Mga Parasuportar sa Tunay na Pagsamba—Kaidto Asin Ngonyan

NAGIGIRUMDOMAN daw nindo an ngaran nin sarong lalaki na nagtangis huli sa suanoy na siudad nin Jerusalem? ‘Jesus,’ an tibaad sabihon nindo​—asin si Jesus nanggad idto. (Lucas 19:​28, 41) Minsan siring, dakol na siglo bago nabuhay si Jesus digdi sa daga, saro pang fiel na lingkod nin Dios an nagtangis man huli sa Jerusalem. An ngaran nia Nehemias.​—Nehemias 1:​3, 4.

Ano an dahelan ta nagin mamondoon si Nehemias kaya nagtangis sia huli sa Jerusalem? Ano an ginibo nia para sa kapakanan kan siudad asin sa mga nag-eerok dian? Asin ano an manonodan ta sa saiyang halimbawa? Para sa simbag, repasohon niato an nagkapirang pangyayari kan saiyang kaaldawan.

Sarong Tawong May Pagmate Asin Aktibo

Si Nehemias nanombrahan na gobernador sa Jerusalem, alagad bago kaiyan, saro siang halangkaw an ranggong opisyal sa palasyo nin Persia sa siudad nin Susa. Pero, an saiyang maginhawang buhay dai nagpaluya sa saiyang pagmakolog para sa kapakanan kan saiyang mga tugang na Judio duman sa harayong Jerusalem. Sa katunayan, an enot niang ginibo kan an sarong delegasyon nin mga Judio hale sa Jerusalem magsongko sa Susa iyo an ‘hapoton sinda manongod sa mga Judio, idtong mga nakadulag, na natada sa pagkabihag, asin manongod man sa Jerusalem.’ (Nehemias 1:2) Kan magsimbag an mga bisita na an mga taga Jerusalem “nasa maraoton na kamugtakan” asin na an lanob kan siudad “gaba,” si Nehemias “nagtukaw . . . asin nanangis patin nagmondo sa laog nin nagkapirang aldaw.” Pakatapos kaiyan ipinahayag nia an saiyang kamondoan sa sarong odok sa pusong pamibi ki Jehova. (Nehemias 1:3-11) Taano ta mamondoon si Nehemias? Huli ta an Jerusalem an sentro nin pagsamba ki Jehova sa daga, asin napabayaan na iyan. (1 Hade 11:36) Dugang pa, an gabang kamugtakan kan siudad nagpapaheling kan maluyang espirituwal na kamugtakan kan mga nag-eerok dian.​—Nehemias 1:​6, 7.

An pagmakolog ni Nehemias sa Jerusalem asin an saiyang pagkaludok sa mga Judiong nag-eerok duman an nagpahiro sa saiya na gamiton an saiyang panahon asin kosog. Kan togotan sia kan hade nin Persia na magbakasyon sa saiyang trabaho, pinonan tolos ni Nehemias na planohon an halawig na pagbaklay pa-Jerusalem. (Nehemias 2:​5, 6) Boot niang itao an saiyang kosog, panahon, asin abilidad bilang pagsuportar sa kinakaipuhan na paghirahay. Pirang aldaw pagkaabot nia, andam na an plano nia para sa paghirahay kan enterong lanob kan Jerusalem.​—Nehemias 2:11-18.

An dakulaon na trabahong paghirahay kan lanob binarangabanga ni Nehemias sa dakol na pamilya, na gabos nagtarabangan. a Labing 40 laen-laen na grupo an inasignaran na maghirahay nin tigsararong “sinokol na kabtang.” An resulta? Huli sa kadakol na trabahador​—kabale an mga magurang na kaiba an saindang mga aki​—na nagtatao kan saindang panahon asin kosog, nakaya an garo baga dakulaon na trabaho. (Nehemias 3:​11, 12, 19, 20) Sa laog nin duwang bulan na pano nin aksion, nahirahay an enterong lanob! Nagsurat si Nehemias na maski idtong mga nagkontra sa paghirahay napiritan na midbidon “na gikan sa samong Dios na nahaman an gibong ini.”​—Nehemias 6:​15, 16.

