Padagos na Maglingkod nin Daramay

“Itatao ko sa mga banwaan an pagbago sa dalisay na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.”​—SOFONIAS 3:9.

1. Ano an nangyayari bilang kaotoban kan Sofonias 3:9?

 MGA 6,000 na lenguahe an ginagamit ngonyan sa bilog na daga. Apuera kaini, igwa nin manlaenlaen na dialekto, o lokal na lenguahe. Minsan siring, baga man an mga tawo nagtataram nin mga tataramon na siring kamagkalaen kan Arabe asin Zulu, may ginibo an Dios na totoong pambihira. Pinagin posible nia na an mga tawo sa gabos na lugar makanood asin makapagtaram kan kasarosaroing dalisay na tataramon. Nangyayari ini bilang kaotoban nin sarong panuga na itinao paagi ki propeta Sofonias: “Itatao ko [Jehova Dios] sa mga banwaan an pagbago sa dalisay na tataramon [sa literal, “malinig na ngabil,” nota sa ibaba], tanganing sinda gabos mag-apod sa ngaran ni Jehova, tanganing daramay na maglingkod sa saiya.”​—Sofonias 3:9.

2. Ano an “dalisay na tataramon,” asin ano an pinagin posible kaiyan?

² An “dalisay na tataramon” iyo an katotoohan nin Dios na yaon sa saiyang Tataramon, an Biblia. Espesyalmente na iyan an katotoohan manongod sa Kahadean nin Dios, na masantipikar sa ngaran ni Jehova, mabindikar sa saiyang soberaniya, asin matao nin mga bendisyon sa katawohan. (Mateo 6:​9, 10) Bilang an solamenteng tataramon na malinig sa espirituwal digdi sa daga, an dalisay na tataramon ginagamit nin mga tawo kan gabos na nasyon asin rasa. Pinapangyayari sinda kaiyan na makapaglingkod ki Jehova nin “daramay” (sa Ingles, “shoulder to shoulder”), o segun sa nota sa ibaba,  “may saro sanang abaga” (sa Ingles, “with one shoulder”). Sa siring naglilingkod sinda sa saiya na nagkakasararo, o “may sarong pagkaoroyon.”​​—The New English Bible.

Daing Lugar an Pagpaorog

3. Ano an nagpapangyari sa sato na makapaglingkod ki Jehova na may pagkasararo?

³ Bilang mga Kristiano, nagpapasalamat kita sa kooperasyon nin dakol na lenguahe sa tahaw niato. Minsan ngani ihinuhulit niato an maogmang bareta kan Kahadean sa dakol na tataramon nin tawo, naglilingkod kita sa Dios na may pagkasararo. (Salmo 133:1) Posible ini ta, saen man kita nag-eerok sa daga, nagtataram kita kan sarong dalisay na tataramon sa kaomawan ni Jehova.

4. Taano ta dai dapat na magkaigwa nin pagpaorog sa tahaw kan banwaan nin Dios?

⁴ Dai dapat na magkaigwa nin pagpaorog sa tahaw kan banwaan nin Dios. Lininaw iyan ni apostol Pedro kan sia maghulit sa harong kan Hentil na opisyal sa hukbo na si Cornelio kan 36 C.E. asin napahiro sia na magsabi: “Sa katotoohan ako nakaiisi na an Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:​34, 35) Huling iyan totoo, an Kristianong kongregasyon daing lugar sa pagpaorog, paggrupogrupo, o paboritismo.

