Mga Neutral na Kristiano sa Huring mga Aldaw

“Sinda bakong kabtang kan kinaban, kun paanong ako bakong kabtang kan kinaban.”​—JUAN 17:16.

1, 2. Ano an sinabi ni Jesus dapit sa relasyon kan mga parasunod nia may labot sa kinaban, asin anong mga hapot an pinalalataw kan saiyang mga tataramon?

 JKAN huring banggi kan saiyang buhay bilang sangkap na tawo, namibi si Jesus nin halawig na nadadangog kan saiyang mga disipulo. Sa pamibi na iyan, may sinabi sia na naglaladawan sa buhay kan gabos na tunay na Kristiano. Nagtataram dapit sa saiyang mga parasunod, sia nagsabi: “Itinao ko sa sainda an saimong tataramon, alagad an kinaban naongis sa sainda, huli ta sinda bakong kabtang kan kinaban, kun paanong ako bakong kabtang kan kinaban. Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot. Sinda bakong kabtang kan kinaban, kun paanong ako bakong kabtang kan kinaban.”​—Juan 17:14-16.

² Duwang beses na sinabi ni Jesus na an saiyang mga parasunod dai magigin kabtang kan kinaban. Dugang pa, an pagigin siblag na iyan magbubunga nin mga tension​—an kinaban maoongis sa sainda. Pero, an mga Kristiano dai dapat na manluya an boot; babantayan sinda ni Jehova. (Talinhaga 18:10; Mateo 24:​9, 13) Huli sa mga tataramon  na iyan ni Jesus, tibaad marahay na ihapot niato: ‘Taano ta bakong kabtang kan kinaban an tunay na mga Kristiano? Ano an boot sabihon kan pagigin bakong kabtang kan kinaban? Kun an mga Kristiano ikinaoongis kan kinaban, paano ninda minamansay an kinaban? Partikularmente, paano ninda minamansay an mga gobyerno sa kinaban?’ Mahalaga an sono sa Kasuratan na simbag sa mga hapot na ini huli ta kita gabos apektado kaiyan.

“Kita Gikan sa Dios”

3. (a) Paano kita nagigin bakong kabtang kan kinaban? (b) Ano an ebidensia na an kinaban nasa “kapangyarihan kan maraot”?

³ An dayupot na relasyon niato ki Jehova sarong dahelan kun taano ta bako kitang kabtang kan kinaban. Si apostol Juan nagsurat: “Aram niato na kita gikan sa Dios, alagad an bilog na kinaban namumugtak sa kapangyarihan kan maraot.” (1 Juan 5:19) An mga tataramon ni Juan manongod sa kinaban malinaw na totoo. An mga guerra, krimen, karingisan, pan-aapi, pandadaya, asin inmoralidad na lakop na marhay ngonyan ebidensia kan impluwensia ni Satanas, bakong nin Dios. (Juan 12:31; 2 Corinto 4:4; Efeso 6:12) Kun an sarong indibiduwal magin saro sa Mga Saksi ni Jehova, dai nia gigibohon o kokonsintehon an siring na salang mga gibo, asin dahel kaiyan sia nagigin bakong kabtang kan kinaban.​—Roma 12:2; 13:12-14; 1 Corinto 6:9-11; 1 Juan 3:10-12.

4. Sa anong mga paagi niato ipinaheheling na sadiri kita ni Jehova?

⁴ Sinabi ni Juan na an mga Kristiano, kabaliktaran kan kinaban, “gikan sa Dios.” An gabos na nagdudusay kan saindang sadiri ki Jehova sadiri nia. Si apostol Pablo nagsabi: “Pareho na kun kita mabuhay, nabubuhay kita para ki Jehova, asin kun kita magadan, nagagadan kita para ki Jehova. Kaya baga man kita mabuhay o magadan, sadiri kita ni Jehova.” (Roma 14:8; Salmo 116:15) Huling sadiri kita ni Jehova, itinatao niato sa saiya an eksklusibong debosyon. (Exodo 20:4-6) Huli kaini, an sarong tunay na Kristiano dai idinudusay an saiyang buhay sa sarong sekular na obheto. Asin baga man iginagalang nia an nasyonal na mga simbolo, dai nia iyan sinasamba, magsalang sa gibo o sa boot. Dai nanggad nia sinasamba an mga sikat sa isport o iba pang idolo sa presenteng panahon. Siempre, iginagalang nia an mga deretso nin iba na gibohon an gusto ninda, alagad an Kaglalang sana an saiyang sinasamba. (Mateo 4:10; Kapahayagan 19:10) Dahel kaini sia nagigin man siblag sa kinaban.

