Taano ta Depisilon Maghagad nin Dispensasyon?

KAN Hulyo 2000, an Lehislatura kan Estado nin California sa Estados Unidos nagpasar nin sarong ley na an intension iyo na palibrehon an mga tawo sa paninimbagan kun sinda magpahayag nin pakikidamay sa sarong indibiduwal na naerido sa sarong aksidente na imbuelto mismo sinda. Taano ta naggibo nin arog kaiyan na ley? Narisa na kun an sarong aksidente nakaerido o nakadanyar, an mga tawo parateng nag-aalangan na maghagad nin dispensasyon ta tibaad interpretaron iyan sa korte bilang pag-admitir nin pagkakulpable. Sa ibong na lado, an mga nakamamateng maninigo na maghagad tolos sa sainda nin dispensasyon tibaad makologan an boot, asin an sarong sadit na aksidente tibaad magin dakulang iriwal.

Siempre, dai kaipuhan na maghagad nin dispensasyon sa sarong aksidente na bako man kamo an may sala. Asin tibaad may mga panahon na an madonong na gibohon iyo an mag-ingat sa sinasabi nindo. An sarong suanoy na talinhaga nagsasabi: “Sa kadakolan nin tataramon dai nawawaran nin paglapas, alagad an nagpopogol kan saiyang mga ngabil naghihirong may diskresion.” (Talinhaga 10:19; 27:12) Pero, puede kamong magin magalang asin matinabang.

Pero, bako daw na totoo na dakol na tawo an dai na naghahagad nin dispensasyon,  dawa ngani mayong kalabot na kaso sa husgado? Sa harong an sarong agom na babae tibaad manambitan, ‘An sakong agom dai noarin man naghahagad nin dispensasyon sa ano man.’ Sa trabaho an sarong kapatas tibaad magreklamo, ‘An sakong mga trabahador dai nag-aadmitir kan saindang mga sala, asin bihira sindang maghagad nin dispensasyon.’ Sa eskuelahan an sarong maestra tibaad magreport, ‘An mga aki dai sinanay na magsabing pasensia na po.’

An sarong dahelan kun taano ta an sarong tawo nag-aalangan na maghagad nin dispensasyon tibaad iyo an takot na haboan. Huling napupurisaw kan pagsaboot na sia tuyong dai intindihon, tibaad dai nia ipahayag an totoong namamatean nia. An totoo, an tawong nakolgan tibaad biyong likayan an nakakolog, na ginigibong depisilon an pakipaghusay.

An kadaihan nin pagmakolog sa saboot kan iba tibaad saro pang dahelan kun taano ta an nagkapira nag-aalangan na maghagad nin dispensasyon. Tibaad magrason sinda, ‘Dai man mahahale kan paghagad nin dispensasyon an sala na nagibo ko na.’ Pero an iba nag-aalangan na maghagad nin dispensasyon huli sa posibleng mga resulta. Nag-iisip-isip sinda, ‘Papaninimbagon daw ako asin hahagadon sako na magbayad?’ Minsan siring, an pinakadakulang olang sa pag-admitir nin sala iyo an kapalangkawan. An sarong tawo na mapalangkaw na marhay tanganing magsabing “patawadon mo ako” tibaad magsaboot, ‘habo kong mapasupog sa pag-admitir kan sakong sala. Mapababa iyan sa sakong posisyon.’

Sa ano man na dahelan, dakol an nadedepisilan na sabihon an mga tataramon sa paghagad nin dispensasyon. Alagad kaipuhan daw talaga na maghagad nin dispensasyon? Ano an mga pakinabang sa paghagad nin dispensasyon?

[Ritrato sa pahina 3]

“An mga aki dai sinanay na magsabing pasensia na po”

[Ritrato sa pahina 3]

“An sakong agom dai noarin man naghahagad nin dispensasyon”

[Ritrato sa pahina 3]

“An sakong mga trabahador dai nag-aadmitir kan saindang mga sala”