5. Taano ta sala na magkaigwa nin kabtang sa paggrupogrupo sa kongregasyon?

⁵ Mapadapit sa pagsongko nia sa Kingdom Hall, an sarong estudyante sa kolehio nagsabi: “Sa parate, an mga iglesia nakaeenganyar nin mga miembro nin sarong rasa o grupong etniko. . . . An mga Saksi ni Jehova gabos nakatukaw na magkairiba asin bakong grupo-grupo.” Minsan siring, an nagkapirang miembro kan kongregasyon sa suanoy na Corinto nagbibilog nin mga paksion. Dahelan sa pinapangyari ninda an dai pagkaoroyon huli kaini, kinokontra ninda an paghiro kan banal na espiritu nin Dios, ta pinalalakop kaiyan an pagkasararo asin katoninongan. (Galacia 5:22) Kun magpapalakop kita nin paggrupogrupo sa kongregasyon, kokontrahon niato an paggiya kan espiritu. Kun siring, tandaan niato an mga tataramon ni apostol Pablo sa mga taga Corinto: “Sinasadol ko kamo, mga tugang, paagi sa ngaran kan satong Kagurangnan na  si Jesu-Cristo na kamo gabos maninigong magtaram na may pagkaoroyon, asin na dai magkaigwa nin pagkabaranga dian sa saindo, kundi na kamo dayupot na magkasararo sa saro sanang pag-isip asin sa saro sanang paghonahona.” (1 Corinto 1:10) Idinoon man ni Pablo an pagkasararo sa surat nia sa mga taga Efeso.​—Efeso 4:1-6, 16.

6, 7. Anong hatol an itinao ni Santiago mapadapit sa paboritismo, asin paano minaaplikar an saiyang mga tataramon?

⁶ An dai pagpaorog kaidto pa hinahagad na sa mga Kristiano. (Roma 2:11) Huling an nagkapira sa kongregasyon kan enot na siglo nagpapaheling nin paboritismo sa mga mayaman, si disipulo Santiago nagsurat: “Mga tugang, ano pinangangaptan nindo an pagtubod kan satong Kagurangnan na Jesu-Cristo, na satong kamurawayan, na may mga gibo nin paboritismo? Huli ta, kun an sarong tawo na may mga singsing na bulawan sa saiyang mga moro asin gubing na mamahalon maglaog sa saindong katiriponan, alagad maglaog man an sarong tawong dukha na may gubing na maati, pero paorogon nindo an may gubing na mamahalon asin magsabi kamo: ‘Tumukaw ka digdi sa marahay na lugar,’ asin sabihan nindo an dukha: ‘Tumindog ka sana dian,’ o: ‘Tumukaw ka sa ibaba kan sakong tongtongan,’ igwa kamo nin pagpalaenlaen dian sa saindo asin nagin kamong mga hokom na nagtatao nin maraot na mga desisyon, bako daw?”​—Santiago 2:1-4.

⁷ Kun mag-atender sa sarong Kristianong pagtiripon an mayayaman na daing pagtubod na nakasingsing nin bulawan asin mamahalon an bado saka an mga dukhang daing pagtubod na maati an gubing, an mayaman an nag-aako nin espesyal na tratamiento. Pinapatukaw sinda sa “marahay na lugar,” mantang an mga dukha pinapatindog o pinapatukaw sa salog sa may pamitisan nin sarong tawo. Alagad an Dios daing pagpaorog na itinao an atang na pantubos ni Jesus pareho para sa mga mayaman asin dukha. (Job 34:19; 2 Corinto 5:14) Kaya kun boot niatong paogmahon si Jehova asin paglingkodan sia nin daramay, dai kita dapat magpaheling nin paboritismo o ‘maghanga sa mga tawo para sa sadiri niatong kapakinabangan.’​—Judas 4, 16.

Likayan an Paggumodgumod

8. Ano an nangyari huli ta naggurumodgumod an mga Israelita?

⁸ Tanganing mapagdanay an satong pagkasararo asin padagos na kamtan an pabor nin Dios, dapat niatong himateon an hatol ni Pablo: “Padagos nindong gibohon an gabos na bagay na mayo nin mga paggumodgumod.” (Filipos 2:​14, 15) An daing pagtubod na mga Israelita na pinatalingkas sa pagkaoripon sa Egipto naggurumodgumod tumang ki Moises asin Aaron asin sa siring pati ki Jehova Dios. Huli kaini, an gabos na lalaking 20 anyos paitaas, apuera sa fiel na si Josue asin Caleb patin mga Levita, dai nakalaog sa Dagang Panuga kundi nagadan durante kan 40 taon na pagbaklay kan Israel sa kaawagan. (Bilang 14:​2, 3, 26-30; 1 Corinto 10:10) Abaa kadakulang karibay kan saindang paggumodgumod!