“An Sakong Kahadean Bakong Kabtang kan Kinaban na Ini”

5, 6. Paano kita nagigin siblag sa kinaban dahel sa pagpasakop sa Kahadean nin Dios?

⁵ An mga Kristiano parasunod ni Cristo Jesus asin sakop kan Kahadean nin Dios, na dahel kaiyan sinda nagigin man bakong kabtang kan kinaban. Kan binibista si Jesus sa atubangan ni Poncio Pilato, sia nagsabi: “An sakong kahadean bakong kabtang kan kinaban na ini. Kun an sakong kahadean kabtang kan kinaban na ini, nakipaglaban kutana an sakuyang mga lingkod tanganing dai ako ikatao sa mga Judio. Kundi, sa katotoohan, an sakong kahadean bakong gikan digdi.” (Juan 18:36) An Kahadean an gagamiton sa pagsantipikar sa ngaran ni Jehova, sa pagbindikar sa saiyang soberaniya, asin sa paggibo kan saiyang kabotan digdi sa daga kun paano sa langit. (Mateo 6:​9, 10) Sa bilog niang ministeryo, ihinulit ni Jesus an maogmang bareta kan Kahadean, asin sinabi nia na ibabalangibog iyan kan saiyang mga parasunod sagkod sa katapusan kan sistema nin mga bagay. (Mateo 4:23; 24:14) Kan 1914 naotob an makahulang mga tataramon sa Kapahayagan 11:15: “An kahadean kan kinaban nagin nang kahadean  kan satong Kagurangnan asin kan saiyang Cristo, asin sia mamamahala bilang hade sagkod lamang.” Madali nang dumatong an aldaw na an langitnon na Kahadean na iyan an magigin solamenteng kapangyarihan na mamamahala sa katawohan. (Daniel 2:44) May panahon na maski an sekular na mga namamahala mapipiritan na rekonoseron an autoridad kaiyan.​—Salmo 2:6-12.

⁶ Nasa isip an gabos na iyan, an tunay na mga Kristiano ngonyan sakop kan Kahadean nin Dios, asin sinusunod ninda an hatol ni Jesus na ‘padagos na hanapon nguna an kahadean asin an katanosan nin Dios.’ (Mateo 6:33) Dahel kaiyan dai man sinda nagigin bakong maimbod sa mga nasyon na iniistaran ninda, alagad dahel kaiyan sinda nagigin nanggad siblag sa kinaban sa espirituwal na paagi. An pangenot na gibohon kan mga Kristiano ngonyan, arog kaidtong enot na siglo, iyo an ‘magtao nin lubos na patotoo may labot sa kahadean nin Dios.’ (Gibo 28:23) Mayong gobyerno nin tawo an may deretso na olangon an gibohon na iyan na itinao nin Dios.

7. Taano ta neutral an tunay na mga Kristiano, asin paano ninda ini ipinaheling?

⁷ Kaoyon kan saindang pagigin sadiri ni Jehova asin pagigin parasunod ni Jesus patin sakop kan Kahadean nin Dios, an Mga Saksi ni Jehova nagdanay na neutral sa nasyonal asin internasyonal na ralaban kan ika-20 asin ika-21 siglo. Mayo sindang piniling kampihan, dai nagbingat nin armas tumang sa siisay man, asin dai nagpalakop nin propaganda para sa ano man na sekular na katuyohan. Bilang pambihirang pagpaheling nin pagtubod sa atubangan nin garo baga dakulaon na pagtumang, sinunod ninda an mga prinsipyo na ipinahayag sa mga namamahalang Nazi nin Alemania kan 1934: “Mayo kami nin pakiaram sa politikal na mga aktibidad, kundi lubos kaming dusay sa kahadean nin Dios sakop ni Cristo na saiyang Hade. Dai kami mandadanyar o mangongolog sa siisay man. Maoogma kaming marhay na mag-erok na may katoninongan asin gumibo nin marahay sa gabos na tawo sagkod na may oportunidad kami.”

