Kaipuhan kan mga Kristiano an Lambang Saro
Kaipuhan kan mga Kristiano an Lambang Saro
“Kita mga miembro na kabtang kan lambang saro.”—EFESO 4:25.
1. Ano an sinasabi nin sarong ensiklopedya manongod sa hawak nin tawo?
AN HAWAK nin tawo sarong makangangalas na linalang! Nagsabi an The World Book Encyclopedia: “Kun minsan inaapod kan mga tawo an hawak nin tawo na makina—an pinakamakangangalas na makinang ginibo kasuarin man. Siempre, an hawak nin tawo bakong makina. Alagad ikakokomparar iyan sa makina sa dakol na paagi. Arog nin makina, an hawak kompuesto nin dakol na kabtang. An balang kabtang kan hawak, arog kan balang kabtang nin makina, igwa nin espesyal na mga trabaho. Alagad an gabos na kabtang nagtatarabangan kaya an hawak o an makina areglado an dalagan.”
2. Sa anong paagi magkaagid an hawak nin tawo asin an Kristianong kongregasyon?
2 Iyo, an hawak nin tawo igwa nin dakol na kabtang, o miembro, asin an balang saro igwa nin itinatao na kinakaipuhan. Mayo ni sarong ugat, kalamnan, o iba pang kabtang kan hawak na mayo nin katuyohan. Kaagid kaiyan, an balang miembro kan Kristianong kongregasyon may ikakokontribwir sa espirituwal na salud asin kagayonan kaiyan. (1 Corinto 12:14-26) Minsan ngani an sarong miembro kan kongregasyon maninigo na dai mag-isip na sia nakalalabi sa iba, dai man maninigong ibilang nin siisay man an saiyang sadiri na bakong mahalaga.—Roma 12:3.
3. Paano ipinaririsa kan Efeso 4:25 na kaipuhan kan mga Kristiano an lambang saro?
3 Arog kan nagsisinarigan na mga kabtang kan hawak nin tawo, kaipuhan kan mga Kristiano an lambang saro. Sinabi ni apostol Pablo sa mga kapagtubod na linahidan nin espiritu: “Ngonyan na nahale na nindo an kaputikan, an balang saro sa saindo magtaram nin katotoohan sa saiyang kapwa, huli ta kita mga miembro na kabtang kan lambang saro.” (Efeso 4:25) Huling sinda “kabtang kan lambang saro,” igwa nin sadiosan na komunikasyon asin lubos na kooperasyon sa tahaw kan mga miembro kan espirituwal na Israel—an “hawak ni Cristo.” Iyo, an balang saro sa sainda kabtang kan gabos na iba pa. (Efeso 4:11-13) Maogmang kasaro ninda an sadiosan, nakikikooperar na mga Kristiano na may daganon na paglaom.
4. Sa anong mga paagi matatabangan an mga bagohan?
4 Kada taon, rinibong may paglaom na mabuhay sa sarong daganon na paraiso an nababautismohan. An ibang miembro kan kongregasyon naoogmang tabangan sinda na ‘magpadagos sa pagkamaygurang.’ (Hebreo 6:1-3) Puedeng kalabot sa tabang na ini an pagsimbag sa mga hapot dapit sa Kasuratan o pagtao nin praktikal na tabang sa ministeryo. Puede niatong matabangan an mga bagohan paagi sa pagtao nin marahay na halimbawa nin regular na pakikikabtang sa Kristianong mga pagtiripon. Sa mga panahon nin kapurisawan, puede man kitang tumao nin pagparigon sa boot o tibaad pagranga. (1 Tesalonica 5:14, 15) Maninigo kitang humanap nin mga paagi na matabangan an iba na ‘padagos na maglakaw sa katotoohan.’ (3 Juan 4) Baga man kita hoben o gurang, nagpoon pa sanang maglakaw sa katotoohan o dakol na taon nang naglalakaw dian, puede niatong suportaran an espirituwal na ikararahay kan mga kapagtubod—asin talagang kaipuhan ninda kita.