9. Ano an naeksperyensiahan ni Miriam huli sa saiyang paggumodgumod?

⁹ Ipinaheheling kaini an puedeng mangyari sa sarong bilog na nasyon na paragumodgumod. Kumusta man an indibiduwal na mga paragumodgumod? Bueno, an tugang ni Moises, si Miriam, kaiba an tugang niang si Aaron, naggumodgumod: “Paagi sana daw ki Moises na nagtaram si Jehova? Bako daw na paagi man samo na sia nagtaram?” Idinagdag kan pagkasaysay: “Si Jehova nagdadangog.” (Bilang 12:​1, 2) An resulta? Sinupog nin Dios si Miriam, na minalataw na iyo an nangenot sa pagreklamong ini. Paano? Dinaot sia asin napiritan na magdanay sa luwas kan kampo sa laog nin pitong aldaw sagkod na sia magin malinig.​—Bilang 12:9-15.

10, 11. An dai sinusumpo na paggumodgumod puedeng magresulta sa ano? Iilustrar.

¹⁰ An paggumodgumod bako sanang reklamo manongod sa sarong salang nagibo. An daing ontok na mga paragumodgumod sobra an importansiang  itinatao sa saindang mga saboot o posisyon, na dinadara an atension sa saindang sadiri imbes na sa Dios. Kun dai susumpoon, ini nagbubunga nin dai pagkaoroyon sa tahaw nin magturugang sa espirituwal asin nakaoolang sa saindang mga paghihingoa na maglingkod ki Jehova nin daramay. Totoo ini huli ta an mga paragumodgumod pirmeng ipinapahayag an saindang mga reklamo, na daing duda na naglalaom na masimpatiya sa sainda an iba.

¹¹ Halimbawa, tibaad may magkritikar sa paagi nin pagtao nin sarong magurang sa kongregasyon kan saiyang mga kabtang sa kongregasyon o pag-asikaso sa saiyang mga katongdan. Kun hihinanyogon niato an nagrereklamo, tibaad magpoon kitang mag-isip nin arog sa saiya. Bago natanom sa isip niato an banhi nin pagkadiskontento, an mga ginigibo kan magurang na iyan tibaad dai man niato pinoproblema, alagad ngonyan iyo na. Sa kahurihurihi, mayo nang ginigibo an magurang na iyan na magigin tama sa pagheling niato, asin kita man tibaad magpoon nang magreklamo manongod sa saiya. An arog kaining gawe-gawe bakong angay sa kongregasyon kan banwaan ni Jehova.

12. An paggumodgumod puedeng magkaigwa nin anong epekto sa satong relasyon sa Dios?

¹² An paggumodgumod manongod sa mga lalaking an katongdan magpastor sa aripompon nin Dios puedeng magresulta sa pagmuda. An siring na paggumodgumod o may pagbalobaging pagmaldisyon sa sainda puedeng makaraot sa satong relasyon ki Jehova. (Exodo 22:28) An daing pagsolsol na mga paramuda dai magmamana kan Kahadean nin Dios. (1 Corinto 5:11; 6:10) Si disipulo Judas nagsurat manongod sa mga paragumodgumod na “nagbabasangbasang sa pagkakagurangnan patin nagtataram na may panlilibak sa mga mamuraway,” o may paninimbagan na mga lalaki sa kongregasyon. (Judas 8) Dai inoyonan nin Dios an mga paragumodgumod na idto, asin madonong na isikwal niato an maraot na ginibo ninda.