Mga Embahador Asin Sugo Para ki Cristo

8, 9. Sa anong paagi na an Mga Saksi ni Jehova ngonyan mga embahador asin sugo, asin paano ini nakakaapektar sa saindang relasyon sa mga nasyon?

⁸ Sinabi ni Pablo na sia asin an kapwa linahidan na mga Kristiano “mga embahador na karibay ni Cristo, na garo baga an Dios nakikimaherak paagi sa samo.” (2 Corinto 5:20; Efeso 6:20) Poon kan 1914, an mga Kristiano na linahidan nin espiritu tamang apodon na mga embahador para sa Kahadean nin Dios, na sinda “mga aki” kaiyan. (Mateo 13:38; Filipos 3:20; Kapahayagan 5:​9, 10) Dugang pa, nagkua si Jehova hale sa mga nasyon nin “sarong dakulang kadaklan” nin “ibang karnero,” mga Kristiano na may daganon na paglaom, na masuportar sa linahidan na mga aki sa saindang trabaho bilang embahador. (Kapahayagan 7:9; Juan 10:16) An “ibang karnero” na ini puedeng apodon na “mga sugo” kan Kahadean nin Dios.

⁹ An sarong embahador asin an saiyang mga tawohan dai nakikilabot sa mga aktibidad kan nasyon kun saen sinda nagseserbi. Kaagid kaiyan, an mga Kristiano nagdadanay na neutral sa politikal na mga aktibidad kan mga nasyon sa kinaban. Dai sindang kinakampihan apabor o kontra sa ano man na grupo nasyonal, rasyal, sosyal, o pan-ekonomiya. (Gibo 10:​34, 35) Imbes, sinda ‘naggigibo kan marahay sa gabos.’ (Galacia 6:10) An neutralidad kan Mga Saksi ni Jehova nangangahulogan na mayo nin siisay man na onestong makasasayuma sa saindang mensahe paagi sa pagsabi na sinda kabilang sa kalaban nin sarong grupo nin rasa, nasyon, o tribo.

Namimidbid Paagi sa Pagkamoot

10. Para sa sarong Kristiano, gurano kaimportante an pagkamoot?

¹⁰ Apuera sa nasambitan na, an mga Kristiano neutral sa mga aktibidad kan kinaban huli sa saindang relasyon sa ibang mga Kristiano. Si Jesus nagsabi sa saiyang mga parasunod: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) An pagkamoot sa tugang importanteng marhay sa pagigin Kristiano. (1 Juan 3:14) Minsan ngani konektado iyan sa saiyang relasyon ki Jehova asin ki Jesus, an relasyon nin Kristiano sa ibang mga Kristiano haraning marhay. An saiyang pagkamoot bako sanang sa lokal na mga kakongregasyon. Kaiba dian an “bilog na kasararoan nin [saiyang] mga tugang sa kinaban.”​—1 Pedro 5:9.

11. Paano naimpluwensiahan kan saindang pagkaminorootmootan an paggawe kan Mga Saksi ni Jehova?

 ¹¹ Ngonyan, ipinaheheling kan Mga Saksi ni Jehova an saindang pagkamoot sa tugang paagi sa pag-otob sa mga tataramon sa Isaias 2:4: “Pupulpogon ninda an saindang mga espada na magin tarom nin arado asin an saindang mga budyak na magin mga gunting na pan-awan. An nasyon dai mabingat nin espada tumang sa nasyon, ni mag-aadal pa man sinda sa pakilaban.” Huling tinokdoan ni Jehova, an tunay na mga Kristiano may pakipagkatoninongan sa Dios asin sa lambang saro. (Isaias 54:13) Huling namomotan ninda an Dios asin an saindang mga tugang, dai lamang ninda pepensaron na magbingat nin armas tumang sa mga kapwa Kristiano​—o sa kiisay pa man​—na nasa ibang nasyon. An saindang katoninongan asin pagkasararo mahalagang marhay na kabtang kan saindang pagsamba, na nagpapatunay na talagang yaon sa sainda an espiritu nin Dios. (Salmo 133:1; Miqueas 2:12; Mateo 22:37-39; Colosas 3:14) ‘Hinahanap ninda an katoninongan asin sinusunod iyan,’ sa pakaaram na “an mga mata ni Jehova nakaturuhok sa mga matanos.”​—Salmo 34:​14, 15.

