Mga Hapot Hale sa mga Parabasa

Sala daw an magtaya kun sadit man sanang kantidad an imbuelto?

Dai man tinotokar nin detalyado kan Tataramon nin Dios an paghuego, alagad igo na an sinasabi kaiyan tanganing ipaheling na an gabos na paghuego dai kaoyon kan mga prinsipyo sa Biblia. a Halimbawa, rinerekonoser nin dakol na an paghuego nagpupukaw nin kahanaban. An katotoohan sanang iyan importanteng konsideraron kan mga Kristiano, huling sinasabi kan Biblia na an “mga paslo” dai magmamana kan Kahadean nin Dios asin an kaaraan ibinibilang na idolatriya.​—1 Corinto 6:​9, 10; Colosas 3:5.

Pinupukaw man kan paghuego an egotismo asin salang espiritu nin pakipagdaogan, sarong makosog na pagmawot na manggana. Si apostol Pablo nagpatanid tumang sa siring na mga bagay kan sia sumurat: “Dai kita magin egotista, na nagpupukaw nin pagdaraogan, na nagpapauroriurihan.” (Galacia 5:26) Dugang pa, ineenkaminar kan paghuego sa nagkapira an superstisyosong pagsarig sa suerte. An mga parahuego nagkakaigwa kan gabos na klaseng superstisyon, na naglalaom na suertehon sinda. Ipinagigirumdom kaiyan sato an manongod sa bakong fiel na mga Israelita na “nagpupuesto nin lamesa para sa dios nin Marahay na Suerte asin an mga nagpapano nin tinimplang arak para sa dios nin Kapaladan.”​—Isaias 65:11.

An nagkapira tibaad magrason na an pagtaya nin sadit na kantidad mantang nagkakarawatkawat nin baraha o kawat na arog kan dama kaiba kan mga paryente o dayupot na mga katood saro man sanang aling-alingan na dai man nin maraot. Totoo, an saro na nagtataya nin sadit na kantidad tibaad dai mansayon an saiyang sadiri na mahanab, egotista, nakikipagdaogan, o superstisyoso. Pero, ano an magigin epekto kan saiyang paghuego sa mga kahuego nia? Dakol na bangkag nang parahuego an nagpoon paagi sa saradit na taya ‘bilang aling-alingan man sana.’ (Lucas 16:10) An garo baga mayo man nin maraot na libangan nagin sarong bagay na mas kapahapahamak na marhay sa kaso ninda.

Nangorognang totoo iyan kun dapit sa mga aki. Dakol na aki an naogmang marhay na manggana sa sadit na taya asin nasugotan na magtaya nin mas dakulang kantidad. (1 Timoteo 6:10) Kinompirmar nin sarong panhaloyan na pag-adal na ipinublikar sa Estados Unidos kan Konseho sa Bangkag na Paghuego sa Arizona na an dakol na adikto sa huego nagpoon sa amay pang edad “paagi sa pagpusta nin kadikit na kantidad sa mga karawat o sa pakipagbaraha sa mga katood o paryente.” An saro pang report nagsasabi na “an mga aki nagpopoon na maghuego sa harong, na sa parate sa pakikipagbaraha sa kapamilya asin mga katood.” An report nagsasabi pa na “treinta porsiento kan mga aking naghuhuego an nagpoon na gibohon iyan bago kan ikaonseng kumpleanyo ninda.” An dakol na parahuegong tinedyer ginagastosan an saindang pagkaadikto paagi sa krimen o inmoralidad, oyon sa pag-adal na Why Do People Gamble Too Much​—Pathological and Problem Gambling. Makaturotriste nanggad na resulta nin sarong bagay na garo baga mayo man nin maraot sa primero!

Mantang nabubuhay kita sa kinaban na dakolon na an siod asin sugot, taano ta isasapeligro an satong sadiri nin dai man kaipuhan sa saro pa? (Talinhaga 27:12) An paghuego​—may mga aking presente o mayo, sadit o dakulang kantidad​—isinasapeligro an espirituwalidad asin maninigong likayan. An mga Kristiano na naoogma sa kawat na arog kan dama o sa pagbaraha bilang aling-alingan mas marahay pang isurat na sana an iskor o magkarawat sana kaiyan bilang aling-alingan na daing iriskoran. An madonong  na mga Kristiano na inaasikaso an espirituwalidad ninda mismo saka an sa mga katood patin pamilya ninda naglilikay sa paghuego​​—dawa sa sadit na kantidad.

Saro daw na porma nin pag-iribaiba nin relihion (interfaith) an pagbakal nin sarong edipisyo sa ibang relihiosong grupo asin gibohon iyan na Kingdom Hall?

