Kaipuhan Niato Gabos an Komendasyon

NAKAOOGMANG aldaw idto para sa sadang na aking babae. Maski ngani sa ibang panahon kaipuhan siang itanos, sa partikular na aldaw na ini, sia toltolon na gayo. Kan bangging iyan, minsan siring, pakapatoroga sa sadang na aking babae, nadangog kan saiyang ina na sia naghihibi. Kan hinapot kun taano ta makolog an boot nia, nagluluha siang suminimbag: “Bako po na nagin marahay na aki ako ngonyan?”

Natudok na marhay an boot kan ina sa hapot na iyan. Pirme niang ikinokorehir tolos an saiyang aki. Alagad sa aldaw na iyan, apisar na narisa nia kun guranong pagmamaigot an ginibo kan saiyang sadang na aking babae na magtoltol, nalipasan kan ina na magsabi nin dawa sarong tataramon nin pag-apresyar.

Bako sana an sadang na mga aking babae an nangangaipo nin komendasyon asin pag-asegurar giraray. Gabos kita nangangaipo kaiyan​​—kun paanong kaipuhan niato an konseho asin pagtatanos.

Ano an namamatean niato kun nakakaako kita nin odok sa pusong komendasyon? Bako daw na nagpapaogma iyan sa satong puso asin pinagagayagaya an satong aldaw? Posibleng marhay na mamatean niato na may nakarisa, may nagmamakolog. Inaasegurar giraray kita kaiyan na may pakinabang an paghihingoa niato, asin minomotibar kita kaiyan na maghingoa giraray sa ngapit. Bakong makangangalas na an sinserong komendasyon parateng irinarani kita sa tawo na nagtao nin panahon tanganing magsabi nin sarong bagay na nakaparirigon sa boot.​—Talinhaga 15:23.

Nasasabotan ni Jesu-Cristo an pangangaipong magtao nin komendasyon. Sa parabola kan mga talento, may init na kinomendaran kan kagurangnan (na naglaladawan ki Jesus mismo) an kada saro sa duwang fiel na oripon, na nagsasabi: “Marahay na gibo, marahay asin fiel na oripon!” Kanigoan kanakaoogma! Minsan ngani igwa sinda nin magkalaen na marhay na mga abilidad asin nagibo, sinda nag-ako nin parehong komendasyon.​—Mateo 25:19-23.

Kaya girumdomon niato an ina kan sadang na aking babae na iyan. Dai na niato halaton na lumuha an iba bago niato sinda tawan nin komendasyon. Imbes, pagmaigotan niatong humanap nin mga oportunidad na magtao nin komendasyon. Tunay nanggad, igwa kita nin marahay na rason tanganing magtao nin sinserong komendasyon sa lambang oportunidad.