Maninigo daw na an mga Kristiano Mag-imon?

PAG-IMON—iyan daw kualidad na maninigong kultibaron nin mga Kristiano? Bilang mga Kristiano, ineenkaminar kita na ‘pagmaigotan na magibo an pagkamoot,’ asin sinasabihan kita na “an pagkamoot bakong maimon.” (1 Corinto 13:4; 14:1) Sa ibong na lado, sinasabihan man kita na “si Jehova . . . Dios na maimon” asin pinagbobotan kita na ‘magin mga paraarog sa Dios.’ (Exodo 34:14; Efeso 5:1) Taano ta garo baga may kontradiksion?

Huli ta an Hebreo asin Griegong mga termino na trinadusir na “pag-imon” sa Biblia igwa nin magkaralaenlaen na kahulogan. Puedeng magkaigwa iyan nin magsalang positibo o negatibong konotasyon, depende sa pagkagamit kan mga termino. Halimbawa, an Hebreong termino na trinadusir na “pag-imon” puedeng mangahulogan nin “pag-insistir sa dai nababangang debosyon; dai pagtogot na may makaribal; kaigotan; init; pag-imon [matanos o makasalan]; pagkauri.” An kaparehong termino sa Griego may kaagid na kahulogan. An mga terminong ini puedeng ipanongod sa biko, biribid na emosyon sa pinagdududahan na karibal o sa saro na hinohonang igwa nin bentaha. (Talinhaga 14:30) Puede man na ipanongod iyan sa sarong positibong pagpaheling kan kualidad na tao nin Dios​​—pagmawot na protehiran na dai maano an sarong namomotan.​—2 Corinto 11:2.

An Nakalalabi sa Gabos na Halimbawa

Si Jehova an nagtatao kan nakalalabi sa gabos na halimbawa sa pagpaheling nin tamang pag-imon. An saiyang motibo dalisay asin malinig, na pinahihiro kan pagmawot na ilikay an saiyang banwaan sa espirituwal asin moral na karatan. Mapadapit sa saiyang suanoy na banwaan, na piguratibong inaapod na Sion, sinabi nia: “Ipag-iimon ko an Sion na may dakulang pag-imon, asin ipag-iimon ko sia na may dakulang kabangisan.” (Zacarias 8:2) Kun paanong an sarong mamomoton na ama pirmeng listo na protehiran na dai mapahamak an saiyang mga aki, si Jehova listo man na protehiran an saiyang mga lingkod sa pisikal asin espirituwal na peligro.

Tanganing protehiran an saiyang banwaan, itinao ni Jehova an saiyang Tataramon, an Biblia. Igwa iyan nin dakol na pamparigon sa boot na sinda maglakaw na may kadonongan, asin igwa iyan nin dakol na halimbawa kan mga naggibo kaiyan. Sa Isaias 48:​17, mababasa niato: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” Nakararanga nanggad na maaraman na an saiyang pag-imon nagpapahiro sa saiya na atamanon asin bantayan kita! Kun bako siang maimon sa marahay na paaging ini, kita masapo nin gabos na klaseng peligro huli sa pagkadaing kabatidan niato. An pagpaheling ni Jehova nin pag-imon tunay nanggad na bakong maimot.

Kaya, kun siring, ano an kalaenan kan diosnon na pag-imon sa salang pag-imon? Tanganing maaraman iyan, estudyaran niato an halimbawa ni Miriam asin an ki Fineas. Mangnohon kun ano an nagpahiro sa sainda.

Si Miriam Asin si Fineas

Si Miriam an matuang tugang ni Moises asin Aaron, an mga namomoon sa mga Israelita durante kan Lagdoan na Pagharale. Mantang yaon an mga Israelita sa kaawagan, si Miriam nag-imon sa saiyang tugang na si Moises. An rekord sa Biblia nagsasabi: “Ngonyan nagpoon na magtaram si  Miriam asin Aaron tumang ki Moises dahel sa Cusita na inagom nia . . . Asin padagos sindang nagsasabi: ‘Paagi sana daw ki Moises na nagtaram si Jehova? Bako daw na paagi man samo sia nagtaram?’” Minalataw na si Miriam an nangenot sa pagtumang na ini ki Moises, huli ta dinisiplina ni Jehova si Miriam, bakong si Aaron, nin sarong semanang daot huli sa daing galang niang gawe.​—Bilang 12:1-15.

Ano an nagpahiro ki Miriam na tumangon si Moises? Idto daw pagmalasakit sa tunay na pagsamba asin pagmawot na protehiran sa kapahamakan an mga kapwa Israelita? Malinaw na bako. Minalataw na tinogotan ni Miriam an salang pagmawot nin orog na prestihio asin autoridad na tumalubo sa saiyang puso. Bilang propetisa sa Israel, nakamtan nia an dakulang paggalang kan mga tawo, partikularmente an mga babae. Pinangenotan nia sinda sa musika asin pag-awit pakatapos kan milagrosong pagkaligtas kan Israel sa Dagat na Pula. Pero, ngonyan, tibaad nagin labi-labi an paghadit ni Miriam na an saiyang pagkaprominente mapaduman sa pinagdududahan niang karibal, an agom ni Moises. Pinahiro kan maimot na pag-imon, pinukaw nia an pakidiskutiran ki Moises, an saro na ninombrahan ni Jehova.​—Exodo 15:​1, 20, 21.

