Sarong Panahon nin Paggayagaya sa Balkanes

Taon 1922. May ginigibong pagtiripon kaidto an Maigot na mga Estudyante sa Biblia, na apod kaidto sa Mga Saksi ni Jehova, sa Innsbruck, Austria. Kabilang sa mga nagdadangog si Franz Brand, sarong hoben na lalaki na taga Apatin sa Vojvodina, Serbia. Kan sambiton kan ispiker an ngaran nin Dios, an Jehova, nagpoon na mangantsaw an sarong sururog, kaya nagin imposible na sia magpadagos, asin an pagtiripon napaontok. Pero, an nadangog ni Franz nagkaigwa nin hararom na epekto sa saiya, asin ihinulit nia an maogmang bareta kan Kahadean. Ini an simpleng kapinonan nin nakaoogmang espirituwal na pag-oswag sa saro kan mga nasyon sa Balkanes.

PARA sa kadaklan na tawo ngonyan, an ngaran na Yugoslavia nagpapagirumdom kan mga ladawan nin guerra asin mga nagadan. Nagsasabong sa isip an makamomondong mga ladawan nin teribleng lagdoan na pangadan, desesperadong mga dulag, gabang mga harong, asin mga ilo na labi-labi an kamondoan. Dai ikalaladawan paagi sa mga tataramon an makuring kolog asin kamondoan na bunga kan guerra na nagpasakit sa Peninsula Balkaniko poon kan 1991 sagkod 1995, na luminaglag sa gabos na paglaom para sa sarong asensado asin daing kahaditan na ngapit paagi sa mga paghihingoa nin tawo. Bilang resulta kan guerra, an mga tawo sa dating Yugoslavia nagtitios huli sa kasakitan sa pagbuhay asin kaherakherak na kadukhaan. a

Huli sa siring na pagdusa, dai nanggad lalaoman nin saro na makanompong nin mga tawong maogma sa parteng ini nin kinaban. Minsan ngani iyan garo pambihira, talagang may siring na mga tawo. Sa katunayan, naeksperyensiahan ninda an sarong aldaw nin espesyal na paggayagaya sa paghinanapos kan ika-20 siglo. Paano imbuelto si Franz Brand, an hoben na lalaki na nasambitan sa kapinonan, sa gabos na ini?

Espirituwal na Pag-oswag sa Balkanes

Ogmahon si Franz Brand sa bagong mga katotoohan na nadangog nia asin nagdesisyon na kaipuhan niang palakopon an maogmang bareta. Nakakua sia nin trabaho bilang barbero sa Maribor, sarong siudad sa Slovenia na harani sa linderos nin Austria, asin nagpoon na maghulit sa saiyang mga parokyano, na parate nang minatukaw asin toninong na naghihinanyog mantang sinda inaarisan. Bilang resulta kan saiyang mga paghihingoa, nagkaigwa nin sadit na grupo nin mga parabalangibog kan Kahadean sa Maribor sa huring mga taon nin 1920. May mga pahayag sa Biblia na  ginigibo sa sarong restawran, na sa huri angay na nginaranan na Novi svet (Bagong Kinaban) Seafood Restaurant.

Pag-abot nin panahon, an maogmang bareta nakalakop sa bilog na dagang iyan. An paggamit kan “Photo-Drama of Creation” (sarong otso oras na presentasyon na may mga pelikula, slide, asin rekording) nakatabang nin dakula sa paghiwas na ini. Dangan kan mga taon nin 1930 kan an mga Saksi ni Jehova linamag nin grabe sa Alemania, an mga saksi sa Kahadean nin Yugoslavia napasarig kan mga payunir na Aleman na nagdulag sa saindang dagang tinuboan. Isinasakripisyo an personal na kaginhawahan o kagianan, hiningoa nindang makaabot sa pinakahararayong parte kan mabukid na nasyon na ini tanganing maghulit. Kan primero, garo kakadikit an naghihimate sa saindang mensahe. Kan enot na mga taon nin 1940, 150 sanang parahayag an nagreport nin paglilingkod sa langtad.

Kan 1941, nagpoon an maringis na paglamag, na nagpadagos sagkod 1952. Kanigoan na kagayagayahan kan sa katapustapusi kan Setyembre 9, 1953, sa irarom kan Komunistang rehimen ni Heneral Tito, an Mga Saksi ni Jehova legal na irinehistro! Kan taon na idto, may 914 parahayag kan maogmang bareta, asin padagos na duminakol an kabilangan. Kan 1991, an kabilangan kan mga parahayag nagin 7,420, asin 16,072 an nag-atender sa Memorial kan taon na idto.

Poon kan Agosto 16 sagkod 18, 1991, ginibo an enot na internasyonal na kombension kan Mga Saksi ni Jehova sa nasyon na ini sa Zagreb, Croatia. Hale sa laog kan nasyon asin sa ibang nasyon, 14,684 an nag-atender. An dai malilingawan na kombension na ini inandam an banwaan ni Jehova para sa maabot na mga pagbalo. Kabilang sa ultimong mga sakayan na uminagi sa lugar nin inspeksion sa pag-oltanan nin Croatia asin Serbia an mga auto na naghatod sa mga delegado papuli. Pakaagi kan ultimong auto, sinerahan an linderos asin nagpoon an guerra.

An Banwaan ni Jehova May Dahelan na Maggayagaya

An mga taon nin guerra nagin panahon nin grabeng pagbalo para sa mga Saksi ni Jehova sa Balkanes. Minsan siring, may dahelan sindang maggayagaya huli ta binendisyonan ni Jehova nin marahayon na pag-oswag an saiyang banwaan duman. Poon kan 1991, an kabilangan nin mga parahayag kan Kahadean sa lugar kan dating Yugoslavia nag-aumento nin labing 80 porsiento. An 2001 taon nin paglilingkod nagkaigwa nin pinakahalangkaw na kabilangan na 13,472.