Kun Paano Minamansay kan mga Kristiano an Kinaban

12. Anong saboot ni Jehova sa mga tawo sa kinaban an inaarog kan Mga Saksi ni Jehova, asin paano?

¹² Si Jehova nagpahayag nin bakong paborableng paghokom sa kinaban na ini, alagad dai pa nia hinohokoman an gabos na indibiduwal sa kinaban. Gigibohon nia iyan paagi ki Jesus sa Saiya mismong itinalaan na panahon. (Salmo 67:​3, 4; Mateo 25:31-46; 2 Pedro 3:10) Mientras tanto, nagpapaheling sia nin dakulang pagkamoot sa katawohan. Itinao pa ngani nia an saiyang bugtong na Aki tanganing an lambang saro magkaigwa kan oportunidad na mag-ako nin buhay na daing katapusan. (Juan 3:16) Bilang mga Kristiano, inaarog niato an pagkamoot nin Dios paagi sa pagsabi sa iba kan manongod sa mga probisyon nin Dios para sa kaligtasan, dawa kun an satong mga paghihingoa parateng sinasayumahan.

13. Paano niato maninigong mansayon an sekular na mga namamahala?

¹³ Paano niato maninigong mansayon an sekular na mga namamahala sa kinaban? Sinimbag ni Pablo an hapot na iyan kan sia sumurat: “An lambang kalag magpasakop sa superyor na mga  autoridad, huli ta mayo nin autoridad na dai itinogot nin Dios; an nagdadanay na mga autoridad nagtitirindog sa saindang relatibong mga kamugtakan na itinogot nin Dios.” (Roma 13:​1, 2) An mga tawo nagkakapot nin “relatibong” mga katongdan na may autoridad (mas dakula o mas sadit may koneksion sa balang saro, alagad pirmeng mas hababa kisa ki Jehova) huli ta tinotogotan sinda kan Makakamhan sa Gabos. Nagpapasakop an Kristiano sa sekular na autoridad huli ta kabtang iyan kan saiyang pagkuyog ki Jehova. Pero paano kun magkakontra an mga kahagadan nin Dios asin an mga kahagadan nin gobyerno nin tawo?

An Ley nin Dios Asin an ki Cesar

14, 15. (a) Sa anong paagi nalikayan ni Daniel an pagkakasarongatan kun dapit sa pagkuyog? (b) Ano an nagin paninindogan kan tolong Hebreo kan dai malikayan an pagkakasarongatan kun dapit sa pagkuyog?

¹⁴ Si Daniel asin an saiyang tolong kairiba nagtatao nin marahayon na halimbawa kun paano babalansehon an pagpasakop sa mga gobyerno nin tawo asin an pagpasakop sa autoridad nin Dios. Kan an apat na hoben na Hebreo madistiero sa Babilonya, kinuyog ninda an mga ley kan nasyon asin tolos na napili para sa espesyal na pagsasanay. Sa pagkarealisar na an pagsasanay posibleng marhay na masarongat sa Ley ni Jehova, ipinakipag-olay iyan ni Daniel sa namamahalang opisyal. Bilang resulta, may espesyal na mga areglong ginibo tanganing igalang an konsensia kan apat na Hebreo. (Daniel 1:8-17) Sinusunod kan Mga Saksi ni Jehova an halimbawa ni Daniel kun mataktika nindang ipinaliliwanag sa mga opisyal an saindang paninindogan tanganing malikayan an dai kinakaipuhan na mga problema.