Itinao Ninda an Kinakaipuhan na Tabang
5. Paano nakatabang ki Pablo si Aquila asin Priscila?
5 An Kristianong mga mag-agom kabilang sa mga nakakamate nin pagkakontento sa pagtabang sa mga kapagtubod. Halimbawa, si Pablo tinabangan ni Aquila asin kan agom nia, si Priscila (Prisca). Pinadagos sia ninda sa saindang harong, nagtrabaho sinda kaiba nia bilang mga paragibo nin tolda, asin tinabangan sia ninda na pakosogon an bagong kongregasyon sa Corinto. (Gibo 18:1-4) Sa sarong dai ihinayag na paagi, isinapeligro pa ngani ninda an saindang buhay para ki Pablo. Nasa Roma sinda kan sabihan ni Pablo an mga Kristiano duman: “Ikumusta nindo ako ki Prisca asin Aquila na mga kapwa trabahador ko dian ki Cristo Jesus, na isinapeligro an saindang liog para sa sakong kalag, na sa sainda nagpapasalamat bako sanang ako kundi pati an gabos na kongregasyon kan mga nasyon.” (Roma 16:3, 4) Arog ki Aquila asin Priscila, an nagkapirang Kristiano sa presenteng aldaw nagpapakosog sa mga kongregasyon asin nagtatabang sa mga kapwa parasamba sa laen-laen na paagi, na kun minsan isinasapeligro pa ngani an sainda mismong buhay tanganing ikalikay an ibang mga lingkod nin Dios sa karingisan o kagadanan sa kamot nin mga paralamag.
6. Anong tabang an inako ni Apolos?
6 Tinabangan man ni Aquila asin Priscila an matibay magtaram na Kristianong si Apolos, na nagtotokdo sa mga taga Efeso manongod ki Jesu-Cristo. Kan panahon na idto, an aram sana ni Apolos iyo an bautismo na ginibo ni Juan bilang simbolo nin pagsolsol sa mga kasalan tumang sa tipan nin Ley. Huling namansayan na kaipuhan ni Apolos an tabang, an ginibo ni Aquila asin Priscila “ipinaliwanag sa saiya nin mas tama an dalan nin Dios.” Posibleng marhay na ipinaliwanag ninda na kabale sa Kristianong bautismo an pagpabuntog sa tubig asin pag-ako kan pagbubo nin banal na espiritu. Nakanood na marhay si Apolos. Kan huri sa Acaya “tinabangan niang marhay an mga nagturubod huli sa dai na kutana maninigong kabootan nin Dios; huli ta may kaigotan na biyo niang pinatunayan nin hayagan na sala an mga Judio, mantang ipinaheheling nia paagi sa Kasuratan na si Jesus iyo an Cristo.” (Gibo 18:24-28) An mga komento nin mga kapwa parasamba sa parate puedeng makatabang na madagdagan an satong pakasabot sa Tataramon nin Dios. Sa bagay man na ini, kaipuhan niato an lambang saro.
Pagtao nin Materyal na Tabang
7. Ano an nagin reaksion kan mga taga Filipos kan an mga kapwa Kristiano mangaipo nin materyal na tabang?
7 Si Pablo namotan na marhay kan mga miembro kan Kristianong kongregasyon sa Filipos asin pinadarahan sia ninda nin materyal na mga probisyon durante kan saiyang pag-istar sa Tesalonica. (Filipos 4:15, 16) Kan mangaipo nin materyal na tabang an mga tugang sa Jerusalem, ipinaheling kan mga taga Filipos an pagigin andam na mag-ambag nin labi pa ngani sa kaya ninda. Inapresyar na marhay ni Pablo an marahayon na espiritu kan saiyang mga tugang na lalaki asin babae sa Filipos kaya sinambit nia sinda bilang halimbawa sa iba pang mga may pagtubod.—2 Corinto 8:1-6.