 Sarong Halimbawa na Dapat Girumdomon

Bako sana an saiyang panahon asin abilidad sa pag-organisar an itinabang ni Nehemias. Ginamit man nia an saiyang kabuhayan tanganing suportaran an tunay na pagsamba. Ginamit nia an saiyang sadiring kuarta tanganing balukaton sa kaoripnan an saiyang mga tugang na Judio. Nagpautang sia na mayo nin porsiento. Nungka niang “pinagabatan” an mga Judio paagi sa paghagad nin paragastos bilang gobernador, sarong bagay na may deretso siang hagadon. Imbes, ginibo niang pirmeng bukas an saiyang harong tanganing pakakanon an “sanggatos may limang polong lalaki, asin an mga nagduduruman samo hale sa mga nasyon na nasa palibot niamo.” Kada aldaw nagpapaandam sia nin “sarong toro, anom na piling karnero asin mga gamgam” para sa saiyang mga bisita. Dugang pa, sarong beses kada sampulong aldaw tinatawan nia sinda nin “lambang klase nin arak na abunda”​—gabos gastos nia.​—Nehemias 5:​8, 10, 14-18.

Marahayon nanggad na halimbawa nin pagigin buka an palad an itinao ni Nehemias para sa gabos na lingkod nin Dios kaidto asin ngonyan! An makosog an boot na lingkod na ini nin Dios suelto asin gikan sa boot na ginamit an saiyang kabuhayan sa pagsuportar sa mga trabahador tanganing paoswagon an tunay na pagsamba. Angay nanggad, puede niang hagadon ki Jehova: “Girumdoma . . . O Dios ko, para sa karahayan, an gabos na ginibo ko para sa banwaan na ini.” (Nehemias 5:19) Sierto nanggad na gigibohon man iyan ni Jehova.​—Hebreo 6:10.

Inaarog Ngonyan an Halimbawa ni Nehemias

Nakaoogmang maheling na an banwaan ni Jehova ngonyan nagpapaheling man nin mamomoton na mga pagmate, gikan sa boot na paghiro, asin mapagsakripisyong aktitud para sa tunay na pagsamba. Kun nababaretaan niato na an mga kapagtubod nag-aagi nin mga kasakitan, kita nahahadit na gayo manongod sa saindang kapakanan. (Roma 12:15) Arog ni Nehemias, minadolok kita ki Jehova sa pamibi sa pagsuportar sa satong mga tugang sa pagtubod na nagsasakit nin makuri, na hinahagad sa saiya: “Tabi man na tawan logod nin atension kan saimong talinga an pamibi kan saimong lingkod asin an pamibi kan saimong mga lingkod na naoogmang marhay na matakot sa saimong ngaran.”​—Nehemias 1:11; Colosas 4:2.

Minsan siring, an pagmakolog niato sa espirituwal asin pisikal na kapakanan kan satong Kristianong mga tugang asin sa pag-oswag kan tunay na pagsamba bako sanang may epekto sa mga pagmate niato. Pinahihiro man kita kaiyan. Idtong mga tinotogotan kan saindang kamugtakan napahihiro nin pagkamoot na bayaan an  medyo maginhawang kamugtakan sa saindang harong asin, arog nanggad ki Nehemias, minabalyo sa ibang lugar tanganing tumabang sa mga nangangaipo. Dai nadedesganar sa bakong gayong maginhawang mga kamugtakan sa buhay na tibaad inaatubang kan siring na mga boluntaryo sa nagkapirang parte kan kinaban, sinusuportaran ninda an pag-oswag kan tunay na pagsamba duman, na naglilingkod sa kaibanan kan saindang Kristianong mga tugang. Tunay nanggad na kaomaw-omaw an espiritu nin pagsakripisyo na ipinaheheling ninda.