Sa pankagabsan, linilikayan kan Mga Saksi ni Jehova an siring na pakipagtransaksion sa ibang relihion. Pero, an siring na transaksion puedeng bako man na akto nin pag-iribaiba nin relihion. Iyan puedeng mansayon sana bilang sarong transaksion sa negosyo na ginigibo nin sararoan. An lokal na kongregasyon kan Mga Saksi ni Jehova dai man nakikikolaborar sa ibang relihiosong grupo sa pagtogdok nin sarong lugar nin pagsamba na gagamiton kan duwang grupo.

Ano an ikabibilang na akto nin pag-iribaiba nin relihion sa pagheling ni Jehova? Estudyare an instruksion ni apostol Pablo: “Dai kamo makipagsakal na bakong timbang sa mga dai nagtutubod. Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom? Dugang pa, ano an pagkakaoyon ni Cristo asin ni Belial? O ano an pakikikabtang kan tawong may pagtubod sa daing pagtubod? Asin anong pakikioyon igwa an templo nin Dios sa mga idolo? . . . ‘Kun siring humale kamo sa tanga ninda, asin sumuhay kamo,’ an sabi ni Jehova, ‘asin dai na kamo dumotdot sa maating bagay’; ‘asin aakoon ko kamo.’” (2 Corinto 6:14-17) Ano an boot sabihon ni Pablo kan mga terminong “pakikiiba” asin “pakikisumaro”?

An pakikiiba na nasasambitan ni Pablo malinaw na may labot sa pagsamba asin espirituwal na mga aktibidad sa kaibanan kan mga parasamba sa idolo asin daing pagtubod. Nagpatanid sia sa mga taga Corinto tumang sa ‘pakikikakan sa lamesa nin mga demonyo.’ (1 Corinto 10:​20, 21) Sa siring, an akto nin pag-iribaiba nin relihion nanonongod sa pakikisumaro sa pagsamba o espirituwal na pakikikabtang sa ibang relihiosong organisasyon. (Exodo 20:5; 23:13; 34:12) Pagbinakal an sarong edipisyo na ginamit nin sarong relihiosong organisasyon, ginigibo ini sa katuyohan sanang magkaigwa kan kinakaipuhan na edipisyo para sa sarong Kingdom Hall. Bago gamiton bilang Kingdom Hall, hinahale dian an ano man na relikya nin falsong pagsamba. Sa siring pagnapakarhay na, iyan idinededikar ki Jehova tangani na gamiton solamente sa katuyohan nin pagsamba sa saiya. Mayo nin pakikisumaro o pakikiiba an tunay asin falsong pagsamba.

Kun pinag-oolayan an mga detalye mapadapit sa siring na pagbakal, maninigong limitaran nanggad an pakikikomunikar sa ibong na lado asin maninigo na manongod sana sa transaksion an orolay. Maninigo na girumdomon kan mga miembro kan Kristianong kongregasyon an patanid ni Pablo na dai “makipagsakal na bakong timbang sa mga dai nagtutubod.” Minsan ngani dai kita nagsasaboot na superyor kita kisa mga iba an pagtubod, linilikayan niato an sosyal na pakipagtipontipon sa sainda o na maimpluwensiahan na makiayon sa saindang pagsamba. b

Kumusta man kun an sarong kongregasyon nag-aarkila nin sarong edipisyo na sadiri nin sarong relihiosong organisasyon? An pag-arkila sa parate may kalabot na regular na pakikikomunikar, na dapat likayan. Dawa pa sarong beses sanang aarkilahon an siring na edipisyo para sa sarong okasyon, maninigong konsideraron kan kamagurangan an minasunod: Igwa daw nin ano man na idolo asin relihiosong mga simbolo sa laog o luwas kan edipisyo? Ano daw an magigin pagmansay kan mga tawo sa komunidad sa satong paggamit kan pasilidad na iyan? May masisingkog daw sa kongregasyon kun gagamiton niato an edipisyong iyan? (Mateo 18:6; 1 Corinto 8:7-13) Tuturotimbangon kan kamagurangan an mga bagay na ini dangan madesisyon oyon dian. Dapat man na konsideraron ninda an sainda mismong konsensia asin an konsensia kan kongregasyon sa pankagabsan sa pagdeterminar kun baga babakalon asin gigibohon na Kingdom Hall an siring na edipisyo.

[Nota sa Ibaba]

[Ritrato sa pahina 31]

An edipisyong ini, na dating sinagoga, binakal asin hinirahay tangani na magin Kingdom Hall