8. Anong espiritu an ipinaheling ni Epafrodito?
8 Kan si Pablo nasa mga gapos nin bilanggoan, an mga taga Filipos bako sanang nagpadara sa saiya nin materyal na mga regalo kundi isinugo man an saindang personal na representanteng si Epafrodito. ‘Dahel sa gibohon kan Kagurangnan diit pang magadan si Epafrodito, na ibinugtak sa peligro an saiyang kalag,’ sabi ni Pablo, “tangani na lubos niang mahipnoan an saindong pagigin mayo digdi sa pagtao nin personal na paglilingkod sa sako.” (Filipos 2:25-30; 4:18) Dai sinabi sa sato kun baga si Epafrodito sarong magurang sa kongregasyon o ministeryal na lingkod. Minsan siring, saro siang mapagsakripisyo asin matinabang na Kristiano, asin talagang kaipuhan sia ni Pablo. Igwa daw nin arog ki Epafrodito sa saindong kongregasyon?
Sinda “Tabang na Nagpapakosog”
9. Anong halimbawa an itinatao sa sato ni Aristarco?
9 Pinahahalagahan na marhay sa arin man na kongregasyon an mamomoton na mga tugang na lalaki asin babae na arog ki Aquila, Priscila, asin Epafrodito. An nagkapira sa satong mga kapwa parasamba tibaad kaparehong gayo kan Kristianong si Aristarco kan enot na siglo. Sia asin an iba pa nagin “tabang na nagpapakosog,” tibaad gikanan nin karangahan o tabang sa pundamental asin praktikal na mga bagay. (Colosas 4:10, 11) Paagi sa pagtabang ki Pablo, si Aristarco nagin tunay na katood sa mga panahon nin pangangaipo. Sia an klase nin tawo na nasambitan sa Talinhaga 17:17: “An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.” Bako daw na kita gabos maninigo na maghingoang magin “tabang na nagpapakosog” sa mga kapwa Kristiano? Nangorognang maninigo kitang tumabang sa mga nag-aagi nin kasakitan.
10. Nagtao si Pedro nin anong halimbawa para sa Kristianong kamagurangan?
10 An Kristianong kamagurangan partikularmenteng dapat na magin tabang na nagpapakosog sa saindang mga tugang sa espirituwal. Nagsabi si Cristo ki apostol Pedro: “Pakosoga an saimong mga tugang.” (Lucas 22:32) Nagibo iyan ni Pedro huli ta nagpaheling sia nin makosog, garo gapo kasarig na mga kualidad, nangorogna pagkabuhay liwat ni Jesus. Kamagurangan, pagmaigotan nanggad nindo na gibohon man iyan nin gikan sa boot asin may kabootan, huli ta kaipuhan kamo kan saindong mga kapagtubod.—Gibo 20:28-30; 1 Pedro 5:2, 3.
11. Paano kita makikinabang sa pagpiropensar sa espiritung ipinaheling ni Timoteo?
11 An kaibaiba ni Pablo sa pagbiahe na si Timoteo sarong magurang sa kongregasyon na nagmamalasakit na marhay sa ibang mga Kristiano. Minsan ngani may mga problema sia sa salud, si Timoteo nagpaheling nin bilog na pusong pagtubod asin ‘naglingkod sa kaibanan ni Pablo sa pagpalakop kan maogmang bareta.’ Kun siring masasabi kan apostol sa mga taga Filipos: “Mayo na ako nin iba na may kaisipan na arog kan sa saiya na mangangataman nin tunay sa mga bagay mapadapit sa saindo.” (Filipos 2:20, 22; 1 Timoteo 5:23; 2 Timoteo 1:5) Puede kitang magin bendisyon sa mga kapwa parasamba ki Jehova paagi sa pagpaheling nin espiritu na arog kan ki Timoteo. Totoo, dapat niatong tagalan an sato mismong mga kaluyahan bilang tawo asin an laen-laen na pagbalo, alagad kita puede man asin maninigo na magpaheling nin makosog na pagtubod asin mamomoton na pagmalasakit sa mga tugang niato sa espirituwal. Maninigo na pirme niatong girumdomon na kaipuhan ninda kita.
