Bareta kan mga Parabalangibog kan Kahadean

An mga Kingdom Hall Bukas sa Gabos

MANTANG sinasanay an saiyang mga disipulo sa pampublikong ministeryo, inenkaminar sinda ni Jesu-Cristo na ‘maghulit hale sa mga atop.’ (Mateo 10:27) Iyo, kaipuhan nindang gibohon an saindang Kristianong ministeryo nin hayagan, naheheling kan publiko. Sa prinsipyo kan konsehong ini, an aktibidad kan Mga Saksi ni Jehova hayagan man na ginigibo. An pagigin hayag na ini an nagpangyari na mapangganahan kan mga Saksi an pagtumang asin makua an paborableng atension.

Maski ngani bukas sa publiko an mga pagtiripon kan kongregasyon kan Mga Saksi ni Jehova, an prehuwisyo an dahelan kaya nag-aalangan an mga tawo na maglaog sa Kingdom Hall. Totoo ini sa Finlandia. An iba nagduduwaduwa sana sa pagpasiring sa bagong mga lugar. Kun may itinogdok na bagong Kingdom Hall o hinirahay na dati nang hall, parateng iinaareglo an inaapod na open house. Sarong espesyal na paghihingoa an ginigibo tanganing imbitaran an kataraed na magbisita sa Kingdom Hall asin makaaram sa aktibidad kan Mga Saksi ni Jehova.

Sa sarong lugar, an mga Saksi nag-areglo nin sarong kampanya na magkaigwa nin pagmamagasin sa iyo man sanang aldaw na ginibo ninda an open house sa bago nindang Kingdom Hall. Nanuparan kan duwang Saksi an sarong may edad nang lalaki na nagsabing naoogma siang basahon an mga magasin na Torrengbantayan asin Awake! Isinabi saiya kan mga tugang an manongod sa open house asin nag-alok na ibanan sia sa Kingdom Hall. Nagsabi an lalaki na naoogma siang mag-iba sainda. An saiyang agom, na nagdadangog sa orolay, nagsabi, “Maiba man ako!”

Paglaog sa Kingdom Hall, an lalaki nangalagkalag asin nagsabi: “Bako palan ini itom. Tara, ini magayon asin maliwanag. May nagsabi sako na an Kingdom Hall itom!” An mag-agom nagdanay nin haloy-haloy asin naghagad nin nagkapirang literatura na nakaeksibir.

Gusto kan sarong kongregasyon na ianunsiar sa lokal na peryodiko an open house sa dedikasyon kan saindang Kingdom Hall. Pagkaresibi kan paisi dapit sa okasyon, an namamayong editor nagsuherir na magsurat nin sarong artikulo manongod kaiyan. An mga tugang uminoyon, asin dai nahaloy pakatapos kaiyan, sarong paborableng artikulo na kabangang pahina an nagluwas sa peryodiko, na tinotokar an okasyon asin isinasaysay an mga aktibidad kan lokal na kongregasyon kan Mga Saksi ni Jehova.

Pakatapos na mapublikar an artikulo, nanuparan nin may edad nang Saksi an sarong kataed na nagsabi saiya: “Igwa nin marahayon na artikulo manongod sa Mga Saksi ni Jehova sa peryodiko ngonyan!” An tugang na babae nakapagpatotoo asin sa huri nakapasakamot saiya kan brosyur na Jehovah’s Witnesses in the Twentieth Century.

Apuera sa pagklaripikar sa nagkapirang salang paghona manongod sa Mga Saksi ni Jehova, an siring na mga areglo na may koneksion sa mga open house asin programa sa dedikasyon sa bagong mga Kingdom Hall nagpahiro sa mga parahayag paagi sa pag-enkaminar sainda na mag-imbitar nin dakol pang tawo na mag-atender sa mga pagtiripon. Iyo, sa dakol na nasyon, kaiba an Finlandia, naaraman kan mga tawo na an mga Kingdom Hall kan Mga Saksi ni Jehova bukas para sa gabos.