¹⁵ Minsan siring, sa sarong okasyon kan huri, dai malilikayan an pagkakasarongatan kun dapit sa pagpapasakop. An hade kan Babilonya nagpatindog nin sarong dakulang idolo sa kaplanodohan nin Dura asin pinagbotan an haralangkaw na opisyal, kabale an mga administrador kan hurisdiksional na mga distrito, na magtiripon para sa inagurasyon kaiyan. Kan panahon na ini, an tolong katood ni Daniel nombrado nang mga administrador kan hurisdiksional na distrito nin Babilonya, kaya aplikado sa sainda an pagboot. Sa sarong parte kan aktibidad na iyan, an gabos na tiripon dapat na magduko sa imahen. Alagad aram kan mga Hebreo na kontra ini sa ley nin Dios. (Deuteronomio 5:8-10) Kaya kan magduko an gabos na iba pa, nagdanay sindang nakatindog. Sa pagsuway sa pagboot kan hade, napaatubang sinda sa peligro nin makatatakot na kagadanan, asin an saindang buhay naligtas sana paagi sa sarong milagro; alagad pinili nindang atubangon an peligro nin kagadanan imbes na makisuway ki Jehova.​—Daniel 2:49–​3:29.

16, 17. Ano an isinimbag kan mga apostol kan pagbotan na pumondo sa paghuhulit, asin taano?

¹⁶ Kan enot na siglo, an mga apostol ni Jesu-Cristo pinaatubang sa mga namomoon na Judio sa Jerusalem asin pinagbotan na pumondo sa paghuhulit sa ngaran ni Jesus. Ano an simbag ninda? Sinugo sinda ni Jesus na gumibo nin mga disipulo sa gabos na nasyon, na kabale an Judea. Sinabihan man nia sinda na sinda magigin saiyang mga saksi sa Jerusalem saka sa iba pang parte kan kinaban. (Mateo 28:​19, 20; Gibo 1:8) Aram kan mga apostol na an mga pagboot ni Jesus nagrerepresentar sa kabotan nin Dios para sa sainda. (Juan 5:30; 8:28) Huli kaini, sinda nagsabi: “Dapat na kuyogon niamo an Dios bilang namamahala imbes na mga tawo.”​—Gibo 4:​19, 20; 5:29.

¹⁷ Dai nagrerebelde an mga apostol. (Talinhaga 24:21) Pero, kun babawalan sinda kan mga namamahalang tawo sa paggibo kan kabotan nin Dios, an masasabi sana ninda, ‘Dapat na kuyogon niamo  an Dios, bakong an tawo.’ Sinabi ni Jesus na maninigo niatong “itao . . . ki Cesar an mga bagay na ki Cesar, alagad sa Dios an mga bagay na sa Dios.” (Marcos 12:17) Kun susuwayon niato an sarong pagboot nin Dios huli ta sinasabihan kita nin sarong tawo, itinatao niato sa tawo an para sa Dios. Imbes, itinatao niato an gabos na obligasyon niato ki Cesar, alagad rinerekonoser niato an supremong autoridad ni Jehova. Sia an Unibersal na Soberano, an Kaglalang, an mismong Gikanan nin autoridad.​—Kapahayagan 4:11.

Maninindogan Kita nin Marigon

18, 19. Ano an nagin marahayon na paninindogan kan dakol niatong tugang, asin paano niato maaarog an saindang halimbawa?

¹⁸ Sa presente, rinerekonoser nin kadaklan na sekular na gobyerno an neutral na paninindogan kan Mga Saksi ni Jehova, asin ipinagpapasalamat niato iyan. Pero sa nagkapirang kadagaan, an mga Saksi napaatubang sa grabeng pagtumang. Sa bilog na ika-20 siglo asin padagos sagkod sa presenteng panahon, an nagkapira sa satong mga tugang na lalaki asin babae makosog na nakipagtusayan, na sa espirituwal na sentido nakikipaglaban “kan marahay na pakilaban kan pagtubod.”​—1 Timoteo 6:12.