Paggibo kan Satong Kabtang sa Sadiring Lugar

Natural sana na dai mahihimo kan kadaklan sa sato na bumalyo sa ibang lugar. Sinusuportaran niato an tunay na pagsamba sa sadiring lugar niato. Ipinaheheling man iyan sa libro ni Nehemias. Mangnoha an detalyeng idinagdag ni Nehemias manongod sa nagkapira sa fiel na mga pamilya na nakikabtang sa paghirahay. Sia nagsurat: “Naghirahay si Jedaias na aki ni Harumaf sa atubangan kan saiyang sadiring harong . . . Naghirahay si Benjamin asin Hasub sa atubangan kan saindang sadiring harong. Kasunod ninda naghirahay si Azarias na aki ni Maaseias na aki ni Ananias sa may harani kan saiyang sadiring harong.” (Nehemias 3:​10, 23, 28-30) Dakula an itinabang kan mga lalaking idto asin kan saindang pamilya sa pag-oswag kan tunay na pagsamba paagi sa paggibo kan saindang kabtang sa paghirahay sa sadiri nindang lugar.

Ngonyan, dakol sa sato an nagsusuportar sa tunay na pagsamba sa satong sadiring mga lugar sa  laen-laen na paagi. Nakikikabtang kita sa mga proyekto nin pagtogdok nin mga Kingdom Hall, pag-ayuda sa inagihan nin kalamidad asin, pinakamahalaga, sa paghuhulit kan Kahadean. Dugang pa, baga man nahihimo niato o dai na magpartisipar nin personal sa pagtogdok o sa pag-ayuda, kita gabos igwa nin odok sa pusong pagmawot na suportaran an tunay na pagsamba paagi sa satong kabuhayan, arog kan bukang marhay an palad na ginibo ni Nehemias kan saiyang kaaldawan.​—Helingon an kahon na “Mga Karakteristiko nin Boluntad na Pagtatao.”

An paghanap nin kinakaipuhan na mga pondo tanganing may magastos sa satong nagdadakulang aktibidad nin pag-imprenta, pag-ayuda, asin kadakol na iba pang paglilingkod na ginigibo sa bilog na globo tibaad kun beses garo dakulaon. Minsan siring, tandaan na an trabahong paghirahay kan dakulaon na lanob kan Jerusalem garo baga dakulaon man. (Nehemias 4:10) Pero, huling binarangabanga an trabaho sa dakol na boluntad na pamilya, nahaman an gibohon. Siring man ngonyan, an paghanap sa darudakulang rekurso tanganing mahaman an satong pambilog na kinaban na aktibidad magigin posible kun an balang saro sa sato padagos na inaasikaso an sarong kabtang kan gibohon.

An kahon na “Mga Paaging Pinipili nin Iba sa Pagtao” nagpapaheling nin nagkapirang paagi na puedeng masuportaran an gibohon na pan-Kahadean sa pinansial na paagi. Durante kan nakaaging taon, dakol sa tahaw kan banwaan nin Dios an nagtao nin siring na suporta, asin an Namamahalang Grupo kan Mga Saksi ni Jehova boot na  gamiton an oportunidad na ini na ipahayag an saindang odok na pasasalamat sa gabos na pinahiro kan saindang puso na makikabtang sa boluntad na pagtataong ini. Orog sa gabos, pinasasalamatan niato si Jehova sa saiyang mayaman na bendisyon sa bilog na pusong mga paghihingoa kan saiyang banwaan sa pagpaoswag kan tunay na pagsamba sa bilog na kinaban. Iyo, kun pinepensar niato kun paano kita giniyahan kan kamot ni Jehova sa nag-aging mga taon, napahihiro kita na otrohon an mga tataramon ni Nehemias, na may pagpasalamat na nagsabi: “[An] kamot kan sakuyang Dios, . . . gurano idto karahay sa sakuya.”​—Nehemias 2:18.

[Nota sa Ibaba]

[Kahon/Mga ritrato sa pahina 22, 23]

Mga Paaging Pinipili nin Iba sa Pagtao

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Worldwide Work​—Matthew 24:14.”

Kada bulan, ipinadadara kan mga kongregasyon an kantidad na ini magsalang sa pankinaban na opisina prinsipal kan Mga Saksi ni Jehova o sa lokal na sangang opisina. An boluntad na mga donasyon na kuarta puede man na direktang ipadara sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa sangang opisina na naglilingkod sa saindong nasyon. An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA KONDISYONAL NA DONASYON

Puedeng magdonar nin kuarta paagi sa sarong espesyal na areglo na dian, enkaso magkaigwa nin personal na pangangaipo an nagdonar, an donasyon puedeng ibalik sa saiya. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalo asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower Society bilang direktang regalo.