13. Taano ta bakong gabos na reklamo sala?

¹³ Totoo, bakong gabos na reklamo ikinaaanggot nin Dios. Dai nia pinalimanlimanan “an kurahaw nin reklamo” dapit sa Sodoma asin Gomorra kundi linaglag an maraot na mga siudad na idto. (Genesis 18:​20, 21; 19:​24, 25) Sa Jerusalem, dai nahaloy pakalihis kan Pentecostes nin 33 C.E., “nagkaigwa nin paggurumodgumod kan mga Judiong Griego an tataramon tumang sa mga Judiong Hebreo an tataramon, huli ta an saindang mga balong babae napababayaan sa aroaldaw na pagwaras.” Bilang resulta, itinanos “kan dose” an situwasyon paagi sa pagnombra nin “pitong lalaki na marahay an dangog” para sa “mahalagang gibo” na pagwaras nin kakanon. (Gibo 6:1-6) An kamagurangan sa presenteng panahon dai dapat na ‘magtahob kan saindang talinga’ sa lehitimong mga reklamo. (Talinhaga 21:13) Asin imbes na kritikaron an mga kapwa parasamba, an kamagurangan dapat na nakaparirigon sa boot asin nakapakokosog.​—1 Corinto 8:1.

14. Tanganing malikayan an paggumodgumod, anong kualidad an nangorognang kaipuhan?

¹⁴ Kaipuhan na likayan niato gabos an paggumodgumod, ta an espiritu nin pagreklamo nakararaot sa espirituwal. An siring na aktitud makakaraot sa satong pagkasararo. Imbes, pirme niatong togotan an banal na espiritu na pataluboon an pagkamoot sa sato. (Galacia 5:22) An pagsunod sa ‘makahadeng ley nin pagkamoot’ matabang sa sato na padagos na maglingkod ki Jehova nin daramay.​—Santiago 2:8; 1 Corinto 13:4-8; 1 Pedro 4:8.

Magmaan sa Pagbalobagi

15. Paano nindo ipaliliwanag an kalaenan nin tsismis asin pagbalobagi?

¹⁵ Huling an paggumodgumod puedeng magresulta sa nakararaot na tsismis, dapat kitang mag-ingat sa satong sinasabi. An tsismis daing kamanungdanan na orolay manongod sa mga tawo asin sa mga gibo-gibo ninda. Pero an pagbalobagi sarong bakong totoong estorya na an katuyohan raoton an reputasyon nin ibang tawo. An siring na orolay bakong marahay an intension asin maraot. Kun siring, sinabihan nin Dios an mga Israelita: “Dai ka maglibot sa saimong banwaan para sa pambabalobagi.”​—Levitico 19:16.

16. Ano an sinabi ni Pablo manongod sa nagkapirang tsismosa, asin ano an maninigong magin epekto sa sato kan saiyang hatol?

¹⁶ Huling an daing kamanungdanan na orolay puedeng magresulta sa pagbalobagi, si Pablo nagtaram kontra sa nagkapirang tsismosa. Pakatapos na maunabihan an mga babaeng balo na kualipikado para sa tabang kan kongregasyon, nasambitan nia an mga babaeng balo na nakanood na “magtukawtukaw, na namamasyar sa mga harong; iyo, bako sanang magtukawtukaw, kundi siring man mga tsismosa asin parapakilabot sa gibo nin iba, na  nag-oorolay sa mga bagay na dai dapat.” (1 Timoteo 5:11-15) Kun manompongan nin sarong Kristiana na may kaluyahan sia sa klase nin orolay na puedeng magresulta sa pagbalobagi, marahay na himateon nia an hatol ni Pablo na magin “pormal, bakong parabalobagi.” (1 Timoteo 3:11) Siempre, an Kristianong mga lalaki dapat man na magmaan sa nakararaot na tsismis.​—Talinhaga 10:19.

Dai Kamo Maghokom!

17, 18. (a) Ano an sinabi ni Jesus manongod sa paghokom sa satong mga tugang? (b) Paano niato ikaaaplikar an mga tataramon ni Jesus manongod sa paghokom?