¹⁹ Paano kita makapaninindogan nin marigon arog ninda? Enot, ginigirumdom niato na dapat niatong asahan an pagtumang. Dai kita maninigong makubhanan o mabigla pa ngani kun mapaatubang kita dian. Pinatanidan ni Pablo si Timoteo: “An gabos na nagmamawot na mamuhay na may diosnon na debosyon kaibahan ni Cristo Jesus paglalamagon man.” (2 Timoteo 3:12; 1 Pedro 4:12) Sa sarong kinaban na nangingibabaw an impluwensia ni Satanas, taano ta dai kita mapapaatubang sa pagtumang? (Kapahayagan 12:17) Sagkod na kita fiel, pirmeng igwa nin nagkapira na ‘nagngangaralas asin padagos na magtataram na may panlilibak manongod sa sato.’​—1 Pedro 4:4.

20. Anong nakapakokosog na mga katotoohan an ipinagigirumdom sa sato?

²⁰ Ikaduwa, kombensido kita na susuportaran kita ni Jehova asin kan saiyang mga anghel. Siring kan sabi ni Eliseo kan suanoy, “mas dakol an nasa sato kisa nasa sainda.” (2 Hade 6:16; Salmo 34:7) Posible na tinotogotan ni Jehova, para sa saiya mismong marahay na katuyohan, na magpadagos sa laog nin kadikit na panahon an pangigipit nin mga paratumang. Minsan siring, pirme nia kitang tatawan kan kosog na kaipuhan tanganing makatagal. (Isaias 41:​9, 10) An nagkapira itinao an saindang buhay, alagad dai iyan nakapaluluya sa boot niato. Si Jesus nagsabi: “Dai kamo matakot duman sa mga minagadan kan hawak alagad dai nakagagadan kan kalag; kundi matakot kamo sa saiya na nakalalaglag kan kalag sagkod hawak sa Gehenna.” (Mateo 10:16-23, 28) Kita “nakiiistar [sana] nin temporaryo” sa sistemang ini nin mga bagay. Ginagamit niato an satong panahon digdi “tangani [na] makapangapot nin marigon sa tunay na buhay,” an buhay na daing katapusan sa bagong kinaban nin Dios. (1 Pedro 2:11; 1 Timoteo 6:19) Daing tawo an makahahale sa sato kan balos na iyan basta nagdadanay kitang fiel sa Dios.

21. Ano an maninigo na pirme niatong girumdomon?

²¹ Huli kaini, girumdomon niato an pribilehiadong relasyon niato ki Jehova Dios. Logod na danay niatong apresyaron an bendisyon nin pagigin parasunod ni Cristo asin pagigin sakop kan Kahadean. Kamotan niato nin bilog na puso an satong mga tugang, asin logod na pirme niatong ikaogmang marhay an pagkamoot na inaako niato sa sainda. Orog sa gabos, himateon niato an mga tataramon kan salmista: “Maglaom ka ki Jehova; magin makosog an boot mo asin pakosoga an saimong puso. Iyo, maglaom ka ki Jehova.” (Salmo 27:14; Isaias 54:17) Kun siring, arog kan dai mabilang na mga Kristiano na naenot sa sato, maninindogan kita nin marigon na segurado an satong paglaom​—fiel na mga neutral na Kristiano na bakong kabtang kan kinaban.

Ikapaliliwanag daw Nindo?

• Paano kita nagigin siblag sa kinaban na ini dahel sa satong relasyon ki Jehova?

• Bilang mga sakop kan Kahadean nin Dios, paano kita naninindogan na neutral sa kinaban na ini?

• Sa anong mga paagi kita pinagdadanay na neutral asin siblag sa kinaban kan pagkamoot sa satong mga tugang?

[Mga Hapot Para sa Pag-adal]

[Ritrato sa pahina 15]

Paano nakakaapektar sa satong relasyon sa kinaban an satong pagpasakop sa Kahadean nin Dios?

[Ritrato sa pahina 16]

An sarong Hutu asin Tutsi maogmang nagtatabangan

[Ritrato sa pahina 17]

Kristianong magtugang na Judio asin Arabe

[Ritrato sa pahina 17]

An mga Kristianong Serbiano, Bosniano, asin Croata naoogmang magkairibanan

[Ritrato sa pahina 18]

Ano an tamang gibohon kun pagbotan kita nin mga namamahala na balgahon an ley nin Dios?