Daga Asin Harong: An ikapapabakal na daga asin harong puedeng idonar sa Watch Tower Society magsalang paagi sa direktang pagregalo o paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Paaramon an sangang opisina sa saindong nasyon bago ibalyo an ano man na daga asin harong.

Gift Annuity: An gift annuity sarong areglo kun saen ibinabalyo nin saro an kuarta o garantiya sa Watch Tower Society. Karibay kaiyan, an nagdonar, o saro na dinesignaran kan nagdonar, maresibi nin espesipikong annuity payment kada taon sagkod na nabubuhay. An nagdonar binabawasan sa buhis sa entrada sa taon na naestablisar an gift annuity.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Watch Tower Society puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaririsa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, sarong brosyur an iinandam sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur bilang simbag sa dakol na hapot na naresibi mapadapit sa mga regalo, testamento, asin kabuhayan na ipinagkatiwala. Igwa man iyan nin dagdag na makakatabang na impormasyon sa pagplano manongod sa daga, pinansial, asin buhis. Iniimpormaran kaiyan an mga indibiduwal dapit sa laen-laen na paagi nin pagtao nin regalo magsalang ngonyan o paagi sa pamana pagnagadan. Puedeng makakua kan brosyur na ini paagi sa direktang paghagad nin kopya sa sangang opisina kan Mga Saksi ni Jehova.

Pakatapos na mabasa an brosyur asin magkonsulta sa sangang opisina kan Mga Saksi ni Jehova, dakol an nakatabang sa Mga Saksi ni Jehova sa bilog na kinaban asin, kadungan kaiyan, ginagamit sa pinakalubos na paagi an mga benepisyo sa buhis huli sa paggibo kaiyan. An sangang opisina kan Mga Saksi ni Jehova maninigong paaramon kan asin makaresibi nin kopya nin ano man na may koneksion na dokumento dapit sa arin man kan mga areglong ini. Kun kamo interesado sa arin man sa mga areglong ini sa pagplano para sa pag-abuloy, maninigo nindong paaramon an sangang opisina kan Mga Saksi ni Jehova, magsalang paagi sa pagsurat o telepono, sa adres na nakalista sa ibaba o sa opisina kan Mga Saksi ni Jehova na naglilingkod sa saindong nasyon.

Sangang Opisina kan Mga Saksi ni Jehova

Watch Tower Bible and Tract Society of the Philippines, Inc.

186 Roosevelt Avenue San Francisco del Monte

1105 Quezon City

Telepono: (02) 411-6090

[Kahon sa pahina 24]

Mga Karakteristiko nin Boluntad na Pagtatao

Sa saiyang surat sa mga taga Corinto, sinambit ni apostol Pablo an tolong mahalagang karakteristiko nin boluntad na pagtatao. (1) Kan magsurat manongod sa pangongolekta nin kuarta, an instruksion ni Pablo: “Sa kada enot na aldaw kan semana an lambang saro sa saindo sa saiyang sadiring harong magtagama na.” (1 Corinto 16:2a) Sa siring, an pagtatao kaipuhan na planohon na antes pa, asin kaipuhan iyan na gibohon nin sistematiko. (2) Nagsurat man si Pablo na an balang saro maninigo na magtao “sono sa saiyang entrada.” (1 Corinto 16:2b, New International Version) Sa ibang pagtaram, an sarong indibiduwal na gustong makikabtang sa boluntad na pagtatao puedeng gibohon iyan nin proporsionado. Dawa kun dikit an ginaganar nin sarong Kristiano, an ibinubungang sadit na kantidad na tibaad ikinontribwir nia pinahahalagahan ni Jehova. (Lucas 21:1-4) (3) Isinurat pa ni Pablo: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 9:7) An sinserong mga Kristiano nagtatao gikan sa puso​—na masinggaya.

[Mga ritrato sa pahina 20]

Si Nehemias sarong tawong may mga pagmate asin aktibo

[Mga ritrato sa pahina 24]

An boluntad na mga kontribusyon nagsusuportar sa mga pag-imprenta, pag-ayuda, pagtogdok nin Kingdom Hall, asin iba pang kapakipakinabang na mga paglilingkod sa bilog na globo