Mga Babae na Nagmakolog sa Iba
12. Ano an manonodan niato sa halimbawa ni Dorcas?
12 Kabilang si Dorcas sa diosnon na mga babae na nagmakolog sa iba. Kan sia magadan, ipinaapod kan mga disipulo si Pedro asin ipinag-iba sia sa sarong kuarto sa itaas. Duman “an gabos na babaeng balo uminatubang sa saiya na naghihibi asin ipinaheheling an dakol na pan-irarom na gubing asin pan-ibabaw na gubing na ginibo kaidto ni Dorcas kan sia nasa kaibanan ninda.” Binuhay liwat si Dorcas asin daing duwa-duwa na nagpadagos na magin “pano nin marahay na mga gibo asin mga balaog nin pagkaherak.” Sa Kristianong kongregasyon sa presenteng panahon, igwa nin mga babaeng arog ki Dorcas na tibaad naggigibo nin mga bado o iba pang mamomoton na mga bagay para sa mga nangangaipo. Siempre, an saindang marahay na mga gibo sa pangenot igwa nin koneksion sa pagpalakop kan intereses na pan-Kahadean asin pakikikabtang sa paggibo nin mga disipulo.—Gibo 9:36-42; Mateo 6:33; 28:19, 20.
13. Paano nagpaheling nin pagmalasakit sa mga kapwa Kristiano si Lidia?
13 An sarong may takot sa Dios na babae na an ngaran Lidia nagmakolog sa iba. Sarong propiong taga Tiatira, nag-eerok sia sa Filipos kan maghulit duman si Pablo kan mga 50 C.E. Si Lidia posibleng sarong proselitang Judia, alagad tibaad pipira sana an mga Judio asin mayo nin sinagoga sa Filipos. Sia asin an ibang debotong babae nagtitiripon tanganing sumamba sa may salog kan ibalangibog sa sainda kan apostol an maogmang bareta. An pagkasaysay nagsasabi: “Binukasan ni Jehova an . . . puso [ni Lidia] tanganing magtao nin atension sa mga bagay na itinataram ni Pablo. Ngonyan kan sia asin an kairiba nia sa harong mabautismohan, sia nakimaherak: ‘Kun ako ibinibilang nindong fiel ki Jehova, dumagos kamo sa sakong harong asin umontok dian.’ Asin pinirit nia kami.” (Gibo 16:12-15) Huling gusto ni Lidia na gumibo nin marahay na mga bagay para sa iba, napirit nia si Pablo asin an kairiba kaini na umontok sa harong nia. Kanigoan an pagpahalaga niato kun ipinaheheling nin maboot asin mamomoton na mga Kristiano ngonyan an kaagid na pagkamapagpasakat!—Roma 12:13; 1 Pedro 4:9.
Kaipuhan Man Niamo Kamo mga Aki
14. Paano trinatar ni Jesu-Cristo an mga aki?
14 An Kristianong kongregasyon pinonan kan maboot, madinamayon na Aki nin Dios, si Jesu-Cristo. An mga tawo pamugtak an boot sa kaibanan nia huli ta sia mamomoton asin may pagkaludok. Sarong beses, kan magpoon na darahon ki Jesus kan nagkapira an saindang saraday na aki, hiningoa kan mga disipulo nia na isubol sinda. Alagad nagsabi si Jesus: “Pabayae nindo na dumolok sa sako an saraday na aki; dai nindo sinda pagpogolan, huli ta an kahadean nin Dios para sa mga siring. Totoong sinasabi ko sa saindo, An siisay man na dai mag-ako sa kahadean nin Dios na arog sa sarong saday na aki dai nanggad makalalaog dian.” (Marcos 10:13-15) Tanganing akoon an mga bendisyon kan Kahadean, dapat kitang magin mapakumbaba asin madaling tokdoan siring sa saraday na aki. Ipinaheling ni Jesus an saiyang pagkamoot sa saradit na aki paagi sa pagkugos sa sainda asin pagbendisyon sa sainda. (Marcos 10:16) Kumusta man kamo mga aki ngonyan? Makasisierto kamo na kamo namomotan asin kinakaipuhan sa kongregasyon.
