Mga Lugar nin Pagsamba—Kaipuhan daw Niato Iyan?

‘Rinibong peregrino na nakasulot nin magagayon an kolor na gubing hale sa laen-laen na parte kan nasyon, mga grupo nin Indian na inaarog an mga bayleng sinasabi na bago kan mga panahon kan mga Kastila na sinusundan an pagtugtog nin mga bombo, asin mga miembrong nakokologan sa pagmamaigot na makipagsusoan mantang paluhod na nagpapasiring sa altar an nakapano sa patyo asin mga kalye na nakapalibot sa basilika.’

AROG kaiyan an pagkaladawan kan peryodikong El Economista sa dakulang marhay na kadaklan kan Disyembre 2001. Kan panahon na iyan mga tolong milyon katawo an nagbisita sa basilika sa Siudad nin Mejico tanganing ipaheling an saindang pagtubod sa Birhen nin Guadalupe. An iba pang relihiosong mga edipisyo, arog kan Basilika ni San Pedro sa Roma, nakaaakit man sa kadakoldakol na bisita.

An relihiosong mga edipisyo harani sa puso kan dakol na nagmamawot na sumamba sa Dios. “Para sako, an simbahan sarong lugar na dian puede akong magin harani sa Dios,” an sabi ni Maria na taga Brazil. “Iyan sarong banal na lugar. Naniniwala ako na an pagsimba naglilinig kan kalag asin na kasalan an dai pag-atender nin Misa asin dai pagkumpisal kada Domingo.” Si Consuelo na taga Mejico nagsasabi: “An simbahan nakapupukaw nin makosogon na emosyon sa sako; pinahahalagahan kong marhay iyan. Kun ako yaon dian, an pagmate ko yaon ako sa langit.”

Minsan ngani an nagkapira nagpapahalagang marhay sa mga simbahan, an iba nagduduwaduwa kun iyan kaipuhan bilang mga lugar nin pagsamba. Nagtataram manongod sa hababang bilang nin nagsisimba, si Peter Sibert, sarong Katolikong padi sa Inglaterra, nagsasabi: “Pinipili kan [mga tawo] an parte sana kan relihion na gusto ninda. Dakol na tawong may edad na an Katoliko asin namumuhay sinda oyon sa saindang pagtubod​​—alagad mayo lamang nin pakamate nin obligasyon sa tahaw nin mga hoben.” An Daily Telegraph sa Londres  kan Nobyembre 20, 1998, nagkomento: “Poon kan 1979 mga 1,500 na simbahan an sinerahan sa Inglaterra kun ikokomparar sa 495 simbahan na binuksan asin 150 itinogdok liwat.”

Kan 1997 an peryodikong Süddeutsche Zeitung sa Munich, Alemania, nagbareta: “An mga simbahan ginibo nang mga sinehan asin apartment: An mga nagtutubod dai na nagsisimba, an mga lugar nin pagsamba ginagamit na sa ibang bagay. . . . An dati nang ginigibo sa Netherlands o sa Inglaterra ginigibo na sa Alemania.” Idinugang kaiyan: “An saro puedeng makakua nin mga 30 o 40 pambihirang ipinapabakal na mga simbahan sa Alemania sa laog kan nakaaging pirang taon.”

Talaga daw na kaipuhan an relihiosong mga edipisyo sa pagsamba sa Dios? Igwa daw nin arogan sa Kasuratan an mga basilika asin maadornong mga simbahan? Anong klaseng mga edipisyo an iinaasosyar sa pagsamba sa tunay asin nabubuhay na Dios? Ano an manonodan niato sa mga iyan manongod sa pangangaipo nin mga lugar nin pagsamba asin sa maninigong ginigibo dian?