Sa ibong na lado, si Fineas igwa nin laen na motibo sa saiyang mga aksion. Dai nahaloy bago maglaog sa Dagang Panuga, kan an Israel nagkakampo sa Kaplanodohan nin Moab, inakit kan mga babaeng Moabita asin Midianita an dakol na Israelitang lalaki sa inmoralidad asin idolatriya. Tanganing linigon an kampo asin mapondo an naglalaad na kaanggotan ni Jehova, pinagbotan an mga hokom sa Israel na gadanon an gabos na lalaki na suminuhay. Para sa inmoral na katuyohan, an prinsipeng Simeonita na si Zimri daing supog na dinara sa kampo an babaeng Midianita na si Cozbi na “naheheling kan bilog na katiriponan kan mga aki ni Israel.” Si Fineas desididong huminiro. Itinulod kan pakamate nin pag-imon, o kaigotan, para sa pagsamba ki Jehova asin pagmawot na mapagdanay an kadalisayan sa moral kan kampo, ginadan nia an mga parapakisaro sa saindang tolda. Inomaw sia huli sa saiyang “maimon na kaanggotan,” na ‘dai nanggad nagtogot nin pakikiribal’ ki Jehova. An listong paghiro ni Fineas an nagpapondo sa padusang damat na guminadan na nin 24,000, asin binalosan sia ni Jehova paagi sa sarong tipan na an pagkasaserdote magdadanay sa saiyang linahe sagkod sa panahon na daing talaan.​—Bilang 25:4-13; The New English Bible.

Ano an pagkakalaen kan duwang pagpaheling na ini nin pag-imon? Si Miriam nagtumang sa saiyang tugang huli sa maimot na pag-imon, mantang si Fineas ginibo an hustisya basado sa diosnon na pag-imon. Arog ni Fineas, may beses na kita maninigong makamate na napapahirong magtaram o humiro bilang pagdepensa sa ngaran ni Jehova, sa saiyang pagsamba, asin sa saiyang banwaan.

Napasalang Pag-imon

Pero, posible daw na makamate nin napasalang pag-imon? Iyo. Ini an nangyari sa pankagabsan sa mga Judio kan enot na siglo. May pag-imon nindang iningatan an Ley na tao nin Dios asin an saindang mga tradisyon. Sa paghingoa nindang protehiran an Ley, guminibo sinda nin dai mabilang na detalyadong regulasyon asin restriksion na nagin magabat na pasanon sa mga tawo. (Mateo 23:4) Huling dai kaya o habo nindang rekonoseron na sinalidahan na nin Dios an Ley ni Moises kan tunay na mga bagay na nagserbing anino kaiyan, an saindang pag-imon nagpahiro sa sainda sa salang paagi na iluwas an daing kontrol  na kaanggotan sa mga parasunod ni Jesu-Cristo. Si apostol Pablo, na dati mismong may pag-imon na kaimbodan sa Ley sa napasalang paagi, nagsabi na an mga tawong idinedepensa an Ley igwa nin “kaigotan [pag-imon] para sa Dios; alagad bakong oyon sa tamang kaaraman.”​—Roma 10:2; Galacia 1:14.

Dawa an dakol na Judio na nagin Kristiano nasasakitan na makabutas sa ngana-ngana nindang kaigotan na ini para sa Ley. Pakatapos kan saiyang ikatolong pagbiahe sa pagmimisyonero, nagreport si Pablo sa namamahalang grupo kan enot na siglo dapit sa pagkakombertir kan mga nasyon. Kan panahon na idto, an rinibong Kristianong Judio “gabos maigot para sa Ley.” (Gibo 21:20) Ini pakalihis nin dakol na taon pakatapos na desisyonan kan namamahalang grupo na dai na kaipuhan na turion an mga Kristianong Hentil. An mga isyung may koneksion sa pag-otob sa Ley an nagigin dahelan nin iriwal sa kongregasyon. (Gibo 15:​1, 2, 28, 29; Galacia 4:​9, 10; 5:7-12) Huling mayo nin lubos na pakasabot sa kun paano tinatratar ngonyan ni Jehova an saiyang banwaan, iininsistir kan nagkapirang Kristianong Judio an sadiri nindang mga punto de vista, na kinikritikar an iba.​—Colosas 2:17; Hebreo 10:1.

Kun siring, kaipuhan na likayan niato an siod nin may pag-imon na paghihingoang protehiran an sato mismong minamahal na mga ideya o pamamaagi na dai man nin marigon na basehan sa Tataramon nin Dios. Marahay na akoon niato an bagong liwanag na pinasisirang sa Tataramon nin Dios paagi sa pinakapaagihan na ginagamit ni Jehova ngonyan.

