanggad na pasil iyan sa irarom kan siring na mga sirkunstansia na manodan na gibohon an tama asin magprosegir dian.

Natatandaan ni Noe kun paano sia nakinabang na marhay sa katotoohan. Poon kan sia akion pa, madali siang maanggot asin magin madahas. Kan magpoon siang mag-adal sa Biblia sa edad na 14, an saiyang ugale nagpoon na magrahay, kaya an saiyang mga magurang na bako man interesado sa Biblia kan panahon na iyan nagpapasalamat na marhay. Mantang nag-ooswag si Noe sa espirituwal, gusto niang gamiton an saiyang buhay nin mas lubos sa paglilingkod sa Dios. Sia ngonyan nasa bilog na panahon na ministeryo na.

Siring man, si Alejandro nagpoon na magkainteres sa Kristianong katotoohan kan sia akion pa, dawa ngani an saiyang mga magurang dai interesado kaiyan. Ipinapahayag an saiyang pagpapahalaga sa katotoohan, sia nagsabi: “Pinadakula ako sa sarong tradisyonal na Katolikong harong. Alagad nag-oorog an sakong interes sa Komunistang ateismo, huli ta dai nasimbag kan iglesia an mga hapot na nakapurisaw sa sako poon kan ako akion pa. An organisasyon ni Jehova an nagtabang sako na makua an kaaraman manongod sa Dios. Literal na ilinigtas kaiyan an sakong buhay huli ta kun dai ako nag-adal sa Biblia, tibaad naimbuelto na ako sa inmoralidad, alkoholismo, o pagdodroga. Tibaad ngani nagin kabtang na ako nin sarong rebolusyonaryong grupo, na makamomondo an kaaabtan.”

Paano puedeng magprosegir an sarong hoben sa saiyang paghanap sa katotoohan asin pangaptan iyan dawa mayo an pagsuportar kan saiyang mga magurang? Siempre pa, an kamagurangan asin an iba pa sa kongregasyon may importanteng marhay na kabtang. Natatandaan ni Noe: “Nungka kong namatean na ako nagsosolo, huli ta si Jehova pirmeng haranihon sa sako. Siring man, yaon an pagsuportar sako kan dakol na mamomoton na mga tugang na lalaki asin babae na nagin sakong espirituwal na ama, ina, asin mga tugang.” Naglilingkod sia ngonyan sa Bethel asin ginagamit an saiyang panahon sa paglilingkod sa Dios. Siring man, isinasaysay ni Alejandro: “An sarong bagay na pirme kong pasasalamatan iyo an bendisyon na pagigin yaon ko sa sarong kongregasyon na may grupo nin kamagurangan na nagpaheling sako nin mamomoton na interes bilang sarong tawo. Nangorognang nagpapasalamat ako huli ta kan magpoon akong mag-adal sa Biblia, sa edad na 16, an pagkaribaraw na lakop sa mga hoben nakaapektar man sako. Nungka akong pinabayaan kan mga pamilya sa kongregasyon. Pirmeng may mapag-istimar na minaako sako asin ihinihiras sako bako sanang an saiyang harong asin kakanon kundi patin an saiyang puso.” Si Alejandro labing 13 taon na ngonyan sa bilog na panahon na paglilingkod.

May mga tawong nagsasaboot na an relihion para sana sa mga gurang. Minsan siring, dakol na hoben an nakanood kan katotoohan sa Biblia sa amay na edad asin namotan si Jehova patin nagdanay na fiel sa saiya. Sa mga hoben na ini puedeng iaplikar an mga tataramon ni David na nakasurat sa Salmo 110:3 “An saimong banwaan gikan sa boot na magpepresentar kan saindang sadiri sa aldaw kan saimong puersa militar. Sa kagayonan nin kabanalan, poon sa kaagahon, ika igwa kan saimong grupo nin hoben na mga lalaki siring kan tagdo kan ambon.”

Sarong angat para sa mga hoben na manodan an katotoohan asin magdanay dian. Kanigoan na kagayagayahan an maheling na dakol an nagdadanay na dayupot na marhay sa organisasyon ni Jehova, nag-aatender nin regular sa mga pagtiripon, asin mahigos na nag-aadal sa Biblia. Sa paggibo kaiyan, nakultibar ninda an tunay na pagkamoot sa Tataramon nin Dios asin sa paglilingkod sa saiya!​—Salmo 119:​15, 16.

[Nota sa Ibaba]