Dating inaasikaso kan mga opisina sa Zagreb asin Belgrade (Serbia) an gibohon kan Mga Saksi ni Jehova sa enterong dating Yugoslavia. Huli sa pag-oswag asin politikal na mga pagbabago, kinaipuhan na mag-establisar nin bagong mga opisina sa Ljubljana (Slovenia), asin Skopje (Macedonia), apuera sa pagkaigwa nin bagong mga opisina sa Belgrade asin Zagreb. Poko mas o menos 140 miembro an naglilingkod sa mga opisinang ini. An kadaklan sa sainda hoben asin pano nin kaigotan asin pagkamoot ki Jehova. Medyo dakol sa sainda an kaiba sa pagtradusir kan mga pantabang sa pag-adal kan Biblia sa Croata, Macedonio, Serbiano, asin Esloveno. Kanigoan na bendisyon na an kadaklan sa mga magasin asin literatura kan Mga Saksi ni Jehova sa mga lenguaheng ini ipinupublikar na kadungan kan orihinal na edisyon sa Ingles! An mga publikasyon na ini nagtatabang sa dakol na tawo na makanompong nin karangahan asin paglaom.

An dugang pang dahelan nin paggayagaya iyo an daing kaimotan na suporta na itinatao kan kadakol  na bilog na panahon na lingkod hale sa ibang nasyon. Dakol na magayon na Kingdom Hall an itinogdok sa nakaagi pa sanang mga taon, na nakadudugang sa kagayagayahan kan mga kongregasyon. Minsan siring, igwa nin orog pa nganing kagayagayahan na nakatagama. Paano iyan mangyayari?

Sarong Daing Kaagid na Proyekto

Dakol na parahayag an parateng nag-iisip, ‘Magkakaigwa pa daw kami kan New World Translation sa samong lenguahe?’ Taon-taon, galaga nindang inaantisipar na madangog an paisi dapit dian sa pandistritong kombension. Pero, paano daw gigibohon an siring kadakulang proyekto, kun iisipon na pira pa sanang taon an nakaagi kan maorganisar an mga grupo nin mga paratradusir para sa mga lenguaheng ini asin medyo kadikit an mga paratradusir?

Pakatapos na siyasaton an mga bagay-bagay, inaprobaran kan Namamahalang Grupo an sarong pinag-iribang proyekto na dian an mga grupo nin mga paratradusir na Croata, Macedonio, asin Serbiano maingat na magtatarabangan asin sa siring makikinabang sa trabaho asin suhestion kan balang saro. An grupong Croata an nangenot.

Sarong Aldaw nin Kagayagayahan

Dai noarin man malilingawan kan Mga Saksi ni Jehova sa Balkanes an Hulyo 23, 1999. An serye nin “Makahulang Tataramon nin Dios” na Pandistritong mga Kombension gigibohon kaidto nin durungan sa Belgrade, Sarajevo (Bosnia-Herzegovina), Skopje, asin Zagreb. Sa haloy-haloy na panahon dai sierto kun baga magkakaigwa nin kombension sa Belgrade huli ta durante kan pambobomba kan NATO, dai itinotogot na magkaigwa nin mga pagtiripon sa publiko. Kanigoan an kaogmahan kan mga tugang sa oportunidad na makaasosyar an lambang saro pakatapos nin dakol na bulan na kadaihan nin kasegurohan! Minsan siring, linabihan kan tunay na nangyari an saindang mga inaasahan.

Kan Biernes na hapon itinao an sarong espesyal na paisi sa gabos na kombension sa apat na siudad. Silensiong inaantisipar kan 13,497 delegado an mangyayari. Kan sa katapustapusi iluwas kan ispiker an New World Translation of the Christian Greek Scriptures sa Croata asin Serbiano asin sinabi sa mga nagdadangog na nagpapadagos an pagtradusir sa Macedonio, dai na napogolan kan mga delegado an saindang emosyon. Huli sa makosogon na urupakan dai na nakatapos sa pagpaisi an ispiker. Sa kombension sa Sarajevo, biglang napatoninong an mga nagdadangog, na biyong nasorpresa. Iyan sinundan nin halawig na urupakan. Dakol an napaluha huli sa kagayagayahan sa Belgrade, asin napapondo an ispiker huli sa paorootrong urupakan bago nia natapos an paisi. Kanigoan an kaogmahan kan gabos!

An balaog na ini orog pang pinahahalagahan huli ta nakua kan Mga Saksi ni Jehova an deretso sa pag-imprenta nin sarong traduksion nin Biblia sa Croata saka Serbiano. Sa siring, an New World Translation of the Christian Greek Scriptures sa duwang lenguaheng ini ginibong sarong tomo na may kaibang traduksion kan Hebreong Kasuratan sa iyo man sanang lenguahe. Dugang pa, an Biblia sa Serbiano inimprenta sa Romano asin Cirilicong tipo nin letra.

Nagpapasalamat sa gabos na bendisyon asin paggiyang inako, an banwaan ni Jehova sa Balkanes talagang minaoyon sa mga tataramon ni David: “Minsan ako maglakaw sa kababan nin kadikloman, dai ako natatakot sa ano man na maraot, huli ta ika [Jehova] kaibanan ko.” Sa ibong kan gabos na kasakitan na padagos nindang inaatubang, determinado sindang gibohon ‘an kagayagayahan ni Jehova na saindang kuta.’​—Salmo 23:4; Nehemias 8:10.

[Nota sa Ibaba]

[Ritrato sa pahina 20]

An enot na grupo nin mga parahayag na taga Maribor, Slovenia, na naghuhulit sa harayong teritoryo