¹⁷ Dawa kun mayo kitang binabalobagi, tibaad kaipuhan kitang gumibo nin odok na pagmamaigot na likayan an pagigin mapaghokom. Kinondenar ni Jesus an siring na espiritu kan sia magsabi: “Dai na kamo maghokom tanganing dai man kamo hokoman; huli ta an paghokom na ihinohokom nindo, iyo man an ihohokom sa saindo; asin an sokol na isinosokol nindo, iyo man an isosokol ninda sa saindo. Kun siring, taano ta naheheling mo an dagami sa mata kan saimong tugang, alagad dai mo hinohorophorop an pasagi na nasa sadiri mong mata? O paano mo masasabi sa saimong tugang, ‘Togoti akong haleon an dagami sa saimong mata’; mantang, uya! may pasagi sa saimo mismong mata? Parasaginsagin! Haleon mo nguna an pasagi sa saimong sadiring mata, dangan malinaw mong maheheling kun paano hahaleon an dagami sa mata kan saimong tugang.”​—Mateo 7:1-5.

¹⁸ Dai kita maninigong mangahas na mag-alok na haleon an sadit na “dagami” sa mata kan satong tugang tanganing tabangan sia mantang an sato mismong kakayahan na magtao nin tamang paghokom naoolang nin sarong piguratibong “pasagi.” An totoo, kun talagang nasasabotan niato kun gurano kamaheherakon an Dios, dai kita magigin mahilig na maghokom sa satong mga tugang sa espirituwal. Paano niato mahihimong masabotan sinda nin siring kan pakasabot sa sainda kan satong langitnon na Ama? Bakong makangangalas na pinatanidan kita ni Jesus na ‘dai na maghokom tanganing dai man kita hokoman’! An sadiosan na pag-ebalwar sa sato mismong mga pagkabakong sangkap dapat na makapogol sa sato sa paggibo nin paghokom na ibibilang nin Dios na bakong matanos.

Matapo Alagad May Onra

19. Paano niato maninigong mansayon an mga kapagtubod?

¹⁹ Kun determinado kitang maglingkod sa Dios nin daramay kaiba kan mga kapagtubod, dai sana kita malikay na magin mapaghokom. Mangengenot kita sa pagpaheling sa sainda nin onra. (Roma 12:10) An totoo, hahanapon niato an bentaha ninda,  bakong an sato, asin magayagayang gigibohon an hamak na mga gibohon para sa sainda. (Juan 13:12-17; 1 Corinto 10:24) Paano niato mapagdadanay an siring karahay na espiritu? Paagi sa paggirumdom na an balang may pagtubod mahalagang marhay ki Jehova asin na kaipuhan niato an lambang saro, kun paanong an balang kabtang kan hawak nin tawo nagsasarig sa ibang mga kabtang.​—1 Corinto 12:14-27.

20, 21. Ano an kahulogan para sa sato kan mga tataramon sa 2 Timoteo 2:​20, 21?

²⁰ Totoo, an mga Kristiano matapong mga lalagan na dalipay na pinaniwalaan kan mamuraway na kayamanan kan ministeryo. (2 Corinto 4:7) Tanganing magibo niato an sagradong aktibidad na ini sa kaomawan ni Jehova, dapat niatong papagdanayon an may onrang kamugtakan sa atubangan nia asin kan saiyang Aki. Solamente paagi sa pagdadanay na dalisay sa moral asin espirituwal na kita makapagdadanay na may onrang lalagan na magagamit nin Dios. Sa bagay na ini, si Pablo nagsurat: “Sa sarong dakulang harong igwa nin mga lalagan na bako sanang bulawan asin pirak kundi pati kahoy asin dalipay, asin an nagkapira para sa katuyohan na may onra alagad an iba man para sa katuyohan na mayong onra. Kun siring, kun an siisay man lumikay sa mga nahuhuri, sia magigin lalagan para sa sarong katuyohan na may onra, sinantipikar, nagagamit kan saiyang kagsadiri, andam para sa lambang marahay na gibo.”​—2 Timoteo 2:​20, 21.

