“Magin Ka Madonong sa Saimong Kaaabtan sa Ngapit”

“Ginagamit kan mayoriya nin katawohan an enot na mga taon kan saindang buhay tanganing gibohon na miserable an huring kabtang kaiyan.” Iyan an sinabi ni Jean de La Bruyère, sarong parasurat na Pranses kan ika-17 siglo. Tunay nanggad, an sarong hoben na dai makadesisyon tibaad mag-alangan, na nakaeeksperyensia nin pagkadiskontento asin pagbasol. Sa ibong na lado, an sarong hoben na matagas an payo tibaad magpadagos sa bakong madonong na mga gibo, na mahale kan saiyang kagayagayahan sa huring kabtang kan saiyang buhay. Sa ano man na paagi, an mga kasalan na huli sa kapabayaan o sa pakakomiter puedeng magbunga nin grabeng kamondoan.

Paano malilikayan an arog kaiyan na kaaabtan? Sa pagpatanid tumang sa pagkadai makadesisyon kan mga hoben, an Tataramon nin Dios nagsasadol sa mga hoben: “Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkahoben na lalaki, bago umabot an kapahapahamak na mga aldaw, o dumatong an mga taon na ika masabi: ‘Mayo ako nin kawilihan sa sainda.’” (Eclesiastes 12:1) Kun ika sarong hoben, gumibo nin positibong mga lakdang na makanood manongod sa “saimong Kaharohalangkaweng Kaglalang” mantang hoben ka pa.

Kun siring, paano nakatatabang an Biblia sa mga hoben na malikayan an kabalisngagan nin pagigin hoben? Sinasabi kaiyan: “Hinanyoga an hatol asin akoa an disiplina, tanganing magin ka madonong sa saimong kaaabtan sa ngapit.” (Talinhaga 19:20) Malinaw man na ipinaheheling kan Biblia na an paghabo sa diosnon na kadonongan na resulta nin kapabayaan o pagrebelde mantang hoben pa, o sa ano man na edad, magbubunga nin makolog na resulta. (Talinhaga 13:18) Sa kabaliktaran, an paghimate sa paggiya nin Dios minaresulta sa ‘lawig nin mga aldaw asin mga taon nin buhay patin katoninongan,’ sarong nakakokontentong buhay.​—Talinhaga 3:2.