Ipag-imon si Jehova

Minsan siring, an diosnon na pag-imon may tamang kabtang sa tunay na pagsamba. Kun garo nagigin labi-labi an paghadit niato sa satong sadiring reputasyon o mga deretso, ibinabalyo kan diosnon na pag-imon an satong atension pasiring ki Jehova. Pinahihiro kita kaiyan na humanap nin mga paagi tanganing ipahayag an katotoohan manongod saiya, na idinedepensa an saiyang mga gibo asin an saiyang banwaan.

Si Akiko, sarong bilog na panahon na ministro kan Mga Saksi ni Jehova, makosog na sinayumahan nin sarong kagharong na igwa nin salang pakasabot manongod sa ley nin Dios sa dugo. Mataktikang idinepensa ni Akiko an Tataramon nin Dios, na sinasambit pa ngani an mga komplikasyon asin problema sa medisina na kalabot sa pag-ineksion nin dugo. Napahiro nin maigot na pagmawot na ipakipag-olay an manongod ki Jehova, ibinalyo nia an orolay sa narisa niang tunay na dahelan kan pagkontra kan babae​—an babae dai nagtutubod na igwa nin Kaglalang. Nakipagrasonan si Akiko sa kagharong kun paano pinatutunayan kan paglalang an pagtubod sa Kaglalang. An saiyang pusoan na pagdepensa bako sanang nakahale sa daing basehan na prehuwisyo kundi nagbunga man nin sarong pag-adal sa Biblia sa babae. An dating anggot na kagharong saro nang paraomaw ki Jehova ngonyan.

An tamang pag-imon, o kaigotan, para sa tunay na pagsamba nagpapahiro sato na magin listo asin aprobetsaran an mga oportunidad na ipakipag-olay asin idepensa an satong pagtubod sa trabaho, sa eskuelahan, sa tindahan, asin mantang nagbibiahe. Halimbawa, desidido si Midori na ipakipag-olay an saiyang pagtubod sa saiyang mga katrabaho. An sarong katrabaho na nasa mga 40 na nagsabi na habo nia talagang makipag-olay sa mga Saksi ni Jehova. Paghaloyhaloy, durante nin  saro pang pag-oolay, an babae nagreklamo na an saiyang aking babae nagkakaigwa nin bakong marahay na ugale. Ipinaheling sa saiya ni Midori an librong Questions Young People Ask​​—Answers That Work, a asin sia nag-alok na iareglo an sarong pakikipag-adal sa libro sa saiyang aki. Naponan an pag-adal, alagad an ina dai nakiayon sa orolay. Nagdesisyon si Midori na ipadalan sa babae an video na Jehovah’s Witnesses​​—The Organization Behind the Name. b Lininaw kaini an dakol niang salang impresyon. Napukaw an boot sa naheling nia, sia nagsabi: “Gusto kong magin arog kan Mga Saksi ni Jehova.” Nakiayon sia sa saiyang aki sa pag-adal sa Biblia.

An tamang pag-imon igwa man nin kabtang sa Kristianong kongregasyon. Pinaooswag kaiyan an mainit na espiritu nin pagkamoot asin pagmakolog patin pinahihiro kitang labanan an nakararaot na mga impluwensia na puedeng makadanyar sa satong mga tugang sa espirituwal, arog baga kan nakadadanyar na tsismis asin apostatang kaisipan. Pinahihiro kita nin diosnon na pag-imon na suportaran an mga desisyon kan kamagurangan, na kun beses naheheling ninda na kinakaipuhan na sagweon an mga paragibo nin sala. (1 Corinto 5:11-13; 1 Timoteo 5:20) Sa pagsurat manongod sa saiyang pag-imon para sa mga kapagtubod sa kongregasyon nin Corinto, si Pablo nagsabi: “Ipinag-iimon ko kamo nin diosnon na pag-imon, huli ta ipinanuga ko kamo mismo na magin agom nin sarong agom na lalaki tanganing ikapresentar ko kamo siring sa mabining daraga ki Cristo.” (2 Corinto 11:2) Kaya an pag-imon niato nagpapahiro man sa sato na gibohon an gabos na magigibo niato na maprotehiran an doktrinal, espirituwal, asin moral na kadalisayan kan gabos na yaon sa kongregasyon.

Iyo, an pag-imon na igwa nin tamang motibo​​—diosnon na pag-imon​​—may nakararahay na impluwensia sa iba. Nagbubunga iyan kan pag-oyon ni Jehova asin maninigong magin saro sa mga kualidad na namamasdan sa mga Kristiano ngonyan.​—Juan 2:17.

[Nota sa Ibaba]

[Mga ritrato sa pahina 29]

An aksion ni Fineas nakabasar sa diosnon na pag-imon

[Mga ritrato sa pahina 30]

Likayan an siod nin napasalang pag-imon

[Mga ritrato sa pahina 31]

An diosnon na pag-imon nagpapahiro sa sato na isabi sa iba an satong pagtubod asin pakamahalon an satong kasararoan nin magturugang