Mga Hapot Hale sa mga Parabasa

Maninigo daw niatong ikonklusyon basado sa Kapahayagan 20:8 na kadakol kan tawo na malalagalag ni Satanas sa pangultimong pagbalo?

Ilinaladawan kan Kapahayagan 20:8 an pangultimong pagsalakay ni Satanas sa mga tawo na nabubuhay sa daga sa katapusan kan sangribong taon na pamamahala kan Mesiyanikong Kahadean. Nagtataram dapit ki Satanas, an bersikulo nagsasabi: “Sia maluwas tanganing ilagalag an mga nasyon sa apat na kanto kan daga, ki Gog asin Magog, tanganing tiriponon sinda para sa ralaban. An kabilangan kan mga ini siring kadakol kan mga baybay kan dagat.”

Apisar kan mga pag-oswag sa sientipikong mga pamamaagi asin paggamit nin mga instrumento, dai pa man giraray maaraman an kadakolan o kabilangan kan “mga baybay kan dagat.” Sa siring, masasabi na an pananaram na iyan nagrerepresentar sa dai aram, dai madeterminaran na kabilangan. Alagad nagpaparisa daw iyan nin labi-labi kadakulang kabilangan, o iyan daw kabilangan sana na dai aram pero awad-awad, o darudakula?

Sa Biblia, an pananaram na “mga baybay kan dagat” ginagamit sa dakol na paagi. Halimbawa, sa Genesis 41:​49, mababasa niato: “Si Jose nagpadagos na magtipon nin trigo na labi-labi kadakol, arog kan mga baybay kan dagat, sagkod na sa katapustapusi nagpondo na sinda sa pagbilang kaiyan, huli ta idto dai nin kabilangan.” An idinodoon digdi iyo an pagigin dai mabilang kaiyan. Siring man, si Jehova nagsabi: “Kun paanong an hukbo kan kalangitan dai mabibilang, ni masosokol man an mga baybay kan dagat, siring man padadakulon ko an banhi ni David na sakuyang lingkod.” Kun paanong seguradong dai mabibilang an mga bitoon sa langit asin an mga baybay kan dagat, siring man kaseguradong ootobon ni Jehova an saiyang panuga ki David.​—Jeremias 33:22.

Sa parate an pananaram na “arog kan mga baybay na yaon sa baybayon” nanonongod sa sarong bagay na darudakula asin nakagugulat an kadakolan o kadakulaan. An mga Israelita sa Gilgal nahandal na marhay sa hukbo kan mga Filisteo na nagkatiripon sa Micmas, na “arog kan mga baybay na yaon sa baybayon huli sa kadakolan.” (1 Samuel 13:​5, 6; Hokom 7:12) Asin “an Dios padagos na nagtao ki Salomon nin dakulaon na kadonongan asin pakasabot asin kahiwasan nin puso, arog kan mga baybay na yaon sa baybayon.” (1 Hade 4:29) Minsan ngani darudakula an pinanonongdan kan sinasabi sa kada pangyayaring iyan, iyan limitado pa man giraray.

An “mga baybay kan dagat” puede man na magrepresentar sa dai aram na kabilangan, na dai isinusuherir an pagigin labi-labi kadakol kaiyan. Sinabi ni Jehova ki Abraham: “Padadakolon ko nanggad an saimong banhi siring kan mga bitoon sa kalangitan asin siring kan mga baybay sa baybayon.” (Genesis 22:17) Sa pag-otro kan panugang ini sa makoapo ni Abraham na si Jacob, ginamit ni Jehova an pananaram na “kabokabo kan daga,” na sinambit giraray ni Jacob na “mga baybay sa dagat.” (Genesis 28:14; 32:12) Siring kan nangyari, apuera ki Jesu-Cristo, an “banhi” ni Abraham may kabilangan na 144,000, na inapod ni Jesus na “sadangoton na aripompon.”​—Lucas 12:32; Galacia 3:​16, 29; Kapahayagan 7:4; 14:​1, 3.

Ano an manonodan niato sa mga halimbawang ini? Na an pananaram na “siring kadakol kan mga baybay kan dagat” dai man pirmeng nangangahulogan nin labi-labi kadakulang kabilangan; ni pirme iyan na ginagamit sa paglaladawan sa sarong bagay na grabe kadakula an sokol. Sa parate nagrerepresentar iyan sa sarong kabilangan na dai aram alagad darudakula. Sa siring, rasonableng tumubod na an rebeldeng kadaklan na masuportar ki Satanas sa saiyang pangultimong pagsalakay sa banwaan nin Dios magigin, bakong labi-labi kadakol, kundi dakol-dakol asin igo an kadakolan tanganing magin sarong huma. Minsan siring, an kabilangan nagdadanay na dai aram sa ngonyan.