15. Anong impormasyon manongod sa buhay ni Jesus an nakasurat sa Lucas 2:40-52, asin anong halimbawa an itinao nia para sa mga aki?
15 Kan si Jesus aki pa, nagpaheling sia nin pagkamoot sa Dios asin sa Kasuratan. Kan sia 12 anyos, sia asin an saiyang mga magurang, si Jose asin Maria, nagbaklay hale sa saindang sadiring banwaan na Nazaret pasiring sa Jerusalem tanganing selebraron an Paskua. Sa pagpuli, nadiskobre kan mga magurang ni Jesus na mayo si Jesus sa grupo na magkairibanan. Sa kahurihurihi nanompongan sia ninda na nagtutukaw sa saro kan mga pasilyo sa templo, na naghihinanyog sa mga paratokdong Judio asin naghahapot sa sainda. Nagngalas na dai aram ni Jose asin Maria kun saen sia hahanapon, si Jesus naghapot: “Dai kamo nakakaaram na ako dapat na nasa harong kan sakong Ama?” Sia nagpuli kaiba kan saiyang mga magurang, padagos na nagpasakop sa sainda, asin padagos na nag-oswag sa kadonongan asin nagtalubo sa pisikal. (Lucas 2:40-52) Kanigoan karahay na halimbawa an itinao ni Jesus para sa satong kaakian! Daing duwa-duwa na maninigo sindang kumuyog sa saindang mga magurang asin magin interesado na manodan an manongod sa espirituwal na mga bagay.—Deuteronomio 5:16; Efeso 6:1-3.
16. (a) Ano an ikinurahaw nin nagkapirang aking lalaki kan si Jesus nagpapatotoo sa templo? (b) May anong pribilehio an mga Kristianong aki ngonyan?
16 Bilang aki, tibaad nagpapatotoo kamo manongod ki Jehova sa eskuelahan asin sa harong-harong kaiba kan saindong mga magurang. (Isaias 43:10-12; Gibo 20:20, 21) Kan si Jesus nagpapatotoo asin pinaoomayan an mga tawo sa templo dai mahaloy bago sia magadan, an nagkapirang aking lalaki nagkurahaw: “Ligtasan, ipinamimibi niamo, an Aki ni David!” Ikinaanggot ini, an poon na mga saserdote asin mga eskriba nagreklamo: “Nadadangog mo an sinasabi kan mga ini?” “Iyo,” an simbag ni Jesus. “Ano dai nindo noarin man nabasa ini, ‘Gikan sa ngoso nin mga omboy asin pasusohon ika nagkamit nin pag-omaw’?” (Mateo 21:15-17) Arog kan mga aking idto, kamong mga aki sa kongregasyon igwa nin dakulang pribilehio na omawon an Dios asin an saiyang Aki. Gusto asin kaipuhan niamo na makaibanan kamo bilang mga parabalangibog kan Kahadean.
Kun May Kasakitan
17, 18. (a) Taano ta inorganisar ni Pablo an pangongolekta para sa mga Kristiano sa Judea? (b) Ano an nagin epekto sa mga Kristianong Judio asin Hentil kan boluntad na mga donasyon para sa mga may pagtubod na taga Judea?
17 Ano man an satong kamugtakan, pinahihiro kita nin pagkamoot na tabangan an mga kapwa Kristiano na nangangaipo. (Juan 13:34, 35; Santiago 2:14-17) Pagkamoot sa mga tugang niang lalaki asin babae sa Judea an nagpahiro ki Pablo na organisaron an pangongolekta para sa sainda sa mga kongregasyon sa Acaya, Galacia, Macedonia, asin sa distrito nin Asia. An paglamag, kariribokan sibil, asin tiggutom na naeksperyensiahan kan mga disipulo sa Jerusalem an tibaad nagin dahelan kan inapod ni Pablo na “mga pagdusa,” “kahorasaan,” asin “pagsamsam sa [saindang] mga rogaring.” (Hebreo 10:32-34; Gibo 11:27–12:1) Kun siring, nagmaneho sia na magkaigwa nin pondo para sa dukhang mga Kristiano sa Judea.—1 Corinto 16:1-3; 2 Corinto 8:1-4, 13-15; 9:1, 2, 7.