²¹ An mga indibiduwal na dai minagawe kaoyon kan mga kahagadan nin Dios ‘mga lalagan na mayong onra.’ Minsan siring, paagi sa paglakaw sa diosnon na dalan kita magigin ‘mga lalagan para sa sarong katuyohan na may onra, sinantipikar, o isiniblag, para sa paglilingkod ki Jehova asin andam para sa lambang marahay na gibo.’ Kaya ikahahapot niato sa satong sadiri: ‘Ako daw sarong “lalagan na may onra”? Ako daw marahay na impluwensia sa mga kapagtubod? Ako daw sarong miembro kan kongregasyon na naglilingkod na kadamay kan mga kapwa parasamba?’

Padagos na Maglingkod nin Daramay

22. Sa ano ikakokomparar an Kristianong kongregasyon?

²² An Kristianong kongregasyon sarong areglo na garo pamilya. Igwa nin mamomoton, nagtitinabangan, asin nakaoogmang kamugtakan sa sarong pamilya kun an gabos na miembro kaiyan nagsasamba ki Jehova. An sarong pamilya puedeng kompuesto nin dakol na indibiduwal na laen-laen an personalidad, alagad an gabos igwa nin kabtang na may onra. Arog man kaiyan an situwasyon sa kongregasyon. Minsan ngani kita gabos magkakalaen​—asin bakong sangkap​—dinagka kita nin Dios sa saiya paagi ki Cristo. (Juan 6:44; 14:6) Namomotan kita ni Jehova asin ni Jesus, asin siring sa nagkakasararong pamilya, kaipuhan nanggad niatong magpaheling nin pagkamoot sa lambang saro.​—1 Juan 4:7-11.

23. Ano an maninigo na girumdomon niato asin magin determinado kitang gibohon?

²³ An garo pamilyang Kristianong kongregasyon saro man na lugar na dian tama sanang asahan niato na manompongan an kaimbodan. Si apostol Pablo nagsurat: “Sakuyang minamawot na sa lambang lugar an mga lalaki magpadagos sa pamimibi, na nag-iitaas nin maimbod na mga kamot, na dai nin grabeng kaanggotan asin mga debate.” (1 Timoteo 2:8) Sa siring an kaimbodan ikinonektar ni Pablo sa pampublikong pamibi “sa lambang lugar” na pinagtitiriponan nin mga Kristiano. Solamente an maimbod na mga lalaki an maninigong magrepresentar sa kongregasyon sa pampublikong pamibi. Siempre, inaasahan nin Dios na kita gabos magin maimbod sa saiya asin sa lambang saro. (Eclesiastes 12:​13, 14) Kun siring, magin determinado kita na magtarabangan na may pagkaoroyon, arog kan mga kabtang kan hawak nin tawo. Logod na maglingkod man kita na nagkakasararo bilang kabtang kan pamilya nin mga parasamba ki Jehova. Orog sa gabos, girumdomon niato na kaipuhan niato an lambang saro asin na kakamtan niato an pag-oyon asin mga bendisyon nin Dios kun kita padagos na maglilingkod ki Jehova nin daramay.

Ano an Isisimbag Nindo?

• Ano an nagpapangyari sa banwaan ni Jehova na makapaglingkod sa saiya nin daramay?

• Taano ta linilikayan nin mga Kristiano an pagpaorog?

• Ano an masasabi nindong sala sa paggumodgumod?

• Taano ta maninigo niatong tawan nin onra an mga kapagtubod?

[Mga Hapot Para sa Pag-adal]

[Ritrato sa pahina 15]

Nakaiisi si Pedro na “an Dios daing ipinaoorog”

[Ritrato sa pahina 16]

Aram daw nindo kun taano ta sinupog nin Dios si Miriam?

[Ritrato sa pahina 18]

An maimbod na mga Kristiano magayagayang naglilingkod ki Jehova nin daramay