18 An boluntad na mga donasyon para sa mga banal sa Judea nagpatunay na igwa nin bogkos nin pagkanitugang sa tahaw kan mga Judio asin Hentil na mga parasamba ki Jehova. An paghatod kan mga kontribusyon nagpangyari man sa mga Kristianong Hentil na ipaheling sa saindang mga kapwa parasamba sa Judea an pasasalamat para sa espirituwal na mga kayamanan na inako ninda hale sa sainda. Huli kaini, nagkaigwa nin paghinirasan sa materyal sagkod sa espirituwal na paagi. (Roma 15:26, 27) An mga kontribusyon para sa nangangaipong mga kapagtubod ngonyan boluntad man asin motibado nin pagkamoot. (Marcos 12:28-31) Kaipuhan niato an lambang saro sa bagay man na ini tanganing magkaigwa nin pagpantaypantay ‘asin an saro na may kadikit dai magkulang.’—2 Corinto 8:15.
19, 20. Tumao nin halimbawa tanganing ipaheling kun paano an banwaan ni Jehova nagtatabang kun may mga kalamidad.
19 Sa pakaaram na kaipuhan kan mga Kristiano an lambang saro, tolos kitang minatabang sa satong mga tugang sa pagtubod. Halimbawa, helinga an nangyari kan magkaigwa nin mapanlaglag na mga linog asin pagtupas sa El Salvador sa kapinonan kan 2001. Nagsabi an sarong report: “Naggibo nin mga pag-ayuda an mga tugang sa gabos na parte kan El Salvador. Nag-arabot hale sa Guatemala, Estados Unidos, asin Canada an mga grupo nin mga tugang tanganing tumabang samo. . . . Labing 500 na harong asin 3 magagayon na Kingdom Hall an marikas na itinogdok. Sarong dakulang patotoo an ikinatao kan kahigosan asin kooperasyon kan mapagsakripisyong mga tugang na ini.”
20 An sarong report hale sa Aprika del Sur nagsabi: “An grabeng mga pagbaha na nandestroso sa darakulang parte nin Mozambique nakaapektar man sa dakol na Kristianong tugang niato. Iinareglo kan sangang opisina sa Mozambique na asikasohon an kadaklan kan saindang pangangaipo. Alagad hinagad ninda sa samo na magpadara kami nin marahay pang mga badong segunda mano sa nangangaipong mga tugang. Nakatipon kami nin igong gubing tanganing makapadara nin 12 metros an labang container na pano nin mga gubing sa samong mga tugang sa Mozambique.” Iyo, sa paagi man na ini, kaipuhan niato an lambang saro.
21. Ano an totokaron sa sunod na artikulo?
21 Siring sa nasabi na, mahalaga an gabos na kabtang kan hawak nin tawo. Tunay nanggad na totoo man iyan sa Kristianong kongregasyon. Kaipuhan kan gabos na miembro kaiyan an lambang saro. Kaipuhan man sindang padagos na maglingkod na nagkakasararo. Totokaron kan sunod na artikulo an nagkapirang bagay na nagpapagin posible kaini.
Ano an Isisimbag Nindo?
• Ano an pagkakaagid kan hawak nin tawo asin kan Kristianong kongregasyon?
• Ano an nagin reaksion kan enot na mga Kristiano kan an mga kapwa parasamba mangaipo nin tabang?
• Ano an nagkapirang halimbawa sa Kasuratan na nagpapaheling na kaipuhan asin tinatabangan kan mga Kristiano an lambang saro?
[Mga Hapot Para sa Pag-adal]
[Ritrato sa pahina 10]
Si Aquila asin Priscila nagmakolog sa iba
[Mga ritrato sa pahina 12]
An banwaan ni Jehova nagtatabang sa lambang saro asin sa iba kun may kasakitan